ගරුභාණ්ඩ විනිච්ඡය.pdf
- කතෘ :
- කලුකොඳයාවේ පඤ්ඤාශෙඛර හිමි
- ප්‍රකාශිත වර්ෂය :
- 1939
- මුද්‍රිත වර්ෂය :
- 1939
- පිටු ගණන :
- 56
- බාගත කිරීම් ගණන :
- 1,814
- වෙබ් අඩවියට එක් කළ දිනය :
- 2018-02-14
- ගොනුවේ ප්‍රමාණය :
- 5.2 MB
පොතේ පිටු කිහිපයක ඡායාරූප පහතින් බලන්න.
ගරුභාණ්ඩ විනිශ්චය යනු භික්ෂු විනයෙහි දැක්වෙන ගරුභාණ්ඩ සහ ලහුභාණ්ඩ පිළිබඳව කරුණු විභාග කරමින් සම්පාදිත විනය ග්‍රන්ථයකි. මෙහි කර්තෘත්වය විද්‍යොදය පිරිවෙණෙහි ආචාර්ය්‍ය කලුකොඳයාවේ පඤ්ඤාශෙඛර ස්ථවිරයන් වහන්සේ සතු වේ.
ශ්‍රී කල්යාණී සාමග්‍රී ධර්ම මහා සංඝ සභාවේ කාරක සභා රැස්වීම්වලදී 1931 සහ 1932 වසරවල පවත්වන ලද ධර්ම දේශනා ඇසුරෙන් සකස් වූ මෙම කෘතිය, සඟසතු ගරුභාණ්ඩ පරිහරණය සහ ඒවා බෙදාහැරීම සම්බන්ධ විනය නීති රීති මැනවින් පැහැදිලි කරයි. චුල්ලවග්ග, පරිවාර, සමන්තපාසාදිකාව, සාරත්ථදීපනී, විනයාලංකාර ඇතුළු විනය පාළි, අටුවා, ටීකා සහ පැරණි සිංහල ග්‍රන්ථ රැසක් ඇසුරු කර ගනිමින් මෙය සම්පාදනය කර ඇත.
කොළඹ විද්‍යාසාගර මුද්‍රණාලයාධිපති ඒ. පී. සෝමරත්න කුරේ මහතා විසින් කාලක්‍රියා කළ සිය භාර්යාවට පින් පැමිණවීම උදෙසා ධර්ම දානයක් ලෙස 1939 (බු.ව. 2483) වසරේදී මෙම කෘතිය මුද්‍රණය කරවා ඇත.
සංඥාපනය.
ශ්‍රී කල්යාණී සාමග්‍රී ධර්ම මහා සඞ්ඝසභාව පිළිබඳ කාරක සභා රැස්වීම් වාරයක් පාසා ම ස්වනිකායයට අයත් භික්‍ෂූන්ගේ විනයානුකූල පැවැත්ම ද විනයධර්‍මයෙහි විශිෂ්ට ඥානය ද ඇති කරවීම අපෙක්ෂා කොට විනයධර ස්ථවිර නමක් විසින් කථාවක් පවත්වනු ලැබේ.
එයට අනුව “ගරුභාණ්ඩවිනිශ්චය” පිළිබඳව විනය කථාවක් කිරීමට මට පැවරුණේ ය. එහෙයින් 1931 සැප්තැම්බර් මස 19 වන දින බොරලැස්ගමුවේ පරමධම්මචේතිය පරිවෙණස්ථානයෙහි ද 1932 ජූලි මස 3 වන දින නවගමුවේ සුගතබිම්බාරාම පුරාණ විහාරස්ථානයෙහි ද පවත්වනු ලැබූ කාරකසභා රැස්වීම් වාරයන්හි දී මාගේ කථාව කෙළෙමි. “එය තව මඳක් විස්තර සහිතව මුද්‍රණය කරවා ප්‍රචාරයට පැමිණවුවහොත් මැනවැ” යි රත්මලානේ පරමධම්මචේතිය පිරිවෙණේ උපප්‍රධානාචාර්ය්‍ය වලානේ සිරිසීවලී ස්ථවිරයෝ එකෙණෙහි ම ආරාධනය කළහ. නිකායයේ සංඝනායක බුරැන්දර අගලවත්තේ පුතිරජ පරිවෙණාධිපති පිඹුරේ සිරි ධම්මානන්ද වාචිස්සර ස්වාමීන්ද්‍රයන්වහන්සේ ඇතුළු හැම කාරක සභ්‍යයන්වහන්සේම ඒ අදහස අනුමත කළහ. එහෙයින් මම එය පොතක් වශයෙන් සම්පාදනය කෙළෙමි. එහෙත් එය මුද්‍රණය කරවීම සඳහා ශ්‍රද්ධාවත් භවතෙකු සොයා ගැනීමට ටික කලක් ගත විය.
ඒ අතර වර්‍ෂයක් පාසා ම ස්වකීය ධනවැයයෙන් ධර්‍මපුස්තක මුද්‍රණය කරවා නො මිලයේ බෙදා දෙන කොළඹ විද්‍යාසාගර මුද්‍රණ යන්ත්‍රාලයාධිපති ඒ. පී. සෝමරත්න කුරේ මහත්මයාට මාගේ අදහස දැන්වූ කෙණෙහි ම ඒ මහත්මයා ඉතා කැමැත්තෙන් එයට එකඟ විය. එහි ප්‍රතිඵලයක් වශයෙන් මෙය භික්‍ෂූන්වහන්සේ අතට පැමිණවීමට මට හැකි වූයේ ය. එහෙයින් මෙය කියවා ප්‍රයෝජන ගන්නා හැම භික්‍ෂූන්වහන්සේගේ ම කෘතඥභාවය ඒ ශ්‍රද්ධාවත් මහත්මයාට හිමි විය යුතු ය.
පිටු ගණනින් මහත් සඞ්ඛ්‍යාවක් නූ වුව ද මෙය සම්පාදනය කිරීමේ දී ප්‍රමාණවත් පරිශ්‍රමයක් දරන්නට සිදු විය. මේ සඳහා 1 චුල්ලවග්ග පාලි, 2 පරිවාර පාලි, 3 විනයාලංකාර, 4 සිකවලඳ, 5 සිකඛාපදවලඳලක්ඛන, 6 සිකවලඳ විනිස, 7 මුළුසික, 8 මුළුසික සන්න, 9 කඞ්ඛාවිතරණී ගැටපද, 10 ඛුද්දකසික්ඛා ටීකා,
12 කුදුසික සන්න, 13 සමන්තපාසාදිකා, 14 සාරත්ථදීපනී ටීකා, 15 කඞ්ඛාවිතරණී පිටපොත, 16 විනයසඞ්ගහ අත්ථවණ්ණනා, 17 විනයවිනිශ්චය, 18 විනයවිනිශ්චය ටීකා, 19 ධම්මපදට්ඨකථා, 20 සද්ධර්‍මරත්නාවලි, 21 පපඤ්චසූදනී, 22 අමාවතුර, 23 ධර්‍මප්‍රදීපිකා ගැටපදය, 24 බුත්සරණ, 25 පන්සියපණස්ජාතකපොත, 26 කඞ්ඛාවිතරණී, 27 විනයත්ථමඤ්ජූසා, 28 පාලිමුත්තකවිනය විනිශ්චය, 29 විමතිවිනෝදනී ටීකා, 30 වජිරබුද්ධි ටීකා, 31 පාලිමුත්තකවිනයවිනිශ්චය ටීකා යන ග්‍රන්ථයන්ගෙන් කරුණු උපුටා ගතිමි.
එසබිසකපරිභොගයෙන් ප්‍රයෝජන ගතයුතු බොහෝ බඩු, නො දැනීම හේතු කොට ගෙණ පෙහෙළිකපරිභොගයට ගැණීමෙන් වරද සිදු කර ගන්නා භික්‍ෂූන්වහන්සේ ස්වල්ප නො වෙති. උන්වහන්සේ අතුරෙන් එක් නමකගේ වත් ශ්‍රමණ භාවය ආරක්‍ෂාවීමට මෙය උපකාරි වුවහොත් එය ම මාගේ උත්සාහයට සරි ලන ප්‍රතිඵලය කොට මම සලකමි.
ස්වකීය ප්‍රියභාර්ය්‍යාවට අනුමෝදන් කරවීම පිණිස එයට වඩා මහත් පිණක් සිදු කර ගැනීම සෝමරත්න කුරේ මහත්මයාට ද පහසු නො වේ ය යි සිතමි.
හුදු බුද්ධශාසනාභිවෘද්ධිය ම අපෙක්ෂා කොට මේ ග්‍රන්ථය සැපයීමෙන් මා රැස් කර ගත් කුශලචේතනාරාශිය මාගේ ප්‍රව්‍රජ්‍යාචාර්ය්‍ය වූ කඹුරාවල සුමනතිස්සාභිධාන මහා ස්වාමිපාදයන් වහන්සේට ද ධර්‍මවිනයාචාර්ය්‍ය වූ මහගොඩ ශ්‍රී ඥානේශ්වර, කහවේ ශ්‍රී රතනසාර නායක ස්වාමීන්ද්‍රයන්වහන්සේලාට ද ස්වර්‍ගමොක්‍ෂ ප්‍රතිලාභය පිණිස ගුරුපූජා වශයෙන් පූජා වේවා.
මෙසේ,
කලුකොඳයාවේ පඤ්ඤාශෙඛර
ස්ථවිරයෙමි.
ශ්‍රී බුද්ධ වර්ෂ 2483 අධි නිකිණි මස අව අටවක දින විද්‍යොදය පිරිවෙණේ දී ය.