සූත්‍රසංග්‍රහව සන්නය - මේධාවීතිස්ස හිමි 1935.pdf
- කතෘ :
- මේධාවීතිස්ස හිමි
- ප්‍රකාශිත වර්ෂය :
- 1935
- මුද්‍රිත වර්ෂය :
- 1935
- පිටු ගණන :
- 531
- බාගත කිරීම් ගණන :
- 1,519
- වෙබ් අඩවියට එක් කළ දිනය :
- 2019-03-29
- ගොනුවේ ප්‍රමාණය :
- 87 MB
පොතේ පිටු කිහිපයක ඡායාරූප පහතින් බලන්න.
සූත්‍රසඞ්ග්‍රහව (සූත්‍රසංග්‍රහ පදාර්ථ ව්‍යාඛ්‍යානය හෙවත් සන්නය) යනු ත්‍රිපිටකයෙන් තෝරාගත් සූත්‍ර 85ක් ඇතුළත් ප්‍රකට පාලි සංග්‍රහ ග්‍රන්ථයක් වන සූත්‍රසංග්‍රහය සඳහා සම්පාදිත විස්තරාත්මක සිංහල සන්නයකි. මෙය වස්කඩුවේ ක්ෂේත්රාසන්න විහාරාධිපති මහාමහෝපාධ්‍යාය සිරිසුගත ශාසන වංශපාල ගණාචරිය අරියවංශතිලක ශ්‍රී මේධාවීතිස්ස මහානායක ස්ථවිරයන් වහන්සේ විසින් සම්පාදනය කරන ලද්දකි.
වලනේ සරණපාල මහා විහාරාධිපති ධම්මානන්ද මහා ස්ථවිරයන්ගේ ආරාධනයෙන් ආරම්භ කරන ලද මෙම කෘතිය, කාණ්ඩ වශයෙන් මුද්‍රණය කරවා අවසානයේ සම්පූර්ණ ග්‍රන්ථයක් ලෙස ප්‍රකාශයට පමුණුවා ඇත. පාලි ඉගෙන ගන්නා ආධුනික භික්ෂූන්ගේ හා ගිහියන්ගේ පහසුව සඳහා පාලි පාඨය සමඟින් පදගත අර්ථ හා විස්තර මෙහි අන්තර්ගත වේ.
මෙම සංස්කරණය බු.ව. 2478 (ක්‍රි.ව. 1935) දී පොතුවිල කේ. ඇස්. නිශ්ශංක සහ ඇන්. ඇස්. ඩී. සිල්වා යන මහතුන් විසින් පානදුර යන්ත්‍රාලයෙහි මුද්‍රණය කරවා ප්‍රකාශයට පත් කර ඇත.
සංඥාපනය.
ශ්‍රී ශාක්‍ය ජිනෙන්ද්‍ර වූ අප සම්මා සම්බුදුපියාණන් වහන්සේගේ පර්‍ය්‍යාප්ති ප්‍රතිපත්ති ප්‍රතිවෙධසඞ්ඛ්‍යාත ත්‍රිවිධ ශාසනයෙන් පර්‍ය්‍යාප්ති නම් ලද පිටකත්‍රය ධර්‍මයෙන් උපුටා පුරාතන මහාස්ථවිර කෙනකුන් විසින් සඞ්ග්‍රහකරනලද දානකථා, ශීලකථා, ස්වර්‍ගගකථා1, කාමයන්ගේ ආදීනව යනාදි ක්‍රමයෙන් ඒ ඒ යුක්ත ප්‍රයුක්තාවස්ථාවන්හි දෙශනාකිරීමට අවශ්‍යවූ සූත්‍ර ධර්‍ම අසූපහකින් ප්‍රතිමණ්ඩිතවූද පාලිභාෂා විජානනාභිලාෂීන් විසින් බොහෝකලක පටන් හස්තසාර වස්තුවක් මෙන් සලකා පරිශීලනය කරනු ලබන්නාවූද උපසපන් භික්‍ෂූන් වහන්සේලාගේ නිශ්‍රය මුක්තභාවයට (ගුරුඇසුරෙන් තුරන්ව ස්වප්‍රධානවීමට) ප්‍රාමාණික වූ ව්‍යක්ත මුක්ත බහුශ්‍රැතභාවය පිණිස අර්ථ කථා සහිතව උද්ග්‍රහණ ධාරණකළ යුතු යයි පිළිගනු ලබන්නාවූ ද සූත්‍ර සඞ්ග්‍රහ නම් වූ ධර්‍ම සඞ්ග්‍රහය සකල ශාසනිකයන් අතුරෙහි විරූඪ ප්‍රසිද්ධ හෙයින් තත් සංඥාපනයෙහි ප්‍රපඤ්ච කථා ව්‍යර්ථ යයි සිතමිහ.
ඒ මේ ධර්‍ම සඞ්ග්‍රහයට සන්නයක් ලියා ප්‍රසිද්ධකැර වූවොත් එයින් ආධුනික ගිහි පැවිදි බොහෝදෙනාට ඇතිවන විපුල ප්‍රයෝජනය සහ ධර්‍ම ශාස්ත්‍ර සඞ්ග්‍රහය සලකා වලානේ සරණපාල මහා විහාරාධිපති අප හිතවත් විචිත්‍රභාණක සිරිසද්ධම්මාචාරිය ධම්මානන්ද මහා ස්ථවිරතුමන් විසින් මීට අවුරුදු විසිපහකට පමණ උඩදී “සූත්‍ර සඞ්ග්‍රහ පෙළට සන්නයක් ලිවිය යුතුය”යි අප වෙත කළ ආරාධනයක් සලකා එසේ සන්නයක් ලියා ප්‍රසිද්ධකැරවීමෙන් ඇතිවියහැකි උභය ලොකාභිවෘද්ධිය අපටද වැටහී ගියෙන් නිශ්ශරණාධ්‍යාශයෙන් මෙම ව්‍යාඛ්‍යානය ලිවීමෙහි ව්‍යාපෘත වීමු.
එසේ සන්නය ලියාගෙන යන අතර ගිහි පැවිදි බොහෝ දෙනාගේ ඕනෑකම පිටත් අපගේ පහසුව සලකාත් මුද්‍රිත පෝර්ම දශයකින් යුත් කාණ්ඩ වශයෙන් පොත ඉක්මනින් ප්‍රසිද්ධකරවන්ට පටන්ගත් නමුත් අතුරුතුර පැමිණි ස්වාභාවික බාධා හේතුවෙන් අතපසුවූ නමුත් වයොවෘද්ධාවස්ථාවෙහි සිටින අපගේ ආරම්භයෙහි අවසානය දැකීමට අප ශිෂ්‍ය පසියාලගල විමලරංසි තැනගේ විශේෂ ආධාර හේතුවූ බව කියම්හ.
තවද මෙහි දෙවන තුන්වන කලාප මුද්‍රණය කරවන අවස්ථාවෙහි අප හිතමිත්‍ර වැලිතර විද්‍යාභාෂ පරිවෙණාධිපති ඥා. ඒ. ඥානතිලක නායක ස්ථවිරනුමන්ගෙන්ද, සතරවන කලාපයේ පටන් අවසානය දක්වා මුද්‍රණය කරවන අවස්ථාවෙහි වේලාපුර කළුතර පෞරාණික දීපාරාම දූවේ විහාරාධිවාසී ආචාර්‍ය්‍ය බෙන්තර ශ්‍රද්ධාතිස්ස ස්ථවිරතුමන්ගෙන්ද බොහෝ ආධාරෝපකාර ලැබුණු බව සහ අප හිතමිත්‍ර කොළඹ සිරිසොභනාරාමාධිපති අධිකරණ නායක ධුරන්ධර ආභිධම්මික කහාවේ ආනන්ද මහා ස්ථවිරයන් වහන්සේගෙන් විශේෂාධාර ලැබුණු බවත් සඳහන් කරමින් අපගේ අවංකාදර ස්තුතිය පුදකරම්හ.
මෙසේ ධර්‍මශාස්ත්‍ර සඞ්ග්‍රහයම පරමාර්ථ කොට අප විසින් ලියනලද මේ සූත්‍ර සඞ්ග්‍රහ පදාර්ථ ව්‍යාඛ්‍යානය ශාසනාන්තය දක්වා ගිහිපැවිදි ආධුනිකයන්ට වැඩ සිදුවෙකෙරෙමින් පවතිවායි ආශංසනය කරමින් මෙබඳු ව්‍යාඛ්‍යානාදියක් කිරීමෙහිදී ප්‍රමාද භ්‍රමාද වශයෙන් වන සදොෂස්ථාන විද්‍යමානතාව පක්‍ෂාපරවශ නොවූ මෙබන්දෙහි කෘතහස්තවූ සකල සාධූන්ට දන්නා බැවින් එබන්දක් විද්‍යමානවත්හොත් ක්‍ෂමාපර වෙත්වා.
මුද්‍රණයෙහිදී අක්‍ෂර විපර්‍ය්‍යාසාදියෙන් වූ දෝෂ ස්ථාන පාලිය හා සන්නය සසඳා බැලීමාදියෙන් නිදොස්කර ගැනීමෙන් අර්ත්‍ථාවබොධය ම සලකත්වා.
මීට:-
සිරිසුගත ශාසන වංශපාල ගණාචරිය අරියවංශතිලක මේධාවීතිස්ස මහා නායක ස්ථවිරයෝ වම්හ.
4-4-1935,
ක්ෂේත්රාසන්න විහාරය;
වස්කඩුව.