පාළිපාඨමඤ්ජරී ප්‍රථම භාගය - කහඳාමෝදර පියරතන හිමි.pdf
- කතෘ :
- කහඳාමෝදර පියරතන හිමි
- ප්‍රකාශිත වර්ෂය :
- 2016
- මුද්‍රිත වර්ෂය :
- 2016
- පිටු ගණන :
- 134
- බාගත කිරීම් ගණන :
- 2,459
- වෙබ් අඩවියට එක් කළ දිනය :
- 2020-11-29
- ගොනුවේ ප්‍රමාණය :
- 46 MB
පොතේ පිටු කිහිපයක ඡායාරූප පහතින් බලන්න.
පාළිපාඨමඤ්ජරී (ප්‍රථම භාගය) යනු ප්‍රාරම්භක මට්ටමේ පාලි ඉගෙනුම ලබන විද්‍යාර්ථීන් වෙනුවෙන් සම්පාදිත ප්‍රාථමික කියවීම් හා අභ්‍යාස පොතකි. මෙය රාජකීය පණ්ඩිත කහඳාමෝදර චන්ද්‍රකීර්ති ශ්‍රී පියරතන ස්වාමීන්ද්‍රයන් වහන්සේ විසින් 1931 දී පළමුවරට සම්පාදනය කරන ලද්දකි.
පාලි භාෂාව මුල සිට හදාරණ ශිෂ්‍යයන්ට ව්‍යාකරණ විභක්ති යෙදුම්, සරල වාක්‍ය හා පාඨ මගින් ක්‍රමානුකූලව භාෂා ඥානය ලබාදීම මෙහි අරමුණයි. විශේෂයෙන් ආධුනිකයන්ගේ පහසුව පිණිස විභක්ති පිළිවෙළින් පාඩම් පෙළගස්වා ඇති අතර, එක් එක් පාඩම අවසානයේ අභ්‍යාස ප්‍රශ්න, පදමාලා සහ පොත අවසානයේ සිංහල-ඉංග්‍රීසි අර්ථ සහිත ශබ්දකෝෂයක් (වචනාර්ථ සූචියක්) ද ඇතුළත් කර තිබේ.
මූලික පිරිවෙන් විෂය නිර්දේශයට ද අයත් වන මෙම දුර්ලභ ග්‍රන්ථය, විද්‍යොදය පිරිවෙණේ ආදිශිෂ්‍ය සංගමය මගින් 2016 දී සමයවර්ධන මුද්‍රණාලය හරහා නවතම මුද්‍රණය ලෙසින් යළි ප්‍රකාශයට පත් කර ඇත.
පෙරවදන
බුදුරජාණන් වහන්සේ විසින් දේශනා කොට වදාළ ශ්‍රී සද්ධර්‍මය ත්‍රිපිටකයෙහි අන්තර්ගත වී ඇත. පාලි භාෂාවෙන් ලියන ලද එම ධර්‍මය පිළිබඳව මනා අවබෝධයක් ලබා ගැනීමට නම් ත්‍රිපිටකයත් එය විස්තර කරමින් ලියා ඇති අටුවා සහ ප්‍රකරණ සාහිත්‍යයත් මැනවින් හදාළ යුතුය. මේ සඳහා පාලි භාෂාව මුල සිට හදාරණ කෙනෙකුට බෙහෙවින් ප්‍රයෝජනවත් වන පරිදි පොත් පත් ලියැවී ඇත්තේ ඉතා ස්වල්පයකි.
කෝට්ටාගොඩ සුදර්ශනාරාම මහා විහාරාධිපතිව හා සෞගතෝදය විද්‍යාලයේ ප්‍රධානාචාර්‍ය්‍යව වැඩ සිට අපවත් වී වදාළ, රාජකීය පණ්ඩිත, ගෞරවාර්භ කහඳාමෝදර චන්ද්‍රකීර්ති ශ්‍රී පියරතන මහාස්වාමීන්ද්‍රයන් වහන්සේ විසින් “පාළිපාඨමඤ්ජරී” නමැති ග්‍රන්ථයෙහි ප්‍රථම භාගය සහ ද්විතීය භාගය ඉතා සරල පාඩමේ සිට ක්‍රමානුකූලව සම්පාදනය කොට ඇත්තේ ආධුනිකයකුට පාලි භාෂාව මුල සිට සරල කථා ඇසුරෙන් ඉතා ඉක්මණින් ඉගෙනගත හැකි වන පරිදිය. මූලික පිරිවෙන්හි නව විෂය නිර්දේශයට ද ඇතුළත් කොට තිබෙන මෙම පොත ඉතා දුර්ලභ හෙයින් විද්‍යාර්ථීන්ට ඉමහත් දුෂ්කරතාවන්ට මුහුණ පෑමට සිදු වී ඇත.
එබැවින් මේ පිළිබඳව අවධානය යොමු කොට විද්‍යොදය පිරිවෙණේ ආදිශිෂ්‍ය සංගමය මගින් එය පුනර්මුද්‍රණය කිරීමට අදහස් කළේ ශිෂ්‍යයන්ට පහසුවෙන් එම පොත ලබාගැනීමට සැලැස්වීමේ අරමුණෙනි. මෙම පොත මුද්‍රණය කිරීමෙන් ලැබෙන කර්තෘභාගය විද්‍යොදය පිරිවෙණේ ආදිශිෂ්‍ය සංගමය මගින් ආරම්භ කොට ඇති ත්‍යාග හා ශිෂ්‍යත්ව අරමුදලට බැර කොට, එහි වාර්ෂික පොළිය “කහඳාමෝදර ශ්‍රී පියරතන නාහිමි අනුස්මරණ පාලි ත්‍යාගය” යන නමින් පාලි විෂයෙන් සාමර්ථ්‍යය ලබන දක්ෂ ශිෂ්‍යයකුට වාර්ෂිකව ප්‍රදානය කිරීමට කටයුතු යොදා ඇත.
මෙම සත්කාර්යය ඉටු කිරීම සඳහා ඉදිරිපත් වූ මාලිගාකන්දේ සමයවර්ධන මුද්‍රණාලය අධිපති, ආරියදාස වීරමන් මහතාට විද්‍යාර්ථීන්ගේ නොමඳ ප්‍රශංසාව හිමි විය යුතු ය.
මෙයට,
ධර්‍මශාස්ත්‍රෝන්නතිකාමී,
ජ්‍යෙෂ්ඨ මහාචාර්‍ය්‍ය පූජ්‍ය වැලමිටියාවේ පියරතන නාහිමි,
ප්‍රධාන ලේකම්,
විද්‍යොදය පිරිවෙණේ ආදිශිෂ්‍ය සංගමය,
විද්‍යොදය පිරිවෙණ,
හික්කඩුවේ ශ්‍රී සුමංගල නාහිමි මාවත,
මාලිගාකන්ද,
කොළඹ 10.
2016. 03. 01
දුරකථනය:- 0171-8301046
සංඥාපනය පාළිපාඨමඤ්ජරී
මෙය වනාහි අතිශය ආයාසයෙන් ලැබිය යුතු වූ, එහෙයින් ම දුලබ වූ, ග්‍රන්ථ කර්තෘත්වය පිළිබඳ හිමිකමක් අනායාසයෙන් හෝ තරමක ආයාසයෙන් ලබා ගැනීමට කළ ප්‍රයාසයක් නො වේ; හුදෙක්, පාළිභාෂාව හදාරන නවීන පංක්තියෙහි ශිෂ්‍යයාගේ කියවීම් පාඩම පිළිබඳ පහසුවක් සැලසීම මෙහි මුඛ්‍යාර්ථය වන්නේ ය.
මාගධී සංඛ්‍යාත පාළිභාෂාව දෙස පාඨශාලා ශිෂ්‍යයා පවා නොදුරු අතීතයට වඩා පැහැැස මෙන් ම මනැසත් යොමා මහත් ඕනෑකමකින් බලන මේ කාලයෙහි නවීන වූත් සුබොධ වූත් ක්‍රමයන් ගෙන් ලක්දිව පාළි අධ්‍යාපනය තවත් ප්‍රාණවත් බවට පැමිණැවිය යුතුව තිබේ.
ලක්දිව වැසි නවීන පාළි ශිෂ්‍යයාට කියවීම් පාඩම් පොතක් වශයෙන් පළමු කොට අතට දෙනු ලබන්නේ නැතහොත් දීමට තිබෙන්නේ ධම්මපදට්ඨකථා ජාතකට්ඨකථාදී පොත්වලින් එකක් ය. සන්දර්භය (රචනා විලාසය) අතින් සලකන විට මෙකී පොත් ලියා තිබෙන්නේ සෙසු අට්ඨකථාවන්ගේ ම තත්ත්වයෙන් මිස “ක්‍රමානුගත ප්‍රාථමික පාඩම් පොත්” වශයෙන් නො වේ යයි කීම කිසිසේත් එකී ග්‍රන්ථයන්ට කරන අගෞරවයක් නොවිය යුතු බව පැහැදිලි ය. එහෙත් කිව යුත්තක් තිබේ. පාළිභාෂාව පිළිබඳ තරමක සාමාන්‍ය දැනීමක් අනුක්‍රමයෙන් ක්‍රමානුගතව ඇතිකරගත් පසු අට්ඨකථා පාළිය ඉගෙනීමට එකී පොත් අවශ්‍යයෙන් ම භාවිත කළ යුතු බව යි.
වයසින් හෝ උගත්කමින් - නැතහොත් ඒ දෙකෙන් ම ළදරු වූ ශිෂ්‍යයාහට ප්‍රථම කොට මේ පොත් ඉතා බරපතළ බවත්, තදීය ව්‍යාඛ්‍යාන ගණ්ඨිපදාදී නොයෙක් පරිවාර පොත් තිබියදීත් ප්‍රාථමික ශිෂ්‍යයා එයින් පෙළෙන සැටිත් බොහෝ පාළි ආචාර්ය්‍යවරයන්හට ප්‍රත්‍යක්ෂ වී තිබෙනු නොඅනුමාන ය. පැවිදි ශිෂ්‍යයාටත් වඩා මේ කරුණෙහි ලා මහත් ආයාසයට පැමිණෙන්නේ ගෘහස්ථ ශිෂ්‍යයා බව බොහෝ විට දක්නා ලැබේ.
එසේ හෙයින් පාළිභාෂාව හදාරන නවීන ශිෂ්‍යයාගේ ප්‍රථමාවතරණයට යෝග්‍ය ලිහිල් වූත් සුබෝධ වූත් ක්‍රමික වූත් පාළි (කියවීම්) පාඩම් පොතක ආවශ්‍යකත්වය බෙහෙවින් මා උද්යුක්ත කර වූයේ ය. උද්යුක්ත කරවා මේ කාර්‍ය්‍යයෙහි නියුක්ත කරවීය.
පාළි ව්‍යාකරණ හා වාක්‍ය රචනා (Composition) පිළිබඳ ලිහිල් පාඩම්වලින් යුත් පොත් පෙළක් නිපදවීම ද මෙකල පාළි අධ්‍යාපන වර්ධනය උදෙසා කළයුතු උසස් සංග්‍රහයකි. උගතුන් කීප පළක් විසින් දැනට එබඳු පොත් කීපයක් ලියා තිබෙනු දැක්ම සතුටට කරුණකි.
මේ පාළි පාඨමඤ්ජරියෙහි පළමු කොට විභක්ති හැඳින්වීම් වශයෙන් පාඩම් හයක් දක්වා එතැන් පටන් ක්‍රමානුගත වූ ඉතා ලිහිල් පාඩම් යොදන ලදී. පහසුවෙන් අවබෝධ කරවීම පරමාර්ථ කොට සිංහල භාෂාවට ඉතා ම ආසන්න වූ පාළි වචනයන්ගෙන් හා ලුහුඬු වාක්‍යයන්ගෙන් ම පාඩම් සම්පාදනය කිරීමට අපේක්ෂිත විණි. ප්‍රථමාවතරණයෙහි දී ශිෂ්‍යයා ඛෙදයට නොපැමිණීමෙන් ඉගෙනීමෙහි ආශාව වර්ධනය වන බැවිනි.
සන්ධි ශාස්ත්‍රය මේ තාක් නූගත් අලුත් ශිෂ්‍යයාට සන්ධි පද වෙන්කර ගැනීම සඳහා මහත් ආයාස දරන්නට සිදු වන්නේය. ඇතැම් විට වරදද ද විසන්ධි කරන්නේ ය. අර්ථය දරා ගැනීමට පවා නොහැකිව වෙහෙසෙන ශිෂ්‍යයාට මෙබඳු ප්‍රාථමික පාඩම් පොතක දී සන්ධි පිළිබඳව ද තවත් ගැහැටක් ඇති කිරීම කිසිසේත් යුතු නොවන බව සැලකීම අයුතු නො වේ.
මෙහි ඒ ඒ පාඩම් අගට “පදමාලා” නමින් දක්වන වචන පද්ධතිය පාඩම් උගන්වා අවසානයේ දී අතිරේක වචන කිහිපයක් වශයෙන් ඉගැන්විය යුතුය. කිසිසේත් ඒ වචන සමූහය ඊළඟ පාඩමේ දී ශිෂ්‍යයාහට සම්මුඛ විය හැකිය. සාකච්ඡා ව්‍යාපාරයෙන් හෝ අන් ක්‍රමයකින් පාඩමෙන් පිටත් වූ වචන ද පාඩම අවසානයෙහි හැකි තාක් ඉගැන්වීම් විධිමත් නවීන අධ්‍යාපන ක්‍රමයේ ඵලදායක අංගයක් බව සැලකුවමනා ය.
තවද ශිෂ්‍යයාහට අලුත් වූ ද, දුර්බෝධ විය හැකි වූ ද පදයන්ගේ අර්ථ ඒ ඒ පාඩම්වලට මුලින් දක්වන ලදි. සම්පූර්ණ පොතෙහි වචනාර්ථ අකාරාදී ක්‍රමයෙන් ග්‍රන්ථාවසානයෙහි දකින්නට ඇත.
පාඩමට මුලින් දක්වන වචනයෝ ත්වා - ත්වාන - තුං - මාන - අන්ත ආදි ප්‍රත්‍යයාන්ත ශබ්ද වෙන් වශයෙන් ඒ ඒ පාඩම්වල බොහෝ සෙයින් ඇතුළත් වනසේ පිළියෙල කරන ලද බව හඟවත්. එයින් අදහස් කරන්නේ ඒ අන්තවත් අන්‍ය ශබ්ද ද හමු වූ විට එබඳු ම අර්ථවත් ශබ්ද යයි ශිෂ්‍යයාහට පහසුවෙන් අවබෝධ කරවීම ය.
උදාහරණයක්:- මෙහි 13 වෙනි පාඩමෙහි “මාන” ප්‍රත්‍යයාන්ත ශබ්ද බහුල වශයෙන් ඇත. පාඩම් විස්තර කර දීමේ දී ගුරුවරයා විසින් පොතේ නො ආ ඒ ප්‍රත්‍යයාන්ත අන්‍ය ශබ්ද ද ආදර්ශ වශයෙන් කියා දිය යුතුය. එසේ කල ශබ්ද පරිඥාන විෂයෙහි ස්වල්ප ව්‍යාපාරයකින් ශිෂ්‍යයාගේ බුද්ධිය පුළුල් වීමට එය හළදොරක් වැනි වෙයි. සෙසු පාඨයන්හි ද මේ ක්‍රමයෙන් ම ශිෂ්‍යයාහට හස්තාවලම්බනය දිය යුතු ය.
සාමාන්‍ය වශයෙන් මේ කුඩා පොතෙන් පාළි භාෂාවේ වචන 1500 ක් පමණ ඉගෙන ගත හැකි වෙයි.
‘’යො කරොති දීපමත්තනො ඛිප්පං වායම, පණ්ඩිතො භව.’’ - ධම්මපද -
මීට,
කහඳාමෝදර පියරතන ස්ථවිර.
2474
------ 01. 01. කෝට්ටාගොඩ
1931
සෞගතොදය විද්‍යාලය.