වීථි විභාගය සහිත පට්ඨාන ත්‍රී රාසිය.pdf
- කතෘ :
- ජනකාභිවංස හිමි
- ප්‍රකාශිත වර්ෂය :
- 2011
- මුද්‍රිත වර්ෂය :
- 2011
- පිටු ගණන :
- 84
- බාගත කිරීම් ගණන :
- 2,530
- වෙබ් අඩවියට එක් කළ දිනය :
- 2018-02-14
- ගොනුවේ ප්‍රමාණය :
- 19 MB
පොතේ පිටු කිහිපයක ඡායාරූප පහතින් බලන්න.
වීථි විභාගය සහිත පට්ඨාන ත්‍රී රාසිය යනු අභිධර්ම පිටකයෙහි එන චිත්තවීථි, රූපවීථි හා පට්ඨාන ප්‍රත්‍ය විභාගයන් මැනවින් පැහැදිලි කෙරෙන අභිධර්ම ග්‍රන්ථයකි. බුරුම රට (මියන්මාරයේ) මණ්ඩලේ මහාගන්ධාරාම විහාරාධිපති අතිපූජ්‍ය භදන්ත යූ. ජනකාභිවංස මහානාහිමියන් විසින් බුරුම බසින් රචිත ‘වීථි භාෂාටීකා’ (චිත්ත වීථි හා රූප වීථි විභාග) සහ ‘පට්ඨාන් තුන්පෙළූ’ (පට්ඨාන ත්‍රිශාශිය) යන කෘති දෙක පදනම් කරගනිමින් මෙය සම්පාදනය වී ඇත.
මෙම කෘති යුගලය 1964 වර්ෂයේ දී ශ්‍රී කල්‍යාණී යෝගාශ්‍රම සංස්ථාවේ ප්‍රධාන අනුශාසක අතිපූජ්‍ය නා උයනේ අරියධම්ම මහා ස්වාමීන්ද්‍රයන් වහන්සේ විසින් සිංහල භාෂාවට පරිවර්තනය කරන ලදී. ශ්‍රී සම්බුද්ධත්ව ජයන්ති 2600 සහ කල්‍යාණී යෝගාශ්‍රම සංස්ථාවේ 60 වන සංවත්සරය නිමිත්තෙන් ලසන්ත අලගියවන්න සහ අමා ජයසිංහ අලගියවන්න දෙපළගේ ධර්ම දානමය දායකත්වයෙන් 2011 වසරේදී මෙම මුද්‍රණය ප්‍රකාශයට පත් කර ඇත.
පෙරවදන
නමෝ තස්ස භගවතෝ අරහතෝ සම්මා සම්බුද්ධස්ස ///
ධම්මාරාමො ධම්මරතො - ධම්මං අනුවිචින්තයං ධම්මං අනුස්සරං භික්ඛු - සද්ධම්මා න පරිහායති
(ධම්මපදය - භික්ඛු වග්ග)
හද මැදුර ධර්ම මන්දිරයක් බවට පත්කොට ධර්මයෙහිම සිත පිනවන, නැවත නැවත ධර්මයම සිතන, ධර්මය මෙනෙහි කරන බෞද්ධයා නවලොවුතුරා ධර්මයෙන් නොපිරිහෙයි.
ධර්මය - අභිධර්මය, විනය - අභිවිනය නමින් ධර්මවිනය සතරාකාර වෙයි. සූත්‍රපිටකය ධර්මයය - අභිධර්ම පිටකය - අභිධර්මයය. විනය පිටකයෙහි පාරාජිකා පාලි පාචිත්තිය පාලි ග්‍රන්ථ දෙක විනයය, මහවග්ග චූල්ල වග්ග පරිවාර ග්‍රන්ථ තුන අභිවිනයය.
විනය අභිවිනය - ආඥාදේශනයකි. යථාපරාධ ශාසනයකි. සංවරාසංවර කථාවකි. සූත්‍ර පිටකය ව්‍යවහාර දේශනයකි. යථානුලෝම ශාසනයකි. දෘෂ්ටි ගතියන් නිරාකරණ කථාවකි. අභිධර්මය පරමාර්ථධර්ම දේශනයකි. යථාධර්ම ශාසනයකි. නාමරූප පරිච්ඡේද කථාවකි. විනය උගෙන ශීලයෙහි පිහිටයි. සූත්‍ර දේශනා උගෙන ධ්‍යාන සමාපත්ති අභිඥාබල වඩයි. අභිධර්මය උගෙන නාමරූප පරමාර්ථ ධර්ම විදර්ශනා වඩා මග පල නිවන සාක්ෂාත් කරයි. මෙසේ ධර්ම විනය මගින් සීල සමාධි ප්‍රඥා වඩා නිවන්මග ආලෝකවත් වනු පිණිස පැරණි උතුමෝ සුවිසුද්ධ වූ ත්‍රිපිටක ධර්මය ඉගෙන ගත්හ, උගැන්වූහ, ලියා තැබූහ, පාලි භාෂාව නොදත් අයට පහසුව පිණිස තම තමන්ගේ භාෂාවනට පරිවර්තනය ද කළහ.
බුරුම රට මණ්ඩලේ අමරපුර නුවර මහාගන්ධාරායුං මහා පරිවේණාධිපතිව වැඩ විසූ මහා ග්‍රන්ථකාරක අතිපූජ්‍ය ජනකාභිවංස මහා නාහිමියන් වහන්සේ විසින් බුරුම බසින් ලියා මුද්‍රණය කරවන ලද (වීථි භාෂාටීකා) චිත්ත වීථි - රූප වීථි විභාග සහ (පට්ඨාන් තුන්පෙළූ) පට්ඨාන ත්‍රිශාශිය නමැති දහම් පොත් දෙක මා විසින් සිංහල බසට පරිවර්තනය කරන ලද්දේ වර්ෂ 1964 අගෝස්තු මාසයේ දී අතිපූජ්‍ය භදන්ත අග්ගමහා පණ්ඩිත ඤාණින්ද සෙයාඩෝ නාහිමියන් වහන්සේගේ කාරුණික අනුග්‍රහයෙනි.
ආධුනිකව අභිධර්මය හදාරන ශිෂ්‍යයනට උපකාර පිණිස මේ දහම් පොත් දෙක එකතු කොට මුද්‍රණය කරවා ධර්ම දානය කරන ලෙස සත්ගුණවත් ලසන්ත අලගියවන්න ඇමතිතුමාටත්, එම අමා ජයසිංහ අලගියවන්න මැතිතුමියටත් සිහිපත් කරන ලද්දේ පූජ්‍ය නාග පොකුණේ අරියසීල ස්වාමීන් වහන්සේ විසිනි. මෙය ඉතාමත් සතුටෙන් පිළිගත් පින්වත් අමා ජයසිංහ අලගියවන්න මැතිතුමියත්, පින්වත් ලසන්ත අලගියවන්න ඇමැතිතුමාත් මුද්‍රණය කරවා පිරිනැමූයේ ධර්ම දානමය පුණ්‍ය සම්භාරයේ අගය අමිල බව දැන ඉමහත් ගෞරවයෙනි.
තව ද, සම්බුද්ධත්ව ජයන්තිය (2600) නිමිත්තෙන් සහ ශ්‍රී කල්‍යාණී යෝගාශ්‍රම සංස්ථාවේ සම්ප්‍රාප්ත (60) වසර නිමිත්තෙන් අනුරපුර රුවන්වැලි මහා සෑ මළුවේ දී (2011.06.04 සහ 05) දෙදින තුළ සිදු කෙරෙන සාරාණීය පුණ්‍ය මහෝත්සවයේ දී පිරිනැමෙන මෙම ධර්ම දානය ද බුද්ධ පූජාවක්ම වේවා යන ප්‍රසාදනීය භක්තියෙනි.
මෙම ධර්මදානමය කුශලානුභාවය සම්බුද්ධ ශාසන චිරස්ථිතිය පිණිස වේවා. මෙහි ප්‍රථම කර්තෘවර අතිගරු පූජනීය මහා ගන්ධායුං සෙයාඩෝ නම් වූ ජනකාභිවංස නාහිමිපාණන්ට සහ පරිවර්තනයට අනුග්‍රාහකත්ව දැක්වූ අතිගරු පූජනීය භදන්ත අග්ගමහා පණ්ඩිත ඤාණින්ද නාහිමිපාණන්ටත් පැතූ උතුම් බෝධියෙන් අමා මහ නිවන් සුව පිණිස හේතු වේවා. පින්වත් ලසන්ත අලගියවන්න ඇමතිතුමාගේ සහ එම මැතිනියගේ පියවරු දෙදෙනා ප්‍රධාන පරලෝ සැපත් සියලු ඥාති මිත්‍රාදීන්ටත්, අමා මහ නිවන් සුව පිණිස හේතු වේවා. ජීවත්ව සිටින ආදරණීය මවුවරු දෙදෙනාට සහ දයාබර දරු දෙදෙනාට ද අලගියවන්න දම්පතීන් දෙදෙනාට ද ආයුවර්ණ සැප බල ප්‍රඥාවත්, දෙලොව සුබ සෙතත්, ශාන්ත නිවන් සුව පිණිසත් වාසනා වේවා. සිතූපැතූ සංකල්පනා සියල්ල සමෘද්ධ වේවා.
“සබ්බෙ සත්තා භවන්තු සුඛිතත්තා”
මෙයට, මෙත්ගති, නාඋයනේ අරියධම්ම ස්ථවිර නාඋයන ආරණ්‍ය සේනාසනය.
මෙයට,
මෙත්ගති,
නාඋයනේ අරියධම්ම ස්ථවිර
නාඋයන ආරණ්‍ය සේනාසනය.
ධර්ම දානය
සර්වඥ සම්බුද්ධ රාජෝත්තමයාණන් වහන්සේ නමක් ලොව පහළ වීම පුදුම ආශ්චර්යයකි. එවන් අසිරියක් තවත් නොමැත. එය එසේ වන්නේ සියලු සත්වයන්ටම බුදු උපත සැපතක් වන බැවිනි. මුළු ලොවම අවිද්‍යා අඳුරෙන් අඳුරු වී ඇත. තණ්හාවෙන් භරිත වී ඇත. එහි ප්‍රතිඵලය අනන්ත සසර දුකෙහි ගිලියාමයි. පුහුදුන් සියලු සතුන්ගේ තත්ත්වය එයයි. මෙය සර්වකාලික ය. හැම කල්හිම ලෝකයේ හැටි එහෙමයි. මේ දුක් සයුරෙන් එතෙර වන්නට ඇති එකම පිහිට බුදු පිහිටයි. තමන් වහන්සේ ඒ බවදුක් සයුර තරණය කළ සේක. මහා කරුණාවෙන් ලෝකයාටත් එය පහදා වදාළ සේක. තමන් කළ දේ කියන - කියන දේ කරන ශාස්තෘන් වහන්සේ නමකගේ දහමක් වෙතොත්, ඒ බුදු දහම පමණයි නියම නිවන් මග වන්නේ.
ඒ සුවිශුද්ධ නිර්වාණ මාර්ගය, සම්මුති දේශනා පරමත්ථ දේශනා වශයෙන් දෙවැදෑරුම් වෙයි. සාමාන්‍ය ජනයාට ලෝකව්‍යවහාරය ඇසුරෙන් දැනුම ලබා දී නිවන් මගට යොමු කරවීම සම්මුති දේශනාවයි. සෘජුවම නිවන් මග පෙන්වීම පරමත්ථ දේශනාවයි. ඒ පරමත්ථ දේශනාව හැම කල්හිම සුවිශුද්ධයි. පරම ගම්භීරයි. වහ වහා නුවණැස පාදයි.
මේ ධර්ම ග්‍රන්ථය ඒ අභිධර්ම පිටකය පිළිබඳ සංක්ෂිප්ත කෘතියකි. එහෙත්, මෙය ප්‍රවීණ අප්‍රවීණ සැමට පරමාර්ථ ධර්ම උගැනුමට මහත් පිටිවහලකි. බුරුම රට (මියන්මාර්හි) මහා ගන්ධායුං විහාරාවාසී අතිපූජනීය භදන්ත යූ. ජනකාභිවංස මාහිමියන් අතින් මේ පොත සම්පාදනය වී ඇත.
එහෙත්, සිංහල අපට එයින් මෙසේ ප්‍රයෝජන ගත හැකි වන්නේ ශ්‍රී කල්‍යාණී යෝගාශ්‍රම සංස්ථාවේ ප්‍රධාන අනුශාසක මහා කම්මට්ඨානාචරිය, ත්‍රිපිටකධාරී ආචාර්යෝත්තම අතිපූජනීය නාඋයනේ ශ්‍රී අරියධම්ම මහා ස්වාමීන්ද්‍රයන් වහන්සේගේ සුවිශාරද හස්තයෙන් එය හෙළ බසට පරිවර්තනය වීම නිසා ය. උන්වහන්සේගේ සමීපවාසී උපස්ථායක පූජ්‍ය නාගපොකුණේ අරියසීල ස්වාමීන් වහන්සේගේ කාරුණිකත්වය නිසා එය මුද්‍රණය කොට 2600 වන ශ්‍රී සම්බුද්ධත්ව ජයන්තිය හා සබැඳිව ශ්‍රී කල්‍යාණී යෝගාශ්‍රම සංස්ථාවේ සම සැට වසර පූර්ණය සමරන මෙම අවස්ථාවේ ධර්ම දානයක් වශයෙන් පිරිනැමීමේ භාග්‍යය අපට උදාවිය.
මෙය සියලු දන් පරදවන උතුම්ම උතුම් ධර්ම දානමය පින්කමකි. ග්‍රන්ථ සම්පාදක අතිපූජනීය භදන්ත යූ. ජනකාභිවංස මාහිමියන්ට මේ පින නිවන් පිණිස වේවා. පරිවර්තක අතිපූජනීය නාඋයනේ ශ්‍රී අරියධම්ම මාහිමියන් වහන්සේට නිදුක් නිරෝගී සුව හා දීර්ඝායු ශ්‍රී ශාන්තිය පිණිස වේවා. සුව සේම උතුම් බුදුබව ලබන්නට හේතු වාසනා වේවා. අභාවප්‍රාප්ත අපගේ පියාණන් වහන්සේලාට ද, සියලු ඥාති මිත්‍රාදීන්ට ද, සගමොක් සුව පිණිස වේවා. පින්වත් නන්දා අලගියවන්න සහ ශීලා ජයසිංහ අප මෑණියන් වහන්සේලාට ද දිගාසිරි සම්පත් පිණිස වේවා. ටිරානි අලගියවන්න අප ආදරණීය දියණියට ද පවතින අපල, රෝගදුක් දුරු වී නිරෝගි සම්පත් ලබනු පිණිස වේවා. උත්පල අලගියවන්න අප දයාබර පුතණුවන්ට ද සියලු සෙත පිණිස වේවා. හිතාහිත මැදහත් සියලු සත්ත්වයන්ට ද සියලු හිත සෙත පිණිසම වේවා. අප සෑම දෙනාටම මෙලොව සුභසිද්ධිය, පරලොව සුභසිද්ධිය හා උතුම් නිවන් සුව පිණිස මේ සියලු පින් හේතු වාසනා වේවා.
තුනුරුවන් සරණයි!
මෙයට,
ලසන්ත අලගියවන්න අමා ජයසිංහ අලගියවන්න
මෙයට,
ලසන්ත අලගියවන්න
අමා ජයසිංහ අලගියවන්න