09 ශ්‍රේණිය.pdf

මෙම ග්‍රන්ථය ශ්‍රී ලංකා බෞද්ධ කටයුතු දෙපාර්තමේන්තුව මඟින් දහම් පාසල් සිසුන් උදෙසා සම්පාදනය කොට නොමිලයේ බෙදාහරින ලද 9 වන ශ්‍රේණිය සඳහා වූ නිල ධර්ම පාසල් පෙළපොතයි.

ගරුතර මහා සංඝරත්නය ඇතුළු විද්වත් මණ්ඩලයක උපදේශකත්වයෙන් යුතුව සම්පාදිත මෙම කෘතිය කොටස් දෙකකින් සමන්විත වන අතර, බුද්ධ චරිතය, ශ්‍රාවක ශ්‍රාවිකා චරිත, ශ්‍රී ලාංකික බෞද්ධ චරිත, ජාතක කථා, මූලික ධර්ම කරුණු (ත්‍රිලක්ෂණය, චතුරාර්ය සත්‍යය, කර්මය ආදිය), සූත්‍ර ධර්ම, ආචාර ධර්ම, බෞද්ධ කලා ශිල්ප මෙන්ම පාලි සහ අභිධර්මය හා භාවනා පිළිබඳ මූලික පාඩම් ද මෙහි අන්තර්ගත වේ.

මේ වචන ටික ගුරු භවතුන්ටයි

සමස්ත දහම් පාසල් ක්‍රියාවලියේ ම අරමුණ තමා සහ තමා අවට පරිසරය පිළිබඳ නිවැරදි අවබෝධයක් ඇති, එම අවබෝධයට අනුව හැසිරෙන හා එසේ හැසිරීමේ ප්‍රතිඵල අත්දකින පිරිසක් බිහිවීම යි. ගුරු භවතකු වශයෙන් ඔබ කරන්නේ එම උදාර අරමුණ ඉටු කර ගැනීමට ඔබට හැකි පමණින් දායක වීම යි.

අටවන ශ්‍රේණියේ දරු දැරියන් ගේ කලණ මිතුරකු ලෙස ඔබට මඟ පෙන්වීමට ලැබීම ඔබේ ද භාග්‍යයකි. මෙම ශ්‍රේණියෙහි සිටින්නේ දිනපතා පාසලේ නවවන වසරේ ඉගෙනුම ලබන ශිෂ්‍ය ශිෂ්‍යාවන් ය. එනම් සාමාන්‍යයෙන් දහතුන්වන වියට පා තබා සිටින දරු දැරියන් ය. ඔවුන්ගේ මානසික තත්ත්වය පිළිබඳව යම් ප්‍රමාණයක හෝ අවබෝධයක් ඇතිව මෙම පාඨ ග්‍රන්ථය ඉගැන්වීමෙන් ඔබේ ගුරු සේවය වඩාත් සාර්ථක වනු ඇත.

දහම් පාසලේ 5, 6, 7, ශ්‍රේණි සඳහා වූ අභිනව පාඨ ග්‍රන්ථයන්හි ගුරු භවතුන්ගේ අවධානයට යොමු කර ඇති කරුණුත්, බෞද්ධ කටයුතු දෙපාර්තමේන්තුව විසින් ප්‍රකාශිත “දහම් පාසලින් සදාචාර සමාජයක්” යන කෘතියත් ඔබට නැවත කියවාගත හැකිනම් ඉතා මැනවි.

මෙම පොතෙහි පළමු කොටසේ පාඩම් සැකසී තිබෙන්නේ ඒකක නවයක් යටතේ ය. ඒ සෑම ඒකකයකින් ම බලාපොරොත්තු වන්නේ බෞද්ධ දරුවකුට අවශ්‍ය කරන දැනුම ලබා දී, මිනිස්කමට වුවමනා කරන ගුණ දහම් හඳුන්වා දී ඒවා පිළිපැදීමට යොමු කරවීම යි.

මීට ඉහත ශ්‍රේණි වලදී ද අවධාරණය කර ඇති පරිදි සිසු දරු දැරියන්ට විෂය කරුණු කියා දීම පමණක් ප්‍රමාණවත් නොවේ, ශිෂ්‍ය චර්යාවේ යහපත් වෙනසකට අවශ්‍ය පදනම සකස් වන අයුරු පාඩම් ගොඩ නැඟීම අවශ්‍ය ය.

බුද්ධ චරිතය ඉගෙන ගන්නා දරුවා තුළ බුදුරජාණන් වහන්සේ ගේ ශ්‍රේෂ්ඨත්වය පිළිබඳ හැඟීම් ජනිත වන ලෙසත් තම ජීවිතයට බුද්ධ චරිතයෙන් ආදර්ශ ගැනීමට පෙළඹෙන ලෙසත් පාඩම් ගොඩ නැඟිය යුතු වේ.

චරිත කථා හා ජාතක කථා ඉගැන්වීමෙන් බලාපොරොත්තු වන්නේ ශ්‍රේෂ්ඨ චරිත හඳුනාගෙන ඒවා ආදර්ශයට ගන්නා බෞද්ධ දරුවකු වීමට මඟ පෙන්වීම යි. එසේ ම කිසියම් චරිතයක දුබලතා තිබේනම් ඒවා බැහැර කිරීමේ ඇති වටිනාකම පිළිබඳ හැඟීම් ජනිත කරවීමයි. එබැවින් ඒ ඒ චරිතවල දක්නට ලැබෙන සුවිශේෂ ලක්ෂණ මතුවන ආකාරයට එම පාඩම් ඉගැන්වීම අවශ්‍ය ය.

බුදුදහමේ අනන්‍යතාව හා එහි ශ්‍රේෂ්ඨත්වය වටහා ගැනීමට මූලික බෞද්ධ ඉගැන්වීම් පිළිබඳ නිවැරදි අවබෝධයක් බෞද්ධ දරු දැරියන්ට තිබිය යුතු ය. එම දැනුම ලබාගැනීමටත් ඒ අනුව ජීවිතය හා ලෝකය දෙස නිවැරදිව බැලීමට හා නිවැරදිව ක්‍රියා කිරීමටත් මඟ පෙන්වීම ධර්ම කරුණු ඉගැන්වීමේ සුවිශේෂ අරමුණ බව සැලකිය යුතු ය.

ගාථා, දහම් කවි හා සූත්‍රධර්මවලින් ලබාදෙන ජීවන ආදර්ශ වලට අමතරව ඒවා නිවැරදිව උච්චාරණය කිරීමේ හා තාලයකට ගායනා කිරීමේ කුසලතාව ලබා දීමත් බලාපොරොත්තු වන බව එම පාඩම් ඉගැන්වීමේදී සැලකිල්ලට ගැනීම අවශ්‍ය ය.

බෞද්ධ ආචාරධර්ම ඉගෙන ගන්නා දරුවා බෞද්ධ නොවන සිරිත් විරිත් වලින් බෞද්ධ සිරිත් විරිත් වෙන්කර හඳුනා ගැනීමේ හැකියාව ඇති ඒවා අගය කරන අයකු වීම බලාපොරොත්තු වෙයි. එසේම එම ආචාර ධර්ම ඇසුරෙන් සමාජ අභිවෘද්ධි ලක්ෂණ හැඳින ඒවා ප්‍රගුණ කිරීමටත් සමාජ පරිහානි ලක්ෂණ හැඳින ඒවායින් බැහැරවීමටත් පෙලඹීමක් ඇති විය යුතු ය.

කලාශිල්ප පාඩම්වලින් විශේෂයෙන් බලාපොරොත්තු වන්නේ අපේ බෞද්ධ සංස්කෘතික උරුම හඳුනාගෙන ඒවා අගය කරන හා ආරක්ෂා කරන දරු පිරිසක් සමාජය තුළ බිහිවනු දැකීම යි.

ඉහත කී අරමුණු හිතේ තබාගෙන 5, 6, 7 ශ්‍රේණි පාඨග්‍රන්ථ වලදී අවධාරණය කළ කරුණු ද සැලකිල්ලට ගෙන ඉගැන්වීම් ක්‍රියාවලියට සම්බන්ධ වුවහොත් දැනුමෙන් පොහොසත්, හැඟුමෙන් අර්ථවත්, ආදර්ශවත් චරණයෙන් අලංකාර වූ දරු පිරිසක් බිහිකර ගැනීමට ඔබ කැප වූ ප්‍රමාණය ගැන සිතා ඔබට ම සතුටුවිය හැකිවනු ඇත.

මෙම පාඨග්‍රන්ථය පිළිබඳ ඔබේ අදහස් බෞද්ධ කටයුතු දෙපාර්තමේන්තුව වෙත යොමු කරන්නේ නම් මැනවි.

ගන්තුනේ අස්සජී හිමි.