සද්ධර්මාලංකාරය - ජයබාහු ධර්මකීර්ති හිමි.pdf

සද්ධර්මාලංකාරය යනු ගම්පොළ යුගයේ විසූ පූජ්‍යාචාර්ය ජයබාහු ධර්මකීර්ති මහා ස්ථවිරයන් වහන්සේ විසින් රචිත අගනා සිංහල බෞද්ධ සාහිත්‍ය ග්‍රන්ථයකි. පාලි රසවාහිනිය ඇසුරු කරගනිමින් ලියැවුණු මෙම කෘතිය බණ කථා සාහිත්‍යයේ ඉතා ප්‍රකට සම්භාව්‍ය කෘතියක් වේ.

මෙම සංස්කරණය ශ්‍රී ලංකා ප්‍රාචීන භාෂෝපකාර සමාගම මගින් සම්භාව්‍ය ග්‍රන්ථ සංස්කරණ ව්‍යාපෘතිය යටතේ සම්පාදනය කරන ලද්දකි. මහාචාර්ය ඇම්. බී. ආරියපාල මහතාගේ ප්‍රධානත්වයෙන් යුත් ගිහි පැවිදි විද්වත් මණ්ඩලයක් විසින් පුස්කොළ පිටපත් 12 ක් සහ පෙර මුද්‍රිත සංස්කරණ ගණනාවක් සංසන්දනය කර ශාස්ත්‍රීය විධික්‍රමානුකූලව මෙම පෙළ සකස් කර තිබේ. අධ්‍යාපන ප්‍රකාශන දෙපාර්තමේන්තුව මඟින් 1996 දී මෙය මුද්‍රණය කර පළ කර ඇත.

මෙහි ධම්මසංගණි වර්ගය, නිදාන වර්ගය, අභිනීහාර වර්ගය, ධර්මසොණ්ඩක වර්ගය, මහා මන්ධාතු වර්ගය ඇතුළු වර්ග විසිහතරකින් යුත් කථා වස්තු සහ අනාගතවංස දේශනාව මෙන්ම අගනා ගැටපද විවරණයක් ද අන්තර්ගත වේ.

පෙරවදන

සද්ධර්මාලංකාරයේ මෙම සංස්කරණය සම්පාදනය කරන ලද්දේ ශ්‍රී ලංකා ප්‍රාචීන භාෂෝපකාර සමාගම මගිනි. එම සමාගම මගින් දියත් කෙරෙන සම්භාව්‍ය ග්‍රන්ථ සංස්කරණය පිළිබඳ ව්‍යාපෘතිය යටතේ පළවන දෙවන ග්‍රන්ථය මෙය වේ.

ගිහි පැවිදි විද්වතුන්ගෙන් සැදුම්ලත් මණ්ඩලයක සහභාගිත්වයෙන් සැකසුණු මෙම කෘතිය ශාස්ත්‍රීය වශයෙන් බලන කල සංස්කරණ අඩු ලුහුඬුකම් මග හැරෙන ලෙස සම්පාදනය වූ අගනා කෘතියක් ලෙස සැලකිය හැකිය. එබැවින් උසස් අධ්‍යාපනය සඳහා සිංහල භාෂාව හා සාහිත්‍යය හදාරන සැමට බෙහෙවින් ප්‍රයෝජනවත් කෘතියක් බව සඳහන් කරනු කැමැත්තෙමි.

එම සමාගමේ ඉල්ලීම පරිදි මේ සද්කාර්යයට දායක වී මෙම මාහැඟි ග්‍රන්ථය මුද්‍රණය කිරීමට අධ්‍යාපන ප්‍රකාශන දෙපාර්තමේන්තුවට හැකිවීම අගය කොට සලකමි.

එම්. කේ. ජේ. ඒ. අල්විස්
අධ්‍යාපන ප්‍රකාශන කොමසාරිස් හා නියෝජ්‍ය අධ්‍යාපන අධ්‍යක්‍ෂ ජනරාල්.
1996. 02. 20 වන දින
බත්තරමුල්ල
ඉසුරුපාය
අධ්‍යාපන ප්‍රකාශන දෙපාර්තමේන්තුවේ දීය.

සංඥාපනය

සද්ධර්මාලංකාරයෙහි මෙම සංස්කරණය සම්පාදනය වී ඇත්තේ ශ්‍රී ලංකා ප්‍රාචීන භාෂෝපකාර සමාගමේ සම්භාව්‍ය ග්‍රන්ථ සංස්කරණ ව්‍යාපෘතිය යටතේ ය. සම්භාව්‍ය සාහිත්‍ය කෘතිවල ප්‍රාමාණික වූත් සමරූපතාවෙන් යුක්ත වූත් සංස්කරණ මාලාවක් ප්‍රකාශයට පත් කිරීමේ අවශ්‍යතාව සැලකූ මෙම සමාගම දැනට වසර කීපයකට උඩදී මෙම සම්භාව්‍ය ග්‍රන්ථ ව්‍යාපෘතිය ආරම්භ කළේය. මෙම ව්‍යාපෘතියේ පළමුවන පියවර වශයෙන් සද්ධර්මරත්නාවලිය සංස්කරණය කොට ප්‍රකාශයට පත් කරන ලදී. මෙම සද්ධර්මාලංකාර සංස්කරණය එම ව්‍යාපෘතියේ දෙවන පියවරයි. මෙම ග්‍රන්ථයේ දැනට දක්නට ලැබෙන සංස්කරණ බොහෝමයක ශාස්ත්‍රීය විධි නියමයන් නොපිරිහෙලා අනුගමනය නොකරන ලද බවක් පෙනෙන්නට තිබීමත් දැනට මුද්‍රණය වී ඇති සංස්කරණවල පිටපත් ලබා ගැනීම අපහසු වීමත් නිසා මෙම ග්‍රන්ථය සංස්කරණය කිරීමට සමාගම විසින් තීරණය කරන ලදී. හැකිතාක් පුස්කොළ පිටපත් ලබාගෙන මුද්‍රිත සංස්කරණ ද පරිශීලනය කරමින් සම්මත ශාස්ත්‍රීය විධි නියමයන්ට අනුකූල වූ සංස්කරණයක් මුද්‍රණය කිරීම සමාගමේ අභිලාෂය විය. මෙම සංස්කරණය සම්පාදනය කිරීම සඳහා ප්‍රාචීන භාෂෝපකාර සමාගමේ ගිහි පැවිදි පඬිවරුන්ගෙන් හා කොළඹ විශ්වවිද්‍යාලයේ සිංහලාංශයේ ආචාර්ය මණ්ඩලයෙන් ද සැදුම්ලත් සංස්කාරක මණ්ඩලයක් පත් කර ගන්නා ලදී. මෙම මණ්ඩලයේ අධ්‍යක්ෂ ධුරය දරන ලද්දේ මහාචාර්ය ඇම්. බී. ආරියපාල මහතා විසිනි. සංස්කරණ කාර්යයට සහභාගි වූ ගිහි පැවිදි භවතුන්ගේ නාම ලේඛනය මෙහි පහත දැක්වේ.

රාජකීය පණ්ඩිත පූජ්‍ය හොරණ වජිරඤාණ නාහිමිපාණන්වහන්සේ රාජකීය පණ්ඩිත පූජ්‍ය බෙලිදෙණියේ සිරිධම්ම නාහිමිපාණන්වහන්සේ රාජකීය පණ්ඩිත පූජ්‍ය රත්කරව්වේ විමලධම්ම නාහිමිපාණන්වහන්සේ රාජකීය පණ්ඩිත පූජ්‍ය රත්ගම සුමනනන්ද නාහිමිපාණන්වහන්සේ රාජකීය පණ්ඩිත පූජ්‍ය පත්බේරියේ විමලඥාන නාහිමිපාණන්වහන්සේ ශාස්ත්‍රපති පූජ්‍ය විගමුවේ විමලජෝති හිමිපාණන් වහන්සේ මහාචාර්ය ඇම්. බී. ආරියපාල මහතා මහාචාර්ය ජී. හේමපාල විජයවර්ධන මහතා මහාචාර්ය ජේ. බී. දිසානායක මහතා මහාචාර්ය කුසුමා කරුණාරත්න මහත්මිය මහාචාර්ය තිස්ස ජයවර්ධන මහතා මහාචාර්ය ඒ. බී. දිසානායක මහතා මහාචාර්ය රෝහිණී පරණවිතාන මහත්මිය මහාචාර්ය අනුර වික්‍රමසිංහ මහතා ජ්‍යෙෂ්ඨ කථිකාචාර්ය සරත් විජේසූරිය මහතා රාජකීය පණ්ඩිත ආචාර්ය ආනන්ද තිස්සකුමාර මහතා කථිකාචාර්ය ප්‍රේමසිරි නාගසිංහ මහතා රාජකීය පණ්ඩිත රාජා දිසානායක මහතා රාජකීය පණ්ඩිත ඩී. එම්. කරුපුටුගල මහතා ප්‍රේමදාස රණසිංහ මහතා නන්දන ජයකොඩි මහතා ජනහිත විජයබණ්ඩාර මහතා ලයනල් ද සිල්වා මහතා පියසිරි නාගහවත්ත මහතා

මෙම සද්ධර්මාලංකාර සංස්කරණය සඳහා විවිධ ප්‍රදේශවලින් ලබා ගත් පුස්කොළ පිටපත් 12 ක් ද මුද්‍රිත සංස්කරණ 06 ක් ද උපයෝගී කොට ගන්නා ලදී. එම පුස්කොළ පිටපත් හා මුද්‍රිත සංස්කරණ පිළිබඳ විස්තර ද අඩෝ ලිපිවල එම පොත් හැඳින්වීම සඳහා යොදා ඇති සංකේත ද පහත දැක්වේ.

පුස්කොළ පිටපත් : - A - බලපිටියේ වැලිතර අඹරුක්ඛාරාම විහාරයට අයත් පුස්කොළ පිටපත. මෙය අසම්පූර්ණ පිටපතකි. මහාභරණ වස්තුවේ සිට චූලගල්ල වස්තුවේ අවසානය තෙක් කොටස අඩු ය.

B - හඟුරන්කෙත පොත්ගුල් විහාරයට අයිති පිටපතකි. අසම්පූර්ණ පිටපතකි. සිරිනාග වර්ගය හා නන්දි රාජ වර්ගය යන කොටස් දෙක මෙහි දක්නට නැත.

C - මිරිස්සේ සිරි සුනන්ද පිරිවෙන සතු පිටපතකි. මෙය සම්පූර්ණ පිටපතකි.

D - ගෙලිඔය, තෙලඹුගල නිග්‍රොධඛෙත්ත පිරිවෙනෙන් ලබා ගත් පිටපතකි. මෙය සම්පූර්ණ පිටපතකි.

E - ගම්පොළ බෝවල රජමහා විහාරය සතු පිටපතකි. සම්පූර්ණ පිටපතකි. මැනවින් ආරක්ෂා වී ඇත.

F - මාලිගාකන්දේ විද්‍යොදය පිරිවෙන සතු පිටපතකි. අසම්පූර්ණ පිටපතකි. අගින් විශාල කොටසක ඌනතාවක් ඇත. තෙභාතික වර්ගයෙහි පළමුවන තෙභාතික වස්තුවෙන් පිටපත අවසන් වේ.

G - හානාගල සුමංගල පිරිවෙනෙන් ලබා ගත් පිටපතකි. මෙය ද අසම්පූර්ණ පිටපතකි. අගින් සුළු කොටසක ඌනතාවක් ඇත. ග්‍රන්ථයේ අවසාන කථා වස්තුව වන තිස්සනාග වර්ගයේ මෙත්තෙය්‍ය වස්තුවේ මැද භාගයෙන් පිටපත අවසන් වේ.

H - අහුනුගොල පැලෑස්ස අලුත්වැව පුරාණ විහාරය සතු පිටපතකි. මෙය සම්පූර්ණ පිටපතකි.

I - දොඩන්දූවේ, පටුවත, මොරකොළ සිරි ගංගාරාම මහා විහාරය සතු පිටපතකි. මෙය ද අසම්පූර්ණයි. ග්‍රන්ථාරම්භයෙහි පත් ඉරුවක ඌනතාවක් පෙනේ. අගින් ද විශාල කොටසක ඌනතාවක් පෙනේ. පිටපත අවසාන වන්නේ මහාමන්ධාතු වර්ගයේ පළමුවන මහාමන්ධාතු වස්තුවෙනි.

J - බ්‍රිතාන්‍ය කෞතුකාගාර පුස්තකාලයේ හ්‍යු නෙවිල් පුස්කොළ පොත් සංචිතයෙන් ලබා ගත් පිටපතකි. එහි මෙම පිටපතේ අංකය වන්නේ Or. 6603 (38) ය. සංස්කරණය සඳහා භාවිත කරන ලද්දේ පුස්කොළ පිටපතින් ලබා ගන්නා ලද ඡායා පිටපතකි. මෙය ද අසම්පූර්ණ පිටපතකි. එහෙත් අඩු වී ඇත්තේ ග්‍රන්ථාවසානයේ පත් ඉරු කීපයක් පමණි. එනම්, මෙත්තෙය්‍ය වස්තුවේ මැද භාගයේ පටන් ග්‍රන්ථාවසානය දක්වා කොටස ය. ලිපි දෝෂ සහ අක්ෂර වින්‍යාසය පිළිබඳ දෝෂ බෙහෙවින් අඩු මෙම පිටපත සංස්කරණයේ දී වඩාත් ප්‍රාමාණික සේ සලකන ලදි.

K - බඹලපිටියේ වජිරාරාමයෙන් ලබා ගන්නා ලද පිටපතකි. මෙය ද අසම්පූර්ණ ය. තෙභාතික වර්ගයේ දෙවන පුත්‍ර වස්තුව අවසානයේ සිට කාකවර්ණ වර්ගයේ සුරනිමල වස්තුවේ මැද කොටස දක්වා වූ කොටස නැත. බෙහෙවින් දිරා යාම හා කැඩූන් විසින් කා දමනු ලැබීම නිසා මෙම පිටපත කියවීම පවා ඉතා දුෂ්කර විය. L පිටපත හා මෙය ද එක ම මුල් පිටපතකින් පිටපත් කර ගන්නා ලද බවක් පෙනේ. මෙහි අක්ෂර වින්‍යාසය සතුටුදායක ව පැවතිණි.

L - බඹලපිටියේ වජිරාරාමයෙන් ලබා ගන්නා ලද සම්පූර්ණ පිටපතකි. අග කොටසේ පත් ඉරුවල දිරා ගිය ස්වභාවයක් දක්නට ලැබිණ. අන්තිම පත් ඉරුව කළු මැද නොමැත. මෙහි අක්ෂර වින්‍යාසය දුර්වලයි. පිටපත් කිරීමේදී තැන් තැන්වලින් වචන, වාක්‍ය කොටස් හා වාක්‍ය අත්හැර දමා තිබේ. මෙය පැලෑනේ වජිරඥාන නාහිමියන්ට ගාල්ලේ පෙට්ටිගල වත්තේ ඒ. සී. එස්. ගුණරත්න මුහන්දිරම් රාළහාමි විසින් 1914.11.08 දින පූජා කරන ලද බවක් කම්බයේ සඳහන් ව ඇත.

මුද්‍රිත සංස්කරණ

ක - සද්ධර්මාලංකාරය, කළුතර සාරානන්ද හිමියන්ගේ සංස්කරණය, කොළඹ - 1928. කි - සද්ධර්මාලංකාරය, කිරීඇල්ලේ ඤාණවිමල හිමියන්ගේ සංස්කරණය, කොළඹ - 1954. ඤා - සද්ධර්මාලංකාරය, ඥානේශ්වර හිමියන්ගේ සංස්කරණය, කොළඹ - 1914. බෙ - සද්ධර්මාලංකාරය, බෙන්තර ශ්‍රද්ධාතිෂ්‍ය හිමියන්ගේ සංස්කරණය, කොළඹ - 1935. ම - සද්ධර්මාලංකාරය, මකුළුදූවේ පියරතන හිමියන්ගේ සංස්කරණය, කොළඹ - 1971.

මෙම මුද්‍රිත සංස්කරණ හැරුණු විට මහාචාර්ය පුඤ්චිබණ්ඩාර සන්නස්ගල මහතා විසින් ආචාර්ය උපාධිය සඳහා සංස්කරණය කරන ලද මෙතෙක් අමුද්‍රිත සද්ධර්මාලංකාර සංස්කරණය (ස) ද පරිශීලනය කරන ලදී.

කොළඹ විශ්වවිද්‍යාලයේ සිංහලාංශයේදී රැස්වූ සංස්කාරක මණ්ඩලය විසින් පුස්කොළ පිටපත් හා මුද්‍රිත සංස්කරණ සියල්ල කියවා බලා පාඨාන්තර සංසන්දනය කොට සාකච්ඡා කිරීමෙන් පසු පෙළට තෝරා ගන්නා පාඨය නිශ්චය කර ගන්නා ලදී. මේ සඳහා අවශ්‍ය අවස්ථාවලදී පාලි රසවාහිනිය, ජාතකට්ඨ කථාව, සහස්සවත්ථුප්පකරණය හා මහාවංශය ද පරිශීලනය කරන ලද්දේය.

මෙම සංස්කරණයේදී ද හැම විට ම ප්‍රමුඛත්වයෙන් සලකන ලද්දේ පුස්කොළ පිටපත් ය. මුද්‍රිත පොත්වල සංස්කාරකවරුන් පිටපත්වල ප්‍රතිෂ්ඨාව නොමැති ව පාඨ සංශෝධනය කර ඇති බව පෙනී ගිය ස්ථානවලදී පුස්කොළ පිටපත්වලින් ලැබෙන ප්‍රතිෂ්ඨාව මත පෙළ තෝරා ගන්නා ලදී. පැහැදිලි වශයෙන් ම ලිපි දෝෂ බව පෙනී ගිය පිටපත්වල එන පාඨාන්තර අඩෝලිපි වශයෙන් දක්වා ඇත. කිසියම් පාඨයක් ඇතැම් පිටපත්වල නොමැති බව දැක්වීම සඳහා අඩෝ ලිපිවල එම පාඨය ඉදිරියෙන් (නැත) යන්න වරහන් තුළ දක්වා ඉන් පසු එසේ නොමැති පිටපත් ආදිය සංකේත මගින් සටහන් කොට ඇත. කිසියම් ප්‍රබල හේතුවක් නිසා කිසිදු පුස්කොළ පිටපතක නොපෙනෙන අක්ෂරයක් හෝ පාඨයක් පෙළට තෝරා ගනු ලැබූ විට එම අක්ෂරය හෝ පාඨය පෙළෙහි හතරැස් වරහන් තුළ දක්වා ඇත. බොහෝ විට මෙම ක්‍රමය අනුගමනය කර ඇත්තේ පුස්කොළ පිටපත් බෙහෙවින් දූෂිත ව ඇති බව පෙනී ගිය විටදී ය. මෙබඳු තන්හිදී මුද්‍රිත සංස්කරණවල එන පාඨ විශේෂ අවධානයට ලක්විය. රසවාහිනිය, සහස්සවත්ථුප්පකරණය, මහාවංශය, ජාතකට්ඨකථාවේ නිදාන කථා කොටස යන මෙකී පාලි ග්‍රන්ථ ද අවස්ථානුරූප පරිදි පාඨ ශෝධනය සඳහා උපකාර කොට ගන්නා ලදී.

අප විසින් භාවිත කරන ලද පිටපත් අතුරින් වඩාත්ම විශ්වාසනීය පිටපත හැටියට පෙනී ගියේ J පිටපතයි. මෙහි ලිපි දෝෂ බෙහෙවින් අඩු බව පෙනී ගිය අතර පෙළට තෝරා ගැනීම වඩාත්ම යෝග්‍ය සේ පෙනී ගියේ ද මෙහි ඇතුළත් පාඨයි. A පිටපත ද මෙයට බෙහෙවින් සමාන බවක් දක්නට ලැබේ. මෙම පිටපත් දෙකේ ඇතුළත් පාඨ බොහෝ සෙයින් බෙන්තර ශ්‍රද්ධාතිෂ්‍ය සංස්කරණය සමග ද සමාන බවක් පෙනී ගොස් ඇත. ඉතිරි පිටපත් අතුරින් B, G, H යන පිටපත් තුනේ පාඨ බොහෝ සෙයින් සැසඳෙන අතර එම පිටපත් තුන එක මුල් පිටපතකින් පිටපත් කර ගත් සේ අනුමාන කළ හැකිය. ඇතැම් තැනක දී C, D, හා E පිටපත් ද පූර්වෝක්ත පිටපත් තුන හා සමග සැසඳෙන බවක් පෙනේ. K හා L යන පිටපත් දෙක බෙහෙවින් සමානකමක් දරන අතර මේ දෙක එක මුල් පිටපතකින් පිටපත් කරන ලද බව පැහැදිලි ය. අනෙක් පිටපත් හා සසඳන විට මේ දෙකෙහි විසදෘශ පාඨ දක්නට ඇතත් ලිපි දෝෂවලින් ගහන බැවින් ප්‍රාමාණික සේ සැලකිය නොහැකි ය. මේ පිටපත් දෙක බෙහෙවින් දිරා ගොස් තිබීම නිසා කියවා ගැනීම ද අපහසු විය. මුද්‍රිත සංස්කරණ අතුරින් වඩාත් ම ප්‍රාමාණික සේ පෙනී ගියේ බෙන්තර ශ්‍රද්ධාතිෂ්‍ය හිමියන්ගේ සංස්කරණයයි. අපගේ මෙම සංස්කරණයෙහි පද බෙදීමේ දී සද්ධර්මරත්නාවලිය සංස්කරණයේ දී තීරණය කර ගනු ලැබූ ක්‍රමය ම මෙහි දී ද අනුගමනය කරන ලදී. මෙහි දී අර්ථයේ පැහැදිලි බව හා ඒකීයතාව කෙරෙහි විශේෂ අවධානය යොමු විය.

සංස්කරණය සඳහා භාවිත කරන ලද පුස්කොළ පිටපත් සපයා දීමෙන් ද එම පිටපත් සංස්කරණ කාර්යය අවසන් වන තෙක් තබා ගැනීමට අවකාශ ලබා දීමෙන් ද මෙම ශාස්ත්‍රීය කර්තව්‍යයට උපකාර කළ ඉහත සඳහන් පුස්කොළ පිටපත් අයිති ඒ ඒ විහාරස්ථානාධිපතීන් වහන්සේලා වෙත සමාගමේ විශේෂ කෘතඥතාව පළ කළ යුතුය. දුර්ලභ මුද්‍රිත පිටපතක් ලබා දීමෙන් ද පේරාදෙණිය විශ්වවිද්‍යාලයීය පුස්තකාලයේ ඇති ග්‍රන්ථ පරිශීලනය කිරීමට අවශ්‍ය සහාය ලබා දීමෙන් ද පේරාදෙණිය විශ්වවිද්‍යාලයේ සිංහලාංශයේ මහාචාර්ය පී. බී. මීගස්කුඹුර මහතා මෙම සංස්කරණ කාර්යයට විශේෂ අනුග්‍රහය දැක්වීය. කොළඹ විශ්වවිද්‍යාලයීය පුස්තකාලයෙන් අවශ්‍ය පොත් පත් ලබා ගැනීමට එහි පුස්තකාලයාධිපතිනි සුමනා ජයසූරිය මහත්මිය විශේෂයෙන් උපකාරී වූවාය. කොළඹ විශ්වවිද්‍යාලයේ සිංහලාංශයේ මහාචාර්ය රෝහිණී පරණවිතාන මහත්මිය විසින් ද දුර්ලභ මුද්‍රිත සංස්කරණයක් සපයා දෙන ලදී. බ්‍රිතාන්‍ය කෞතුකාගාර පුස්තකාලයේ සංචිතයට අයත් පුස්කොළ පිටපතේ ඡායා පිටපත ලබාදෙන ලද්දේ එහි සේවයේ නියුක්ත කේ.ඩී. සෝමදාස මහතා විසිනි ඒ සියලු මහත්ම මහත්මීන්ට ප්‍රාචීන භාෂෝපකාර සමාගමේ විශේෂ ස්තූතිය හිමි වේ.

ප්‍රස්තාවනාවේ මුල් කොටස එනම් ලංකාදීපෝත්පත්ති දක්වා වූ කොටස සම්පාදනය කරන ලද්දේ මහාචාර්ය රෝහිණී පරණවිතාන මහත්මිය විසිනි. එහි අපර කොටස එනම්, ලංකාද්වීපෝත්පත්ති කථාවේ සිට ඉදිරියට පූජ්‍යපාද රාජකීය පණ්ඩිත ආචාර්ය හොරණ වජිරඤාණ නායක ස්ථවිරපාදයන් වහන්සේ විසින් සම්පාදිතයි. අවසානයෙහි යොදා ඇති ගැටපදය මහාචාර්ය ජී. හේමපාල මහතා සහ ප්‍රේමසිරි නාගසිංහ මහතා විසින් පිළියෙල කෙරිණි.

පුස්කොළ පිටපත්වලින් පාඨාන්තර සටහන් කර ගැනීමෙන් අනතුරු ව පෙළ සකස් කිරීම සඳහා ප්‍රාමාණික පාඨ නිශ්චය කිරීමේ කාර්යය මහාචාර්ය ඇම්. බී. ආරියපාල මහතා ප්‍රමුඛ මණ්ඩලයක් විසින් සිදු කරන ලදී. එම මණ්ඩලයට පූජ්‍යපාද බෙලිදෙණියේ සිරිධම්ම නායක ස්වාමීන්වහන්සේ, මහාචාර්ය ජී. හේමපාල විජයවර්ධන මහතා, මහාචාර්ය රෝහිණී පරණවිතාන මහත්මිය සහ ප්‍රේමසිරි නාගසිංහ මහතා ද අයත් වූහ. එම භවතුන්ට ද සමාගමේ කෘතඥතාව හිමි වේ.

මෙම සංස්කරණ කාර්යය කොළඹ විශ්වවිද්‍යාලයේ සිංහලාංශයේදී පැවැත්වීමට පරිපාලන කටයුතු සංවිධානය කරන ලද්දේ එවකට අංශාධිපති ව සිටි මහාචාර්ය කුසුමා කරුණාරත්න මහත්මිය විසිනි. ඒ මහත්මියගේ බලවත් පරිශ්‍රමය මේ කටයුතු සාර්ථක කර ගැනීමට බෙහෙවින් උපකාරී විය. එසේ ම ප්‍රේමසිරි නාගසිංහ මහතා අඛණ්ඩ ව මෙම සංස්කරණ කටයුතු සංවිධානයෙහි ලා දැක්වූ උද්‍යෝගය බෙහෙවින් අගය කටයුතුය.

අප සමාගමේ සියලු කටයුතුවලදී මෙන් ම මෙම ග්‍රන්ථ සංස්කරණ ව්‍යාපෘතිය ද අගයමින් නිරන්තර ව අපට සහයෝගය දක්වන අධ්‍යාපන හා උසස් අධ්‍යාපන අමාත්‍ය ආචාර්ය රිචඩ් පතිරණ මැති තුමන්ට ද අපගේ කෘතඥතාව හිමිවෙයි.

මෙම සංස්කරණයෙහි කටයුතු ආරම්භ වූයේ එම්.ඩී.ඩී. පීරිස් මහතා අධ්‍යාපන හා උසස් අධ්‍යාපන අමාත්‍යාංශයේ ලේකම් සහ ශ්‍රී ලංකා ප්‍රාචීන භාෂෝපකාර සමාගමේ සභාපති ව සිටි අවදියේදී ය. මෙහි ලා එතුමන් දුන් සහාය අගය කළ යුතුය. ඒ සමග ම මෙම කාර්යයෙහි ලා අනුග්‍රහ දැක්වූ අධ්‍යාපන හා උසස් අධ්‍යාපන අමාත්‍යාංශයේ ලේකම්වරුන් සහ සමාගමේ සභාපතිවරුන් ව සිටි එන්.වී.කේ.කේ. වේරගොඩ, ඒ. ඇන්ඩෲ ද සිල්වා යන මහත්වරුන්ට ද අධ්‍යාපන හා උසස් අධ්‍යාපන අමාත්‍යාංශයේ වර්තමාන ලේකම් හා අප සමාගමේ සභාපති ආර්.පී. ගුණවර්ධන මහතාට ද අපගේ ස්තූතිය හිමි වෙයි.

ප්‍රාචීන භාෂෝපකාර සමාගමේ ලේකම් ධුරය දරන බස්නාහිර පළාත් අධ්‍යාපන හා සංස්කෘතික අමාත්‍යාංශයේ අතිරේක ලේකම් සිරිසේන විතානගේ මහතා මෙම කාර්යය හුදෙක් නිල කටයුත්තක් පමණක් සේ නොසලකා එය සඵල කර ගැනීමට මහත් උනන්දුවෙන් හා කැපවීමෙන් තමන් අයුරින් සහයෝගය දැක්වූ බව මෙහි ලා විශේෂයෙන් ස්තුති පූර්වක ව සඳහන් කළ මනා ය.

ප්‍රමාණයෙන් විශාල වූ මෙම ග්‍රන්ථය මුද්‍රණය කිරීම සඳහා ඉදිරිපත් වීම පිළිබඳ ව අධ්‍යාපන හා උසස් අධ්‍යාපන අමාත්‍යාංශයේ අධ්‍යාපන ප්‍රකාශන දෙපාර්තමේන්තුවේ කොමසාරිස් හා නියෝජ්‍ය අධ්‍යාපන අධ්‍යක්‍ෂ ජනරාල් එම්. කේ. ජේ. ඒ. අල්විස් මහතා ප්‍රධාන එම දෙපාර්තමේන්තුවට අපගේ ස්තූතිය හිමි වෙයි.

මෙම සංස්කරණයේ මුද්‍රණ කටයුතු ඉතා ශෝභන ලෙස පරීක්ෂාකාරී ව නිම කර දුන් කොළඹ 10, සමයවර්ධන මුද්‍රණ ආයතනයේ අධිපති ආරියදාස වීරමන් මහතා ප්‍රමුඛ සියලු ම නිලධාරී මහතුන්ට හා සේවක මහතුන්ට ද විශේෂ ස්තූතිය පිරිනැමේ.

මහාචාර්ය ඇම්. බී. ආරියපාල
මහාචාර්ය ජී. හේමපාල විජයවර්ධන