සාමණේර බණ දහම් පොත - කල්‍යාණී යෝගාශ්‍රම.pdf
- ප්‍රකාශිත වර්ෂය :
- 1987
- මුද්‍රිත වර්ෂය :
- 1987
- පිටු ගණන :
- 60
- බාගත කිරීම් ගණන :
- 8,401
- වෙබ් අඩවියට එක් කළ දිනය :
- 2018-02-14
- ගොනුවේ ප්‍රමාණය :
- 40 MB
පොතේ පිටු කිහිපයක ඡායාරූප පහතින් බලන්න.
සාමණේර බණ දහම් පොත යනු පැවිදි බිමට පත්වන සාමණේර භික්ෂූන් වහන්සේලාගේ ප්‍රයෝජනය පිණිස සම්පාදිත ප්‍රායෝගික විනය හා වත්පිළිවෙත් අත්පොතකි. පැරණි ආචාර්යවරුන් විසින් විනය සහ සූත්‍ර පිටකයන්හි එන කරුණු ඇසුරින් සකසන ලද සාමණේර බණ දහම් පොත, ශ්‍රී කල්‍යාණී යෝගාශ්‍රම සංස්ථාවට සක්විතිසරව පිරීම නිමිත්තෙන් පුජ්‍ය නාවුයනේ අරියධම්ම හිමියන් විසින් සංස්කරණය කොට ඇත.
පැවිද්ද ලැබීමේ මූලික වාක්‍යයන්ගේ සිට සිල් රැකීම, ප්‍රත්‍යවේක්ෂා ක්‍රම, දිනචරියාව, සෙඛියා සහ භාවනා ක්‍රම මෙන්ම එදිනෙදා සජ්ඣායනා කරනු ලබන පිරිත් සූත්‍ර ද මෙහි ඇතුළත් වේ. මීට අමතරව පොතෙහි අඩංගු ප්‍රධාන මාතෘකා කිහිපයක් මෙසේය:
- පැවිද්ද ඉල්ලීමේ වාක්‍යය සහ සරණාගමනය
- සාමණේර දශ ශීලය හා හෙරණසිඛ
- සිවුපස ප්‍රත්‍යවේක්ෂා ක්‍රමය (අතීත හා වර්තමාන)
- චතුපාරිශුද්ධි ශීලය, සෙඛියා සහ සෙඛියා සන්නය
- දිනචරියාව, සතර කමටහන් හා පිළිකුල් භාවනාව
- පිරිත් සූත්‍ර සහ අටවිසි පිරිත ආදී ආශිර්වාද ගාථා
මෙම කෘතිය කොළඹ සමයවර්ධන මුද්‍රණාලයේ මුද්‍රණය කරවා 1987 වර්ෂයේදී ඩී. ජේ. අලහකෝන් සහ යූ. කේ. එඩ්මන්ඩ් යන මහත්වරුන්ගේ ධර්මදාන දායකත්වයෙන් ප්‍රකාශයට පත් කර ඇත.
සංඥාපනය
බුදුරජාණන් වහන්සේ බුද්ධත්වයට පත්ව වර්ෂයක් පිරෙන තුරුම කුලපුත්‍රයන් පැවිදි කිරීමට අනුදැන වදාළේ සරණාගමන උපසම්පදාවෙහි පිහිටුවීම වශයෙනි. ප්‍රථම බුද්ධ වර්ෂයෙහි සාමණේර ප්‍රව්‍රජ්‍යාවක් නොවීය. තිසරණයෙහි පිහිටුවීමෙන් ම උපසම්පදාවෙහි පිහිටීම වන්නේය. එහෙත් බුදුපුත් රාහුල කුමරුවන් පැවිදි කළ තැන් පටන් සරණාගමන උපසම්පදාව ප්‍රතික්ෂේප කොට සාමණේර ප්‍රව්‍රජ්‍යාව අනුදන්නා ලදී. එතැන් සිට උපසම්පද සීලය අනුදන්නා ලද්දේ ඤත්තිචතුත්ථ කම්මයෙනි. සරණාගමන විධි සාමණේර දශ ශීලය, සාමණේරයන් විසින් පිරිය යුතු වත් පිළිවෙත් චාරිත්‍ර වාරිත්‍ර විධි සියල්ල පනවා වදාළේ රාහුල ප්‍රව්‍රජ්‍යාවෙන් පසුවය.
සැදැහැයෙන් සසුන් ගතවන කුලපුත්‍රයන් වෙත මහා කරුණාවෙන් අනුදැන වදාළ නිර්මල වූ නෛය්‍යානික ප්‍රතිපත්ති මාර්ගය විනය පිටකයෙන් හා සූත්‍රාන්ත පිටකයෙන් ද ගෙන සාමණේර බණ දහම් පොත නමින් පැරණි ආචාර්යයන් වහන්සේ නමක් විසින් සකසා ඇති මේ ග්‍රන්ථය වනාහි අතිශයින් අගනා ප්‍රශස්ත ග්‍රන්ථ රත්නයකි. මෙහි ඇතුළත් පිළිවෙත් මග අනුගමනය කරන පැවිද්දෝ ඒකාන්තයෙන් බුදු සසුන සුරකන්නෝම වෙති.
සසර දුකින් මිදී සතර මග සතර ඵල පිළිවෙළින් නිවනට පැමිණීමේ නිශ්ශරණාධ්‍යාශයෙන් සසුන් පිළිවෙත් අනු පිළිවෙළින් පුරනු කැමතිව, ශ්‍රී කල්‍යාණි යෝගාශ්‍රම සංස්ථාවේ ප්‍රව්‍රජ්‍යාව ලබන ශ්‍රද්ධා ප්‍රව්‍රජිත කුලපුත්‍රයන් උදෙසා මේ සාමණේර බණ දහම් පොත සංස්කරණය කොට මුද්‍රණය කරනු ලබන්නේ සම්බුදු සසුන ආරක්ෂා කිරීමේ උදාරධ්‍යාශයෙන් සමාරබ්ධ ශ්‍රී කල්‍යාණි යෝගාශ්‍රම සංස්ථාවට සක්විතිසරව පිරීම නිමිත්තෙනි.
මේ පොත මුද්‍රණය කිරීමට අනුමත කරමින් උපදෙස් දෙවා වදාළ අති පූජ්‍ය පණ්ඩිත මාතර සිරි ඤාණාරාමාභිධාන මහොපාධ්‍යාය මාහිමියන් වහන්සේ, අති පූජ්‍ය රාජකීය පණ්ඩිත කඩවැද්දුවේ ශ්‍රී ජිනවංශාභිධාන මාහිමියන් වහන්සේ ද යන ශ්‍රී කල්‍යාණි යෝගාශ්‍රම සංස්ථාධිපති ශාසනභාරධාරි මාහිමියන් වහන්සේ දෙනමට තෙරුවන් ගුණ බෙලෙන් නීරෝගී සුව දීර්ඝායුඃ ශ්‍රී ශාන්ති අත්වේවා.
පොත මුද්‍රණයට සුදුසු ලෙස සම්පූර්ණයෙන් පිටපත් කළ පූජ්‍ය මාතලේ ධම්මින්ද ආයුෂ්මතුන් වහන්සේටත්, ධර්මදාන වශයෙන් මෙය පිරිනමන කොළඹ මරදානේ පින්වත් ඩී. ජේ. අලහකෝන් මහත්මාට ඇතුළු දරු පිරිසටත්, ඉමහත් උද්‍යොගයෙන් මුද්‍රණ කටයුතු ඉටු කළ කොළඹ මරදානේ සමයවර්ධන මුද්‍රණාලයේ අධිපති තුමා ඇතුළු කාර්‍ය්‍ය මණ්ඩලයටත් මෛත්‍රී ආශීර්වාද පූර්වාංගම අවංක ස්තූතිය පිරිනමන අතර ඒ සැමට ආයුරාරෝග්‍යාදි සම්පත් සිද්ධව ප්‍රාර්ථනීය බෝධියෙන් ශාන්ත නිවන් සුව අත්වේවා යි මෙත් සිත් පවත්වමි.
“චිරං තිට්ඨතු ලොකස්මිං - සම්මා සම්බුද්ධ සාසනං”
මෙයට,
නාවුයනේ අරියධම්ම