සංසාරය හා නිර්වාණය - පැලෑණේ වජිරඥාන හිමි.pdf

සංසාරය සහ නිර්‍වාණය යනු අතිපූජ්‍ය පැලෑණේ ශ්‍රී වජිරඥාන මහානායක ස්වාමිපාදයන් වහන්සේ විසින් සම්පාදිත වටිනා ධර්ම ග්‍රන්ථයකි. බෞද්ධ දර්ශනයෙහි ප්‍රධාන ඉගැන්වීම් ද්වය වන සංසාරය සහ නිර්වාණය පිළිබඳව ධර්මානුකූල මෙන්ම ගැඹුරු විවරණයක් මෙම කෘතියෙන් ඉදිරිපත් කෙරේ.

මෙහි පළමු කොටසින් නාම-රූප ධර්මයන්ගේ පැවැත්ම හා පරම්පරාව වන සංසාරය විග්‍රහ කරන අතර, දෙවන කොටසින් සංස්කාර ධර්මයන්ගේ සංසිඳීම වූ පරම සුඛය හෙවත් නිර්වාණ ධාතුව පිළිබඳව සූත්‍ර සහ අභිධර්ම විවරණ ඇසුරින් පැහැදිලි කරයි.

මෙම කෘතිය ශ්‍රද්ධා සම්පන්න ඒ. ඒ. ගබෝසියෙල් මුදලාලි මහතාට පින් පිණිස ඔහුගේ පුත් ඒ. ඒ. ස්ටීවන් පෙරේරා මහතා විසින් ධර්මදානය පිණිස මුද්‍රණය කරවා බෙදාහරින ලද්දකි. බු.ව. 2484 (ක්‍රි.ව. 1940) දී කොළඹ මහාබෝධි යන්ත්‍රාලයෙහි මුද්‍රණය කර ඇත.

පුණ්‍යානුමෝදනාවක්

පින්වත්නි,

දැනට මම දැඩි ගිලන්ව මහාරෝග්‍ය ශාලාවෙහි වෙළඳ වාට්ටුවෙහි ප්‍රතිකාර ලබමින් ලෙඩ ඇඳේ සිටිමි. දැනට මම වයස අවුරුදු 80 ක් පමණ ගතකොට සිටින්නෙක්මි. කිසිවෙකුගේ තරතිරම් නොසලකා කාටත් සාධාරණව පැමිණෙන ජරාවෙන් හා රෝගයකින් පෙළෙමින් ලෙඩ ඇඳේ සිටින මට මා විසින් කරණ ලද බොහෝ පින් ඇති බැවින් මතක ඇති තරමින් ඒ පින්කම් මතක් කොට මහජනයාට පින් අනුමෝදනාවක් කරන්නට අදහස් විය.

මම ස්වෝත්සාහයෙන් දියුණුවූවෙක්මි. වියදමෙන් ධනය සම්පාදනය කොට තරුණ විය ඉක්මෙන්නට ප්‍රථම තරමක ධනවතෙක්මි. එතැන් පටන් බොහෝ පින් දහම් කරන්නට පටන් ගතිමි.

කොළඹ ප්‍රසිද්ධ විහාරස්ථානයක්වූ ශ්‍රී ලංකාරාමය සෑදීමට මූලිකව ක්‍රියා කොට එහි දියුණුව පිණිස බොහෝ වියදම් කෙළෙමි. අනතුරුව ලක්දිව උසස් ගුණවතකු මෙන් එකහෙලා පිළිගත් සිරිධම්ම මහාස්ථවිරපාදයන් වහන්සේ සම්මුඛවූ හෙයින් උන් වහන්සේගේ දායකත්වයට පැමිණ මගේ ඉඩමක අන්‍යයන්ගේද උපකාර ඇතිව අඩග සම්පූර්ණ ආරමයක් කරවා පුදා උන්වහන්සේ ප්‍රමුඛ තිස්නමක් පමණ මහාසංඝයා වහන්සේට සිව් පසයෙන් උපස්ථාන කෙළෙමි. පසුව එම ආරාමය පිහිටි භූමිය ආණ්ඩුවට ගත් හෙයින් තවත් සංඝාරාමයක් කරවීමේ කටයුතුවල යෙදෙන්නට විය.

පළමු ආරාමය ආණ්ඩුවට ගත් මුදලින් නැවත දෙමටගොඩ ඉඩමක් මිලයට ගෙන ඉතා ඉක්මණින් සංඝාරාමයක් කරවන ලදී. එය කරවා අවසානවීමෙන් පසු ලෙයාර්ඩ්ස්බ්‍රෝඩ් වීදියේ ජේතවනාරාමය පිහිටි භූමිය මුදලට ගෙන එය ගොඩකරවා අඩග සම්පූර්ණ සංඝාරාමයක් බවට පැමිණ වූයෙමි. මවිසින් මෙසේ සංඝාරාම සතරක් මූලිකව කරවන ලදහ.

මට මේ සියලුම අවස්ථාවලදී බෞද්ධ මහාජනයාගේ ආධාරෝපකාරද ලැබිණ. එහෙත් මේ ආරාව සම්බන්ධයෙන් රුපියල් ලක්ෂයකට අධික මුදලක් පරිත්‍යාගකර තිබේ. මේ හැර මා විසින් ලක්දිව වෙනත් වෙහෙර විහාරස්ථාන පන්සල් වෙනුවෙන්ද පරිත්‍යාග කරණලද ධනය ඉතා බොහෝය.

සෑම වෙසක් පොසොන් පසළොස්වක් දිනයන්හිදී සියයක් පමණ අසරණ දුප්පත් අයට ආහාරයෙන් හා රෙදිපිළි මිල මුදලින් ආධාර කරගෙන ආයෙමි.

මගේ දිනචරියාව වශයෙන් කුඩා කල පටන් මේ දක්වාම අළුයම හතරට නැගිට තුනුරුවන් වැඳීමත් සවස තුනුරුවන් වැඳීමත් පුරුදු කෙළෙමි. ධර්‍මපොත් පත් බොහෝ ගණනක් මුද්‍රණය කරවා ධර්‍මදානය වශයෙන් නොමිලයේ පරිත්‍යාග කෙළෙමි.

ලක්දිව ප්‍රසිද්ධ ගුණවතුන් හැටියට පිළිගත් අරණ්‍යවාසී සීලානන්ද, වවුලත්වත්තේ උපසේන යන මහාස්ථවිර වහන්සේලා නවත්වාගෙන උපස්ථාන කෙළෙමි. දඹදිව හා ලක්දිව සියලු පූජනීය ස්ථාන කරා පැමිණ වැඳ පුදාගතිමි.

තවද බෞද්ධ අධ්‍යාපනයට ආධාරයක් වශයෙන් කොළඹ නාලන්දා විද්‍යාලයෙහි මවිසින් කාමරයක් ගොඩ නංවන ලදී.

ලාදුරු ආරෝග්‍යශාලාව, කාශ ආරෝග්‍යශාලාව, අනාථමඩම්, මහළුමඩම්, ආදියෙහි වෙසෙන අසරණයන් උදෙසා බොහෝවර ධන පරිත්‍යාග කෙළෙමි. එසේම රජරටේ ජනපද පිහිටුවීමේ ව්‍යාපාරයට ආධාරයක් වශයෙන් කිපවතාවක් ඒ අලුත් ජනපද වාසීන්ට රෙදිපිළි බෙදාදීමෙන් සංග්‍රහ කෙළෙමි.

බොහෝ කලක් මුළුල්ලෙහි සිල් සමාදන්වන උවසු උවැසියන් හට දන මානාදියෙන් සංග්‍රහ කෙළෙමි. මරණානුස්මෘතිය, මෛත්‍රී භාවනාව හා ආණාපාණ සතිය භාවනා වශයෙන් පුරුදු පුහුණු කෙළෙමි.

මෙසේ උගත් සුපේශල භික්ෂු සංඝයා ආශ්‍රය කරමින් ශාසනය පවත්නා කාලයෙහි දුකසේ ලැබූ මනුෂ්‍යාත්මභාවය සඵලකර ගන්නා අදහසින් මම මේ ශාසනයෙහි බොහෝ පින්කම් කෙළෙමි.

ඒ මා විසින් සිත කය වෙහෙසීමෙන්ද ධන පරිත්‍යාග කිරීමෙන්ද රැස්කර ගන්නාලද පුණ්‍යසම්භාරය දෙවියන් සහිත සියළු බෞද්ධ ජනකායාටද හිතාහිත මැදහත් සියලු සත්වයින්ටද අනුමෝදන් කරවමි.

ඒ සියලුදෙනාම මේ පින් අනුමෝදන්ව තම තමන් නිවන් සිරි පතමින් ඔවුන්ද සුවපත් බව පතනමෙන් කරුණා මෛත්‍රී පුරස්සරව ඉල්ලමි.

මීට—රෝගාතුරව සිටින, ඒ. ඒ. ගබෝසියෙල්