සදහම් සෙවණ පිටු පත්‍රිකා - කඩවත ගුණානන්ද හිමි 2007.pdf

සදහම් සෙවණ යනු පූජ්‍ය කඩවත ගුණානන්ද හිමියන් විසින් 2007 වෙසක් පුර පසළොස්වක පොහොය දින සිට 2010 මැදින් පොහොය දක්වා ශ්‍රී විනයාලංකාරාරාම විහාරස්ථානයේදී සැදැහැවතුන් වෙත බෙදාහරින ලද සදහම් පත්‍රිකා 36ක් එක්කොට සම්පාදනය කරන ලද ධර්ම සංග්‍රහයකි.

බුදු දහමේ විවිධ මාතෘකා යටතේ එන කරුණු වගු, රූප සටහන් සහ කෙටි සටහන් ආශ්‍රයෙන් ක්‍රමානුකූලව ඉදිරිපත් කර ඇති බැවින්, දහම් පාසල් ගුරුවරුන්ට, ධර්ම දේශකයන් වහන්සේලාට මෙන්ම ධර්මය හදාරන සැදැහැවතුන්ට පරිශීලනය ඉතා පහසු වන පරිදි සකසා ඇත. මෙහි එන ප්‍රධාන මාතෘකා අතර:

• එක් සක්වලක පිහිටීම සහ ලෝක විනාශය
• දස අකුසල්, දස පුණ්‍ය ක්‍රියා සහ දස පාරමිතා විස්තර
• ධර්ම චක්‍ර සටහන, ආර්ය අෂ්ටාංගික මාර්ගය සහ හේතු ඵල ධර්ම
• දෙතිස් මහා පුරුෂ ලක්ෂණ, බුද්ධ ඥාන සහ සූවිසි විවරණ
• පොහොය දින, සතර අපාය, සිත හා කය විග්‍රහය

පෙරවදන

ගිහි පිංවතුන් මෙන්ම මහා සංඝරත්නයේ පැසසුමට මෙම පොත පත්ව ඇත. ධර්‍ම දේශනා කිරීම්, දහම් පාසල් ඉගැන්වීම් සඳහා බෙහෙවින් උපකාර වන බව සම්මුඛව හා දුරකථන පණිවිඩ මගින් අප වෙත කෙරෙන ප්‍රකාශ තුළින් ඒ බව මනාව පැහැදිලි ය.

තුන් වසරක් මුළුල්ලෙහි පුර පසළොස්වක පොහොය දිනයන්හි බෙදා දුන් දහම් පත්‍රිකා පෙළ මෙසේ පොතක් ලෙස පෙළ ගස්සවා ඇත. මෙහි කියවීමට අනුපිළිවෙළක් අවශ්‍ය නැත.බුදු දහමේ සඳහන් විශේෂිත දහම් කරුණු රාශියක් විවිධාකාර රාමු තුළ අන්තර්‍ගත කර කෙටි විස්තර සහිතව දක්වා ඇත. එම කරුණු උපුටා ගැනීමට උපකාර වූ පොත් පත්හි නම් එක් තැනෙක දක්වා ඇත. යම් මාතෘකාවක් සොයා ගැනීමට පහසුවීම පිණිස මෙවර පිටු අංක අනුපිළිවෙළට යොදා පටුනක් සකසන ලදී.

තවද මෙම මුද්‍රණයේදී පිට කවරය වෙනස් කර ‘සදහම් පිටුව’ නමින් හැඳින්වූ මෙම පොත කියවීමෙන් දහම් සුවයක් ලැබෙන බැවින් ‘සදහම් සෙවණ’ නමින් හැඳින් විය. මෙයාකාරයෙන් පොතක් ලෙස මුද්‍රණය කරන්නට වූයේ පිංවත් අමිල මහතාගේ යෝජනාවක් පරිදිය. දහම් කරුණු වලට ගැළපෙන පරිදි පොතේ බාහිර පෙනුම වෙනස් කරමින් පොතට තවත් වටිනාකමක් ගෙන දීමට යෝජනා කර කටයුතු කළ පිංවත් එම මහතාටත්, මුද්‍රණ කටයුතු මනාව කිරීමට දායක වූ සැමටත් අපි පුණ්‍යානුමෝදනා කරමු.

සම්පාදක
කඩවත ගුණානන්ද හිමි
ශ්‍රී විනයාලංකාරාරාමය,
පොකුණුවිට.