බාලාවතාර සුත්‍ර වර්ණනාව - වැලිතර ඤාණවිමල හිමි.pdf
- කතෘ :
- වැලිතර ඤාණවිමල හිමි
- ප්‍රකාශිත වර්ෂය :
- 1914
- මුද්‍රිත වර්ෂය :
- 1914
- පිටු ගණන :
- 469
- බාගත කිරීම් ගණන :
- 1,281
- වෙබ් අඩවියට එක් කළ දිනය :
- 2019-03-29
- ගොනුවේ ප්‍රමාණය :
- 225 MB
පොතේ පිටු කිහිපයක ඡායාරූප පහතින් බලන්න.
බාලාවතාර සූත්‍ර වර්ණනාව යනු පාලි ව්‍යාකරණ ඉගෙනුම සඳහා සම්පාදිත ප්‍රකට කෘතියක් වන බාලාවතාරයෙහි එන සූත්‍රයන් අර්ථ විවරණ, නිර්දේශ සහ නිෂ්පත්ති සහිතව විග්‍රහ කරමින් සම්පාදිත අගනා ග්‍රන්ථයකි. මෙහි කර්තෘත්වය දරන්නේ වැලිතර විද්‍යොභාෂ පරිවෙණාධිපති ධුරය දැරූ සු. ජී. ඤාණතිලකාභිධාන අමරපුර ගණප්‍රධාන සංඝනායක ස්වාමිපාදයන් වහන්සේගේ ශිෂ්‍යවර වැලිතර ඤාණවිමල තිස්ස ස්වාමීන් වහන්සේ විසිනි.
විද්‍යොභාෂ පිරිවෙන්හි උපාචාර්‍ය්‍ය අරියවංසාලංකාර කවිධජ ඤාණාවාස තිස්ස ස්වාමීන් වහන්සේ විසින් මෙම ග්‍රන්ථය ශුද්ධි පත්‍රාවලෝකනය කර සංස්කරණයට සහාය වී ඇති අතර, වැලිතර ඇම්. ඒ. ඩී. සිල්වා මුදලාලි මහතුන්ගේ ප්‍රකාශනයෙන් 1914 වසරේදී විද්‍යාර්ත්ථාකර යන්ත්‍රාලයෙහි මුද්‍රණය කරවා ඇත.
බාලාවතාරය හදාරන ශිෂ්‍යයන්ට කාත්‍යායන ව්‍යාකරණ සූත්‍රයන්ගේ අර්ථය හා පද නිෂ්පත්තිය සවිස්තරව පහසුවෙන් වටහා ගැනීමට හැකිවන අයුරින් මෙම සූත්‍ර වර්ණනාව සකසා තිබේ.
වි ඥා ප ති ය.
ශ්‍රී සුගත තථාගත දෙශිත මූලභාෂා සංඛ්‍යාත ශුද්ධ මාගධීමය ත්‍රිපිටක ධර්‍මාවබොධයෙහි මහෝපකාරීභූත නෛක ශාස්ත්‍රාර්ත්‍ථපාරදර්ශී සද්ධර්‍මවිදෙශීසාර්‍ථවාහවරප්‍රණීත සූත්‍රොදාහෘත ප්‍රයොගාත්මක ව්‍යාකරණ ග්‍රන්ථ අතුරෙන් අසීති මහාශ්‍රාවකාන්තර්ගත සිව්පිළිසිඹියාපත් අභිභූ මහාකාත්‍යායන මහාස්වාමින් විසින් දෙශනාකර වදාරණලද්දාවූ කාත්‍යායන ප්‍රකරණය සමයසමයාන්තර ප්‍රවීණ ගාම්භීර්‍ය්‍ය ප්‍රවාරිතාශෙෂ පණ්ඩිතොත්තමයන් විසින් සුසම්භාවිත ග්‍රන්ථ රත්නයකි.
ඒ මේ අර්හන්ත මහා කච්චායන ස්වාමිපාදොත්තම තෙමෙ සද්ධර්මප්‍රවචනාදියෙහි දක්ෂතර තන්නාමික අන්‍යතම සද්ධිවිහාරිකයෙකැයි ලක්වැසි ඇතැම් පණ්ඩිතයන්ගේ සම්මතයකි.
ඒ වනාහි න්‍යාස සාරාත්‍ථමඤ්ජූසා රූපසිද්ධි තට්ඨීකා සූත්‍රනිද්දෙස කාත්‍යායන වර්‍ණනා ශබ්දනීති තට්ඨීකා කාත්‍යායනභෙද මහාටීකා යනාදී ග්‍රන්ථකාරාචාර්‍ය්‍යවරයන්ගේ මතාවලම්බනකාරී ආගම ශාස්ත්‍රාභිදක්ෂ සුධීශ්වරයන් එකහෙලා නොපිළිගත් කරුණකි.
එක්භාගියෙන් සහස්‍ර ග්‍රන්ථධාරණයෙහි පුළුල් ශක්තිමත් ශාරීපුත්‍රාදි ප්‍රගුණවිතාචාර්‍ය්‍යවරයන් විසිනුදු නිසැකව පිළිගත් මෙබඳු කරුණු සංස්කෘත ප්‍රාකෘතාදි නෛකශාස්ත්‍රාභිදක්ෂ සමහර පණ්ඩිතයන් නොපිළිගනු ලැබීම සාතිශය සාවද්‍යයකි.
හේ කෙසේ වෙතත් කාත්‍යායනව්‍යාකරණය ශබ්දනීති මොග්ගල්ලානාදී සෙසු ව්‍යාකරණයන්ට වඩා ප්‍රයොගසාධනයෙහි විචක්ෂණභාවය පිණිස ලංකා ස්‍යාම අමරපුරාදී රටවල හැම ඇදුරෝම ස්වකීය ශිෂ්‍යවරයන්ට උගන්වති.
සුවිමල විපුල ප්‍රඥාවෙය්‍යාකරණික ජනකවූ වත් ව්‍යාකරණාර්‍ත්‍ථාවබොධයට සුඛොපගමනොපායභූත හෘදප්ප්‍රහ්ලාදකර ධර්‍මකීර්තිපාදප්‍රණීත බාලාවතාර ග්‍රන්ථය ග්‍රහණධාරණ වශයෙන් පරිශීලනයකරනු ලැබීම ශුද්ධමාගධික නිරුක්තියෙහි තත්පරවූවන් අතර අඛණ්ඩව පවත්නා මාහැඟි සිරිතකි.
ඒ එසේවුයේ ප්‍රථමකොටම ලක්ෂණප්‍රධානවූ සුවිහිත කාත්‍යායනොද්ග්‍රහණයෙන් මන්‍දබුද්ධීන්ට පදසිද්ධික්‍රම දුරවබොධහෙයිනුත් ලක්ෂ්‍යප්‍රමුඛව ප්‍රතිපාදිත බාලාවතාරය තදර්ථසිද්ධිය සහිත කාත්‍යායන පාරාවාර තරණයෙහි තරණසමාන වන බැවිනි.
බාලාවතාරොද්ග්‍රහණාභිලාෂීන්ට තද්විජානනයෙහි සුඛාවතරණය සඳහා ලක්දිවැ සුවිශද බුද්ධිමතුන් විසින් ව්‍යාඛ්‍යාන, ටීකා, ගණ්ඨිපද ක්‍රමයෙන් කලින් කල නිපදවනලද ග්‍රන්ථ රාශියක් විද්‍යමාන වන්නේයි.
ඉන් එකක් නම් ග්‍රන්ථකර්තෲන් වහන්සේ විසින්ම කරණලදැයි කිසිවකු විසින් සලකනු ලබන ගඩලාදෙණි සන්නය නමින් ලොකප්‍රසිද්ධ ව්‍යාඛ්‍යානයවේ. එසේම ඔකඳපල සන්නය (නොහොත්) බාලාවතාර ලියන සන්නය, එම බලන සන්නය, සුගන්ධිසාරය, බාලාවතාර සූත්‍ර නිද්දෙසයයි, තවත් පොත් කිහිපයක් ඇත්තේයි.
මෙයින් ගඩලාදෙණි සන්නය බාලාවතාරගත සූත්‍රයන්ගේ සාමාන්‍ය පද විභාගයක් සහිත වාක්‍යාර්ථයට පමණක් පැහැදී ඇති ඇතැම් තැන් මඳක් විනිශ්චයකොට පරව්‍යාකරණ ග්‍රන්ථයන්ගෙන්ද සාරවත් කරුණු යොකොට කරණලද්දේයි. ඔකඳපල සන්නය පදසිද්ධි මාත්‍රයක් නිදර්ශිතවූවකි. බලන සන්නය ගඩලාදෙණි සන්නයම ඇසුරුකොට කරතිබෙන බැවින් ගඩලාදෙණි සන්නය භාවිතාකරනු ලබන්නන්ට එය බැලීමෙන් වැඩිප්‍රයෝජනයක් නොමැත්තේයි. සුගන්ධිසාරයෙන් ලද හැකි සියලු ප්‍රයෝජන ගඩලාදෙණි සන්න, ඔකඳපල සන්න දෙකින්ම සම්පූර්ණවන්නේයි. සූත්‍රනිද්දෙසයෙහි ඇති විශේෂප්‍රයෝජන නම් ඇතැම් සූත්‍රයන්ගේ පදවිභාගවාක්‍යාර්‍ත්‍ථයක් සහිත එසේම නිද්දෙස ක්‍රමයක් දැනගැන්මවෙයි. හේ ද සියලු සූත්‍ර පිළිබඳ නොවෙයි.
සූත්‍ර පිළිබඳ නොවන බැවිනුත් නිද්දෙස දැක්වීමද බෙහෙවින් අශොභන බැවිනුත් මන්‍දබුද්ධීන්ට සම්පූර්ණඥානවන්ත නොවන්නේයි.
බාලාවතාරයට කරණලද ටීකා අතුරෙන් පරම ගෞරව්‍යාකරණ හෘදයඥ බුද්ධඝොෂ මහාස්වාමිපාද විරචිත සාරාර්ත්‍ථසංග්‍රහාභිධාන පුරාණ ටීකාව සප්‍රයෝජන මාහැඟි කරුණුවලින් යුක්ත නමුත් කිතකය අවසන්කොට පවත්නාවූ ලඝුතර කෘතියකි. කාරකලක්ෂණාවබොධයෙහි කිඤ්චිදුපකාරයක් ඉන් නොලද හැක්කේයි.
මීට ත්‍රිපිටක වාගීශ්වර ශ්‍රී සුමංගලාභිධාන නවකෝරළේ ප්‍රධාන නායක ස්ථවිරයන් වහන්සේ විසින් ලියනලද සුබෝධිකා නම්වු ටීකාවක්ද ඇත්තේය.
එසේද වුවත් බාලාවතාර ව්‍යාකරණානුරොධොද්ග්‍රහණාභිලාෂීන්ට අතිශය ප්‍රයෝජන දායකවූ සූත්‍රසංවර්ණනාවෙහි මෙතෙක් එකම ආචාර්යවරයන්වත් ප්‍රොත්සාහී නුවූ බැව් ඒ ඒ ග්‍රන්ථාවලොකනයෙහි තත්පරවූවන්ට මනාව වැටහේමැයි.
අප විද්‍යාමන්දිරයෙහි මේ ග්‍රන්ථය උගන්වනු ලබනකල්හි මේ ක්‍රමයටම අර්ත්‍ථව්‍යාඛ්‍යායී සකලනෙරුක්තිකානමස්‍යමානානුඥ සු. මහාතිස්ස අරියවංසාලංකාර ඤාණතිලකාභිධාන අමරපුර ගණප්‍රධාන සංඝනායක මාහිමියන් වහන්සේ විසින් උගන්වනු ලබන්නේයි. ඒ උගන්වනු ලබන්නේද හැම ආචාර්‍ය්‍යවරුන්ට එසේ ඉගැන්වීම දුෂ්කරවූහෙයින් ඔවුන්ගේ පහසුව පිණිසද උන්වහන්සේගේ වචනමාර්‍ගය ආශ්‍රයකොට මේ වර්ණනාව ලියන ලද්දේයි.
යම් කිසි ව්‍යාකරණ ග්‍රන්ථයක ප්‍රධාන වශයෙන් නිසැකව උගතමනාවන්නේ එහි සූත්‍ර පිළිබඳ සම්පූර්ණ විස්තර කථාව වේ. සූත්‍රඥානයෙහි අපොහොසත් ජනතෙමේ පදසිද්ධ්‍යාදි තදනුගත ක්‍රමයන්හි කිසිසේත් දක්ෂ නොවන්නේයි. සූත්‍රවිපන්නයෙහි පටුතරභාවය අනිකුදු සියල්ලටම මූලාධාරවන්නේයි.
අපගේ මේ ග්‍රන්ථයද බාලාවතාරොද්ග්‍රහණයෙහි නියුක්ත ශිෂ්‍යජනයාට අනිකුදු එකම ව්‍යාකරණ ග්‍රන්ථයකින්වත් අනූනව නොලැබිය හැකි පරිද්දෙන් සියලු සූත්‍රයන්ගේ අර්ත්‍ථවිවරණ, නිද්දෙස, නිෂ්පත්ති යන මේ ප්‍රධානාංගයන් ඇතුලත්කොට කරණ ලද්දේයි.
එබැවින් මේ එකම සූත්‍රවර්‍ණනාව භාවිතකිරීමෙන් ඊෂිකාඛිඩා පරවශනොවූ සකල මන්‍දබුද්ධීන්ට කාත්‍යායන ව්‍යාකරණයද සුවසේ දතහැකි බැව් කියමු.
තවද මේ ග්‍රන්ථය ලිවීමේදී අපහට දුරවබොධවූ අනෙකස්ථාන කරුණු සහිතව විස්තාරකොට දෙමින් ආධාරකළාවූ වැලිතර විද්‍යොභාෂ පිරිවෙන්හි උපාචාර්‍ය්‍ය අරියවංසාලංකාර කවිධජ වැලිතර ඤාණාවාස ස්වාමීන්ට අනෙක වාරයක් ප්‍රණාමපූර්‍වක ස්තුති කරම්හ.
එසේම මෙම ග්‍රන්ථයෙහි ශුද්ධිපත්‍රයට ඇතුලත්නුවූද මන්‍දබුද්ධිය සෙවුනාවූද යම් යම් ඛලිතස්ථාන ඇතොත් දයාපූර්‍වකව සුධීන් විසින් ශොධනය කටයුතු.
මීට සකලබාල ජනහිත කාංශි වැලිතර ඤාණවිමල තිස්ස භික්‍ෂු.
සකලබාල ජනහිත කාංශි වැලිතර ඤාණවිමල තිස්ස භික්‍ෂු.