විනය පරිවාර පාලි - ශ්‍රීපාද.pdf
- ප්‍රකාශිත වර්ෂය :
- 1957
- මුද්‍රිත වර්ෂය :
- 1957
- පිටු ගණන :
- 289
- බාගත කිරීම් ගණන :
- 929
- වෙබ් අඩවියට එක් කළ දිනය :
- 2020-02-02
- ගොනුවේ ප්‍රමාණය :
- 85 MB
වෙනත් සංස්කරණ
- විනය පරිවාර පාලි - ප්‍රඥාලෝකසභ 1905
එම්. වී. ප්‍රඥාලෝකසභ · 1905
- විනය පරිවාර පාලි - බෙන්තර ශ්රද්ධාතිස්ස හිමි
බෙන්තර ශ්රද්ධාතිස්ස හිමි · 1928
පොතේ පිටු කිහිපයක ඡායාරූප පහතින් බලන්න.
පරිවාර පාලි යනු ථෙරවාදී විනය පිටකයේ අවසාන ග්‍රන්ථය වන පරිවාරපාළියෙහි පාලි පාඨය ඇතුළත් සංස්කරණයකි. මෙය ශ්‍රීපාද ත්‍රිපිටක ග්‍රන්ථමාලාවේ 14 වන කාණ්ඩය (විනය පිටකයේ 5 වන වෙළුම) ලෙස ප්‍රකාශයට පත් කර ඇත.
මෙම කෘතිය සම්පාදනය හා සංස්කරණය කරන ලද්දේ මාරපණ ශාස්ත්‍රෝදය පිරිවෙන්පති පණ්ඩිත කිරිඇල්ලේ ඤාණවිමල මහාස්ථවිරයන් වහන්සේ විසිනි. මෙහි විනය නීති හා ශික්ෂාපද විභාග කෙරෙන ප්‍රශ්නෝත්තර, වර්ගීකරණ සහ ගාථා විනය ශික්ෂකයනට ප්‍රයෝජනවත් වන අයුරින් පෙළගස්වා ඇත. සංස්කරණයේදී බුරුම ඡට්ඨසංගීති පිටක පාඨ සංසන්දනය කර වැදගත් පාඨාන්තර ද ඇතුළත් කොට තිබේ.
1957 (බු.ව. 2501) වසරේදී ශ්‍රීපාද අරමුදලේ (Sri pada Trust Fund) ආධාර ඇතිව රත්නපුර මාරපණ ශාස්ත්‍රෝදය මුද්‍රණාලයේදී මෙම ග්‍රන්ථය මුද්‍රණය කරවා ප්‍රකාශයට පත් කර ඇත.
නිවේදනය යි
ශ්‍රීපාද ත්‍රිපිටක ග්‍රන්ථමාලාවේ 14 වැනි කාණ්ඩය පරිවාර පාලිය යි අප බුදුරජානන් වහන්සේගේ ශ්‍රීමුඛ දේශනාව වන පාළි ත්‍රිපිටක ධර්‍මයෙන් වැඩි කොටසක සංශොධනය හා මුද්‍රණයත් අවසන් කෙළෙමි. ඉතිරිව ඇත්තේ විනය පිටකයේ පොත් 2 ක් සහ සූත්‍ර පිටකයේ පොත් කීපයකුත් පමණකි.
අභිධර්‍මපිටකයේ සප්තප්‍රකරණය ධම්මසඞ්ගණී-විභඞ්ග-ධාතුකථා-පුග්ගලපඤ්ඤත්ති-කථාවත්‍ථු-යමක-පට්ඨාන ප්‍රකරණ වශයෙන් පොත් පිළිවෙළින් කාණ්ඩ 11 ක් වන සේ පළකළ අතර විනය පිටකය පළකරන්ට සිදු වූයේ පාරාජිකා - පාචිත්තිය - මහා වග්ග - චුල්ලවග්ග - පරිවාර පාලි වශයෙන් පොත් පිළිවෙළින් නොවැ, විනය පිටකය හදාරණ ආධුනිකයන්ට පොත් සපයා ගැනීමේ දුර්‍ලභත්‍වය මගහැරී යන අයුරු චුල්ලවග්ග - මහා වග්ග - පරිවාර පාලි වශයෙනි. ඉතිරි විනය පොත් දෙක සෑහෙන සංශෝධනයකින් හා සොභන මුද්‍රණයකින් යුක්තව මුද්‍රණය වී තිබෙන නිසා එහි මුද්‍රණය තරමක් පමා වූවාට පාඩුවක් නැත.
දැනට ඉතා ඉක්මනින් පළ කළයුතුව තිබෙන්නේ සූත්‍ර පිටකයට අයත් මජ්ඣිම නිකාය යි. ලංකා විශ්වවිද්‍යාලය ඇතුළු පිරිවෙන් වල ඉගෙන ගන්නා ගිහි-පැවිදි ශිෂ්‍යයන්ට ද ඒ ග්‍රන්ථයේ ශ්‍රීපාද ත්‍රිපිටක ග්‍රන්ථ මාලාව පටන් ගැනීමට පෙර මා අතින් ම සංශොධනය වී පළ වූ පැරණි පිටපත් සොයා ගන්ට නැති නිසා ය.
ත්‍රිපිටක සංශොධන
අවුරුදු කීපයකට පෙර ලංකාවේ හා බුරුමයේ ත් සඞ්ගායනා නමින් ත්‍රිපිටක සංශොධන ආරම්භ කළ බැව් මතක ඇත. ඒ පිළිබඳව මගේ අදහස ශ්‍රීපාද ත්‍රිපිටක ග්‍රන්ථ මාලාවේ 11 වැනි කාණ්ඩ (පට්ඨාන අවසාන භාග) යේ හා ප්‍රවෘත්ති පත්‍ර වලත් පළවූයේ මෙසේ ය:
“හීනයාන (ථෙරවාදී) බෞද්ධයන් මෙන් ම මහායාන බෞද්ධයන් ද ගෞතම බුද්ධශ්‍රාවකයන් විය යුතු ය. අපේ ප්‍රථම ධර්‍ම සඞ්ගායනාවේ දී සිට ම සද්ධර්‍මයා දෙපක්‍ෂයක් වී ධර්‍ම සඞ්ගායනාදිය ද වෙන වෙන ම කරගෙන ආ බව පෙනේ.
අපේ ථෙරවාදී ත්‍රිපිටකයේ අඩුපාඩු සකස් කර ගත හැකි පිළිවෙළ මහායානිකයන් අතර ථෙරවාදී භික්‍ෂූන්ට වඩා මහා වියත් බහුශ්‍රුත භික්‍ෂූන් පමණක් නොව බොහෝ ව්‍යක්ත ගිහි බෞද්ධ (උපාසක)යන් පවා සිටි බැව් පැහැදිලි වෙයි.
එමෙන්ම අපේ ථෙරවාදී ත්‍රිපිටකයෙන් ගිලිහී ගිය බොහෝ ධර්‍ම කොට්ඨාස මහායාන ග්‍රන්ථ අතර රැඳී පවත්නා සේ ම, ඇතැම් මහායාන ධර්‍මකොට්ඨාස අපේ ත්‍රිපිටකයට ද කාවැදී තිබෙන බව පෙනේ. එසේ හෙයින් මෙවැනි අවශ්‍ය අවස්ථාවන්හි දී ප්‍රයෝජනය ගැනීම සඳහා අළු විහාරයේ තැන්පත් කර තිබෙන බැව් කියන ලෝහ තුන් පිටකය ත්, අභයගිරි දාගැබෙහි තැන්පත් කර තිබෙන බැව් කියන තුන්පිටකය ත්, එක්තැන් කර ගත යුතු ය.
මෙයින් මහා විහාරික හීනයානිකායකට අයත් මුලස්ථානය වූ අභයගිරියෙහි නිදන්කොට ඇත්තේ අළු විහාර ග්‍රන්ථාරූඪ ත්‍රිපිටකයක් ම යයි සිතීම දුෂ්කර ය. සොයාගත හැකි වුවහොත් අපේ ත්‍රිපිටක සංස්කරණයට මේ අභයගිරි ත්‍රිපිටකය බොහෝ ප්‍රයෝජනවත් විය හැකි යි.
මේ පොත් පෙළත් උතුම් බුද්ධාගමට අයිති ධර්‍ම ග්‍රන්ථ හා ධර්‍මධරයනුත් රැස්කරගෙන ඒ පොත් හා අපේ ථෙරවාදී ත්‍රිපිටක පොත් සංසන්දනය කරමින් - අඩු වැඩි වශයෙන් පෙනෙන ධර්‍මපාඨ සුදුසු ලෙස පෙන්වමින් අපේ ත්‍රිපිටකය සකස් කර ගත හොත් එය සකල ලෝකවාසී බෞද්ධයන්ට ම එකසේ ප්‍රයෝජනවත්, සකල ලෝකවාසී බෞද්ධයන්ගේ ම සම්මානයට භාජන වන ත්‍රිපිටකයක් වන්නේ ය.
එසේ නැතිව අළු විහාර ග්‍රන්ථාරූඪයෙන් පැහැර ගොස් ථෙරවාදී බෞද්ධ රටවල විසිර පවත්නා අපේ මේ ථෙරවාදී ත්‍රිපිටකය කොතැනක කොතෙක් දෙනා එකතුවී, කොපමණ වෙහෙස මහන්සි ගෙන, කවර තරමේ වියදමක් දරා-කොපමණ උත්සවශ්‍රීයෙන් කළ ත් අකුරක් දෙකක් එහා මෙහා කිරීම, ඡෙදයක් වෙන් කිරීම වැනි සුළු වෙනසක් හැර නිර්‍වද්‍ය තරමේ විශේෂ ප්‍රතිඵල ලැබී නැති බැව් ඒ ඒ ආයතන (සඞ්ගායනාගාර) වලින් සකස්වන පොත් පිට වූ දිනක සසඳා බැලීමෙන් වැටහී යනවා ඇත.”
අපේ රටේ පටන්ගන්නා මෙවැනි බොහෝ වැඩවල ඉතිරිවන්නේ සම්මාදන් ශබ්දය ත් පමණකි. නැතහොත් අනාගත පරම්පරාවල එල්ලා තැබීමකි. නමුත් බුරුම ජාතිකයෝ ත්‍රිපිටක සංශොධනය ත් සමග ම මුද්‍රණය ත් නිමකර ස්වජාතියේ ගෞරවය ත් ශ්‍රද්ධාවේ මහිමය ත් රැකගත්හ.
විනයපිටක සංස්කරණයෙහි දී බුරුමයේ සංශොධිත අභිනව (ඡට්ඨ සඞ්ගීති පිටක) පොත් ද සංසන්දනය කර බැලීමි. ඒ පොත්වල දැක්වෙන පාඨ අතුරෙන් ස්වල්පයක් මගේ සංස්කරණයේ පෙළේ හා වැඩිහරියක් පාඨාන්තර වශයෙන් අඩොලිපිවල ත් ඇතුලත් කෙළෙමි. මා කලින් කළ නිගමනයේ සත්‍යතාවය ඒ අභිනව බුරුම සංස්කරණ පොත් කියවා බැලීමෙන් වැටහෙනවා ඇත. විනයපිටකය ගැන සවිස්තර ප්‍රස්තාවනාවක් විනය පිටක මුද්‍රණාවසානයෙහි පළකරවන්නෙමි.
බුද්ධසාසනං චිරං තිට්ඨතු
මෙයට:
පණ්ඩිත කිරිඇල්ලේ ඤාණවිමල ස්ථවිර
2501
——සැප්තැම්බු 9 දින
1957
මාරපණ ශාස්ත්‍රොදය පිරිවෙන්හි දී ය.