විශුද්ධි මාර්ගය 2 RASSL.pdf
- කතෘ :
- බුද්ධඝෝෂ හිමි
- පිටු ගණන :
- 393
- බාගත කිරීම් ගණන :
- 2,166
- වෙබ් අඩවියට එක් කළ දිනය :
- 2018-12-10
- ගොනුවේ ප්‍රමාණය :
- 76 MB
පොතේ පිටු කිහිපයක ඡායාරූප පහතින් බලන්න.
භදන්ත බුද්ධඝෝෂ මහාස්ථවිරයන් වහන්සේ විසින් විරචිත විශිෂ්ට ථෙරවාදී ග්‍රන්ථයක් වන විසුද්ධිමාර්ගයෙහි දෙවන කොටසේ සිංහල පරිවර්තනයයි. මෙම පරිවර්තන කාර්යය ශ්‍රී ලංකා රාජකීය ආසියාතික සමිතියේ (RASSL) අට්ඨකථා පරිවර්තන ව්‍යාපෘතිය යටතේ බුද්ධශාසන අරමුදලේ අනුග්‍රහයෙන් සිදු කරන ලද්දකි.
මෙහි පරිවර්තනය ආචාර්ය හේමචන්ද්‍ර දිසානායකයන් විසින් සිදු කර ඇති අතර මහාචාර්ය කපිල අභයවංශයන් විසින් සමීක්ෂණය කොට ඇත. විසුද්ධිමාර්ගයේ අභිඥා, ස්කන්ධ, ආයතන, ධාතු, ඉන්ද්‍රිය, සත්‍ය සහ සප්ත විශුද්ධි විවරණය කෙරෙන නිද්දේසයන් මෙම දෙවැනි භාගයට ඇතුළත් වේ.
පෙරවදන (පළමු මුද්‍රණය)
පාලි භාෂා මාධ්‍යයෙන් පැවති අට්ඨකථා ග්‍රන්ථ සිංහලභාෂාවට පරිවර්තනය කොට සිංහල පාඨකයන් ගේ ප්‍රයෝජනය සඳහා ඉදිරිපත් කිරීම අරමුණු කොට ශ්‍රී ලංකා රාජකීය ආසියාතික සමිතිය මගින් පාලි අට්ඨකථා සිංහලට පරිවර්තනය කිරීමේ ව්‍යාපෘතිය ඇරඹිණි. මෙම ඓතිහාසික සත්කාර්යය සඳහා ශ්‍රී ලංකා ප්‍රජාතාන්ත්‍රික සමාජවාදී ජනරජයේ බුද්ධ ශාසන අමාත්‍යාංශයේ මග පෙන්වීම යටතේ බුද්ධ ශාසන අරමුදලේ භාරකාර මණ්ඩලයේ පූර්ණ අනුග්‍රහය ලබා ගැනීමට හැකි වූ බව මෙහි ලා සඳහන් කරනුයේ එම ආයතනයන් කෙරෙහි දැක්වෙන අතිශය කෘතඥතාවෙනි.
අට්ඨකථා ග්‍රන්ථ කොටස් දහයක් සිංහලට පරිවර්තනය කොට මුද්‍රණයෙන් පළකිරීම සඳහා ශ්‍රී ලංකා රාජකීය ආසියාතික සමිතියේ අට්ඨකථා පරිවර්තන ව්‍යාපෘතියට බුද්ධශාසන අමාත්‍යාංශයෙන් පැවරුණු වගකීම භදන්ත බුද්ධඝොෂාචාර්යපාදයන් විසින් විරචිත විසුද්ධිමග්ගයේ දෙවැනි කොටසේ සිංහල පරිවර්තනය මුද්‍රණයෙන් එළිදැක්වීමෙන් පරිසමාප්තියට පත් වෙයි.
භදන්ත බුද්ධඝොෂාචාර්ය පාදයන් විසින් රචිත විසුද්ධිමග්ගය සමස්ත බුද්ධ ධර්මයට කරන ලද අතිශය මහර්ඝ වූ අටුවාවෙකි. මුළු මහත් බුද්ධ ධර්මය පිඬුකොට විවරණය කොට දැක්වීමට බුද්ධඝොෂාචාර්යපාදයන් විසින් විසුද්ධිමග්ගයෙන් ප්‍රශස්ත ව්‍යායාමයක් දරා ඇත. ථෙරවාද සම්ප්‍රදායයේ පිළිගැනීම අනුව බුද්ධ ධර්මයේ සෑම පැති කඩක්ම ආවරණය වන සේ රචිත එකම පරිපූර්ණ ග්‍රන්ථය ලෙසද විසුද්ධිමග්ගයට අද්විතීය ස්ථානයක් හිමි වෙයි.
විසුද්ධිමග්ගයේ ප්‍රථම භාගයේ මෙන්ම මෙම අවසාන භාගයේද සිංහල පරිවර්තන කෘත්‍යය බෙහෙවින් සාර්ථකව ඉටු කරන ලද්දේ හේමචන්ද්‍ර දිසානායක සූරීන් විසිනි. පාලි හා සිංහල භාෂා විෂයෙහි විශාරද විද්වතකු වන එතුමන් වයෝ වෘද්ධත්වයේ සිටිමින් වුවද ඉතා සැලකිල්ලෙන් හා උනන්දුවෙන් කරන ලද මෙම විශිෂ්ට කර්තව්‍යය අප මෙහිදී සිහිපත් කරන්නේ අතිශය කෘතඥතාවෙනි.
ශ්‍රී ලංකා රාජකීය ආසියාතික සමිතියේ අට්ඨකථා පරිවර්තන ව්‍යාපෘතිය ක්‍රියාත්මක වූයේ අට්ඨකථා පරිවර්තන කටයුතු පිළිබඳ කමිටුව මගිනි. මෙම මාහැඟි ජාතික හා ආගමික කර්තව්‍යය උදෙසා එම කමිටුවේ සාමාජික විද්වතුන් ස්වකීය සහභාගිත්වය දක්වන ලද්දේ නිශ්ශරණාධ්‍යාශයෙනි. විසුද්ධිමාර්ගයේ දෙවන භාගය මුද්‍රණය කරවීමෙන් එම කමිටුවේ කාර්යභාරය පරිසමාප්තියට පත් කෙරෙන මෙම අවස්ථාවෙහි එම කමිටු සාමාජික විද්වතුන්ගෙන් ඉටු වූ උදාර මෙහෙය මෙහිදී සිහිපත් කිරීම අපගේ පරම යුතුකමෙකි.
ආරම්භයේ සිටම කමිටුවේ සාමාජිකත්වයෙන් පමණක් නොව ක්‍රියාකාරී සහභාගිත්වයෙන් මෙම සත්කාර්යයට සම්මාදන් වෙමින් සිට අභාවප්‍රාප්තවූ මහාචාර්ය එම්. බී. ආරියපාල, ආචාර්ය කේ. ටී. ඩබ්. සුමනසූරිය, ආචාර්ය සෝමපාල ජයවර්ධන, ආචාර්ය ඇස්. ජී. සමරසිංහ හා ශාස්ත්‍රපති රාජකීය පණ්ඩිත ජී. එස්. බී. සේනානායක යන විද්වත්හු මෙහිදී අපගේ විශේෂ ගෞරවෝපහාරයට බඳුන් වෙති.
මෙහි මුද්‍රණ කටයුතු ඉතා මැනවින් කමනීය ලෙස නිමකර දුන් දෙහිවල ශ්‍රීදේවී ප්‍රින්ටර්ස් හි අධිපති මහේන්ද්‍ර සේනානායක මැතිතුමාට හා එහි කාර්ය මණ්ඩලයට ද අපගේ කෘතඥතාව හිමි වෙයි.
මහාචාර්ය කපිල අභයවංස
ලේකම්
අට්ඨකථා පරිවර්තන කටයුතු පිළිබඳ කමිටුව
ශ්‍රී ලංකා රාජකීය ආසියාතික සමිතිය
96, ආනන්ද කුමාරස්වාමි මාවත
කොළඹ 07