විනිශ්චයාර්ත්ථ දීපනී 2 - විනයවිනිච්ඡය සන්නය.pdf
- කතෘ :
- ලංකාගොඩ ධීරානන්ද හිමි
- ප්‍රකාශිත වර්ෂය :
- 1957
- මුද්‍රිත වර්ෂය :
- 1957
- පිටු ගණන :
- 187
- බාගත කිරීම් ගණන :
- 1,233
- වෙබ් අඩවියට එක් කළ දිනය :
- 2018-02-14
- ගොනුවේ ප්‍රමාණය :
- 42 MB
පොතේ පිටු කිහිපයක ඡායාරූප පහතින් බලන්න.
විනිශ්චයාර්ථදීපනී නම් විනයවිනිශ්චය ව්‍යාඛ්‍යානය (දෙවන භාගය) යනු අමරපුර ශ්‍රී සද්ධර්මවංශ නිකායාධිනාථ ලංකාගොඩ ශ්‍රී ධීරානන්ද මහාස්වාමිපාදයන් වහන්සේ විසින් රචිත විනයවිනිශ්චය සන්නයයි. මෙහි ඛන්ධකකථාවේ සිට උත්තරවිනිශ්චය අවසානය දක්වා කොටස් අන්තර්ගත වේ.
මෙම කෘතිය සිරිසද්ධම්මවංසපාල ධීරානන්ද තලල්ලේ ඉහළවෙල සිරි ධම්මරක්ඛිතාභිධාන මහානායක ස්වාමීන්ද්‍රයන් වහන්සේගේ විශෝධනයෙන්ද, තලල්ලේ පණ්ඩිත ධම්මානන්ද ස්ථවිරයන් වහන්සේගේ සංස්කාරකත්වයෙන්ද යුක්තව බුද්ධ ජයන්ති නිමිත්තෙන් ලංකා බෞද්ධ මණ්ඩලය මගින් 1957 දී ප්‍රකාශයට පත් කරන ලද්දකි.
සංඥාපනයයි
විනයවිනිශ්චයව්‍යාඛ්‍යානයේ භික්ඛුණීවිභඞ්ගය අවසන් කොට ඇති පූර්වභාගය ගාථා දෙදහස්සියතෙතාලිසකින් සමන්විතය. දෙදහස් පන්සියයේ සම්බුද්ධජයන්තිය නිමිති කොට පසුගිය (1956) වර්ෂයෙහි දී එය අපගේම සංස්කාරකත්වයෙන් ලංකා බෞද්ධ මණ්ඩලය මගින් ප්‍රකාශයට පමුණුවන ලදි.
මේ ඒ ග්‍රන්ථයෙහි අවසාන භාගයයි. ඛන්ධකකථාවෙහි පටන් සම්පූර්ණ විනයවිනිශ්චයයෙහි හා උත්තරවිනිශ්චයයෙහි ව්‍යාඛ්‍යානය මේ භාගයට ඇතුළත් ය. විනයවිනිශ්චයව්‍යාඛ්‍යානයෙහි පූර්‍වභාගයේ ඇතුළත් කොටස් වරින්වර මුද්‍රිතව ඇති නමුත් උත්තරවිනිශ්චය සහිත වූ මේ අවසාන භාගයේ ව්‍යාඛ්‍යානය නම් මීට පෙර ප්‍රකාශයට නො පැමිණියේ ය.
එහෙයින් විනයවිනිශ්චයව්‍යාඛ්‍යානය පරිශීලනය කරන්නවුන්ට මේ අවසාන භාගය මහාර්‍හලාභයක් වනු ඇත. උත්තරවිනිශ්චය සහිත වූ මුළු පොතට ම පිළියෙල කළ වචනානුක්‍රමණිකාවක් මේ පොත අවසන්හි යොදනු හැකිවීම අපට මහත් සතුටකි. එය පිළියෙල කිරීමෙහි දී අග්‍ර මහාපණ්ඩිත පොල්වත්තේ බුද්ධදත්ත මහාස්වාමීන්ද්‍රයන් වහන්සේගේ සංස්කාරකත්වය ඇතිව ඉංග්‍රීසි අකුරින් මුද්‍රිතව එංගලන්තයෙහි පලකරවූ උත්තරවිනිශ්චය සහිත විනයවිනිශ්චයෙහි අගට යොදා ඇති අකාරාදිය අපේ කාර්ය්‍යභාරය සැහැල්ලු කළ බව සඳහන් කරන්නේ කෘතඥතාපූර්වක වූ ගෞරවයෙනි. විනය පෙළේ ආ රිසියෙන පාලි වචනයකට මේ ව්‍යාඛ්‍යාතෘන් වහන්සේ දුන් සිංහල අදහස කුමක්දැයි පහසුවෙන් දැන ගැනීමට ඒ අනුක්‍රමණිකාව ඉවහල් වනු ඇත. ලංකා බෞද්ධ මණ්ඩලයෙහි සාහිත්‍යකාරක සභාවේ සම්පාදක තැන්පත් විද්‍යාලංකාර පිරිවෙන්හි ආචාර්‍ය්‍ය පණ්ඩිත කොස්ගොඩ ධම්මවංශ ස්වාමීන්ද්‍රයන් වහන්සේ මෙහි දී අපට සෑම අයුරින් ම උපස්තම්භක වූහ.
අපහට පැවරෙන නොයෙක් කටයුතු මධ්‍යයෙහි මේ සඳහා වැඩි අවකාශයක් ලබාගනු පිණිස අප හිතවත් මාණ්ඩලික මෙඩිකල් ඔෆිසර් තැන්පත් මහතාගේ කාරුණික අනුග්‍රහය හැම ලෙසින් ම උපකාර වූ බව ගුණානුස්මරණ පූර්‍වකව පවසමිහ. මෙහි ශෝධ්‍යපත්‍ර බැලීමෙහි දී අපට සහායව ක්‍රියා කළ සියලුම ස්වාමීන්ද්‍රයන් වහන්සේලාට අපගේ කෘතඥතාව හිමි ය. පොතේ අගට යොදා ඇති නිස්සයාවිරිය නිවෙදනයෙහි සවැනි ගාථාවේ ‘වසනා වලුකාරාමෙ’ යනු ‘වසනා වාලුකාරාමේ’යි වියයුතු. මෙය මුද්‍රණය කරවීම සඳහා සෑම අයුරින් ම රැකුල් දුන් ලංකා බෞද්ධ මණ්ඩලයේ සාහිත්‍යකාරක සභාවට අපගේ හෘදයංගම කෘතඥතාව පිරිනමමු.
මේ පොතේ කටයුතු පිරිසිදු ලෙස ඕනෑකමින් සම්පූර්ණ කොට දුන් සිංහලජාතිය මුද්‍රණාලයාධිකාරී තුමන් ඇතුළු කාර්ය්‍ය මණ්ඩලයට ද අපගේ ස්තුතිය හිමි වේ.
මෙයට,
ලෝ සසුන් වැඩ කැමති,
තලල්ලේ ධම්මානන්දස්ථවිර.