පාළිපාඨමඤ්ජරී නවීන භාගය - කහඳාමෝදර පියරතන හිමි.pdf

පාළිපාඨ මඤ්ජරී (නවීන භාගය) යනු පිරිවෙන් සහ පාසල්වල පාළි භාෂාව හදාරන ආධුනික ශිෂ්‍යයන් සඳහා මූලික පාඩම් මාලාවක් වශයෙන් සම්පාදිත ප්‍රවේශක (Primer) ග්‍රන්ථයකි. කෝට්ටවගොඩ සුදර්ශන බිම්බ මහා විහාරාධිපති මෙන්ම සේෂගමෝදය විද්‍යාලයේ ප්‍රධානාචාර්ය ධුරය හෙබවූ ශාස්ත්‍රාචාර්ය පණ්ඩිත කහඳාමෝදර චන්ද්‍රකීර්ති ශ්‍රී පියරතන ස්ථවිරයන් වහන්සේ විසින් මෙම ග්‍රන්ථය සම්පාදනය කර ඇත.

පාළි භාෂාව මුල සිට සරලව ඉගෙනගත හැකි වන පරිදි නාම වරනැගිලි, ක්‍රියා පද, සරල වාක්‍ය භාවිතය මෙන්ම අතරමැද පාඨසම්පිණ්ඩන (Revisions) සහ අභ්‍යාස ප්‍රශ්න (Exercises) ද මෙහි අන්තර්ගත කොට තිබේ. අගභාගයෙහි සිංහල-පාළි ශබ්ද මාලාවක් ද එක්කර ඇත.

මෙම චතුර්ථ මුද්‍රණය 1980 වසරේදී කොළඹ ඇම්. ඩී. ගුණසේන සහ සමාගම මගින් මුද්‍රණය කර ප්‍රකාශයට පත් කරවා තිබේ.

සංඥාපනය

පිරිවෙන්වල ද පාසැල්වල ද පාළි භාෂාව ඉගෙන ගන්නා ආධුනිකයන්ගේ පහසුව පිණිස අළුත් මගක් ගෙන අප විසින් ලියන ලද පාළිපාඨ මඤ්ජරී නම් වූ පාළි පාඩම් පොත් පෙළ අධ්‍යාපන මණ්ඩලය විසිනුදු පිළිගන්නා ලද්දව පාලි ඉගෙන ගන්නවුන් අතර ජනප්‍රිය වී තිබෙනු දැක්ම මහත් ධෛර්ය්‍යයකි.

මේ ඒ පාළි පාඩම් පොත් පෙළේ නවීන (Primer) භාගයයි. පාළි ඉගෙනීම පටන් ගන්නවුන්ට වඩාත් පහසු පාඩම්වලින් යුත් මෙබඳු කුඩා පොතක් ලිවීමේ අවශ්‍යකම අපට පෙනී ගියේ එහි පළමුවැනි පොත ලියුවාට පසුවය. මේ එහි ප්‍රතිඵලයයි.

මෙහි නාම වරනැගිලි දැක්වීමේ දී ඒ ඒ විභක්තිවලට එක් එක් වචනය බැගින් යොදන ලද්දේ ශිෂ්‍යයාගේ මූලික දැනීමට එය ප්‍රමාණවත් යයි කල්පනා කළ බැවිනි. ආලපන විභක්තිය මෙහි දක්වා නැත. මෙහි වචන තේරීම හා ඒවා පාඩම්වල යෙදීම ද ශිෂ්‍යයාගේ දැනුම ටිකෙන් ටික දියුණුවන අන්දමට ක්‍රමානුකූලවමනා සැලකිල්ලෙන් කරන ලදී. මුල් මුල් පාඩම්වලින් ඉගෙන ගත් වචනවලින් ම පසු පසු පාඩම් පිළියෙල වී ඇති බව දැක්ක හැකිය. 23 වෙනි 30 වෙනි පාඩම් දෙක ශිෂ්‍යයා මේ පොතෙන්ම ඉගෙන ගත් වචනවලින් ගලපා සෑදූ පාඩම් බැවින් ස්වශක්තියෙන් වුව ද එහි අදහස අවබෝධ කරගත හැකිය.

පාඩම් කීපයක් දැක්වූ පසු ඒ පාඩම් අභ්‍යාසයෙහි යෙදීම පිණිස පාඨසම්පිණ්ඩන ද (Revisions) අභ්‍යාස ප්‍රශ්න ද (Exercises) මෙහි යොදා ඇත.

මෙහි සියලු හිමිකම් අප වෙත ඇවුරුණේය.

මීට,
පණ්ඩිත කහඳාමෝදර පියරතන ස්ථවිරයෝ.
සේෂගමෝදය විද්‍යාලය,
කෝට්ටවගොඩ, මාතර.