සමන්තකූට වණ්ණනා - දෙනියායේ පඤ්ඤාලෝක හිමි.pdf
- කතෘ :
- දෙනියායේ පඤ්ඤාලෝක හිමි
- ප්‍රකාශිත වර්ෂය :
- 2001
- මුද්‍රිත වර්ෂය :
- 2001
- පිටු ගණන :
- 260
- බාගත කිරීම් ගණන :
- 3,838
- වෙබ් අඩවියට එක් කළ දිනය :
- 2018-12-10
- ගොනුවේ ප්‍රමාණය :
- 61 MB
පොතේ පිටු කිහිපයක ඡායාරූප පහතින් බලන්න.
ප්‍රාචීන භාෂෝපකාර සමාගමේ ප්‍රාචීන මධ්‍යම විභාගය සඳහා නියමිත වූ සමන්තකූටවණ්ණනා පාලි කාව්‍යයේ ප්‍රථම ලංකාගමනයේ සිට අවසානය දක්වා කොටස මෙම ග්‍රන්ථයෙන් විස්තර විවරණයට ලක් කෙරේ. මෙහි පෙළ, අන්වය, පදගතාර්ථ සහ සවිස්තරාත්මක ව්‍යාකරණ විවරණ ද ඇතුළත් වේ.
දෙනියායේ පඤ්ඤාලෝක හිමියන් විසින් 2001 වසරේදී සම්පාදනය කරන ලද මෙම කෘතියෙහි සමන්තකූටවණ්ණනාව සහ පාලි පද්‍ය සාහිත්‍යය පිළිබඳ අගනා ප්‍රස්තාවනාවක් ද, ගාථාවල කථාසාරය ද, ව්‍යාකරණ විවරණ ඇතුළත් පරිච්ඡේදයක් ද සම්පාදනය කර ඇත.
ප්‍රධාන මාතෘකා අතර:
- ප්‍රස්තාවනා හා පාලි පද්‍ය සාහිත්‍ය විමර්ශනය
- බුද්ධත්වයෙන් පසු සහ ප්‍රථම, ද්විතීය, තෘතීය ලංකාගමනයන්
- සමන්තකූටය හා අසිරිමත් සමණොළ විස්තරය
- ප්‍රසාදචාරිකා
- ගාථාවල අන්වය, පදගතාර්ථ හා ව්‍යාකරණ විවරණ
පෙරවදන
බෞද්ධ ලෝකයෙහි අතිමහත් පූජනීයත්වයට පත් සිද්ධස්ථානයක් වන ශ්‍රීපාදස්ථානය පිහිටි සමන්ගිර හෙවත් සමනලකන්ද වස්තු විෂය කොටගෙන ලියවුන පාලි හා සිංහල ගද්‍ය මෙන් ම පද්‍ය ග්‍රන්ථ ද රාශියක් විද්‍යමානය. ඒ අතර සමන්තකූටවණ්ණනාව පැරණි වූ ද, සම්භාවනීය වූ ද, කාව්‍ය රසයෙන් අනූන වූ ද පාලි කාව්‍යයකි. සිංහල බසින් ද, ඉංග්‍රීසි බසින් ද නොයෙක් වර මෙම ග්‍රන්ථය ප්‍රකාශයට පත්වීමට එහි ආගමික හා ඓතිහාසික අගය මෙන් ම කාව්‍යාත්මක ගුණය හේතු වූවා නිසැකය.
ප්‍රාචීන භාෂෝපකාර සමාගමේ නව විෂය නිර්දේශයන්ට අනුව සමන්තකූටවණ්ණනාවෙහි ප්‍රථම ලංකාගමනයේ සිට අවසානය දක්වා කොටස මධ්‍යම විභාගය සඳහා නිර්දේශ කොට ඇති බැවින් මීට ඉහත පළ වූ විවිධ සංස්කරණයන්ද ඇසුරු කරමින් මෙම සංස්කරණය අප අතින් පිළියෙළ විය.
මෙම කුඩා ග්‍රන්ථය මුද්‍රණද්වාරයෙන් එළිදකින මොහොතෙහි මා පැවිදි කොට අධ්‍යයන කටයුතුවල මෙහෙයවා නිරන්තරයෙන් සියලු ශාස්ත්‍රීය කර්තව්‍යයන්හිලා ධෛර්‍ය්‍යය දෙමින් අප මෙහෙයවන අස්මදාචාර්‍ය්‍යපාදෝත්තම ගෞරවාර්භ කොළමුන්නේ සුමනවංශ මාහිමිපාණන් වහන්සේ සහ සොයුරු පෙමින් අපගේ සියලු කටයුතුවලට දිරිදෙන පැවිදි සහෝදර කිංචිගුණේ චන්දවිමල හිමියන් හදපිරි බැතියෙන් සිහිපත් කරමි. මෙම කටයුත්තට මා මෙහෙයවා සියලු දේ සොයා බලමින් ක්‍රියා කළ, අපගේ සියලු ශාස්ත්‍රීය කටයුතුවලට දිරිදෙන කැලණිය විශ්වවිද්‍යාලයේ සංස්කෘත අධ්‍යයන අංශයේ ජ්‍යෙෂ්ඨ කථිකාචාර්ය ආචාර්ය ඉඳුරාගාරේ ධම්මරතන හිමියන් ද,, සෝදුපත් බැලීමෙහි දී මහෝපකාරීව කටයුතු කළ අපගේ ඇදුරු කැලණිය විශ්වවිද්‍යාලයේ පාලි හා බෞද්ධ අධ්‍යයන අංශයේ කථිකාචාර්ය දර්ශනපති පල්ලේගම සමිත හිමියන් ද, මෙම කටයුත්තෙහි අප නිරත වූ අවධියෙහි දුක සැප බෙදා ගනිමින් සොයුරු පෙමින් අපව දිරිමත් කළ කැලණිය විශ්වවිද්‍යාලයේ සංස්කෘත අධ්‍යයන අංශයේ සහකාර කථිකාචාර්ය ඇඹෝගම විමලඤාණ හිමියන් සහ සහකාර කථිකාචාර්ය ඉදිරපොවේ ධම්මසිරි හිමියන් ද,, අත්පිටපත සකස්කිරීමේ දී සහාය වූ ජූලම්පිටියේ පඤ්ඤාදස්සි හිමියන් සහ නදීකා දමයන්ති ලංකාපුර සොහොයුරිය ද, නන් අයුරින් උපකාරී වූ කොටඹේ බොධිරතන හිමි, මහආරේ පියරතන හිමි, පාඨශාලාචාර්ය අශෝක ගුණතිලක මහතා, එච්. එල්. ප්‍රියන්ත සහ අනුරාධ චින්තක යන සොයුරන් ද හදපිරි සෙනෙහසින් සිහිපත් කරමි.
එසේම විශේෂයෙන් ආධුනික ග්‍රන්ථ කර්තෘවරුන්ට නොමඳ සහායක් හා ධෛර්‍ය්‍යයක් දෙන, හුදෙක් ශාස්ත්‍රීය මෙහෙවරක් ලෙස ම සලකා මෙහි මුද්‍රණ හා ප්‍රකාශන කටයුතු මැනවින් නිමකළ පොත් ප්‍රකාශකයෝහි අධිපති ආරියදාස වීරමන් මහතා කෘතඥතා පූර්වකව සිහිපත් කරමි.
මෙය අපගේ මෙබඳු ශාස්ත්‍රීය ව්‍යායාමයන්හි ප්‍රථම පියවර බැවින් ද ඉතා කෙටි කලක් තුළ මෙම ග්‍රන්ථය නිම කළ යුතුව පැවති බැවින් ද මෙහි යම් අඩුපාඩු ඇතොත් ඒවා පෙන්වාදීමට සුධීහු කාරුණික වෙත්වා. මින් විද්‍යාර්ථීන්ට යම් සේවයක් සැලසිණි නම් එහි ගෞරවය අපගේ ගුරුදෙමාපියන්ට හිමි වේවා.
දෙනියායේ පඤ්ඤාලෝක හිමි
පාලි හා බෞද්ධ අධ්‍යයන අංශය,
කැලණිය විශ්ව විද්‍යාලය,
2001. 06. 21.
ප්‍රස්තාවනා
පාලි පද්‍ය සාහිත්‍යය
සියවස් විස්සකට වඩා අධික කාලයක් තුළ වැවෙමින් පුළුල් වෙමින් ආ ගද්‍ය පද්‍ය ග්‍රන්ථාවලියකින් පාලි සාහිත්‍යය පොහොසත් වෙයි. මුල් යුගයේ පාලි කෘතිවලින් අද ශේෂව පවත්නා ග්‍රන්ථ සමූහය ඇසුරෙන් පාලිය ආගමික භාෂාවක් ලෙස හඳුන්වනු ලැබුව ද පසුකාලීනව වර්ධනය වූ ගද්‍ය හා පද්‍ය සාහිත්‍යාංගයන් සමඟ වඩාත් පුළුල්ව විහිදගිය විෂය ක්ෂේත්‍ර රාශියකට අයත් විවිධ ග්‍රන්ථ සමූහයකින් අතුපතර විහිදා රුව ගුණ තේජසින් අනූනව වැඩීගිය පාලි සාහිත්‍යයක් අද විද්‍යාමානය. පාලි කාව්‍ය ග්‍රන්ථ රචනය වඩාත් මුහුකුරා ගොස් පරිණත බවට පත්වීම දක්නට ලැබෙන්නේ පොළොන්නරු යුගයත් සමඟය. ඉන් පෙර යුගවල පහළ වූ කාව්‍ය ග්‍රන්ථ අගයෙන් ඌන බවක් මින් අදහස් නොකෙරේ. පාලි පද්‍යයන්හි වඩාත් ජනප්‍රිය විෂය ක්ෂේත්‍රයන් වූයේ ඉතිහාසය ආගමික තොරතුරු හා දේශපාලනික තොරතුරුය. මේ සියල්ලම හෝ කිහිපයක් වස්තු විෂය නොවන පාලි පද්‍ය නිර්මාණයක් සෙවීම උගහටය. එහෙත් ඒ සියල්ල යටින් දිවෙන නිරාමිෂ ආගමික බව හා නිකැළැල් ලෝකොත්තර ගුණය පාලි පද්‍යයටම ආවේණික වූවකි. රජවරුන් පිළිබඳ සියලු ක්‍රියාකාරකම් වාර්තා කරන මහාවංසය එහි සියලු පරිච්ඡේදයන් අවසන් කරන්නේ
පුඤ්ඤානි එවමමලානි සයඤ්ච සන්තො කුබ්බන්ති සබ්බවිභවුත්තමපත්තිහේතු කාරෙන්ති වාපි හි’ඛිලා පරිසුද්ධචිත්තා නානාවිසෙසජනතා පරිවාරහෙතු1