අභිධම්ම මාතිකා.pdf
- කතෘ :
- සීලවතී පීරිස්
- ප්‍රකාශිත වර්ෂය :
- 1992
- මුද්‍රිත වර්ෂය :
- 1992
- පිටු ගණන :
- 199
- බාගත කිරීම් ගණන :
- 5,006
- වෙබ් අඩවියට එක් කළ දිනය :
- 2018-02-14
- ගොනුවේ ප්‍රමාණය :
- 36 MB
පොතේ පිටු කිහිපයක ඡායාරූප පහතින් බලන්න.
අභිධම්ම මාතිකා ස්වරූපාර‍්ථ යනු අභිධර්ම පිටකයේ මූලික පදනම වන මාතිකාවන්හි (තික මාතිකා, දුක මාතිකා සහ සූත්‍රාන්ත මාතිකා) ස්වරූපය හා අර්ථය විස්තර කෙරෙන අභිධර්ම ග්‍රන්ථයකි. මෙය නුගේගොඩ බෞද්ධ කල්යාණ මිත්‍ර සංගමයේ සභාපතිනිය වූ සීලවතී පීරිස් මාතාව විසින් සම්පාදනය කරන ලද්දකි.
අභිධර්මය හදාරන ආධුනිකයන්ගේ පහසුව උදෙසා ධම්මසංගණී ප්‍රකරණයෙහි ඇතුළත් තික මාතිකා 22 සහ දුක මාතිකා 100 ඇතුළු සියලු මාතිකාවන්හි ස්වරූප හා අර්ථ දැක්වීම් මෙහි අන්තර්ගත කොට ඇත. අතිපූජ්‍ය මාතර ශ්‍රී ඤාණාරාම මහානායක හිමියන්ගේ අවවාද අනුශාසනා පරිදි සහ නාලයකෝ අරියධම්ම ස්ථවිරයන් වහන්සේගේ ප්‍රස්තාවනාවෙන් සමන්විතව මෙය 1992 වර්ෂයේදී එළිදක්වා ඇත.
ප්‍රස්තාවනා
සුවාසූ දහසක් ධර්මස්කන්ධය විනය පිටකය සූත්‍රාන්ත පිටකය අභිධර්ම පිටකය නමින් පිටක වශයෙන් තුනකට බෙදේ. ආඥා දේශනා වෝහාර දේශනා පරමත්ථ දේශනා නමින් ත්‍රිපිටකය හැඳින් වේ. විනය පිටකය බුද්ධ ආඥාවකි. සූත්‍රාන්ත පිටකය ලෞකික ව්‍යවහාරයකි. අභිධර්ම පිටකය පරමාර්ථදේශනයකි.
යථාපරාධ සාසනා යථානුලෝම සාසනා යථා ධම්ම සාසනා නමින් ද ත්‍රිපිටකය හැඳින් වේ. වරදට අනුරූපව කෙරෙන අනුශාසනාව විනය පිටකයය. ලෞකික ව්‍යවහාරයට අනුව කෙරෙන අනුශාසනාව සූත්‍රාන්ත පිටකයය. ධර්මය වූ පරිදි කෙරෙන අනුශාසනාච අභිධර්ම පිටකයයි.
සංවරාසංවර කථා දිට්ඨි විනිවේඨන කථා නාමරූප පරිච්ඡේද කථා නමින් ද තුන් පිටකය හැඳින්වේ. ලොකු කුඩා අසංවර කම් සංවර කෙරෙනුයේ විනය පිටකයෙනි. නානා දෘෂ්ටීන් නිරවුල් කෙරෙනුයේ සූත්‍රාන්ත පිටකයෙනි. නාමරූප පිළිබඳව වෙන් වෙන් වශයෙන් පිරිසිඳීම කෙරෙනුයේ අභිධර්ම පිටකයෙනි.
තවද අධිශීල ශික්ෂාව විනය පිටකයෙහි ද අධිචිත්ත ශික්ෂාව සූත්‍රාන්ත පිටකයෙහි ද අධිප්‍රඥා ශික්ෂාව අභිධර්ම පිටකයෙහි ද ඇතුලත් වේ. තදංග ප්‍රහාණය විනයෙහි ද විෂ්කම්භන ප්‍රහාණය සූත්‍රාන්තයෙහි ද සමුච්ඡේද ප්‍රහාණය අභිධර්මයෙහි ද ඇතුලත් වේ. වීතික්කම ක්ලේශයන්ගේ සංසිඳීම විනයෙහි ද පරියුට්ඨාන ක්ලේශයන්ගේ සංසිඳීම සූත්‍රයෙහි ද අනුශය ක්ලේශයන්ගේ සංසිඳීම අභිධර්මයෙහි ද දැක්වේ.
අර්ථ ගාම්භීරතාව ධර්ම ගාම්භීරතාව දේශනා ගාම්භීරතාව හා ප්‍රතිවේධ ගාම්භීරතාව පිටකත්‍රයෙහිම අනුපිළිවෙළින් ගාම්භීරමය විනයෙහි වැරදි ලෙස පිහිටීමෙන් දුසිල් බවටද සූත්‍රාන්තයෙහි වැරදිලෙස පිහිටීමෙන් මිසදිටු බවට ද අභිධර්මයෙහි වැරදිලෙස පිහිටීමෙන් උමතු බවටද පැමිණීම සිදුවේ විනයෙහි මනාව පිහිටීමෙන් සුශීලවත් ව ත්‍රිවිද්‍යාලාභී වීමද සූත්‍රාන්තයෙහි මනාව පිහිටීමෙන් ෂට් අභිඥා ලාභී වීමද අභිධර්මයෙහි මනාව පිහිටීමෙන් සිවුපිළිසිඹියා ඥාණ ලාභී වීමද සිදු වේ
අභි - විශිෂ්ඨ ධර්මය, අභි - අතිරේක ධර්මය යන අර්ථයෙන් අභිධර්මය හැඳින් වේ.
‘‘ධම්ම සඞ්ගණී විභඞ්ගඤ්ච කථාවත්ථුච පුග්ගලො ධාතු යමක පට්ඨානං අභිධම්මොති වුච්චති’’
ධම්මසංගණී ප්‍රකරණය - විභංග - ධාතුකථා - පුදගල ප්‍රඥප්ති කථාවස්තු - යමක ප්‍රකරණය හා පට්ඨාන මහා ප්‍රකරණයයි ප්‍රකරණ වශයෙන් අභිධර්ම පිටකය සත් වැදෑරුම් වුවද මුලසිට අග දක්වා අනුපිළිවෙල සහිත අතිදීර්ඝ වූ එකම සූත්‍ර දේශනාවක් වැනිය එහෙයින් ම ධම්මසංගණි ප්‍රකරණයේ පටන් අධ්‍යයනය නොකළ කෙනෙකුට ඉන් ඉහළ ප්‍රකරණයක් නිසි සේ හැදෑරිය නොහැකිය
අභිධර්මය හැදෑරීමේ පහසුව පිණිස ධම්ම සංගණියෙහි තික මාතිකා 22x3, දුකමාතිකා 100x2, නමින් අභිධර්ම මාතිකා පද 266 ක් ද සූත්‍රාන්ත මාතිකා 42x2 පද 84 ක් ද වදාරා ඇත. අභිධර්ම පිටකය අනුපිළිවෙළින් නිවැරැදිව නිරාකුලව උගෙනීම පිණිස අභිධර්ම මාතිකා සියල්ල ප්‍රගුණ කරගත යුතුමය. පූර්වාචාර්‍ය්‍යොත්තමයන් විසින් ඒ සඳහා සකස් කරන ලද ස්වරූප කථනය අභිධර්ම මාතිකා ස්වරූපය නමින් හැඳින්වේ.
ත්‍රිපිටක ධර්මය පිළිබඳ දීර්ඝකාලීන මනා අවබෝධයක් ඇත්තාවූ ශ්‍රී සුමංගල ත්‍රිපිටක ධර්ම අධ්‍යයන පරීක්ෂණය පිළිබඳ සහයෝගය දෙන්නා වූ නුගේගොඩ බෞද්ධ කල්යාණ මිත්‍ර සංගමයේ සභාපතිනි ද වූ සත්ගුණවත් සීලවතී පීරිස් මාතාව අභිධර්මය හදාරණ ආධුනිකයන්ගේ ප්‍රයෝජනය පිණිස සිය අතින් මෙම අභිධර්ම මාතිකා ස්වරූපග්‍රන්ථය සම්පාදනය කරන ලද්දේ අති මහත් ශාසනික දයාවෙනි. ඉතාමත් වයෝවෘද්ධව සිටත් මෙම මාහැඟි ග්‍රන්ථය සම්පාදනය කිරීමෙන් සිදු කළ උදාර ශාසනික සේවය පිළිබඳව සත්ගුණවත් සීලවතී පීරිස් මාතාව ශාසනමාමක සාධූන්ගේ ගෞරවාදරයට හා ප්‍රසංසාවට සුදුසුමය. රත්නත්‍රයානු භාවයෙන් පින්වත් සීලවතී පීරිස් මැණියන්ට නිරෝගී සුවයෙන් ශතවර්ෂාධික කාලයක් දීර්ඝායු අත් වේවා. ප්‍රාර්ථනීය බෝධිඥානයෙන් ශාන්ත නිවන් සුව පිණිස සුවසේ පාරමී පිරේවා.
‘‘සබ්බෙ භද්‍රානි පස්සන්තු’’
මෙයට-මෙතැති,
නාලයකෝ අරියධම්ම ස්ථවිර
ශ්‍රී ගුණවර්ධන යෝගාශ්‍රම මධ්‍යස්ථානය. ගල්දූව - කහව, 2536-1992. 10. 20
නාලයකෝ අරියධම්ම ස්ථවිර
ශ්‍රී ගුණවර්ධන යෝගාශ්‍රම මධ්‍යස්ථානය.
ගල්දූව - කහව, 2536-1992. 10. 20
සම්පාදිකාවගෙන්
නමො තස්ස භගවතො අරහතො සම්මා සම්බුද්ධස්ස.
සම්මා සම්බුදු රජාණන් වහන්සේ බුද්ධත්වය ලැබූතැන් පටන් සාවුරුද්දක ගේ ඇවෑමෙන් තීර්ථකයින්ගේ මාන මර්දනය සඳහා යමා මහ පෙලහර පා වදාරා ඊටපසු සත්වන වස්සාන කාලය ගත කිරීම සඳහා තව්තිසා දෙව්ලොවට වැඩිසේක. එහි පරසතු මදාරා රුක්මුල පනවනලද පණ්ඩුකම්බල නම් ශෛලාසනය මත බුද්ධ රශ්මි මාලාවෙන් යුතුව වැඩසිටිසේක්, මාතෘ දිව්‍ය රාජයා ප්‍රධාන කොට දස දහසක් සක්වලින් පැමිණි දෙවි බඹ පිරිස උදෙසා අභිධර්ම දේශනාව කළසේක. ඒ දේශනාව අසාසිටි මාතෘ දිව්‍ය රාජයා ප්‍රමුඛ අනන්ත අප්‍රමාණ දෙවි බඹ පිරිසකට චතුරාර්‍ය්‍ය සත්‍යාවබෝධය විය.
බුදු රජාණන් වහන්සේ විසින් අවබෝධ කරන ලද පරමාර්ථ ධර්මය වාග් භේද කොට දේශනා කරන ලද්දේය. එහි නිදාන කථාව මෙසේය. ‘‘එකං සමයං භගවා දෙවෙසු විහරති තාවතිංසෙසු, පාරිච්ඡත්තක මූලෙ පණ්ඩුකම්බල සිලායං තත්‍රඛො භගවා දෙවානං තාවතිංසානං අභිධම්ම කථං කථෙසී’’ කුසලා ධම්මා, අකුසලා ධම්මා, අබ්‍යාකතා ධම්මා, යනාදීන් මාතිකාව තබා කරන ලද ඉතා විස්තාර දේශනාවකි. එය තෙමසක් මුළුල්ලෙහි නොකඩවා දේශනා කරන ලද්දේය.
ඒ කාලය තුළම නිර්මිත බුදුරුවක් මවා මෙතෙක් ධර්මය දෙසනා කරත්වා යන අධිෂ්ඨානයද කොට මිනිස් ලොවට වඩින සේක. මිනිස් ලොවදී දන්වැළඳීම් ආදිය කොට උපස්ථානයට වඩින ලද සැරියුත් මහ රහතන් වහන්සේට දෙව් ලොවදී කරන ලද විස්තාර දෙසනාව සංක්ෂේපයෙන් හකුළුවා වදාරන සේක. එය ඉතා ගෞරවයෙන් ධාරණය කරගෙන ගොස් සැරියුත් මහරහතන් වහන්සේගේ අතවැසි සද්ධිවිහාරික ශිෂ්‍ය පිරිස වන 500 ක් භික්ෂූන් වහන්සේලාට විස්තර කොට එදිනෙදාට උගන්වන සේක. එම දේශනාව නාති විස්තාර නාති සංක්ෂේප දෙසනාවකි.
බුදුරජාණන් වහන්සේ දෙව්ලොව කරන ලද දෙසනාව අවසන් වීම සමග මේ 500 ක් භික්ෂූන් වහන්සේලා අභිධම්මික මහරහත් භාවයට පත්වූවෝය. දෙව්ලොව හැර මිනිස් ලොවද ආභිධම්මික රහතන් වහන්සේලා 501 ක් නමක් වූවෝය. ඉන් කිප නමක් ප්‍රථම සංගායනාවටද සහභාගි වූවෝය.
අභිධම්ම පිටකයෙහි පළමු වැන්න ධම්ම සංගණී ප්‍රකරණයයි. එය චිත්තෝත්පාද කාණ්ඩය, රූප කාණ්ඩය, නික්ඛේප කාණ්ඩය, අට්ඨ කථා කාණ්ඩයයි සතරාකාර වේ. පළමුව චිත්තෝත්පාද කාණ්ඩය වදාළසේක. එය කාමාවචරය, රූපාවචරය, අරූපාවචරය, ලෝකෝත්තර යයි සතර වැදෑරුම් වේ. එය මාතිකාය පදභාජන යයි දෙවැදෑරුම් වේ. මාතිකාවද අභිධම්ම මාතිකා සූත්තන්ත මාතිකායයි දෙවැදෑරුම් වේ. මෙහි විස්තර ස්වරූප පෙන්වන්නේ අභිධම්ම මාතිකාවෙහිය.
අභිධම්ම මාතිකාවට ප්‍රථම අභිධර්මාර්ථ සංග්‍රහය ආදී පොතකින් චිත්ත චෛතසික ආදී සතරපරමාර්ථ ධර්මයන්ගේ ස්වරූපයන්ද සම්ප්‍රයෝග නය, සංග්‍රහ නය ආදී විභාගයන් ද, රූප ධර්මයන්ද විස්තර වශයෙන් දතයුතුය. එම පොත අභිධර්ම නමැති භාණ්ඩාගාරයට ඇතුළු වීමට තිබෙන දොරටුවක් වැනිය. එය පොඩි දරුවන්ගේ හෝඩී පොත හා සමාන වේ. හෝඩි පොතෙන් අකුරු හැඳිනීම් කරන්නාක් මෙන් අභිධර්මාර්ථ සංග්‍රහය නාම රූප ධර්ම නිසි පරිදි හඳුන්වා දෙති. එය හොඳාකාර තේරුම් ගත හොත් මාතිකාව තනියම හෝ තේරුම් ගතහැකි වේ.
ත්‍රිපිටක ධර්ම පරීක්ෂණයට පෙනීසිටි ස්වාමීන් වහන්සේලාගේ ප්‍රශ්නයක් හේතුකොට මේ පොත සකස් වූ බැව් කෘත ගුණ පූර්වකව සිහිපත් කරමු
‘‘නෝනලා කොහොමද මේවා ඉගෙන ගත්තේ’’ යයි ඇසීම මහත් සංවේග උපද වන්නක් විය. අපේ ආචාර්ය්යයන් වහන්සේගේ දෙපා වැඳ ආරාධනා කළේ ත්‍රික 22 හෝ ලියවා ගැනීමටයි. එය ලියාගෙන එන ලෙස මා වෙතම පැවැරුණි, එයයි හේතුව. මේ පින්කම කර ගැනීමේ ඒ පින එම ස්වාමීන් වහන්සේලාටද නිවන් පිණිසම හේතුවේවා!
නාමරූප ධර්ම තේරුම් ගැනීම එදිනෙදා ජීවිතයටද බලවත් උපකාරයකි. තමා තුළ හටගන්නා ලෝභ ද්වේශාදී අනර්ථකාරී ධර්ම ගැන හරිහැටි තේරුමක් නො මැති වුවහොත් ද්වේශ මෝහ ආදීන්ට යටත්වී මෙන් පලිගැනීම් වැනි දරුණු ක්‍රියා පවා කිරීමට පෙලඹෙති. මේ වායේ භයානක කම නො දනීම නිසා තමාට සිදුවන අනර්ථය නො පෙනෙයි. ධර්මය තේරුම් ගතහොත් තමාට යහපතක් සලසාගත හැකි වේ. බුදු දහම මෙලොව පරලොව දෙකටම යහපතක්ම සලසා දෙන්නේය.
මේ පොත සකස් වූයේද පළමු ත්‍රික දෙවිස්ස අවසන් වූ නමුත් දැනුදු පොත් උවමනා අය සිටින බැවින් මේ වාරයේ අභිධම්ම මාතිකා සියල්ලටම ස්වරූප ලියා ඇත. එය ආදරයෙන් ගෞරවයෙන් ඉගෙනගනිත්වා. අතිපූජ්‍ය මාතර ශ්‍රී ඤාණාරාම ස්වාමීන් වහන්සේගේ අවවාද පරිදි අභිධම්ම මාතිකා සියල්ලටම ස්වරූප ලියා අත්කරගත් පින ඒ අතිපූජ්‍ය මාතර ශ්‍රී ඤාණාරාම ස්වාමීන් වහන්සේට අයිති වේවා.
මෙසේ අභිධම්ම මාතිකා සියල්ලට පොතපතේද උපකාර ඇතිව අප ඉගෙන ගත් පරිදි ස්වරූප ලියා සකස් කොට එහි වැරැදි තැන් නිවැරැදි කරගැනීම සඳහා අතිපූජ්‍ය නාලයනේ අරියධම්ම ස්වාමීන් වහන්සේ වෙතගෙන ගොස් දෙපාවැඳ නමස්කාර කොට මෙය කියා සැලකර සිටියෙමි. ඉතා කරුණාවෙන් එය භාරගෙන සකස් කර වටිනා ප්‍රස්තාවනාවක්ද ලියා දුන්සේක. දැනට 88 වන වියෙහි පසුවන වයෝවෘද්ධ මැණියන් කෙරෙහි දක්වනලද අනුකම්පාව නිසාම මෙය නිමාවට පත්කර ගත හැකි විය.
මේ පොත සකස් කිරීමෙන් හා සෑම ආකාරයකින්ම අප විසින් රැස්කරගන්නා ලද පින අතිපූජ්‍ය නාලයනේ අරියධම්ම ස්වාමීන් වහන්සේට නිරෝගී භාවය හා දීර්ඝායුශ්‍රී සම්පත් ලැබීමටද හේතුවේවා. සම්‍යග් දෘෂ්ටික දෙවිදේවතා සමූහයා ගේ ආරක්ෂාව නිති සැලසේවා. නිර්වානාව බෝධයටද හේතුවේවා එසේම මාගේ ත්‍රිවිධ ද්වාරයෙන් ප්‍රමාද දෝෂයකින් වරදක් සිදුවී ඇත්තොත් එයටද සමාව ලැබේවා.
අභිධම්ම මාතිකාව වාචොද්ගත කොට (කට පාඩමෙන්) ඉගෙන ගන්නා පොතකි. එය ඉගෙන දිනපතා භාවිතා කරන්නේ නම් චුල්ලසෝතාපන්න භාවයට ද, ගතිනියත බවටද පැමිණේ. ත්‍රිහේතුක පටිසන්ධියකුවීමටද, සුඛා පටිපදා ඛිප්පාභිඤ්ඤා බවටද පැමිණීමේ ආනිශංසද ඇති බැවින් ඉතා ආදරයෙන් ගෞරවයෙන් ඉගෙනගනිත්වා යනු මාගේ ප්‍රාර්ථනාවයි.
සෑමටම තෙරුවන් සරණයි. මීට, සම්පාදිකා
මීට,
සම්පාදිකා
පුණ්‍යානුමෝදනාව යි.
ධර්මදානමය පින්කම් මේ පොත ලිවීමෙන්ද, මීට ඉහත මාතිකා ත්‍රික දෙවිස්ස ලියා පළකිරීමෙන් රැස්කර ගන්නා ලද පුණ්‍ය සම්භාරයද ත්‍රිපිටක ධර්මය ඉගෙනීමෙන් සහ ඉගැන්වීමෙන්ද ධර්මය ඉගැන්වීමට සිය නිවස ඉඩ සලසා දීමෙන්ද ධර්මය ඉගෙන ගන්නා පින්වතුන්ට පහසුකම් සහ පොත පත සපයා දීමෙන්ද, මේ ආදී වශයෙන් ධර්මදානමය වශයෙන් පින් රැස් කර ගතිමි.
බුද්ධ ජයන්ති කාලයේ බුරුම රටින් ලංකාවට වඩිනා ලද කම්මට්ඨානාචාර්ය්‍ය අතිගරු උන සුජාත ස්වාමීන් වහන්සේ වෙතින් විපස්සනා භාවනා පුහුණු වීමෙන් සහ ලංකාවේ වැඩ සිටි කාලය තුළ දන්දීම් බණ ඇසීම්, කඨින පින්කම් ආදිය සිදු කිරීමෙන්ද බොහෝ පින් රැස්කර ගතිමි.
අපගේ ආචාර්ය්යයන් වහන්සේ වන පරමාර්ථ ධර්ම සභාවේ සහ ශ්‍රී සුමංගල ගුණානුස් මරණ සභාවේද ආදී කණීවරයෙක් වන අභිධම්මාචාර්ය්‍ය අනගාරික බී. ආර්. ඩයස් මහතාටද අතිපූජ්‍ය මාතර ශ්‍රී ඤානාරාම ස්වාමීන් වහන්සේටද, අපගේ ආචාර්ය්යයන් වහන්සේ වන දෙමටගොඩ මහාවිසුද්ධාරාමාධි පතිවුද, ස්වේජින් නිකායේ මහානායක ස්වාමීන් වහන්සේවුද, ත්‍රිපිටක විද්‍යාලයා ධිපතිවුද, අතිපූජ්‍ය දෙවිනුවර ඥානාවාස මහා නායක ස්වාමීන් වහන්සේට ගිලන් උපස්ථාන කිරීමෙන් හා ආදහන පින්කම්,පින් පැමිණ වීමෙ පින්කම් ආදිය කිරීමෙන්ද, මීතිරිගල නිස්සරණ වන සෙනසුනෙහි අධිපතිවුද, ශ්‍රී ඤානාරාම ධර්මායතනයෙහි අධිපති වූද කම්මට්ඨානාචාර්ය්‍ය අතිපූජ්‍ය මාතර ශ්‍රී ඤානාරාම ස්වාමීන් වහන්සේ වෙත කඨින පූජා කිරීමෙන්ද, මීතිරිගල ශ්‍රී ඤානාරාම ධර්මායතනයෙහි සියලු පින්කම් සහ මාතර ශ්‍රී ඤානාරාම ස්වාමීන් වහන්සේ වෙනු වෙන් තුන් මාසයේ දෙන ලද මහා දනයට සහභාගීවීමෙන්ද බුද්ධදාස මහතාගේ දෙශනා වලින් සකස්කළ බෞද්ධ කල්යාණ මිත්‍ර සංගමයෙන් පළකරන ලද ධර්ම පුස්තකයන්ට සහාය වීමෙන්ද, එම සංගමය ආරම්භ කොට මෑතක් වනතුරු පවත්වා ගත යාමට සහ සියලු පින්කම් සඳහා නිවස ඉඩදී සහාය වීමෙන්ද මේ ආදී වශයෙන් කුඩා කල සිට මේ දක්වා කරන ලද සියලු ආකාරයෙන් රැස්කර ගන්නා ලද පුණය්‍ය කර්මීන්ගේ පුණ්‍ය ඵලයක් ඇත්තේ ද,
ඒ සියලු ආකාරයෙන් රැස්කරගන්නා ලද පින් අනුමෝදන් කරවමු. මාගේ දයාබර මෑණියන් වහන්සේට සහ පියාණන් වහන්සේටද, මාගේ ස්වාමියාණන් වහන්සේටද එම මව්පිය දෙදෙනා වහන්සේලාටද, මාගේ දයාබර බෑනණුවන් වන අභිධර්මාචාර්‍ය්‍ය ඒ. ඩී. එම්. බුද්ධදාස මහතාටද, කුරේ ප්ලේස්හි විසූ ඥාති සොහොයුරු දෙදෙනාටද, මියගිය සොහොයුරු ඥාතිමිත්‍රාදී සැමටද,
මේ පොත මුද්‍රණය කරවා දෙනලද මාගේ ඥාති පුත්‍ර ආතර් සමරසේකර සහ නන්දිසීලි සමරසේකර දියණියටද,
ඒ දෙපොලගේ මියගිය මව්පිය දෙදෙනා වහන්සේලාටද සහ සොහොයුරන් තුන් දෙනාටද, දූ දරු ආදීන් ඇතුළු මාගේ සැපදුක් නිතර සොයා බලා කටයුතු කරන සෑම දෙනාටද මේ පොත සකස් කිරීමේදී මට උපකාරීවු ධර්මසේකර පෙරේරා මහතාටද බෞද්ධ කල්යාණ මිත්‍ර සංගමයේ සැමටද, මා විසින් රැස් කරගන්නා ලද පින අනුමෝදන් කරමු. අනුමෝදන්වෙවා!
ශාසනාරක්ෂක සියලු සම්පත් දෘෂ්ටික දෙවි දේවතා සමූහයා ඇතුළු සියලු සත්ව සමූහයා වෙත මේ පින අනුමෝදන් කරමු. අනුමෝදන් වේවා.
මේ පොත ලිවීමෙන් සහ සෑම ලෙසකින්ම මාගේ හිත, කය, වචනය යන තිදොරින් ප්‍රමාද දෝෂයකින් රත්නත්‍රය කෙරෙහි වරදක් සිදුවූයේ නම් එයටද රත්නත්‍රය කෙරෙන් සමාව ලැබේවා සාධු, සාධු, සාධු, සියලු දෙනාටම තෙරුවන් සරණින් යහපතක්ම වේවා!
මීට, මෙත්සිත්ඇති සීලවතී පීරිස්
මීට,
මෙත්සිත්ඇති
සීලවතී පීරිස්