පාලිගද්‍යපද්‍යරචනා - පොල්වත්තේ බුද්ධදත්ත හිමි.pdf
- කතෘ :
- පොල්වත්තේ බුද්ධදත්ත හිමි
- ප්‍රකාශිත වර්ෂය :
- 1962
- මුද්‍රිත වර්ෂය :
- 1962
- පිටු ගණන :
- 156
- බාගත කිරීම් ගණන :
- 4,043
- වෙබ් අඩවියට එක් කළ දිනය :
- 2018-02-14
- ගොනුවේ ප්‍රමාණය :
- 8.3 MB
පොතේ පිටු කිහිපයක ඡායාරූප පහතින් බලන්න.
පාලිගද්‍යපද්‍යරචනා යනු අග්ගමහාපණ්ඩිත පොල්වත්තේ බුද්ධදත්ත මහානායක ස්ථවිරයන් වහන්සේ විසින් සම්පාදිත පාලි වාක්‍ය රචනාව, භාෂා පරිවර්තනය සහ ගාථා බැඳීම (පද්‍ය රචනාව) ඉගැන්වීම පිණිස සම්පාදිත ප්‍රායෝගික අත්පොතකි. මින් පෙර උන්වහන්සේ විසින් පළකරන ලද ‘පාලිවාක්‍යවිවේචනය’ සහ ‘පාලිවාක්‍යරචනාව හා පරිවර්තනපරිචය’ (1947) යන කෘතිවල අන්තර්ගතය ද ඇතුළත් කරමින්, ගාථා බන්ධනය (පද්‍ය රචනාව) පිළිබඳ මූලික කරුණු ද එකතු කර මෙම කෘතිය සංස්කරණය කර ඇත.
මෙහි ප්‍රධාන වශයෙන් සරල වාක්‍ය සැකසීමේ සිට සංකීර්ණ වාක්‍ය නිර්මාණය දක්වාත්, සිංහල වැකි හා ඡේද පාලියට පෙරළීම, පෞද්ගලික ලිපි සැකසීම, පාලි භාෂා රීති, දීර්ඝ වාක්‍ය කෙටි කිරීම ආදී කරුණු රැසක් විස්තර වේ. එසේම ක්‍රියාමාලා, නිපාත මාලා, යුගල ශබ්ද, විරුද්ධාර්ථ පද මෙන්ම පාලි-සිංහල ශබ්දකෝෂාංග ද අභ්‍යාස සහිතව මෙහි අඩංගුය.
මෙම මුද්‍රණය 1962 දී අම්බලන්ගොඩ ආනන්ද සාප්පුවේ ඒ. පී. කේ. ද වාස් මහතා විසින් ප්‍රකාශයට පත් කරන ලද අතර මුද්‍රණය කොළඹ මරදානේ අනුල මුද්‍රණාලය මඟින් සිදු කර ඇත.
හඳුන්වාදීම.
ස්වභාෂාව නොවු බසක් ඉගෙන ඒ භාෂාවෙන් වාක්‍යරචනා කිරීම කාට වුවත් අපහසු වැඩකි. එහෙත් ඉංග්‍රීසි වාක්‍යරචනාව මුලසිටම පුහුණු කරවීම සඳහා ඒ පාඨශාලාවල උපක්‍රම යොදා තිබේ. ඒ සඳහා අප්‍රමාණ පොත් ද ඒ බසින් සම්පාදිතව තිබෙත්. පාලි භාෂාවේ වාක්‍යරචනාව ඉගැන්වීම ඉතා මෑතකදී පටන්ගන්නා ලද්දකි. මාගේ “පාලිභාෂාවතරණය” වාක්‍යරචනාව මුල්කොට සම්පාදිත වූවකි. එහෙත් එය භාෂාවත් ව්‍යාකරණත් ක්‍රමානුකූලව ඉගැන්වීම සඳහා අදහස්කරන ලද්දක් බැවින් වාක්‍යරචනාවට ඕනෑ සියලු දේ එහි දැක්වීමට අවකාශ නැත. ප්‍රාචීනභාෂෝපකාර සමිති ආදියේ විභාගවලට පෙනී සිටින ශිෂ්‍යයන් වාක්‍යරචනාවලින් බොහෝසේ අසමර්ථවනබව නොයෙක් විට අසන්ට ලැබේ. එයට උපකාර වන අන් පොතක් නොතිබුණු බැවින් මා විසින් මින් පෙර “පාලිවාක්‍යවිවේචනය” නම් පොතක් සම්පාදිත විය. ඒ පොතේ පිටපත් අවසන්වූ විට එය නැවත සකස් කිරීමේදී භාෂාපරිවර්තනය සඳහාත් කොටසක් එක්කළයුතු බව පෙනීගිය නිසා ඒ පොතේ පිළිවෙළ වෙනස්කොට “පාලිවාක්‍යරචනාව හා පරිවර්තනපරිචය” නමැති පොත සකස් කරන ලදී. 1947 දී පළකරවූ ඒ පොතේ පිටපත් කවම විකිණී අවසන් නොවූහ.
මෙහි එක් පොතකවත් ගද්‍යරචනාව ගැන මිස පද්‍යරචනාව ගැන කිසිවක් ඇතුළත් නොකරන ලද බැවින් ආධුනිකයන්ට පද්‍යරචනාව ගැනත් මූලික අවබෝධයක් ඇතිකරවීම සුදුසු යයි වැටහුණ බැවින් තෙවෙනි වර ඒ පොත “පාලිගද්‍යපද්‍යරචනා” නාමය යොදා ගාථාබන්ධනය සම්බන්ධ කරුණු ස්වල්පයක් ද ඇතුළත් කොට මෙසේ සකස්කෙළෙමි. මුල් පොතේ තිබුණු කිසිවක් අත්නොහරිනලදී.
පාලිය සිංහලට පෙරළාගැනීම පහසු නමුත් සිංහලය පාලියට පෙරළීම එතරම් පහසු නොවේ. එබැවින් පරිවර්තනපරිචයේ මුල් කොටසෙහි සාමාන්‍ය කථාව්‍යවහාරයෙහි පවත්නා කරුණු මුල්කොට යෙදූ කෙටි සිංහල වාක්‍යයන් පාලියට නඟන සැටි දක්වා ඊට අනතුරුව කෙටිකථා නඟන සැටි දක්වනලදී. ඊටත් පසුව තරමක් දීර්ඝ වූ ප්‍රවෘත්ති සිංහලෙන් දක්වා ඒවා පාලියට නගා පෙන්වන ලදහ. එසේ යෙදූ කුඩා කථා දශයකි. අනප්‍රවු ප්‍රවෘත්ති ඇතුළත් දීර්ඝ වාක්‍ය කොටස් 13 කි. එයින් නොනැවතී පාලියෙන් පෞද්ගලික ලිපි ගළපන සැටි ද මෙහි 70 වෙනි පිටේ සිට දක්වන ලදී.
සිංහලභාෂා රීතිය ඇතැම් තැනකදී පාලිභාෂාරීතිය හා නොසැසඳෙන බැවින් පාලිභාෂාරීතිය දක්වන කොටසක් මෙහි 79 පිටේ සිට ඇතුළත් කොට තිබේ. දීර්ඝ වාක්‍යයන් කෙටිකොට, වචන අඩුකොට අර්ථයට හානියක් නොවන සේ යොදන සැටි දැක්වීම මේ පොතට අලුතෙන් එක්කරනලදී.
ක්‍රියාමාලාවක් යොදා එක් එක් ක්‍රියාවේ වර්තමාන පදය ද පූර්‍වක්‍රියාව ද අතීතක්‍රියාපදය ද එක් එක් පෙළෙහි දක්වනලදී. සිංහලයෙහි යුගල වශයෙන් යෙදෙන “ගස්-කොළන්, තොවිල්-පවිල්” ආදිය මෙන් පාලියෙහිත් යුගල වශයෙන් යෙදෙන ශබ්ද ඇති බැවින් ඒවා හැකිතරමක් එක්කොට මෙහි පිටුවල දක්වන ලදී. එයට අනතුරුව අන්‍යොන්‍යවිරුද්ධාර්ථ ඇති ශබ්දයන්ගේ වචනමාලාවකි.
සොයාගතහැකිවූ නිපාත සියල්ලම අර්ථ සහිතකොට අකාරාදි පිළිවෙළින් මෙහි යොදා ඇත.
මෙසේ ආධුනිකයන්ට වාක්‍යරචනාවට හා භාෂාපරිවර්තනයට දියහැකි හැම රුකුලක්ම මේ පොතෙන් දෙනලදැයි සැලකියහැක.
මීට,
අම්බලම්ගොඩ අග්‍රාරාමාධිපති
පොල්වත්තේ බුද්ධදත්ත
කල්‍යාණීවංසනිකායේ මහානායකස්ථවිර.
25. 1. 1962.