පිරිවෙන් පාලි භාෂාව 5 ශ්‍රේණිය.pdf
- ප්‍රකාශිත වර්ෂය :
- 2018
- මුද්‍රිත වර්ෂය :
- 2018
- පිටු ගණන :
- 228
- බාගත කිරීම් ගණන :
- 4,703
- වෙබ් අඩවියට එක් කළ දිනය :
- 2020-10-06
- ගොනුවේ ප්‍රමාණය :
- 4.3 MB
පොතේ පිටු කිහිපයක ඡායාරූප පහතින් බලන්න.
මෙම ග්‍රන්ථය ශ්‍රී ලංකාවේ මූලික පිරිවෙන්හි 5 වන ශ්‍රේණියේ ඉගෙනුම ලබන ගිහි පැවිදි ශිෂ්‍ය ප්‍රජාව සඳහා අධ්‍යාපන ප්‍රකාශන දෙපාර්තමේන්තුව මගින් සම්පාදනය කර ප්‍රකාශයට පත් කරන ලද ‘පාලි භාෂාව’ පෙළපොතයි.
පාලි භාෂාවේ ව්‍යාකරණ, වාක්‍ය රචනා, ගද්‍ය හා පද්‍ය පාඨ මෙන්ම විවිධ සූත්‍ර හා සාහිත්‍ය කොටස් ආශ්‍රිත අභ්‍යාස මෙහි අන්තර්ගත වේ. පාලි අටුවා කතා, උදානපාළි, අපදානපාළි සහ ආටානාටිය සූත්‍රය ආදී මූලාශ්‍රයන්ගෙන් උපුටා ගත් පාඩම් මාලාවක් මෙහි ක්‍රමානුකූලව පෙළගස්වා ඇත.
- නමො මහාකාරුණිකස්ස තස්ස
- එතු බො භනෙත භගවා ස්වාගතං භනෙත
- අකෙකාසමෙව අලත්ථං
- තථාගතස්ස ආළාහනං
- බ්‍රහ්මාති මාතාපිතරො
- අග්‍රගණ්‍ය පාලි පඬිවරු සිවුදෙනෙක්
- උදානපාළි හා අපදානපාළි කොටස්
- ආටානාටිය සුත්තං
2018 වසරේ දෙවන මුද්‍රණය ලෙස නිකුත් වූ මෙම පොත පිරිවෙන් අධ්‍යාපන විෂය නිර්දේශයට අනුකූලව සම්පාදනය කරන ලද්දකි.
ගරු අධ්‍යාපන අමාත්‍යතුමාගේ පණිවුඩය
පිරිවෙන් මගින් ගිහි පැවිදි දෙපක්ෂයට ම භාෂා, ආගමික හා සාරධර්ම අධ්‍යාපනය ලබා දීම චිරාත් කාලයක සිට පැවත ආ බැවින්, පිරිවෙණ යනු ශ්‍රී ලාංකික අධ්‍යාපනයේ කේන්ද්‍රස්ථානය බවට පත් විය. එය දේශීය ගිහි පැවිදි ශිෂ්‍ය පරම්පරාව පමණක් නොව විදේශීය විද්‍යාර්ථීන් ද ඥානය කළ විශ්වවිද්‍යාලයක් බඳු ස්ථානයක් විය. එක් එක් යුගයේ අවශ්‍යතා අනුව සකස් වූ විෂයමාලාවක් පිරිවෙන් අධ්‍යාපනය මගින් සිසුන් වෙත ප්‍රදානය කරනු ලැබිණි. එබැවින් ම එවැනි අධ්‍යාපන මධ්‍යස්ථාන විශ්ව සම්භාවනාවට පත් විය.
විදේශීය ආක්‍රමණ හමුවේ - විශේෂයෙන් ම පෘතුගීසි, ලන්දේසි හා ඉංග්‍රීසි ආක්‍රමණ හමුවේ - පිරිවෙන් අධ්‍යාපනය ගුණාත්මක වශයෙන් හීන වී ගිය බව සැබෑ ය.
එහෙත් 1753 දී ශ්‍රී ලංකාවේ මහණ උපසම්පදාව යළි පිහිටුවීමට ක්‍රියාකළ අසරණ සරණ සරණංකර සංඝරාජ මාහිමිපාණන්ගේ කැපවීම මත පිරිවෙණ නැමැති අධ්‍යාපන ආයතනය ශීඝ්‍ර දියුණුවකට පත් ව දෙස් විදෙස් කීර්තියට පත්වීම අප ලැබූ ජයග්‍රහණයකි.
අනෙකුත් අධ්‍යාපන ක්ෂේත්‍රවලට මෙන් ම පිරිවෙන් අධ්‍යාපනයට ද නිදහස් අධ්‍යාපන සංකල්පය වචනයේ පරිසමාප්ත අර්ථයෙන් ම අර්ථවත් කිරීම අපගේ පරම අපේක්ෂාවයි. පිරිවෙන් පෙළපොත් නොමිලයේ සැපයීමෙන් රජය ඉහළ වැයක් දරුව ද එමගින් සමස්ත ජනතාවගේ විනය, සදාචාරය හා යහපැවැත්ම පිරිවෙන් ශිෂ්‍ය ප්‍රජාව වෙතින් ඉටු වනු ඇතැයි උදක් ම අපේක්ෂා ඇති ව මෙම පොත ඔබ අතට පත් කිරීමට ලැබීම භාග්‍යයක් කොට සලකන අතර මෙම පොත පරිහරණය කිරීමෙන් ගිහි පැවිදි දෙපාර්ශ්වයට ම අයත් ශිෂ්‍ය ශිෂ්‍යාවන්ගේ නැණ ගුණ දියුණු වේවායි ද පතමි.
අකිල විරාජ් කාරියවසම්
අධ්‍යාපන අමාත්‍ය
පිරිවෙන් අධ්‍යාපන අධ්‍යක්ෂතුමාගේ පණිවුඩය
සම්භාව්‍ය පිරිවෙන් අධ්‍යාපනය මහනුවර නියමකන්ද පරිවෙණස්ථානයෙන් ආරම්භ වී වර්තමාන අවධියේ දී සාධනීය ලක්ෂ්‍යයකට පැමිණ ඇත. වසර ගණනක් නොවෙනස් ව පැවති මූලික පිරිවෙන් විෂය නිර්දේශය නූතන අධ්‍යාපන ක්‍රමෝපායන්ට උචිත ආකාරයෙන් වෙනසකට භාජනය කර ඇත. ඒ අනුව විශාල පිරිවැයක් දරමින් නව පෙළපොත් මුද්‍රණය කරවා පිරිවෙන් අධ්‍යාපනයට නව ජීවයක් ගෙන දීමට රජය උත්සුක වී තිබීම ප්‍රශංසනීය ය.
සම්භාව්‍ය අධ්‍යාපනය සැකසී ඇත්තේ ප්‍රාචීන හා ප්‍රතිචීන භාෂාවල උපකාරයෙනි. එය තවදුරටත් ආරක්ෂා කර ගනිමින් ජාතික අධ්‍යාපන ප්‍රතිපත්තිය හා සම ව ගමන් කොට විශ්වයට ඔබින ප්‍රතිබලසම්පන්න භික්ෂූන් වහන්සේ නමක් නිර්මාණය කරගැනීම අවශ්‍ය වේ. එකී අරමුණු සාධනයෙහි ලා උපස්ථම්භක වන්නා වූ නව විෂය නිර්දේශයක් හඳුන්වා දී තිබේ. ඊට අනුගත ව පැවිදි ගිහි සිසුන් වෙත නව පෙළපොත් තිළිණ කරනු ලැබ ඇත. මෙය පිරිවෙන් ක්ෂේත්‍රයට සුවිශේෂ අවස්ථාවකි.
රජය මගින් පිරිනමනු ලබන මෙම පෙළපොත ගෞරවයෙන් සහ පිරිසිදු ව භාවිත කිරීමට උත්සාහ කළ යුතු ය. එළඹෙන වසරේ සහෝදර සිසුනට ද නැවත තිළිණ කරදීමට හැකි වන පරිදි පොත පරිශීලනය කිරීම අවශ්‍ය ය. එලෙස කටයුතු කිරීම රටේ ආර්ථික සංවර්ධනයට උරදීමක් ද වනු ඇත.
විජිත වෙලගෙදර
අධ්‍යාපන අධ්‍යක්ෂ (පිරිවෙන්)
අධ්‍යාපන අමාත්‍යාංශය
පෙරවදන
ශ්‍රී ලංකාව තුළ බුද්ධ ධර්මය ස්ථාපිත වීමත් සමග ම වාගේ විහාරාරාම ගොඩනැංවීම ආරම්භ විය. දිවයිනේ ප්‍රධාන විහාරස්ථාන කේන්ද්‍ර කර ගනිමින් “පිරිවෙන” නැමැති විද්‍යායතනය බිහි වී ඇත. ගිහි පැවිදි දෙපක්ෂයට ම අවශ්‍ය වූ කලා ශිල්ප, භාෂා හා සමය සමයාන්තර ඥානයත්, යහපත්, ගුණගරුක සමාජයක් බිහි කිරීමට අවශ්‍ය සාරධර්ම අධ්‍යාපනයත් බෙදා දුන්නේ පිරිවෙන මගිනි. එම සාම්ප්‍රදායික අනන්‍යතාව රැක ගනිමින් ම, කාලීන අවශ්‍යතා ද සපුරාලමින් යහපත් සමාජයක් ගොඩනැංවීමේ කාර්යය ඉදිරියට ගෙන යාමට පිරිවෙන ඉටු කරන කාර්යභාරය සුළු කොට තැකිය නොහැකි ය.
සම්භාවනීය අධ්‍යාපන සම්ප්‍රදායන් රැක ගනිමින් ශිෂ්‍ය භික්ෂූන් වහන්සේලාගේ මෙන් ම ගිහි සිසුන්ගේත් අවශ්‍යතා සැලකිල්ලට ගෙන අධ්‍යාපන ප්‍රකාශන දෙපාර්තමේන්තුව පිරිවෙන් සඳහා මෙම පාඨග්‍රන්ථය සම්පාදනය කර ඇත. එම කාර්යය සඳහා දායකත්වය සැපයූ උපදේශක, ලේඛක හා සංස්කාරක මණ්ඩල සාමාජිකයන් සියලු දෙනාට ද අධ්‍යාපන ප්‍රකාශන දෙපාර්තමේන්තුවේ නිලධාරීන්ට ද මාගේ ස්තූතිය පිරිනමනු කැමැත්තෙමි.
ඩබ්ලිව්. ඩී. පද්මිණී නාලිකා
අධ්‍යාපන ප්‍රකාශන කොමසාරිස් ජනරාල්
අධ්‍යාපන ප්‍රකාශන දෙපාර්තමේන්තුව
ඉසුරුපාය
බත්තරමුල්ල
2018.05.07