නාමමාලා - වස්කඩුවේ සුභූති හිමි 1965.pdf
කලුසුදු
- කතෘ :
- වස්කඩුවේ ශ්‍රී සුභූති හිමි
- ප්‍රකාශිත වර්ෂය :
- 1965
- මුද්‍රිත වර්ෂය :
- 1965
- පිටු ගණන :
- 415
- බාගත කිරීම් ගණන :
- 1,936
- වෙබ් අඩවියට එක් කළ දිනය :
- 2018-02-14
- ගොනුවේ ප්‍රමාණය :
- 121 MB
පොතේ පිටු කිහිපයක ඡායාරූප පහතින් බලන්න.
නාමමාලා (Nāma Mālā) යනු 19 වන සියවසේ ලක්දිව වැඩවිසූ මහා ප්‍රාඥයෙකු වූ පවර නෙරුත්තිකාචරිය මහා විභාවි රාජගුරු වස්කඩුවේ ශ්‍රී සුභූති මහානායක හිමිපාණන් විසින් රචිත විශිෂ්ට පාලි ව්‍යාකරණ ග්‍රන්ථයකි. මෙහි මුල් මුද්‍රණය ආර්. සී. චිල්ඩර්ස් (R. C. Childers) පඬිතුමාගේ ආරාධනයෙන් රජයේ මුද්‍රණාලය මඟින් ක්‍රි.ව. 1876 දී සිදු කර තිබේ.
මෙම දෙවන මුද්‍රණය 1965 දී උන්වහන්සේගේ අනුශිෂ්‍ය වස්කඩුවේ සුමංගල ස්ථවිරයන් වහන්සේගේ මෙහෙයවීමෙන් මංගල මුද්‍රණාලය මඟින් ප්‍රකාශයට පත් කරන ලද්දකි. විද්‍යාලංකාර විශ්වවිද්‍යාලයේ උපකුලපති කිරිවත්තුඩුවේ ප්‍රඥාසාර නාහිමියන්ගේ ප්‍රස්තාවනාවක් හා විද්‍යෝදය විශ්වවිද්‍යාලයේ උපකුලපති පලන්නොරුවේ විමලධම්ම නාහිමියන්ගේ හැඳින්වීමක් ද මෙයට ඇතුළත් වේ.
පාලි නාම පද, ඒවායේ වරනැගීම්, නිපාත, උපසර්ග සහ නාමික ප්‍රත්‍යය පිළිබඳ විචාරාත්මක හා ගැඹුරු විවරණයක් සපයන මෙම කෘතිය විශ්වවිද්‍යාල හා පිරිවෙන් සිසුන්ට මෙන්ම පාලි භාෂා පර්යේෂකයන්ට ද අතිශය ප්‍රයෝජනවත් ශාස්ත්‍රීය ග්‍රන්ථයකි.
පෙරවදන.
මෙසියට වර්‍ෂ 130 ට පෙර බස්නාහිර පළාතේ කළුතර දිස්ත්‍රික්කයේ වස්කඩුව නම් ග්‍රාමවරයෙහි වංශවත් පෙළපතකට අයත් ධනවත් පවුලක ජන්ම ලාභය ලැබූ පවර නෙරුත්තිකාචරිය මහා විභාවි රාජගුරු ශ්‍රී සුභූත්‍යාභිධාන මහානායක මාහිමිපාණන් වහන්සේ කලමුල්ලේ ඈතගම සුමනාරාම මහා විහාරාධිපතිව වැඩ විසූ බෝධිසත්ව ගුණෝපෙත වස්කඩුවේ ශ්‍රී සරණපාල සීලක්ඛන්ධාභිධාන ස්වාමීන්ද්‍රයාණන් වෙතින් පැවිද්ද ලැබීමෙන් පසු වර්‍ෂ කීපයක් සිය ආචාර්‍ය්‍යයන් වහන්සේ සමීපයෙහි ධර්ම ශාස්ත්‍රය ප්‍රගුණකොට වැඩිදුර ඉගෙනීම සඳහා පැල්මඩුල්ලේ විහාරාධිපති ශ්‍රීපාදස්ථානයේ සහ සබරගමු පළාතේ ද නායක ධුරන්ධර ධර්ම විනයෙහි දක්ෂ භාෂා ශාස්ත්‍රයන්හි හසල බුද්ධිමත් ආචාර්ය ඉඳුරුවේ ශ්‍රී සුමංගල මාහිමිපාණන් වහන්සේ වෙත වැඩම කළ සේක එහි වර්‍ෂ හතක් (අවු: 7) අධ්‍යාපනය ලබා ගැනීමෙන් පසු ගම් ප්‍රදේශයට වැඩමවා සිය ඥාතීන් විසින් සාදවා පුදනු ලැබූ වස්කඩුවේ අභිනවාරාම විහාරස්ථානයේ වැඩ වෙසෙමින් ධර්ම ශාස්ත්‍රෝන්නතියටත් ශාසන වෘද්ධියටත් මහඟු සේවයක් සිදුකළහ.
මහාචාර්‍ය්‍ය ආර්. සී. චිල්ඩර්ස් පඬිතුමාගේ ආරාධනය පරිදි මුන්වහන්සේ විසින් රචිත විවේචනාත්මක පාලි ව්‍යාකරණ ග්‍රන්ථයක් වන නාමමාලාව මෙයට අවුරුදු අසූ අටකට (88) උඩදී මුද්‍රණය වූවකි.
මුන්වහන්සේ විසින් රචිත ග්‍රන්ථයන් අතුරෙන් මේ පොත නැවත මුද්‍රණය කිරීමට අප අදහස් කළේ දැනට විශ්වවිද්‍යාලයන්හි පාලි භාෂාව හදාරණ ශිෂ්‍යයන්ට මෙයින් ඇතිවන ප්‍රයෝජන ඉමහත් බැව් අප සමග ප්‍රකාශ කළ පඬිවරුන් කිහිප නමකගේ බලවත් ඉල්ලීම නිසාය. විචාරාත්මකව පාලි භාෂාව හදාරන විශ්ව විද්‍යාලයීය ශිෂ්‍යයන්ට මෙන්ම උසස් අධ්‍යාපනයෙහි නිරත වන සියල්ලන්ටම මෙම පොතින් ලැබිය හැක්කේ විපුල ප්‍රයෝජනයකි.
පෙර පර දෙදිග රජරජ මහාමාත්‍යාදීන්ගෙන් හා මහා වියතුන්ගෙන් ගරු සම්මාන පුද සත්කාර ලැබූ මෙහි කතුවර යාණන් වහන්සේ වන අප ප්‍රාචාර්‍ය්‍ය රාජගුරු ශ්‍රී සුභූති මහා නායක මහා හිමිපාණන් වහන්සේ 19 වන ශතවර්‍ෂයේ ලක්දිව විසූ මහා උගතුන් අතර ශ්‍රෙෂ්ඨස්ථානයක වැජඹුන ගත් කතුවරයෙකු මෙන්ම මහා පණ්ඩිතවරයෙකි.
හත්වන එඩ්වඩ් රජු තමා වේල්ස් කුමාර කල ලක්දිවට සැපත් වූ කල්හි කොළඹ රජවාසලට මුන්වහන්සේ වැඩමවා සියතින්ම චිල්ඩර්ස් පාලි අකාරාදියක් පිළිගැන්වීමෙන් දක්වා ඇත්තේ විශේෂ රාජ ගෞරවයෙකි.
සියම් රජ පවුලද මුන්වහන්සේට විශේෂ ගරු සැලකිලි දැක්වූ බැව් එංගලන්තයේ සියම් තානාපති ධුරය ඉසුලු ප්‍රින්ඩන් චුම්සායි සියම් රජකුමාරයා ක්‍රි.ව. 1896 දී වස්කඩුවේ අභිනවාරාමයට පැමිණ මුන් වහන්සේ වෙතින් පැවිද්ද ලැබීමෙන් වඩාත් පැහැදිලි වේ.
රාජගුරු ශ්‍රී සුභූති මාහිමිපාණන් වහන්සේ විසින් රචිත මෙම පොත ඇතුලු හැම ග්‍රන්ථයක්ම එකල ලංකාණ්ඩුවේ මුද්‍රණාලයෙහි නොමිලයේ මුද්‍රණය කර දීමෙන් එදා ලංකාණ්ඩුව මුන්වහන්සේට විශේෂ ගෞරව දක්වා ඇති බැව් පෙනේ.
අපගේ ආරාධනය පිළිගෙන මෙම ග්‍රන්ථයට විචාරාත්මක දීර්ඝ ප්‍රස්තාවනාවක් සැපයූ විද්‍යාලංකාර විශ්ව විද්‍යාලයෙහි උප කුලපති ආගම චක්‍රවර්ති, සාහිත්‍යසූරී, ත්‍රිපිටක වාගීශ්වරාචාර්‍ය්‍ය උපාධ්‍යාය, පණ්ඩිත කිරිවත්තුඩුවේ ධර්ම කීර්ති ශ්‍රී ප්‍රඥාසාරාභිධාන කොළඹ හලාවත දෙදිසාවේ ප්‍රධාන සංඝනායක ස්වාමීන්ද්‍රයාණන් වහන්සේටත්, එසේම මෙම ග්‍රන්ථයට තවත් හැඳින්වීමක් සැපයූ විද්‍යොදය විශ්ව විද්‍යාලයෙහි උප කුලපති අග්ගමහා පණ්ඩිත සාහිත්‍යසූරී; පලන්නොරුවේ විමලධම්ම නායක ස්වාමීන්ද්‍රයාණන් වහන්සේටත් අපගේ ගෞරවාදරය පිරිනමමි.
ප්‍රස්තාවනාව
මේ විසිවෙනි ශතවර්ෂයෙහි උපන් සුපාර දෙදිග පඬිවරුන් විසින් සම්භාවිත ගුණ කීර්තියක් ඇති විද්වත් මණී මාලායෙහි තරල මිණක් බඳු වූයේ අමරපුර සිරි සද්ධම්මවංස නිකායේ පණ්ඩිතාවතංස පවර නෙරුත්තිකාචරිය මහා විභාවි රාජගුරු ශ්‍රී සුභූති නායක ස්වාමීන්ද්‍රයන් වහන්සේ ය.
ක්‍රි. ව. 1904 දී එවකට ලංකාණ්ඩුවේ අධ්‍යාපනාධ්‍යක්‍ෂකව සිටි ඇස්. ඇම්. බරෝස් මහතාණන් විසින් පෙරදිග භාෂාවන්ගේ දියුණුවට හා ලංකා ඉතිහාස පුරාවෘත්ත ආදීන්ගේ පර්යේෂණයට නව පණක් දීම සඳහා කාරුණික උදර බුද්ධියෙන් ආරම්භ කල ප්‍රාචීන භාෂෝපකාර සමිතිය පිහිටු වීමෙහි ලා උපදෙස් ගැනීමට කැඳවු පඬිවරුන් අතුරෙහි මුන්වහන්සේට හිමි වූයේ වැදගත් තැනෙකි.
එමගින් මේ දිවයිනේ භාෂා ශාස්ත්‍ර පිළිබඳ යම් දියුණුවක් වී නම් එයට මුන්වහන්සේගෙන් ලැබුණු පිටිවහල වැදගත් කොට සලකනු ලැබේ. එමතු නොව රාජකීය ආසියාතික සමිතිය වැනි උසස් පණ්ඩිත සමාජයන්හිද සාමාජිකත්වය දරමින් තවත් අයුරෙකින් මෙරටට කල ශාස්ත්‍රීය සේවාවන් ද අති ප්‍රශස්තය.
එකල වෙනත් පඬිවරුන් මෙන් මුන්වහන්සේ පිරිවෙනක් ප්‍රසිද්ධව ආරම්භ කොට කටයුතු නො කල ද ධර්ම ශාස්ත්‍ර දෙක්හි විශාරද බුද්ධියක් ඇති පඬිවරයෙක් යම් තැනෙක වෙයි නම් එතැන පිරිවෙණය යන පැරැණියන්ගේ මතය සනාථ කළහ.
එයට අනුව සලකන කල අනුරාධපුර යුගයෙහි සියගණන් පිරිවෙන් තුබුණ බව ඉතිහාසයෙහි දක්නට ඇතත් එහි නියම තත්වය නම් සුපේශල ශික්‍ෂාකාමී පණ්ඩිත භික්‍ෂූන් වහන්සේ සමක් වසන තැන පිරිවෙන බවයි. මුන්වහන්සේ ඇසුරු කෙරෙමින් විවේක බුද්ධියෙන් ඉගෙනීම ලැබූ ලංකෙය්‍ය ගිහි පැවිදි ශිෂ්‍යයන් ඇතිවීම පුදුමයට කරුණක් නොවුන ද වෙනත් අපරදිග පඬිවරුන්ට පවා ශාස්ත්‍රීය උපදෙස් දීමෙන් හා ඉගැන්වීමෙන් ද මහත් සේවයක් සිදුකළහ.