සන්න සහිත කච්චායන භේදය - පඤ්ඤාරාම හිමි.pdf
- කතෘ :
- මහායස හිමි
- ප්‍රකාශිත වර්ෂය :
- 1907
- මුද්‍රිත වර්ෂය :
- 1907
- පිටු ගණන :
- 101
- බාගත කිරීම් ගණන :
- 1,117
- වෙබ් අඩවියට එක් කළ දිනය :
- 2019-03-29
- ගොනුවේ ප්‍රමාණය :
- 6.3 MB
පොතේ පිටු කිහිපයක ඡායාරූප පහතින් බලන්න.
සන්න සහිත කච්චායන භේදය යනු පාලි ව්‍යාකරණ ඉගෙනුම සඳහා ඉතා ප්‍රකට කච්චායන ව්‍යාකරණ සම්ප්‍රදායට අයත් ග්‍රන්ථයකි. බුරුම රට විසූ මහායස මහාස්ථවිරයන් වහන්සේ විසින් රචිත මෙම මුල් ග්‍රන්ථයට සිංහල සන්නය සම්පාදනය කර ඇත්තේ කොස්ගොඩ විජයසිරිවර්ධනාරාමවාසීව වැඩවිසූ දුරුජීනවංශ සිරි පඤ්ඤාසාර මහාස්ථවිරයන් වහන්සේ විසිනි.
මෙම මුද්‍රණය සඳහා එම පැරණි සන්නය ප්‍රතිසංස්කරණය කර සකස් කරන ලද්දේ උන්වහන්සේගේ අනුශිෂ්‍ය කොස්ගොඩ තල්ගහපිටියේ අභයසිරිවර්ධනාරාමවාසී පඤ්ඤාරාම ස්ථවිරයන් වහන්සේ විසිනි. බුද්ධ වර්ෂ 2450 (ක්‍රි.ව. 1907) දී ප්‍රකාශයට පත් කරන ලද මෙහි අභිනව ටීකානුසාරයෙන් උදාහරණ හා ටීකාපාඨ දක්වමින් සවිස්තරව කරුණු පැහැදිලි කර ඇත.
සංඥාපනය.
කාත්‍යායන ව්‍යාකරණ රත්නාකර ප්‍රවේශයෙහි නිරතවූ ආධුනික ජනතාවට නිරායාශ මාර්ගවූ “කච්චායනභේද” නම් මේ ග්‍රන්ථය මීට දෙසිය අටඅනූ වර්ෂයකින් පෙර එනම් ශ්‍රී බුද්ධ වර්ෂයෙන් 2152 පමණ කාලයෙහි බුරුම රට විසූ කීර්තිමය මූර්තීන් ඇති පාලි සංස්කෘතාදි නානාභාෂාවන්හි විසාරද බුද්ධිමන්වූ දෙසැටසිංහ වෘත්තිය ඇසුරුකොට කරණලද “සම්බන්ධචින්තා” නම් සංස්කෘත ග්‍රන්ථය නිශ්‍රය කොට “කච්චායනසාර” නම් පාලි ව්‍යාකරණ ග්‍රන්ථය නිර්මාණ යකළ මහායස නම් මහාස්ථවිරයන් විසින් රචනාකරණලදි.
මීට අරියාලංකාර මහතෙරුන් විසින් විරචිත ප්‍රමාණයෙන් කුඩාවුවත් කච්චායනභේදගත අර්ථාවබෝධයෙහි මහොපකාරීවූ “සාරත්ථවිකාසිනී” නම් පුරාණ ටීකාවද උත්තමසික්ඛ මහාස්ථවිරයන් විසින් පෙළ අටුවා ටීකා ප්‍රකරණ ආදියෙන් හා නොයෙක් පාලිව්‍යාකරණ ග්‍රන්ථාන්තරයෙන්ද දෘෂ්ටාන්ත දක්වා සුවිසි බණවරකින්පමණ ඉතා විස්තරව රචනා කරණ ලද “කච්චායනභේද පදීපක සංවණ්ණනා” නම් අභිනව ටීකාවදැයි ටීකාවයක් විද්‍යමානයි.
මේ කච්චායනභේද ග්‍රන්ථය ග්‍රහණ ධාරණ විසින් පරිශීලනය කරණුවන්ට කාත්‍යායන ව්‍යාකරණාවබෝධය සුකරවූයේවිනමුත් නවීණයන්ට ව්‍යාඛ්‍යාන විරහිත කච්චායනභේදයෙන් ප්‍රතිෂ්ඨා ලැබීම සුකර නොවේමය.
එබැවින් මෙයින් සම පනස් වර්ෂයකට පෙර දක්ෂිණ ලංකාවේ කොස්ගොඩ ගණේගොඩැල්ලේ විජයසිරිවර්ධනාරාමයෙහිවිසූ ප්‍රෙත වස්තු අටුවා සන්නයෙහිද අභිනව සාසනවංස සන්නයෙහිහා ඤෙය්‍යත්‍ථ කාව්‍ය ව්‍යාඛ්‍යානයෙහි කර්තෘවූ පාලි සංස්කෘතාදි භාෂාතත්ව විජානනයෙහි සුනිපුණ පණ්ඩිතායත් දුරුජීනවංශ සිරි පඤ්ඤාසාර මහාස්ථවිරයන්වහන්සේ විසින් මේ(කච්චායන භේද)ප්‍රකරණයට සන්න ලියන ලදි. භේද ශ්‍රවණී ප්‍රදීපනයෙන් ආධුනික ජනතාවගේ විපුල ප්‍රයෝජනයට බාධාවේයැයි ලිහිල්බසින් අභිනව ටීකානුසාරීව උදාහරණ දක්වමින් විස්තර කටයුතු තැන්සවිස්තරවද සුබෝධස්ථාන සංක්ෂෙපවද ඇතැම් තැන ටීකාපාඨද දක්වමින් භාවයම ගරුකොට සලකා ඉතා පරිශ්‍රමයෙන් ලියනලද බැව් පෙනේ.
මෙය නූතන ශිෂ්‍යසමූහයා අතර පතළකිරීම මෙකල ආවශ්‍යක කෘත්‍යයක් හෙයින් සන්නකාරීන්වහන්සේගේ අනුශිෂ්‍යයෙක්වූ කොස්ගොඩ තල්ගහපිටියේ අභයසිරිවර්ධනාරාමවාසී පඤ්ඤාරාම ස්වාමීන්වහන්සේලවා මුද්‍රණයට යොග්‍යපරිද්දෙන් ප්‍රතිසංස්කරණය කරවාගෙන මෙසේ ප්‍රසිද්ධ කෙළෙමු.
මේ පොත මුද්‍රණය කරවීම සඳහා කොස්ගොඩ අගම්පොඩි චාර්ලිස් මැන්දිස් විසින් කඩදාසි අරන් දීමෙන් ආධාර කරණලද බව සතුටින් ප්‍රකාශ කරමු.