මුලුසික සන්නය 1887.pdf

මූලසික සන්නය යනු විනය පිටකයේ භික්ෂු ශික්ෂාපද සංග්‍රහයක් වන පාලි ‘මූලසික්ඛා’ නම් ප්‍රකරණය සඳහා සම්පාදනය කරන ලද අගනා සිංහල සන්න ග්‍රන්ථයකි. රාමඤ්ඤ නිකායික දශවර්ගික කාරක සභාවට ඇතුළත් වූ මාතර ශ්‍රී සද්ධර්මාවතංස ඤාණිස්සභ තෙරුන්වහන්සේ විසින් මෙය සකස් කර ඇත.

පැරණි මූලසික සන්නයෙහි පැවති අක්‍ෂර විපර්යාස, දුරවබෝධ එළු වදන් සහ ගැටලු මඟහරවා ගනිමින්, පාලි ටීකා සහ බුරුම පොත්පත් ආශ්‍රයෙන් ආධුනික භික්ෂූන්ට මැනවින් විනය ශික්ෂාපද තේරුම්ගත හැකි වන පරිදි මෙම සන්නය සම්පාදනය කර තිබේ. පාරාජිකා, සංඝාදිසේස, නිස්සග්ගිය, පාචිත්තිය, පකිණ්ණක සහ වත්තාදිකණ්ඩ යන විනය කරුණු මෙහි විස්තර කෙරේ.

මෙම කෘතිය වැලිගම පළාතේ විවාහ රෙජිස්ට්‍රාර් දොන් අන්ද්‍රියස් නුදාවේ පතිනගුණවර්ධන මුහන්දිරම් මැතිතුමා වෙත පිළිගන්වා ඇති අතර, ඇස්. ඒ. ඉසඩ්. සිරිවර්ධන සහ කරොලිස්ද සිල්වා යන මහතුන් විසින් බු.ව. 2431 (ක්‍රි.ව. 1887) දී ගාල්ලේදී මුද්‍රණය කරවා ප්‍රසිද්ධ කර ඇත.

විඥාපනය.

මූලසික්ඛා ප්‍රකරණයෙහි පාරාජිකා, සංඝාදිසේස, නිස්සග්ගිය, පාචිත්තිය, පකිණ්ණක සහ වත්තාදිකණ්ඩ යන පරිච්ඡේදයන් අන්තර්ගත වන බව කතුවරයා දක්වයි. භික්ෂූන්ට විනය ශික්ෂාපද පහසුවෙන් මතක තබාගත හැකි පරිදි පද්‍යයෙන් සකස් කළ මෙම ග්‍රන්ථය ආධුනිකයන්ගේ ධාරණයට බෙහෙවින් උපකාරී වේ. මෙම කෘතිය සඳහා ටීකා දෙකක් හා පුරාණ සන්නයක් පැවතිය ද, එම සන්නයෙහි අක්‍ෂර සහ අර්ථ බොහෝ තැන්වල විසම බවත්, ඇතැම් වචන ග්‍රන්ථාරූඪ සිංහලයෙන් තොරව අප්‍රකට එළු බසින් යුක්ත බවත් පෙන්වා දෙයි. එබැවින් ධර්ම ශාස්ත්‍රෝන්නතිය පතන ආධුනිකයන්ගේ පහසු අවබෝධය පිණිස පුරාණ හා අභිනව ටීකාවල ආභාෂය ද ගනිමින්, බුරුම පොත්වලින් ලැබුණු පාඨ හා ශ්ලෝක සංසන්දනය කර මෙම සන්නය අලුතින් සම්පාදනය කරන ලදී. මෙහි එන සමහර ගාථාවන් සහ ප්‍රකරණ කොටස් ලංකාවේ පැරණි පොත්වල දක්නට නොලැබෙන බැවින් ඒ සියල්ල සලකා බලා මෙම සංස්කරණය පිළියෙල කර ඇත. කිසියම් දෝෂයක් වෙතොත් විද්වතුන් විසින් සංශෝධනය කරගන්නා ලෙස ද දන්වා සිටියි.

වර්ෂ 1887ක්වූ ජුනිමස 20 වෙනිදින ගාල්ලේදීය.