මෙකල නිවුණු ඇත්තෝ - චරිතාපදානය.pdf

මෙකල නිවුණු ඇත්තෝ යනු අතිපූජ්‍ය රේරුකානේ චන්ද්‍රවිමල මහානායක මාහිමිපාණන් වහන්සේ සෙවණේ දාහත් වසරක් ගතකළ උන්වහන්සේගේ ශිෂ්‍යවර පූජ්‍ය කිරිඔරුවේ ධම්මානන්ද නායක හිමියන් විසින් සම්පාදනය කරන ලද චරිතාපදාන ග්‍රන්ථයකි.

මෙහි රේරුකානේ මහානාහිමියන්ගේ පැවිදි දිවිය, උන්වහන්සේ භාවිත කළ වන්දනා වාක්‍ය, ග්‍රන්ථකරණ කාර්යය, අවසාන කාලය, අන්තිම කැමති පත්‍රය සහ සඳවිමල සෙනසුන පිළිබඳ සවිස්තරාත්මක මතක සටහන් රැසක් අඩංගු වේ. තවද මහා තෙරවරුන් උන්වහන්සේ පිළිබඳ පළකළ අදහස් මෙන්ම දුර්ලභ ඡායාරූප එකතුවක් ද මීට ඇතුළත් කර ඇත.

මෙම කෘතිය පොකුණුවිට ශ්‍රී චන්දවිමල ධර්මපුස්තක සංරක්ෂණ මණ්ඩලය මඟින් ප්‍රකාශයට පත් කර ඇති අතර මෙහි දසවන මුද්‍රණය 2025 වසරේදී සිකුරු ප්‍රින්ටර්ස් වෙතින් මුද්‍රණය කර තිබේ.

හැඳින්වීම

අප මහ බෝසතාණන් වහන්සේ සාරාසංඛ්‍ය කල්ප ලක්ෂයක් මුළුල්ලේ බුද්ධ කාරක ධර්මයන් සපුරා වෙසඟ මැදි පොහෝ දිනයෙහි පස්මරුන් පරදවා සවාසනා සකල ක්ලේශයන් ප්‍රහාණය කොට සියල්ල දත් ලොව්තුරා බුදු බවට පැමිණ සත්සති ගෙවා අට වැනි සතියෙහි පැමිණි ඇසළ මස පුන් පොහෝ දින බරණැස ඉසිපතනයේ මිගදායේ දී තමන් වහන්සේ අවබෝධ කරගත් පරම සත්‍ය වූ චතුරාර්‍ය්‍ය සත්‍ය ධර්‍මය පස්වග තවුසන් ප්‍රමුඛ අටළොස් කෝටියක් දෙවි බඹුන්ට දේශනා කළ සේක. එබැවින් ලොවට සදහම් ආලෝකය පහළ වූ මාසය ඇසළ මාසය බව අපි කවුරුත් දනිමු. එ හෙයින් ඇසළ මාසය මුළු මහත් බෞද්ධ ලෝකයාට අති උතුම් මාසයකි.

මෑත කාලයේ සිංහල බෞද්ධ ජනතාවට තථාගත සම්මා සම්බුදු පියාණන් වහන්සේගේ ශ්‍රී සද්ධර්මය නිවැරදිව, නිරවුල්ව, හදවතට දැනෙන අයුරින් ඇතුළු කොටගෙන දහමින් සැනසීමට මග පෙන් වූ සංඝ පිතෲන් වහන්සේලා අතුරින් අද්විතීය තැනක් හිමි වූ අපගේ ගුරු දේවෝත්තම අතිපූජ්‍ය රේරුකානේ චන්දවිමල මහානායක ස්වාමීන්ද්‍රයන් වහන්සේගේ උපතත් විපතත් සිදු වූයේ ද ඇසළ මාසයේ ය. එපමණක් ද නොව උන්වහන්සේගේ සියවස් පූර්ණයත් හරියට ම යෙදුණේ ඇසළ මස පුර පසළොස්වක පොහෝ දිනයට ය.

ඇසළ මස පුර පසළොස්වක පොහෝ දිනයෙහි ඇති ශ්‍රේෂ්ඨත්වය එම පොහෝ දිනයෙහි සිල් සමාදන් වූ උපාසක උපාසිකා පිරිසට මහානායක මා හිමිපාණන් වහන්සේ පැහැදිලි කරන අයුරු අප අසා ඇත්තෙමු. උන්වහන්සේගේ ජන්ම දිනයෙහි එක් එක් වර්ෂ වල විවිධාකාර පින්කම් පැවැත් වූ අතර අනූ විය සපිරෙන දිනයේ ඇසළ මාසයේ සිදු වූ අති උතුම් සිදුවීම වූ ‘ධම්මචක්කප්පවත්තන සූත්‍ර දේශනාව’ නිමිති කොටගෙන ‘ධම්මචක්‍ර පූජාව’ නම් විශේෂ බුද්ධ පූජාවක් පැවැත් වූ සේක. උන්වහන්සේට සියවසක් පිරෙන දිනයේත් ධම්මචක්‍ර පූජාව ඉතා උසස් අන්දමින් සිදුකිරීමට කටයුතු සංවිධානය කරමින් සිටියෙමු. “අනිච්චාවත සංඛාරා” යන බුදු වදන සනාථ කරමින් පරම පූජනීය වූ අපේ මහානායක මා හිමිපාණන් වහන්සේ සියවසක් සම්පූර්ණ වීමට දින 15 ක් තිබිය දී එනම් 1997.07.04 දින අපවත් වූහ. අපවත් වීමෙන් සත් දිනයත්, තුන් මාසයත් නිමිති කොටගෙන ශතාධික මහා සංඝරත්නය විෂයෙහි සපිරිකර සංඝගත දන් පිරිනමා මහ පින්කම් සිදු කළෙමු.

උන්වහන්සේ අපවත් වී වසරක් සපිරෙන 1998.07.04 දින සවස් භාගයේ ගුණ සැමරීම හා උන්වහන්සේ ලියූ දහම් පොත් ඇගයීමේ උත්සව සභාවක් ගිහි පැවිදි විද්වතුන් සම්බන්ධ කරගෙන සිදුකිරීමට අදහස්කොට, කැලණිය විද්‍යාලයේ කුලපති ගෞරවාර්හ වැලමිටියාවේ කුසලධම්ම මාහිමියන්ගේ මූලාසනයෙන් ගිහි පැවිදි විශාල පිරිසකගේ සහභාගිකත්වයෙන් ඉතා සාර්ථකව පැවැත්වීමු. එහි දී ආචාර්ය, රාජකීය පණ්ඩිත හොරණ වජිරඥාන නායක ස්වාමීන්ද්‍රයන් වහන්සේ සහ සිංහල ශබ්දකෝෂයේ කර්තෘ මණ්ඩලයේ ආචාර්ය, පණ්ඩිත කේ.බී.ඒ. එඩ්මන් මහතා විසින් දහම් පොත් ඇගයීම සිදුකරන ලදී.

එතැන් පටන් අපේ මහානායක මාහිමිපාණන් වහන්සේගේ ජන්ම දිනය වූ ජූලි මස 19 වැනි දා දක්වා ධර්ම දේශනා මාලාවක් පැවැත්වීමට කටයුතු සංවිධානය කොට තිබුණි. ඒ අනුව 1998.07.05 දින සිට 1998.07.19 දක්වා ධර්ම දේශනා 15 ක් මහානායක මාහිමිපාණන් වහන්සේ ළඟින් ඇසුරු කළ ස්වාමීන්ද්‍රයන් වහන්සේලා ඇතුළු ප්‍රසිද්ධ ධර්ම දේශකයන් වහන්සේලා විසින් දේශනා කරන ලදී. මේ සෑම දිනයක දී ම විශාල පිරිසක් පැමිණ ධර්ම ශ්‍රවණය කළහ.

දාහත් වසක් පරම පූජනීය රේරුකානේ චන්දවිමල මහානායක මාහිමිපාණන් වහන්සේ ඇසුරු කිරීමේ දී උන්වහන්සේගේ චරිතය අප තේරුම්ගත් ආකාරයට කෙටියෙන් හෝ ලියා තැබීම අපෙන් සිදු විය යුතු යුතුකමක් ලෙස සිතා වර්ෂ පූර්ණ ගුණානුස්මරණය නිමිත්තෙන් දෙසු ධර්ම දේශනා 15 ත් අඩංගු කොට පොතක් මුද්‍රණය කිරීමට කල්පනා කළෙමු. ‘මෙකල නිවුණු ඇත්තෝ’ බිහිවූයේ එලෙස ය.

මේ ග්‍රන්ථය සැකසීමේ දී දේශකයන් වහන්සේලාගේ දේශනා ශෛලිය ඒ අයුරින් ම පාඨක භවතුන්ට දැනගැනීමට සැලැස්වීම අපගේ බලාපොරොත්තුව වූ නිසා සංස්කරණයේ දී විරාම ලකුණුවලින් ඒ කාර්ය ඉටුකර ගැනීමට උත්සාහ කළෙමු. ඒ මිස අඩු වැඩි කිරීමක් නො කළෙමු.

ගුණානුස්මරණ මහා පින්කම් මාලාව ඉතා හොඳින් සාර්ථක කරගැනීමට වැඩමවා වදාළ මහා සංඝරත්නයට පළමු කොට පුණ්‍යානුමෝදනා කරමින් කෘතඥතාපූර්වක ගෞරවය පිරිනමමු. ධර්ම දේශනා මාලාවේ දායකත්වය දැරූ භවතුන් ධර්ම මහා සම්මන්ත්‍රණය ඇතුළු සියළු පින්කම්වලට නන් අයුරින් අපට සහයෝගය දැක් වූ සෑම දෙනාමත් පුණ්‍යානුමෝදනා කරමින් සිහිපත් කරමු.

‘මෙකල නිවුණු ඇත්තෝ’ කියවීමෙන් පැහැදී පරම පූජනීය රේරුකානේ මහනාසමිඳුන් ලියූ ධර්ම ග්‍රන්ථ කියවීමට ගිහි පැවිදි බොහෝ දෙනෙක් පෙළඹී ඇති බව දුරකථන මාර්ගයෙන් ද ලියුම්වලින් ද අපට දැනුම් දෙති. එය අපගේ අදහස් ඉටුවීමක් බැවින් අපට නිරාමිෂ ප්‍රීතිය ගෙන දෙන කරුණක් බව ද මෙහි දී දක්වනු කැමැත්තෙමු.

2017.07.04 දිනට පරම පූජනීය මහානායක මාහිමිපාණන් වහන්සේ අපවත් වී විසි වසරකි. 2017.07.19 දිනට උන්වහන්සේගේ ජන්ම ලාභයෙන් වසර 120 ක් සපිරේ. ඒ නිමිත්තෙන් ගුණ සැමරීමේ පින්කම් මාලාවක් පැවැත්වීමට තීරණය කළෙමු. ඒ අනුව 2017.09.04 දින මහනාසමිඳුන්ගේ ගුණ සැමරීමත් උන්වහන්සේ සිදු කළ මහා ධර්ම දානයත් ඒ දහම් පොත් ඉදිරියට පවත්වාගෙන යාමට පිහිටුවා ඇති ශ්‍රී චන්දවිමල ධර්ම පුස්තක සංරක්ෂණ මණ්ඩලයට පරිත්‍යාග කළ පින්වතුන් සිදු කර ගත් උසස් ධර්ම දානමය පින්කම පිළිබඳවත් කරුණු දක්වමින් ‘ධර්ම දානය’ මාතෘකාව යටතේ අප විසින් ධර්ම දේශනයක් සිදුකරන ලදී. පොකුණුවිට ශ්‍රී විනයාලංකාරාරාමයට අප පැමිණි තැන් පටන් සම්බුදු සසුන වෙනුවෙන් සිදු කළ විහාරාංග ඉදිකිරීම්, සඳවිමල සෙනසුන අලුතෙන් ඉදිකිරීම, පැවිදි කිරීම් ඇතුළු සියළු දේ පිළිබඳවත් ඒවාට උදව් උපකාර කළ පින්වතුන්ට පුණ්‍යානුමෝදනා වශයෙන් ඒවායේ ආනිශංස දක්වමින් 2017.07.05 දින සිට 2017.07.13 දින දක්වා ධර්ම දේශනා මාලාවක් ද පැවැත්වීමු. මහනාසමිඳුන් ළඟින් ඇසුරු කරමින් උන්වහන්සේ කෙරෙහි පැහැදී සිටි මහානායක මාහිමියන් වහන්සේලා ඇතුළු ගෞරවනීය ස්වාමීන් වහන්සේලා කීපනමක් වැඩමවා දානයක් ද පිරිනැමීමු. 2017.07.19 දින ධර්ම චක්‍ර බුද්ධ පූජාව විශාල පිරිසකගේ සහභාගිකත්වයෙන් පැවැත්වීමු.

පරම පූජනීය රේරුකානේ චන්දවිමල මහානායක මාහිමිපාණන් වහන්සේගේ ජීවිතයෙන් ගිහි පැවිදි දෙපක්ෂයට ගතහැකි ආදර්ශ ඉස්මතු කරමින් ‘කරණීය මෙත්ත සූත්‍රය’ ඇසුරෙන් උන්වහන්සේගේ චරිත ගුණ විස්තර කොට ලියා තැබීමටත් වර්තමාන යුගයේ විවිධ වැරදි මත දහම යැ යි කියා, ලියන කියන ගිහි පැවිදි දෙපක්ෂයෙන් සම්බුදු සසුනට සිදුවීගෙන යන අයහපත් තත්ත්වයට නිසි පිළිතුරු වශයෙන් මහනාසමිඳුන්ගේ ග්‍රන්ථ තුළින් සිදුවන මහා ශක්තිය පෙන්වා දීමටත් කල්පනා කළෙමු.

මහනාසමිඳුන්ගේ චරිත ගුණ ලියා ඇති ‘මෙකල නිවුණු ඇත්තෝ’ ග්‍රන්ථයේ වර්ෂ පූර්ණ ගුණ සමරුව නිමිත්තෙන් සිදු කළ ධර්ම දේශනා සියල්ල ම ඇතුළු කළෙමු. එබැවින් එම ග්‍රන්ථය පිටු 450 ක් ඉක්ම වූ ග්‍රන්ථයක් බවට පත් විය. එහෙත් එය අටවැනි වරටත් මුද්‍රණය විය. ඉදිරියේ දී ඉහළ යන මුද්‍රණ වියදම අනුව එම ග්‍රන්ථය මිලයට ගැනීම අපහසු වුවහොත් මහනාසමිඳුන්ගේ අවසාන මොහොත දක්වා ඇති වටිනා චරිත ගුණ සැදැහැවතුන්ට දැන ගැනීමට අවස්ථාව අඩු වීමටත් ඉඩ ඇත. එ බැවින් ඒ ධර්මදේශනා පැවැත්වූ ගෞරවනීය ස්වාමීන්ද්‍රයන් වහන්සේලා ධර්ම දේශනාවට ප්‍රථමයෙන් පරම පූජනීය රේරුකානේ චන්දවිමල මහානායක මාහිමිපාණන් වහන්සේ පිළිබඳව සිදුකළ ගුණකථන පමණක් මෙම ග්‍රන්ථයට ඇතුළු කළෙමු.

තව ද මහනාසමිඳුන්ගේ යම් යම් අවස්ථාවල දී ගත් ඡායාරූප කීපයකුත් මෙම ග්‍රන්ථයේ අවසානයට යොදා ඇත.

මෙම සියළු කාර්යයන්හි දී මුලසිට ම සැදැහැයෙන් යුක්තව මහත් කැපවීමෙන් ක්‍රියා කරන ශ්‍රී චන්දවිමල ධර්ම පුස්තක සංරක්ෂණ මණ්ඩලයේ ගරු ලේකම් ශාස්ත්‍රවේදී චන්ද්‍රපාල තනිප්පුලි ආරච්චි මහතාටත් විශේෂයෙන් සුභාශිංසනය කරමු.

සෝදුපත් බැලීමේ දී සහාය දුන් අපගේ ජ්‍යෙෂ්ඨ ශිෂ්‍ය ශාස්ත්‍රවේදී කළුතර පදුම හිමියන්ටත්, පරිගණක පිටු සැකසීම සහ පිටකවරය නිර්මාණය කරදුන් ශ්‍රී විනයාලංකාර දහම් පාසලේ ආචාර්ය ප්‍රභාෂ්වර ශ්‍රී ජයවික්‍රම මහතාටත්, මුද්‍රණ කටයුතු කවදත් හොඳින් සිදුකර දෙන වෙනිවැල්කොළ, සිකුරු ප්‍රින්ටර්ස් හි අධිපති ගිහාන් ජයවර්ධන මහතාට සහ එම මහත්මියටත් ගුණාශිංසනය පළකර සිටිමු.

මීට
ශාසනප්‍රීතිකාමී,
කිරිඔරුවේ ධම්මානන්ද නායක ස්ථවිර
ගරු සභාපති,
ශ්‍රී චන්දවිමල ධර්ම පුස්තක
සංරක්ෂණ මණ්ඩලය

2025 පෙබරවාරි
පොකුණුවිට ශ්‍රී විනයාලංකාරාරාමයේ දී ය.