සාමණේර බණ දහම් පොත - කල්‍යාණී යෝගාශ්‍රම.pdf
v2
- කතෘ :
- ශ්‍රී කල්‍යාණී යෝගාශ්‍රම සංස්ථාව
- ප්‍රකාශිත වර්ෂය :
- 1987
- මුද්‍රිත වර්ෂය :
- 1987
- පිටු ගණන :
- 60
- බාගත කිරීම් ගණන :
- 3,853
- වෙබ් අඩවියට එක් කළ දිනය :
- 2020-02-02
- ගොනුවේ ප්‍රමාණය :
- 15 MB
පොතේ පිටු කිහිපයක ඡායාරූප පහතින් බලන්න.
සාමණේර බණ දහම් පොත යනු පැවිදි බිමට පත්වන සාමණේර භික්ෂූන් වහන්සේලාගේ දෛනික වත්පිළිවෙත්, ශීල සමාදානය, ප්‍රත්‍යවෙක්ෂා සහ සජ්ඣායනා සඳහා පැරණි ආචාර්යවරුන් විසින් සම්පාදනය කරන ලද මූලික විනය හා ධර්ම කරුණු අඩංගු ග්‍රන්ථයකි.
ශ්‍රී කල්‍යාණී යෝගාශ්‍රම සංස්ථාවට 36 වසරක් පිරීම නිමිත්තෙන්, එම සංස්ථාවේ ප්‍රව්‍රජ්‍යාව ලබන කුලපුත්‍රයන් උදෙසා නාඋයනේ අරියධම්ම හිමියන්ගේ සංස්කාරකත්වයෙන් මෙම සංස්කරණය සකස් කර ඇත. මාතර සිරි ඤාණාරාම මහානායක හිමි සහ කඩවෑද්දුවේ ශ්‍රී ජිනවංශ නාහිමි යන මහා තෙරවරුන්ගේ අනුශාසනා පරිදි මාතලේ ධම්මින්ද හිමියන් විසින් පිටපත් කොට කොළඹ සමයවර්ධන මුද්‍රණාලයෙන් 1987 දී මුද්‍රණය කරවා ඇත.
මෙහි අන්තර්ගත ප්‍රධාන කරුණු අතර:
- පැවිද්ද ඉල්ලීමේ වාක්‍ය, සරණාගමනය සහ සාමණේර දශ ශීලය
- සිවුපස ප්‍රත්‍යවෙක්ෂාව සහ අතීත ප්‍රත්‍යවෙක්ෂාව
- වත්තිංසාකාරය, ප්‍රතීත්‍ය සමුත්පාදය සහ හෙරණසික
- දිනචරියාව, චතුපාරිශුද්ධි ශීලය සහ සේඛියා වත්
- දස ධම්ම, මහා මංගල, රතන, කරණීයමෙත්ත ආදී පිරිත් සූත්‍ර සහ අටවිසි පිරිත ආදී ආශීර්වාද ගාථා
සංඥාපනය
බුදුරජාණන් වහන්සේ බුද්ධත්‍වයට පත්ව වර්‍ෂයක් පිරෙන තුරුම කුලපුත්‍රයන් පැවිදි කිරීමට අනුදැන වදාළේ සරණාගමන උපසම්පදාවෙහි පිහිටුවීම වශයෙනි. ප්‍රථම බුද්ධ වර්‍ෂයෙහි සාමණේර ප්‍රව්‍රජ්‍යාවක් නොවීය. තිසරණයෙහි පිහිටුවීමෙන් ම උපසම්පදාවෙහි පිහිටීම වන්නේය. එහෙත් බුදුපුත් රාහුල කුමරුවන් පැවිදි කළ තැන් පටන් සරණාගමන උපසම්පදාව ප්‍රතික්ෂේප කොට සාමණේර ප්‍රව්‍රජ්‍යාව අනුදන්නා ලදී. එතැන් සිට උපසම්පද සීලය අනුදන්නා ලද්දේ ඤත්තිචතුත්‍ථ කම්මයෙනි. සරණාගමන විධි සාමණේර දශ ශීලය, සාමණේරයන් විසින් පිරිය යුතු වත් පිළිවෙත් චාරිත්‍ර වාරිත්‍ර විධි සියල්ල පනවා වදාළේ රාහුල ප්‍රව්‍රජ්‍යාවෙන් පසුවය.
සැදැහැයෙන් සසුන් ගතවන කුලපුත්‍රයන් වෙත මහා කරුණාවෙන් අනුදැන වදාළ නිර්මල වූ නෛය්‍යානික ප්‍රතිපත්ති මාර්‍ගය විනය පිටකයෙන් හා සූත්‍රාන්ත පිටකයෙන් ද ගෙන සාමණේර බණ දහම් පොත නමින් පැරණි ආචාර්‍ය්‍යයන් වහන්සේ නමක් විසින් සකසා ඇති මේ ග්‍රන්ථය වනාහි අතිශයින් අගනා ප්‍රශස්ත ග්‍රන්ථ රත්නයකි. මෙහි ඇතුළත් පිළිවෙත් මග අනුගමනය කරන පැවිද්දෝ ඒකාන්තයෙන් බුදු සසුන සුරකින්නෝම වෙති.
සසර දුකින් මිදී සතර මඟ සතර ඵල පිළිවෙළින් නිවනට පැමිණීමේ නිශ්ශරණාධ්‍යාශයෙන් සසුන් පිළිවෙත් අනු පිළිවෙළින් පුරනු කැමැතිව, ශ්‍රී කල්‍යාණී යෝගාශ්‍රම සංස්ථාවේ ප්‍රව්‍රජ්‍යාව ලබන ශ්‍රද්ධා ප්‍රව්‍රජිත කුලපුත්‍රයන් උදෙසා මේ සාමණේර බණ දහම් පොත සංස්කරණය කොට මුද්‍රණය කරනු ලබන්නේ සම්බුදු සසුන ආරක්ෂා කිරීමේ උදාරතරාශයෙනි සමාරබ්ධ ශ්‍රී කල්‍යාණී යෝගාශ්‍රම සංස්ථාවට සතිස්වසක් පිරීම නිමිත්තෙනි.
මේ පොත මුද්‍රණය කිරීමට අනුමත කරමින් උපදෙස් දෙවා වදාළ අති පූජ්‍ය පණ්ඩිත මාතර සිරි ඤාණාරාමාභිධාන මහෝපාධ්‍යාය මාහිමියන් වහන්සේ, අති පූජ්‍ය රාජකීය පණ්ඩිත කඩවෑද්දුවේ ශ්‍රී ජිනවංශාභිධාන මාහිමියන් වහන්සේ ද යන ශ්‍රී කල්‍යාණී යෝගාශ්‍රම සංස්ථාධිපති ශාසනහාරධාරී මාහිමියන් වහන්සේ දෙනමට තෙරුවන් ගුණ බෙලෙන් නිරෝගී සුව දීර්‍ඝායුඃ ශ්‍රී ශාන්ති අත්වේවා.
පොත මුද්‍රණයට සුදුසු ලෙස සම්පූර්‍ණයෙන් පිටපත් කළ පූජ්‍ය මාතලේ ධම්මින්ද ආයුෂ්මතුන් වහන්සේටත්, ධර්‍මදාන වශයෙන් මෙය පිරිනමන කොළඹ මරදානේ පින්වත් ඩී. ජේ. අලහකෝන් මහත්මාව ඇතුළු දරු පිරිසටත්, ඉමහත් උද්‍යොගයෙන් මුද්‍රණ කටයුතු ඉටු කළ කොළඹ මරදානේ සමයවර්ධන මුද්‍රණාලයේ අධිපති තුමා ඇතුළු කාර්‍ය්‍ය මණ්ඩලයටත් මෛත්‍රී ආශීර්වාද පූර්‍වාංගම අවංක ස්තුතිය පිරිනමන අතර ඒ සැමට ආයුරාරොග්‍යාදි සම්පත් සිද්ධව ප්‍රාර්ථනීය බෝධියෙන් ශාන්ත නිවන් සුව අත්වේවා යි මෙත් සිත් පවත්වමි.
‘’චිරං තිට්ඨතු ලොකස්මිං - සම්මා සම්බුද්ධ සාසනං’’
මෙයට,
නාඋයනේ අරියධම්ම