භික්ෂු ප්රාතිමෝක්ෂය සහ විනය කරුණු - කිතුල්ගොඩ ආරණ්‍ය.pdf
- ප්‍රකාශිත වර්ෂය :
- 2017
- මුද්‍රිත වර්ෂය :
- 2017
- පිටු ගණන :
- 289
- බාගත කිරීම් ගණන :
- 6,393
- වෙබ් අඩවියට එක් කළ දිනය :
- 2018-10-11
- ගොනුවේ ප්‍රමාණය :
- 5.1 MB
පොතේ පිටු කිහිපයක ඡායාරූප පහතින් බලන්න.
භික්ෂු ප්රාතිමෝක්ෂය සහ විනය කරුණු යනු උපසම්පන්න භික්ෂූන් වහන්සේලාගේ ප්‍රාතිමෝක්ෂ සංවර ශීලය සහ විනය කර්ම පිළිබඳ මූලික කරුණු ඇතුළත්, සිංහල අනුවාද සහිත අත්පොතකි. කිතුල්ගොඩ අරණ්‍ය සේනාසනය මඟින් සම්පාදනය කර ධර්ම දානය පිණිස ප්‍රකාශයට පත් කරන ලද මෙහි තෙවන මුද්‍රණය 2017 වසරේදී නිකුත් විය.
මෙහි භික්ෂු ප්‍රාතිමෝක්ෂ පාලිය හා එහි සිංහල අර්ථ විවරණයට අමතරව සංඝ උපෝසථ විධි, පවාරණ විධි, වස් අධිෂ්ඨාන, කඨිනත්ථරණය, උපසම්පදා කර්මය, සීමා සම්මුති සහ නානාවිධ පරිවාස-මානත්ත කර්මයන් සඳහා අදාළ කර්මවාක්‍ය හා විනය නීති මැනවින් සංග්‍රහ කර ඇත.
පොතෙහි අන්තර්ගත ප්‍රධාන මාතෘකා කිහිපයක් මෙසේය:
- ඕවාද ප්රාතිමෝක්ෂය සහ විනය පිටක නමස්කාරය
- උපෝසථය හා භික්ෂු ප්රාතිමෝක්ෂය (සිංහල අනුවාද සහිතව)
- පාරිසුද්ධි උපෝසථය සහ වස් අධිෂ්ඨානය
- සංඝ පවාරණ විධි සහ කඨිනත්ථරණය
- උපසම්පදා කර්මය සහ සීමා සම්මුති
- අපටිච්ඡන්න, ඒකාහපටිච්ඡන්න ආදී පරිවාස හා පටිකස්සන ක්‍රම
- සිවුපසය ප්‍රත්‍යවේක්‍ෂාව හා දසධම්ම සූත්‍රය
පිදුම...
ගෞතම බුදුන් වහන්සේගේ අනුශාසනාව පරිදි සාසන බ්‍රහ්මචරියාවෙහි හැසිරෙමින් මේ අනමතග්ග සංසාරයෙන් එතෙර වීමට වීර්යය වඩන සියලු පැවිදි උපසපන් බුද්ධ පුත්‍රයන් වහන්සේලාට යි !
අනුමෝදනාව....
“යෝ වෝ ආනන්ද මයා ධම්මෝ ච විනයෝ ච දේසිතෝ පඤ්ඤත්තෝ සෝ වෝ මමච්චයේන සත්ථා” යැයි භාග්‍යවතුන් වහන්සේ පිරිනිවන් මඤ්චකයේදී ධර්ම භාණ්ඩාගාරික අනඳ මාහිමිපාණන් වහන්සේ අමතා වදාළ අයුරින් ඒ සම්බුද්ධ පරිනිර්වාණයෙන් ඉක්බිති ධර්ම-විනය ම පිහිට පිළිසරණ කරගත් සුපේශල බුද්ධ පුත්‍රයන් වහන්සේලා ස්වකීය නිර්වාණය සාක්‍ෂාත් කරගත්තාහු, අනාගතයේ නිස්සරණාධ්‍යාශයෙන් සසුන් වන කුලපුතුන් උදෙසා පිවිතුරු සුභාෂිත සද්ධර්මය සුරක්‍ෂිත කළාහු ය. පළමු ධර්ම සංගායනාවේදී කවරකු විසින් සුපිරිසිදු සද්ධර්මය ආරක්‍ෂා කරනු ලබන්නාහුදැයි අසන ලද පැනයකදී “අනාගතේ ලජ්ජී රක්ඛිස්සන්ති, ලජ්ජී රක්ඛිස්සන්ති, ලජ්ජී රක්ඛිස්සන්ති” යැයි තෙවරක් ම උදන් ඇනූ ඒ ශාසන මාමක උතුමන් වහන්සේලාගේ බලාපොරොත්තුව පරිදි එදා මෙදා තුර ලජ්ජී සුපේශල බුද්ධපුත්‍රයන් වහන්සේලා සර්වඥ සුභාෂිත සද්ධර්මය මැනවින් ආරක්‍ෂා කළාහු ය.
ඒ සර්වඥයන් වහන්සේ ධරමාන කාලයේ ම සාරිපුත්ත, මොග්ගල්ලාන ආදී වූ ස්ථවිර පරම්පරාවෙන් සුරක්‍ෂිත කරගත් සද්ධර්මය අනාගතයේ පාප භික්ෂූන් විසින් අධර්ම-අවිනය ද්වීපනය කිරීමට මත්තෙන් සංගායනාවට බඳුන් කරමින් සද්ධර්මයේ චිරස්ථිතිය පිණිස උරදුන්නෝ මහා කාශ්‍යප මහ රහතන් වහන්සේ ය. එහිලා විනය පිටකය උපාලි මහ රහතන් වහන්සේ විසින් බුදුරජාණන් වහන්සේ පැනවූ අයුරින් ම සංගායනාවට බඳුන් කළ අතර අනඳ මහ රහතන් වහන්සේ විසින් සූත්‍ර, අභිධර්ම පිටකද්වය සංගායනාවට බඳුන් කරමින් ශාසන චිරස්ථිතියට දායක වූහ. එතැන් පටන් භාණක පරපුරෙන් පැවත ආ ඒ තෙවළා දහම යළි යළිත් අලජ්ජීන් විසින් සිදුකරන හානියෙන් සුරක්‍ෂිත කරනු වස් යස මහ රහතන් වහන්සේ, මොග්ගලිපුත්තතිස්ස මහ රහතන් වහන්සේ ආදී වූ ශාසන මාමක ස්ථවිරයන් වහන්සේලා විසින් සංගීතියට නැංවූවාහු ධර්ම-විනය ද්වීපනය පිණිස ස්වකීය දායකත්වය මොනවට සපයා දුන්නෝ ය. ඒ සියලු මහ රහතන් වහන්සේලා මෙන්ම එදා පටන් අනේකවිධ දුක් ගැහැට මධ්‍යයේ සුපිරිසිදු ධර්ම-විනය රැකගැන්මට උරදුන් ලජ්ජී සුපේශල මහා සඟරුවන අප හදෙහි සුපිපි සොම්නස් කුසුමින් පුදමින් නමස්කාරපූර්වකව සිහිපත් කළ යුත්තාහ.
ඉක්බිති පන්දහසක් කල් සුපිරිසිදු ථේරවාදී ධර්ම-විනය සුරක්‍ෂිත වන බවට සර්වඥයන් වහන්සේ විසින් අදිටන් බල පිහිටුවන ලද්දාවූ සිරිලක් ධර්මද්වීපයට ඒ තෙවළා දහම රැගෙනවිත් ප්‍රතිෂ්ඨාපනය කළෝ මහා මහින්ද මහ රහතන් වහන්සේ ප්‍රමුඛ රහතන් වහන්සේලා ය. උන්වහන්සේලා වෙතින් මොනවට ලබාගත් ධර්ම-විනය ශ්‍රී ලංකාද්වීපය තුළ මුල් බැස්සවූවෝ අරිට්ඨ මහ රහතන් වහන්සේ ප්‍රමුඛ මහ සඟරුවනය. එදා පටන් මහා දුර්භික්‍ෂ, සාපිපාසාදී අනේකවිධ දුෂ්කරතා මැද ශ්‍රී සද්ධර්මය කටපාඩමින් දරාගෙන ආ අතීත මහොත්තමයන් වහන්සේලා ද සද්ධර්මයේ චිරස්ථිතිය උදෙසා ත්‍රිපිටකය ග්‍රන්ථාරූඪකරමින් උරදුන් මහ රහතන් වහන්සේලා ද සුපිරිසිදු ථේරවාදයේ අනාගතයට පණදුන්නාහු අපගේ නමස්කාර පූර්වක පිදුමෙන් පිදිය යුත්තාහුම ය.
එපමණකුදු නොව එතෙක් සිහළ බසින් පැවතගෙන ආ තදර්ථකථා එසේම පැවතියහොත් අනාගතයේ පාප භික්‍ෂූන්ගේ දුර්මත මුසු වීමෙන් දූෂිත විය හැකි බව දුටු මහා විහාරීය මහ තෙරවරුන්ගේ ඇරයුම පිට, “ඒකාන්තයෙන් ම මෙතේ බෝසතුන් වහන්සේ ම” යැයි මහා විහාරීය මහ රහතුන් වහන්සේලාගේ සම්භාවනාවට පාත්‍ර වූ බුද්ධඝෝස ඇදුරුපාණන් වහන්සේත්, අනෙකුත් අටුවා ඇදුරුපාණන් වහන්සේලාත්, සීහළ අටුවා අනාගතය දක්වා ද, සමස්ත ලෝකය පුරා ද සුරක්‍ෂිත කරලනු වස් ශුද්ධ මාගධී භාෂාවට පෙරළුවාහු සද්ධර්මයේ චිරස්ථිතියට අමිල දායකත්වයක් දුන්නාහ. එපමණකුදු නොව අනාගතයේ සුපේශල භික්ෂූන් උදෙසා සර්වඥ සුභාෂිතයට අනුව යමින් ධර්ම-විනය විනිශ්චයන් තවදුරටත් විදහා දක්වමින් ටීකා ග්‍රන්ථ සම්පාදනය කළ ඇදුරුපාණන් වහන්සේලා ද ඇතුළු සැවොම මෙහිලා සම්භාවනීය පූජනීයත්වයෙන් පිදිය යුත්තාහුම ය.
ඒ අතීත මහෝත්තමයන් වහන්සේලා ජීවිත පරිත්‍යාගයෙන් අපමණ වෙහෙසක් දරා රැකගෙන ආ සුපිරිසිදු ථේරවාදී සද්ධර්මය යටපත් වීමට නොදී තවත් බොහෝ කළක් නිවන් මග හෙළිකරනු පිණිස සුරක්‍ෂිත කළා වූ මෑතකාලීන උදාරතර සංඝපීතෲන් වහන්සේලා අතර පරම පූජනීය පැලෑණේ සිරි වජිරඤාණ මහානාහිමියන් වහන්සේ, පරම පූජනීය මාතර ශ්‍රී ඥානාරාම නායක මා හිමිපාණන්වහන්සේ, ලොව පුරා දම් ගොස පතුරුවමින් අවවාදයෙන් පමණක් නො ව ආදර්ශයෙන් ද සැම සිත් සතන් පැහැදූ පරම පූජනීය මඩිහේ පඤ්ඤාසීහ මහානාහිමියන් වහන්සේ, පරම පූජනීය කඩවැද්දුවේ ශ්‍රී ජිනවංශ නායක මා හිමිපාණන්වහන්සේ, පරම පූජනීය වැලිගම ශ්‍රී ඥාණරතන මහානාහිමියන් වහන්සේ, අති පූජනීය ගංගොඩවිල සෝම මහා ස්වාමීන්ද්‍රයන් වහන්සේ ආදී අපවත් වී වදාළ සියලු බුද්ධ පුත්‍රයන් වහන්සේලා පැතූ උතුම් බෝධියකින් වහා වහා නිවනින් සැනසෙත්වා! යැයි මෙහිලා ඉත සිතින් ප්‍රාර්ථනා කරන්නෙමු.
ස්වකීය සන්තානය තුළ උතුරා යන කරුණාගුණයෙන් වත්මන් සඟ පරපුරට ගුණ මිණි පහනක් වූ නිවන් දකින තුරු භවයක් භවයක් පාසා පැවිදි බව පතන්නා වූ පරම පූජනීය අම්පිටියේ ශ්‍රී රාහුල නායක මා හිමිපාණන්වහන්සේට, සම්බුදු දම් දසත පතුරා ලන මෛත්‍රී මූර්තියක් බඳු අති පූජනීය නාඋයනේ අරියධම්මාභිධාන මහා ස්වාමීන්ද්‍රයන් වහන්සේට, අප උපාධ්‍යායෝත්තම අති පූජනීය තිරිකුණාමලේ ආනන්ද මහානායක මාහිමිපාණන්වහන්සේට, අති පූජනීය කහගොල්ලේ සෝමවංශ මහා ස්වාමීන්ද්‍රයන් වහන්සේට, විනය විශාරද විද්‍යාවේදී අති පූජනීය නුවරඑළියේ ඤාණසීහ මහා ස්වාමීන්ද්‍රයන් වහන්සේට, අප ආචාර්යෝත්තම පූජ්‍යපාද වැලිමඩ පසන්නමානස ස්වාමීන්ද්‍රයන් වහන්සේ ඇතුළු මහා සංඝ ස්ථවිරයන් වහන්සේලා හට නිදුකින් තවත් චිරාත්කාලයක් ස්වකීය සසුන් මෙහෙවරට විහරණ සැලසී පැතූ බෝධියකින් නිවනින් සැනසීමට මේ කුසල ශක්තිය පාරමිතාවක් ම වේවා!
මෙම මා හැඟි සත්කාර්යයෙහි ලා පෙළ අටුවා සිංහලයට පෙරළමින් මහා විහාරීය විනය විනිශ්චයන් මොනවට සපයමින් වඩාත් අර්ථවත් කෘතියක් බවට පත් කරලීමට ස්වකීය කුදු මහත් කටයුතු මධ්‍යයේ කාලය මිඩංගු කරමින් නිරතුරුව උපකාර කළ දිද්දෙණිය රණගිරිලෙන අරණ්‍ය සේනාසනයේ පූජනීය ලොකු ස්වාමීන් වහන්සේ ප්‍රමුඛ මහා සංඝරත්නයට සුවසේ ම තවත් චිරාත් කාලයක් සසුන් වැඩ සලසමින් ගුණ දම් පුරාගෙන ප්‍රාර්ථනීය බෝධියකින් නිවනින් සැනසෙන්න ම මින් ජනිත කුසල සම්භාරය හේතු වේවා ! යි කෘතඥ පූර්වකව සිහිපත් කළ යුත්තාහ.
එසේම මෙම උතුම් කර්තව්‍යයෙහි ලා සෝදුපත් බලමින් උපකාර කළ මහරගම ජාතික අධ්‍යාපන ආයතනයේ භාෂා, මානව ශාස්ත්‍ර හා සමාජ විද්‍යා පීඨයේ නියෝජ්‍ය අධ්‍යක්‍ෂ ජනරාල් ආචාර්ය පූජ්‍යපාද මාඹුල්ගොඩ සුමනරතන මහා ස්වාමීන්ද්‍රයන් වහන්සේට, මහරගම සිරි වජිරඤාණ ධර්මායතනයේ ආචාර්ය පණ්ඩිත පූජ්‍යපාද බංගලාදේශයේ ධම්මපාල ස්වාමීන් වහන්සේට, මහරගම සිරි වජිරඤාණ ධර්මායතනයේ ආචාර්ය ශාස්ත්‍රපති, පණ්ඩිත පූජ්‍යපාද පාණදුරේ පසන්න ස්වාමීන් වහන්සේට, කහගොල්ලේ ශ්‍රී ඥානාරාම විවේකාශ්‍රමවාසී පූජ්‍යපාද කැටවල ධම්මසුමන ස්වාමීන් වහන්සේට, බම්බලපිටිය සිරි වජිරාරාමවාසී ශාස්ත්‍රපති පූජ්‍යපාද මීගොඩ සුඛිත ස්වාමීන් වහන්සේට ද,
එසේ ම මෙම ගත සකස් කිරීම සඳහා නන් අයුරින් උපකාර කළ ශ්‍රී කල්‍යාණී යෝගාශ්‍රමාධිපති, මහෝපාධ්‍යාය අති පූජනීය නාඋයනේ අරියධම්මාභිධාන මහා ස්වාමීන්ද්‍රයන් වහන්සේට, උපස්ථායක හිමි පූජ්‍යපාද නාගපොකුණේ අරියසීල ස්වාමීන් වහන්සේට, බෙලිහුල්ඔය සීල සමාහිත භාවනා යෝගාශ්‍රමයෙහි ගරු කටයුතු ස්වාමීන් වහන්සේලාට, පූජ්‍යපාද මකුලෑවේ සුදස්සන ස්වාමීන් වහන්සේට, පොල්ගම්පල, කෙවිටියාගල විමුක්ත චිත්ත විවේකාශ්‍රමයට, පරිගණක කටයුතු වලදීත් අනෙකුත් උපකාරක කටයුතු වලදීත් සහය දැක් වූ ගිහි පින්වතුන් සැමදෙනාට, තවද මෙම වටිනා ග්‍රන්ථය මුද්‍රණය කිරීම සඳහා බරපැන දැරූ මහරගම සිරි වජිරඤාණ ධර්මායතනයේ භාවනා සහ සීල සමාදාන වැඩසටහන් වලට සම්බන්ධ පින්වතුන් සැමදෙනාට, මුද්‍රණ කටයුතු කරදුන් කරුණාරත්න සහ පුත්‍රයෝ පුද්ගලික සමාගමේ අධිපතිතුමා ඇතුළු කාර්ය මණ්ඩලයට නිදුකින් නිවන් මග යා ගැනීමට, තව තවත් සසුන් ගුණදම් පුරා ගෙන පැතූ උතුම් බෝධියකින් නිවනින් සැනසීමට මේ කුසල ශක්තිය හේතු වේවා !
නිස්සරණාධ්‍යාශයෙන් සසුන් වන්, වත්මන් සසුනේ ගුණදම් පුරන්නා වූ සහ අනාගතේ සසුන් ගතවන්නා වූ සියලු සඟ පරපුරට තම දිවි පරදුවට තබා සර්වඥ ප්‍රඥප්ත සිකපද රැකගෙන බුදුසසුන තවත් චිරාත්කාලයක් සුරකීමට ඇවැසි විහරණ සැලසේවා ! සාසන භාරධාරී ලෝකපාලක සෑම සියලු දිව්‍යතා මණ්ඩලයේ ධාර්මික දේවාරක්‍ෂාව සද්ධර්මයේ චිරස්ථිතිය පිණිස වේවා !
මේ මාහැඟි ධර්ම දානයෙන් රැස්වන්නා වූ සියලු කුසල සම්භාරයන් අප හැදූ වැඩූ මව් දෙමව්පියන්ටත්, ඥාති හිතමිත්‍රාදීන්ටත්, සමස්ත ලෝකවාසී සත්වප්‍රජාවටත් ලොවුතුරා සුව සදාලනු පිණිස හේතු වේවා !
- චිරං තිට්ඨතු ලෝකස්මිං සම්මාසම්බුද්ධ සාසනං -
කිතුල්ගොඩ අරණ්‍ය සේනාසනය, කිතුල්ගොඩ, අගලවත්ත.
කිතුල්ගොඩ අරණ්‍ය සේනාසනය,
කිතුල්ගොඩ,
අගලවත්ත.
ආශිර්වාදය
ශ්‍රී ලංකා රාමඤ්ඤ මහා නිකායේ අනුනායක, ශ්‍රී කල්‍යාණී යෝගාශ්‍රම සංස්ථාවේ ප්‍රධාන අනුශාසක, මහෝපාධ්‍යාය, ත්‍රිපිටක වාගීශ්වරාචාර්ය සාසනධජ, මහා කම්මට්ඨානාචාර්ය අතිපූජනීය නාඋයනේ අරියධම්මාභිධාන මහා ස්වාමීන්ද්‍රයන් වහන්සේ විසිනි...
නමෝ තස්ස භගවතෝ අරහතෝ සම්මා සම්බුද්ධස්ස !!!
විමස්සා සුවඳ ඇති මලක වර්ණයෙන් සුවඳවත් හානි නොවන සේ මලේ රොන් ටික උරාගෙන මලේ කරලක් හෝ ගෙඩියක් හටගැනීමට නිමිත්තක් වෙයි. මලේ රොන් ටික රැගෙන තමනටත් අන් අයටත් ප්‍රයෝජනය පිණිස ප්‍රණීත මීපැණි නිපදවයි.
සුපේශල ශික්‍ෂාකාමී සිල්වත් බුද්ධපුත්‍රයන් වහන්සේගේ ශීල සමාධි ප්‍රඥාවෙන් යුතුව ශුද්ධ ප්‍රසාදය ඇති බෝධිසත්වයන්ගේ ධර්මික ජීවිතය පිළිබඳව ඔවුන්ට ලොව් ලොවුතුරා සම්පත් සලසා දෙයි.
තමන්ටත් කිවු ක්‍රීඩා ශීලයන් ධ්‍යාන සමාධි සමාපත්ති අභිඥා බල විදර්ශනා ඥාන මාර්ග ඵල නිර්වාණ අමාමහන් පානය කර ගනියි. සැදැහැවතුන්ගේ ධාර්මික ජීවිතය ප්‍රත්‍යවේක්‍ෂා නුවණින් පිරිගෙන තවදිනක් එකසිය අසූ කෝටි ජනක් ලක්‍ෂ සංඛ්‍යාත දහස් ගණන් නිකන්හිද ශික්‍ෂා පද අතුරෙන් ප්‍රධානතමය දර්ශන ශිකාපද දෙසිය විසිහතක් වන ප්රාතිමෝක්ෂය ප්‍රසාදණීය ලෙස මුද්‍රණය කරවා සුපේශල බුද්ධ පුත්‍රයන් වහන්සේලාගේ ධාරණ ධාරණ කුසලතාව සඳහා සම්පාදනය වීම අතිශයින්ම ප්‍රශංසනීයයි.
අති උතුම් භික්ෂු ප්රාතිමෝක්ෂය මෙසේ සම්පාදනය කරවූ රමණීය කිතුල්ගොඩ ආරණ්‍ය සේනාසනවාසී පූජනීය මහා සංඝ රත්නයට රත්නත්‍රයේ අනන්ත සුවිශේෂී මහා ගුණානුභාව බලයෙන් ආයුරාරෝග්‍යාදී සැපතත් ශාන්ති ලක්‍ෂණ නිර්වාණාවබෝධය පිණිසත් අපගේ මෛත්‍රී පූර්ණ ආශිර්වාදය වේවා.
“සබ්බේ සත්තා භවන්තු සුඛිතත්තා”
මෙයට, මෙත්සිතින්.
ශ්‍රී.බු.ව. 2560 (2016) වෙසක් මස (මැයි) 24 වැනි දින.
මීතිරිගල,
ධර්මායතනයෙහි දී ය.