බාලාවතාර සුගණ්ඨිසාරය - කහාවේ රතනසාර හිමි 1905.pdf
- කතෘ :
- පුරාණ වෛය්‍යාකරණ නෛයායිකාවාචාර්යවරයෙක්
- ප්‍රකාශිත වර්ෂය :
- 1905
- මුද්‍රිත වර්ෂය :
- 1905
- පිටු ගණන :
- 107
- බාගත කිරීම් ගණන :
- 793
- වෙබ් අඩවියට එක් කළ දිනය :
- 2021-01-02
- ගොනුවේ ප්‍රමාණය :
- 19 MB
පොතේ පිටු කිහිපයක ඡායාරූප පහතින් බලන්න.
බාලාවතාර සුගණ්ඨිසාරය යනු පාලි බාලාවතාර ව්‍යාකරණ ග්‍රන්ථයේ එන ගැටපද හා දුරවබෝධ තැන් විවරණය කරමින් සම්පාදනය කරන ලද පැරණි ගැටපද විවරණ (සුගණ්ඨි) ග්‍රන්ථයකි. මෙහි මුල් කතුවරයාණන් පැරණි වෛය්‍යාකරණ නෛයායික ආචාර්යවරයෙකු බව හැර නිශ්චිත නාමයක් සඳහන් නොවේ.
බාලාවතාරය හදාරන ශිෂ්‍යයන්ගේ ප්‍රයෝජනය තකා, ලේඛක ප්‍රමාද දෝෂ දුරුකොට සංශෝධනය කරමින් සකස් කරන ලද්දේ විද්‍යෝදය පිරිවෙනේ උපාචාර්ය කහාවේ රතනසාර ස්වාමීන් වහන්සේ විසිනි. පසුව එය විද්‍යෝදය පරිවේණාධිපති අතිපූජ්‍ය හික්කඩුවේ ශ්‍රී සුමංගල නාහිමියන්ගේ අනුදැනුම හා උපප්‍රධානාචාර්ය මහගොඩ ඥානේශ්වර ස්ථවිරයන් වහන්සේගේ අවසාන ශුද්ධිපත්‍ර පරිශීලනය සහිතව පිළිගෙන තිබේ.
මෙම කෘතිය 1905 වර්ෂයේදී වැල්ලම්පිටියේ විද්‍යාසාගර යන්ත්‍රාලයේදී ඇන්. ජේ. කූරේ සහ ඩබ්ලිව්. එච්. තෙමානිස් යන මහතුන් විසින් මුද්‍රණය කරවා ප්‍රකාශයට පත් කරන ලදී.
සංඥාපනය
බාලාවතාර සුගණ්ඨිසාර නම්වූ මේ ග්‍රන්ථය වනාහි අසවල් කාලයෙහි අසවල් නම් ඇත්තහු විසින් කරණලද්දේදැයි පරම්පරා කථා දියකින් හෝ පොතපතින් හෝ අපට අසන්ට දකින්ට නොලැබුණේය, එහෙත් මෙය මාගධව්‍යාකරණාභිවාචතරණයෙහි මහෝපකාරීවූ බාලාවතාරාභිධාන ප්‍රශස්ත ව්‍යාකරණයෙහි හා තදනුසාරි අන්‍යග්‍රන්ථයන්හිද මහත් පටුත්වයක් ඇති මහෝත්තමයෙක් විසින් කරණලද්දක්බව තත්ප්‍රතිපාදිත පදසිද්ධි වර්ණනාදියෙන්ම මොනවට වැටහේ, මෙහි බොහෝතන්හි සංස්කෘත පොත්වලින් නිදර්ශන උපදෙශද විද්‍යමානවේ, මෙවූකලි බාලාවතාරයෙහි විද්‍යමාන බොහෝ ග්‍රන්ථිස්ථාන ලිහිල්කොට අරුත් බිණීමෙන් හා මූලග්‍රන්ථයෙහි පදවිභාග ක්‍රියාසම්බන්ධ චොදනාපරිහාරාදි නානාවිධ ව්‍යාකරණවිධි දක්වා විස්තරකිරීමෙන්ද, සන්ධියෙහි මූලපතන් කෘදන්තාවසානය දක්වා ආධුනිකයන්ට සුඛාවබොධපරිද්දෙන් වැඩිවිස්තර හැර ඒ ඒ තන්හි ඉතාමත් උපමනා යුතුපමණක් දක්වා පදසිද්ධි කිරීමෙන්ද, නාම ඛණ්ඩයෙහි ඒ ඒ ශබ්දවල පදමාලාවෙදීමෙන්ද මොනවට සරසා තිබේ. නුමුත් මෙහි කාරකය සම්බන්ධ වර්ණනාදියක් නොමැත්තේය, ඒ පදසිද්ධි පරමාභ්‍යාසයෙන් කරණලද්දක් බැවින්යයි හඟිමු.
තවද බොහෝ ටීකාතැනක සඟවාගෙණ තුබුන මේපොත බාලාවතාරය ඉගෙනගන්නවුන්ට පහසුවෙන් පදසිද්ධි ග්‍රන්ථිස්ථානාදිය දැන ගැනීමට මහෝපකාර බැවින් මුද්‍රණයකරවා ප්‍රසිද්ධකිරීම යෝග්‍යයයි කීපදෙනෙකුගේ අයැදුමෙන් උක්තානුක්ත භෙදයෙහිද බොහෝ තැන් ආධුනිකයන්ට දුරවබොධබැවින් සුවසේ දතහැකිපරිද්දෙන් මුළින් භාවකථාමාත්‍රයක් ලියා ඇතුළත්කොට විද්‍යොදයපරිවෙණාධිපති ත්‍රිපිටක වාගීශ්වරාචාර්ය හික්කඩුවේ ශ්‍රීසුමංගලාභිධාන ප්‍රධාන සංඝනායක ස්ථවිර ස්වාමිපාදයන්වහන්සේගේ ධර්මාඥානෙවාසිකවූද, ගනේගම විහාරාධිපති වේරගොඩ සොභිතානන්ද ස්ථවිර ස්වාමිපාදයන් වහන්සේගේ ශිෂ්‍යවූද, විද්‍යොදයපිරිවෙණෙහි උපාචාර්ය කහාවේ රතනසාර නමැති මාවිසින් ලෙඛකප්‍රමාදාදීන් සඤ්ජාත දොෂනිරාකරණයෙන් සංශොධනය කරණලදී.
මාගේ ආවාසස්ථානම කෙනෙක්වූ විද්‍යොදය පිරිවෙණේ උප ප්‍රධානභූත මහගොඩ ඥානෙශ්වර ස්ථවිරස්වාමිපාදයන් වහන්සේ විසින් අවශාන ශුද්ධිපත්‍රාවලොකනයෙන් පිළිගන්නාලදී.
තවද මෙහි 1 පිටේ 19 පෙලේ “පාවාපී” යන්න “පවාපී” කියාද, 3 පිටේ 7 පෙලේ “කාදන්තො” යනු “සමාසාන්තො” කියාද, 5 පිටේ 7 පෙලේ “ආකාරව” යනු “ආකාරච” කියාද, 35 පිටේ 21 පෙලේ “එවං” යන්න “එවං” කියාද, 48 පිටේ 1 පෙලේ “රුක්ඛ” යන්න “රුපං” කියාද, 72 පිටේ 2 පෙලේ “පුත්තයොව” යන්න “පුත්තයෙව” කියාද, 73 පිටේ 16 පෙලේ “මනත්‍යසහිත” යන්න “නත්‍යසහිත” කියාද, 76 පිටේ 16 පෙලේ “තෙසංණොලොපංච” යන්න “තෙසං ණොලොපං” කියාද, 79 පිටේ 28 පෙලේ “කර්මාකරණාදිවූ” යන්න “කර්මකරණාදිවූ” කියාද වියයුතුයි, මෙබඳු තවත් සන්දෙහස්ථාන විද්‍යමාන වෙතත් ඉන් ආධුනිකයන්ගේ අවබොධයට බාධානොවන බැවින් මෙහි ශුද්ධිපත්‍රයක් ඇතුළත් කිරීමට අදහස් නොකෙළෙමු, මේ බලන කියන සකල භවතුන්විසින් මෙකී නොකී පුහුදුන්දෙසින්වූ සදොස් තැන් නිදොස්කොට ප්‍රයොජන ගතයුතුයි.
මීට, K. Ratanasara.
විද්‍යොදය පිරිවෙණේ උපාචාර්ය කහාවේ රතනසාර ස්වාමින් වහන්සේලවා ශුද්ධකරවාගෙණ ශුද්ධකරවාගෙණ මෙහිපහත නම් සඳහන්කරණ අපදෙදෙනා විසින් මුද්‍රණයකරවනලද මේපොත නැවත මුද්‍රණයකරවීමේ අයිතිවාසිකමද අපදෙදෙනාටම බැව් සියලුදෙනා විසින් සැලකිය යුතුයි.
N. J. Cooray. W. H. Temanis.
K. Ratanasara. / N. J. Cooray. W. H. Temanis.