ලෝක නිත්ථරණය - හේතුඵල වාදය.pdf
- කතෘ :
- මුනිදාස වීරකෝන්
- ප්‍රකාශිත වර්ෂය :
- 1956
- මුද්‍රිත වර්ෂය :
- 1956
- පිටු ගණන :
- 210
- බාගත කිරීම් ගණන :
- 2,550
- වෙබ් අඩවියට එක් කළ දිනය :
- 2018-02-14
- ගොනුවේ ප්‍රමාණය :
- 51 MB
පොතේ පිටු කිහිපයක ඡායාරූප පහතින් බලන්න.
ලොක නිත්ථරණය හෙවත් හේතු-ඵල වාදය (පටිච්ච සමුප්පාදය) යනු ආචාර්ය්ය මුනිදාස වීරකෝන් මහතා විසින් සම්පාදනය කරන ලද අභිධර්ම හා බෞද්ධ දර්ශන ග්‍රන්ථයකි. මෙහි පටිච්චසමුප්පාද ධර්මය, අභිධර්ම සංකල්ප මෙන්ම බුද්ධ චරිතය ඇසුරින් හේතුඵල න්‍යාය සවිස්තරව විග්‍රහ කර ඇත.
ග්‍රන්ථය සංශෝධනය කර ඇත්තේ ගෝමාගම විද්‍යාවර්ධන පිරිවෙනෙහි ආචාර්ය විද්‍යා විශාරද පණ්ඩිත වෙඬරුවේ අනෝමදස්සී ස්වාමීන් වහන්සේ විසිනි. කිරිවත්තුඩුවේ ශ්‍රී ප්‍රඥාසාර නාහිමි සහ දෙවිනුවර ඤාණාවාස හිමි යන යතිවරයන් වහන්සේලාගේ අගනා හැඳින්වීම් පෙරවදන් ලෙස මෙහි අන්තර්ගතය.
මෙම කෘතිය බුද්ධ වර්ෂ 2499 (ක්‍රි.ව. 1955-1956) දී කොළඹ පිටකොටුවේ ශ්‍රී සද්ධර්මදාන සමිතිය මගින් ධර්මදානය සඳහා මුද්‍රණය කරවා බෙදාහරින ලද්දකි.
සම්පාදකයන්ගේ හැඳින්වීම.
ලොක නිත්ථරණය හෙවත් හේතු-ඵල වාදය නම්වූ මේ ධර්ම ග්‍රන්ථය අප විසින් සම්පාදනය කරගෙන යනු ලබන “ලොකවිජය” ග්‍රන්ථමාලාවේ සිවුවැන්නය. පාල්‍යර්‍ථ කථා හා ටීකාද විශුද්ධිමාර්‍ගයද මුල් තැන්හි තබා සම්පාදනය කරණලද මෙය යම්කිසි ත්‍රිපිටක ග්‍රන්ථයක පරිවර්‍තනයක්ද නොවේ. “බුද්ධසාසන මහා සුර සෙනාපති” ඇම්. ධර්‍මරත්න පඬිතුමන්ගේ සඤ්චෙච්චපෙතවත්ථුවිනිශ්චය නම් නම් ධර්ම ග්‍රන්ථය විශේෂයෙන් ආශ්‍රය කළ බවද, මෙහි 145-162 යන පිටු අතර පවත්නා විස්තරාත්මක සටහන එම ග්‍රන්ථයෙන් උපුටා ගත් බවද සඳහන් කරමු. මෙහි ඇති සම්ප්‍රදායාන්තර විවේචන බලන්ගොඩ ආනන්ද මෛත්‍රෙය හිමියන්ගේ කෘතීන් අනුව සකස් කරණලදී. මෙසේම රේරුකානේ චන්ද්‍රවිමල මහාස්ථවිරපාදයන් වහන්සේගේ “විදර්ශනා භාවනාවද” දෙවිනුවර ඤාණාවාස හිමියන්ගේ “අභිධර්මය” හා මාතර ශ්‍රීවංස හිමියන්ගේ “අභිධර්ම චන්ද්‍රිකාව” ද ඇසුරු කළ බව ගෞරවයෙන් සඳහන් කරමු.
මේ ග්‍රන්ථය සංශොධනය කරණ ලද්දේ ගෝමාගම විද්‍යාවර්ධන පිරිවෙනෙහි ආචාර්ය්ය විද්‍යා විශාරද පණ්ඩිත වෙඬරුවේ අනෝමදස්සී ස්වාමිපාදයන් වහන්සේ විසිනි. බලවත් අවිවේකී තාවයන් මධ්‍යයේ අප වෙත අනුකම්පාවෙන් එම ගෞරවණීය ස්වාමිපාදයන් වහන්සේ විසින් අපට කරණලද අනුග්‍රහය ආශිර්වාද පූර්වකව සිහිපත් කරමු. එසේම මේ ධර්ම පුස්තකය පිළිගෙණ සතුටින් අදහස් ප්‍රකාශකර වදාළ විද්‍යාලංකාර පරිවෙණාධිපති මාහිමියන් වහන්සේද මහා විසුද්ධාරාම ත්‍රිපිටක විද්‍යාලයාධිපතීන් වහන්සේද ගෞරවාදරාභිවාදන පූර්වකව මතක් කරමු. උන්වහන්සේලාගේ ශාසනකාමීත්‍ථ අනුග්‍රහය මේ ධර්ම ග්‍රන්ථයේ ගෞරවය වර්ධනයවීමට හේතුවී ඇත.
පිටකොටුවේ ශ්‍රී සද්ධර්මදාන සමිතියේ ආරාධනය පරිදි සතුටින් මෙය සම්පාදනය කරණලදී. සමිතිය පිළිබඳ විස්තර මෙහි අවසානයේ සඳහන්ව ඇත. වටිනා ධර්ම ග්‍රන්ථයක් වටිනාකම නොතකා නොමිලයේ ප්‍රචාරය කරවීම සමිතියේ පරමාධ්‍යාශය හෙයින් මෙය මෙසේ සම්පාදනය කර දුනිමු. මේ සමිතියේ උදාර අධ්‍යාශය පිළිබඳව බෞද්ධ ලෝකයාගේ ප්‍රශංසාව ලැබියයුතු වෙයි. මේ සමිතියේ භාණ්ඩාගාරික ධුරය දරණ පේරාදෙණියේ ඩී. ඇස්. රාජපක්ෂ මහත්මයා පිළිබඳව විශේෂයෙන් සඳහන් කළයුතුය. ප්‍රතිපත්ති ගරුක අවංක බෞද්ධයෙකු වශයෙන්ද ගුණවතෙකු වශයෙන්ද සඳහන් කළයුතු මේ මහතාගේ විශේෂ පරිශ්‍රමය සමිතියේ චිරජීවනයට හේතුවී ඇති බව කිව යුතුය. තවද ගෝල්පේස් හෝටලයේ ඇල්. බාලසූරිය මහතා පසුගිය වර්‍ෂයේ ප්‍රචාරය කරණලද “ලොකවිජය” ග්‍රන්ථය සඳහා රුපියල් 172/- ක්ද මේ ග්‍රන්ථය සඳහා රුපියල් 277/- ක්ද සපයාදීමෙන් සමිතියට කරණලද ආධාරය බලවත් රුකුලක් විය. ශ්‍රද්ධා සම්පන්නවුද පුණ්‍යකාමී වූද මේ තරුණ මහතා පිළිබඳව අපගේ අවංක ප්‍රසාදය සඳහන් කරමු. මෙසේම සමිතියේ සභාපති තැන්පත් සැදැහැවත් සී. ඩී. චාර්ලිස් වෛද්‍යාචාර්‍ය්‍ය මහතාද භාණ්ඩාගාරික ඇල්. ඒ. එච්. පී. ජෝන් මහතාද ලේකම් තැන්පත් ඊ. ඒ. පුංචිබණ්ඩා මහතාද සමිතියේ කටයුතු පිළිබඳව දියුණුවට හිතවත්ව ක්‍රියා කරන බව මතක් කරමු. තවද 1953 ජනවාරි සිට අපට මාස්පතා “සිසන්” ටිකට් පත පරිත්‍යාග කරණ “බෝට් හවුස්” එකේ මහතුන්ද අපට ධර්ම පුස්තක පරිත්‍යාග කරණ සැදැහැවත් මහතුන්ද ඉතා සතුටින් මතක් කරමු.
තවද අප විසින් 1954 වර්‍ෂයේ ප්‍රචාරය කරවනලද ලොකවිජය ධර්ම ග්‍රන්ථය පිළිබඳව 1954 මැයි 15 දින රාත්‍රි 8.15 ට ගුවන් විදුලියේ විවිධ විචාර අංශය යටතේ විවේචනයක් කළ ප්‍රවෘත්තිපත්‍ර කලාවේදී සසිරස ඩබ්ලිව්. සුරේන්ද්‍ර මහතාටද පොතක් පිළිගෙන වැදගත් විවේචනයක් පළකළ ලංකාදීප පත්‍රයෙහි ගරු කර්තෘ මහතාටද අපගේ අවංක ස්තුතිය හිමිවෙයි.
මෙහි මුද්‍රණ කටයුතු මැනවින් කරදුන් කරුණාධාර මුද්‍රණාලයේ කාර්‍ය්‍ය මණ්ඩලයටද අක්‍ෂෝපමාවේ සිතුවම් පසුපසින් සම්පාදනය කරදුන් ඇල්බට් මහතාටද ස්තූති කරමු.
මෙවර මේ ධර්ම ග්‍රන්ථයේ පිටපත් 2500 ක් පිළිබඳ වගකීම පිටකොටුවේ ශ්‍රී සද්ධර්මදාන සමිතිය සතුය. සමිතියේ සීල් එකද අපගේ අත්සනද නොමැති පොතක් ළඟ තබා ගැනීම තහනම්ය. නැවත මෙය මුද්‍රණය කිරීමේ අයිතිය සම්පාදක වන මා වෙත තබා ගනිමි.
ආචාර්ය්ය මුනිදාස වීරකෝන්, කැලණිය
පැලියගොඩ විද්‍යාලංකාර පරිවෙණාධිපති ත්‍රිපිටක වාගීශ්වරාචාර්‍ය්‍ය උපධ්‍යාය ධුරන්ධර පණ්ඩිතාචාර්‍ය්‍ය කොළඹ-හලාවත දෙදිශාවේ ප්‍රධාන සංඝනායක ස්වාමිපාදයන් වහන්සේගේ හැඳින්වීම
ලොකනිත්ථරණය හෙවත් හේතු-ඵලවාදය
මෙතෙක් නොමිලයේ ධර්මදානය සඳහා පිළියෙල කර තිබෙන මේ ධර්ම ග්‍රන්ථයෙන් ලොකයෙහි සියලු ආගම් අතුරෙන් බුද්ධාගම ශ්‍රේෂ්ඨ වූයේ මක්නිසාද යන ප්‍රශ්නය පහසුවෙන් විසඳාගත හැකිවෙයි.
බුද්ධ චරිතය ඇසුරුකොට ලියන්ට පටන්ගත් මේ ධර්ම ග්‍රන්ථයෙහි ඉතා සැකෙවින් බුද්ධචරිතයද, බුදුරජාණන් වහන්සේගේ දින චර්යාවද, බෝසත් ගුණ මහිමයද, මැනවින් ප්‍රකාශ වෙයි.
මෙසේ මෙයින් මේ ධර්ම ග්‍රන්ථය සැපයූ ආචාර්ය්ය මුනිදාස වීරකෝන් මහතාගේ ධර්‍මඥානය ගැනත්, නිසර්ග සාමර්ථ්‍යය ගැනත්; මෙය මුද්‍රණය කරවීමට ධෛර්ය්‍ය දුන් පරිත්‍යාගශීලී පින්වතුන්ගේ ධර්‍මප්‍රචාරය සඳහා ඇති උද්‍යෝගය ගැනත්; බෞද්ධ ලෝකයාගේ නොමසුරු ප්‍රශංසාව හිමිවෙයි.
මේබව:– ශාසනොදයකාමී කිරිවත්තුඩුවේ ශ්‍රී ප්‍රඥාසාර, විද්‍යාලංකාර පරිවෙණාධිපති
කොළඹ දෙමටගොඩ මහා විසුද්ධාරාම ත්‍රිපිටක විද්‍යාලයාධිපති ආචාර්ය්ය දෙවිනුවර ඤාණාවාස ස්වාමිපාදයන් වහන්සේගේ හැඳින්වීම
ලොකනිත්ථරණය හෙවත් හේතු-ඵලවාදය.
නමැති ධර්‍මපුස්තකය අවකාශ ඇති පරිදි තරමක් දුරට කියවා බැලුවෙමු.
මේ පොතෙහි බුද්ධ චරිතය හා පටිච්ච සමුප්පාදය ආදී වැදගත් කරුණු රැසක් ලිහිල් බසින් විස්තර කොට තිබේ.
සම්පූර්ණ පොත කියවන්ට අවකාශ නොලැබුන නමුත් අපට කියවන්ට ලැබුනු කොටස්වල ඇතුලත් බණපද පැහැදිලි කොට තිබෙන අයුරු සැලකීමේදී ග්‍රන්ථය නිෂ්පාදනය කළ ආචාර්ය්ය මුනිදාස වීරකෝන් මහතාගේ ධර්ම ඥානය බොහෝ දුරට දියුණුවී ඇති බව විශ්වාස කළහැක.
විශෙෂයෙන්ම මෙහි අභිධර්මය පිළිබඳ සියුම් බණපද විස්තර කර තිබෙන අයුරු ඉතා මනහරය. තවද මෙහි අනික් ආගම්වල අසාරත්‍වයද, බුද්ධාගමේ සාරත්‍වයද පැහැදිලිකොට තිබේ. එම නිසා සෑම බෞද්ධයෙකු විසින්ම මේ පොත සාදරයෙන් කියවා ඉගෙනගත යුතුය. බෞද්ධයාගේ අත්පොත හැටියට පරිහරණය කිරීමද මෙය ඉතා සුදුසුය.
මේ පොත සම්පාදනය කිරීමෙන් වීරකෝන් මහත්මයාට හා එය මුද්‍රණය කිරීමෙන් මුදල් වැය කළ භවතුන්ටත් ඤාණ සම්භාර කුසල් රැස්කරගත හැකි වූ බැවින් ඒ පින්වතුන්ගේ උත්සාහය ඉතා ශ්ලාඝනීය බව කිවයුතුය.
මීට – වැඩ කැමැති,
දෙවිනුවර ඤාණාවාස (ස්ථවිර)