සිතියම් සහිත සිංහල ථූපවංශය - ගලගම සරණංකර හිමි 1955.pdf
- කතෘ :
- පරාක්‍රම පණ්ඩිත
- ප්‍රකාශිත වර්ෂය :
- 1955
- මුද්‍රිත වර්ෂය :
- 1955
- පිටු ගණන :
- 267
- බාගත කිරීම් ගණන :
- 6,174
- වෙබ් අඩවියට එක් කළ දිනය :
- 2021-01-02
- ගොනුවේ ප්‍රමාණය :
- 77 MB
පොතේ පිටු කිහිපයක ඡායාරූප පහතින් බලන්න.
සකල විද්‍යාවක්‍රවර්ති පරාක්‍රම පණ්ඩිතයන් විසින් රචිත සිංහල ථූපවංසය දුටුගැමුණු මහරජතුමන් විසින් කරවන ලද රත්නමාලී මහා චෛත්‍ය රාජයාණන්ගේ (රුවන්වැලිසෑයේ) ඉතිහාසය විස්තර කෙරෙන සම්භාව්‍ය ග්‍රන්ථයකි. මෙහි මුල බුද්ධ චරිතය, දීපංකර පාදමූලයේ පටන් විවරණ ලැබීම, දස පාරමිතා වර්ණනාව සහ මාර පරාජය ආදිය මනරම් බසින් විස්තර කර ඇත.
මෙම සංස්කරණය විද්‍යොදය පිරිවෙණෙහි ආචාර්ය ගලගම පණ්ඩිත සරණංකර ස්ථවිරයන් වහන්සේ විසින් සංශෝධනය කොට දුෂ්කර ගැටපද විවරණ සහිතව සකස් කරන ලද්දකි. වැලිවිටියේ ශ්‍රී සොරත නායක ස්ථවිරයන්ගේ සංඥාපනයක් සහ සිතියම් හා චිත්‍ර ද මෙහි ඇතුළත් වේ.
බු. ව. 2498 (ක්‍රි. ව. 1955) දී කොළඹ පිටකොටුවේ රත්නාකර පොත් වෙළඳ ශාලාව මඟින් සීමාසහිත රත්නාකර යන්ත්‍රාලයෙහි මුද්‍රණය කරවා ප්‍රකාශයට පත් කර ඇත.
සංඥාපනය
දුටුගැමුණුමහරජතුමා විසින් අනුරාධපුරයෙහි කරවන ලද රුවන්වැලිසෑය පිළිබඳ ඉතිහාසය පවසන ‘ථූපවංස’ නම් වූ මේ ග්‍රන්ථය සකල විද්‍යාවක්‍රවර්තී පරාක්‍රමපණ්ඩිත නම් උගතෙකු විසින් රචනා කරණ ලද්දෙකි.
මෙ පඬිවරයා හා බුත්සරණ කළ විද්‍යාචක්‍රවර්තීන් එක් කෙනෙක් ම යයි මීට කලකට පෙර අප අදහස වූ නමුත් ඒ අදහස වැරදි බව කියන්ට දැන් කරුණු තිබේ.
බුත්සරණෙහි භාෂාව හා වෙනත් කරුණුත් පරීක්ෂා කළ විට පෙනෙන්නේ එය පොළොන්නරු කාලයට අයත් ය යන බව ය. ථූපවංසයෙහි සමහර තැන බුත්සරණින් ගෙණ යෙදූ පාඨ තිබෙන නමුත් එය කුරුණෑගල කාලයට අයත් බව එහි තිබෙන ද්විත්වවන බහුල වූ භාෂාවෙන් ඔප්පු වේ. මෙහි පෙනෙන ‘මයිලයි’ ආදි සමහර ද්විත්වවන අනික් සිංහල පොතක නැත්තේ ය.
මහාස්තූපය පිළිබඳ ඉතිහාසය ඇතුළත් මෙ පොතෙහි මුල බුද්ධ චරිතය සංක්ෂෙපයෙන් දක්වන ලදී. මාරයුද්ධය මනොරමාකාරයෙන් මෙහි දක්වන ලදී. දශපාරමිතාවන් ශ්‍රොතෲවශයෙන් රූපණය කොට කළ වර්ණනාව අතිශය චමත්කාරජනක ය.
මේ පොත බෞද්ධයන් විසින් බණ පොතක් ලෙස ආදරයෙන් කියවනු ලැබේ. සමහර විට අධ්‍යයන පරීක්ෂණයන් සඳහා ද මෙහි කොටස් නියම කරණු ලැබේ.
සම්පූර්ණ ථූපවංසය දැන් සුලභ නො වේ. එහෙයින් එය නැවතත් මුද්‍රණය කරවා සුලභ කිරීමේ අදහසින් කොළඹ පිටකොටුවේ රත්නාකර පොත් වෙළෙඳශාලාව හිමි ජී. පී. ඩී. හෙන්ද්‍රික් මහතා එය ශුද්ධ කර දෙන ලෙස අපෙන් ඉල්ලා සිටියේ ය. ඒ පිළිබඳ ව යෙදීමට අපට කාලයක් නො මැති හෙයින් ඒ කාර්ය්‍යය විද්‍යොදය පිරිවෙණෙහි ආචාර්ය්‍යවරයෙකු වූ ගලගම පණ්ඩිත සරණංකර ස්ථවිර නමට පැවරිමු. ඒ ස්ථවිර නම විසින් මෙය සකස් කර ඉතා අමාරු ගැටපදයන්ට කුඩා විවරණයක් ද සම්පාදනය කරණ ලදී. මේ පොත කියවන සාමාන්‍ය බෞද්ධයන්ට ඒ ගැටපද විවරණය ප්‍රයෝජනවත් විය හැකි ය. තවත් දුර්බෝධ වචන මෙහි ඇතොත් ඒ වචන අප විසින් සම්පාදනය කළ ශ්‍රී සුමංගල ශබ්දකොෂයෙන් තේරුම් ගත හැකි බව කියමු. ඒ ශබ්දකොෂයෙහි දෙවෙනි කාණ්ඩය තවත් මාස කිපයකින් ප්‍රකාශ කරන්ට බලාපොරොත්තු වෙමු. එයින් ශබ්දකොෂය සම්පූර්ණ වේ.
වැලිවිටියේ සොරත නායක ස්ථවිර
මීට,
වැලිවිටියේ සොරත නායක ස්ථවිර
බු. ව. 2498
ක්‍රි. ව. 1955 මාර්තු මස 20 වන දින දීය.