අධිකරණ විනිශ්චය - ගාල්ලේ පඤ්ඤාසීහ හිමි.pdf
- කතෘ :
- ගාල්ලේ පඤ්ඤාසීහ හිමි
- පිටු ගණන :
- 54
- බාගත කිරීම් ගණන :
- 2,048
- වෙබ් අඩවියට එක් කළ දිනය :
- 2019-03-29
- ගොනුවේ ප්‍රමාණය :
- 3.5 MB
පොතේ පිටු කිහිපයක ඡායාරූප පහතින් බලන්න.
අධිකරණවිනිශ්චය යනු ගාල්ලේ පඤ්ඤාසීහ ස්ථවිරයන් වහන්සේ විසින් සම්පාදිත භික්ෂු විනය නීති සංග්‍රහයකි. පෙළ දහම, අටුවා සහ විශේෂයෙන් පාලිමුත්තක විනයවිනිශ්චය සංග්‍රහය ආශ්‍රය කරගනිමින් භික්ෂු අධිකරණ විසඳීමේ නීතිරීති හා විනය කර්ම පිළිබඳ මූලධර්ම මෙහි විස්තර කර ඇත.
පාළි භාෂාව නොහදාලු භික්ෂූන්ට මෙන්ම විනය නීති පිළිබඳ දැනුම සොයන අයට පහසුවෙන් අවබෝධ කරගත හැකි අයුරින් සිංහල භාෂාවෙන් විස්තර කර ඇති මෙම කෘතිය, සඟසසුනෙහි විනය ආරක්ෂා කරගැනීම උදෙසා මහඟු පිටුවහලක් සපයයි. ග්‍රන්ථයේ ආරම්භයෙහි ගාල්ලේ පඤ්ඤාසීහ හිමියන්ගේ කෙටි චරිත කතාවක්ද ඇතුළත් වේ.
විඥාපනය.
ශ්‍රීඝන සුගත තථාගත ශාසනාවචර සුප්‍රතිපන්න කුලපුත්‍රයන්ගේ ගුණාතිශය රක්‍ෂණ ගොපනාර්ථිවූ තථාගත සම්මා සම්බුදු රජාණන් වහන්සේ තදොරස පුත්‍රයන්ගේ අධිකරණ විනිශ්චය සඳහා වදාළ පෙළ හා අටුවාව අළලා ලියනලද මේ විනය නීති සඞ්ග්‍රහය වනාහී වර්තමාන කාලික විනයනය විජානනාභිලාෂී සාධූන්ගේ ප්‍රයෝජනය පිණිස කරණලදී. විශේෂයෙන් පාළි මුත්තක විනයවිනිශ්චය සඞ්ග්‍රහය මේ කෘත්‍යයෙහි මාතෘකා ස්වරූපයෙන් නිරූපිතය.
සම්‍යක් දෘෂ්ටික මහීපාලයන් ගේ ආඥාචක්‍රයෙන් තොරවූ ලඞ්කාශාසනය පාපභීරුක නොවන පැවිද්දන්ගේ ආත්ම ඝාතක රජනීති ක්‍රමානුගත අධිකරණ මාර්‍ගවර්තීව කෙරෙණ මිච්ඡා ප්‍රතිපත්තිය ශාසනානුලොම නොවන බැව් මේ බුද්ධ නීතිමයවූ සුළු ග්‍රන්ථයෙන් පාළි භාෂාව නොහදාළ නැණැතියන්ට නැණැතියන්ට අවබොධවිය යුතුය.
ශාසනාලය ප්‍රමුඛවැ අප විසින් මේ ධර්ම සඞ්ග්‍රහය සකස්කිරීමෙන් ජනිත කුශලය අපගේ දිවඞ්ගත ආචාර්‍ය්‍ය ප්‍රාචාර්‍ය්‍යාදීන්ටද අත්වේවායි ප්‍රාර්ථනා කරම්හ.
මෙහි අපගේ ප්‍රමාදජන්‍යස්ඛලිත ස්ථාන ඇතහොත් සාධූහු මෛත්‍රී කරුණා පූර්වකව සංශොධනය කෙරෙත්වා.
මිට-ශාසනොදය කාමී, ගාල්ලේ පඤ්ඤාසීහ ස්ථවිර.
සංක්ෂිප්ත චරිතය.
මෙම “අධිකරණවිනිශ්චය” නම්වු විනය නීතිසඞ්ග්‍රහයෙහි කර්තෘභූත ගරුකටයුතු ගාල්ලේ පඤ්ඤාසීහ ස්වාමිපාදයන් වහන්සේ වනාහි ශ්‍රී බුද්ධ වර්‍ෂ 2418 හෙවත් ක්‍රිස්තු වර්‍ෂ 1875 අප්‍රියෙල් මස 18 වෙනි දිනට පැමිණි නානුමුර මඞ්ගල දිනයෙහි සංජාතවූයේය. දෙගුරුන් සිත් ගත්නා සුළු සුවිනීත ගුණයෙන් යුත් ළදරුවෙහෙම ක්‍රමාභිවෘද්ධිවූයේ පාඨශාලාවට යවා අක්‍ෂරාභ්‍යාස කරවන කල්හි එවකට ගාල්ලේ විජයානන්ද විහාරාධිපතිව වැඩවිසූ ගෞරවාර්හ අක්මීමන ධම්මාරාම ස්වාමිපාදයන් වහන්සේ වෙතද ශතකපොත් හැදෑරීම කළේය. මෙසේ දසවස් පිරුණුකල ගරුතර ශ්‍රී ලඞ්කා රාමඤ්ඤනිකායේ ආදිකර්තෘභූත ශාසනවංශ කවිධජ සිරි සද්ධම්මාචරිය යති සංඝපති ඉන්දාසභවර ඤාණසාමි නම්වු පූජ්‍ය පාද අතිගෞරවාර්හ මහා නායක මාහිමියන් වහන්සේ ගාල්ලේ විජයානන්ද විහාරස්ථානයට වැඩමකළ කල්හි දෙවන දින උදෑසන සිරිත පරිදි සිය මව හා විහාරයට පැමිණි ළදරුවා නායක හිමි වෙත කැඳවා “නුඹ මහණවනු කැමතිද” යි විචාල කල්හි එසේයයි ඉතා සතුටින් පිළිවදන් දුනි. ඉක්බිති දෙගුරුන් විචාරා සිවුරු පිරිකරාදිය පිළියෙලකොට මාතර සීමා බන්ධනයට ගොස් පෙරළා වඩින ගමනෙහි ශ්‍රී බුද්ධ වර්‍ෂ 2428 දී හෙවත් ක්‍රිස්තු වර්‍ෂ 1885 පෙබරවාරි මස 4 වෙනි දින මහා සංඝයා වහන්සේ ඉදිරියෙහි ප්‍රව්‍රජ්‍යා භූමියට පත්කර වදාළේය. අනතුරුව ආචාර්‍ය්‍යොත්තම මහා නායක මාහිමියාණන් වහන්සේ සමග පයාගල ධර්‍මගුප්ත පරිවෙණ ස්ථානයට වැඩමවා අවුරුද්දක් ගතවන අතර ශ්‍රී බුද්ධ වර්‍ෂ 2429 දී හෙවත් ක්‍රිස්තු වර්‍ෂ 1886 ජනවාරි මස 29 වෙනි දින මහා නායක ස්වාමීන්ද්‍රයාණන් වහන්සේ අපවත්වී වදාළෙන් ගෞරවාර්හ අළුත්ගම සාසනජොතක සුජාතාසභ අනුනායක මහා ස්ථවිර ස්වාමිපාදයන් වහන්සේගේ ශිෂ්‍යයෙක්ව විසිවස් පිරිකල්හි ශ්‍රී බුද්ධ වර්‍ෂ 2441 දී හෙවත් ක්‍රිස්තු වර්‍ෂ 1897 ජුනි මස අධිශීලයෙහි පිහිටියේය.
ගරුතර ගාල්ලේ පඤ්ඤාසීහ ස්ථවිර ස්වාමිපාදයන් වහන්සේ බෞද්ධ මහාජනතාවට ආගම ධර්‍මය දැනගැන්ම පිණිස “ගෘහස්ථ ප්‍රතිපත්තිසඞ්ග්‍රහය” නම් වටිනා පොතක් හා වෙනත් නොයෙක් පොත් පත්ද කලින් කල සඞ්ග්‍රහකොට තිබේ
මිට-ශාසනස්ථිකාමී, එච්. ඇඩ්වින් ප්‍රනාන්දු, ශාසනධජ දායක සභාවේ ගරු ලේකම්. අළුත්ගම (බෙන්තොට) 1. 10. 38.