පාලිභාෂාවතරණය 1 - පොල්වත්තේ බුද්ධදත්ත හිමි.pdf
- කතෘ :
- පොල්වත්තේ බුද්ධදත්ත හිමි
- පිටු ගණන :
- 137
- බාගත කිරීම් ගණන :
- 11,972
- වෙබ් අඩවියට එක් කළ දිනය :
- 2019-04-07
- ගොනුවේ ප්‍රමාණය :
- 1.6 MB
පොතේ පිටු කිහිපයක ඡායාරූප පහතින් බලන්න.
පාලිභාෂාවතරණය (පළමුවැනි පොත) යනු පාලි භාෂාව ආධුනිකයන්ට පහසුවෙන් උගැන්වීම සඳහා අග්ගමහා පණ්ඩිත පොල්වත්තේ ශ්‍රී බුද්ධදත්ත මහානායක ස්ථවිරයන් වහන්සේ විසින් සම්පාදනය කරන ලද අගනා ප්‍රාරම්භක පෙළපොතකි. වාක්‍ය රචනා මාර්ගයෙන් භාෂාව ඉගැන්වීමේ නූතන ක්‍රමවේදය අනුගමනය කරමින් පාඩම් සහ අභ්‍යාස මාලාවන් ඔස්සේ ස්වෝත්සාහයෙන් ද පාලි ඉගෙනගත හැකි පරිදි මෙය සකස් කර ඇත.
මුල්වරට 1923 දී ප්‍රකාශයට පත් කරන ලද මෙම කෘතිය, අනතුරුව ආනන්ද සහ නාලන්දා විද්‍යාලවල සිසුන්ට ඉගැන්වීමෙන් ලද අත්දැකීම් පාදක කරගනිමින් 1927 දෙවැනි මුද්‍රණයේදී මෙන්ම සිවුවැනි මුද්‍රණයේදී ද පූර්ණ සංශෝධනයට ලක් කර තිබේ. පාලි හෝඩිය, නාම පද, විභක්ති, ලිංග විභාගය, ක්‍රියා පද සහ මූලික නිපාත වර්ග පිළිබඳ පැහැදිලි විස්තර මෙන්ම අභ්‍යාස සහ පාලි-සිංහල, සිංහල-පාලි ශබ්දමාලාවක් ද මෙහි ඇතුළත් වේ.
විංඥාපනය
“මෙය වනාහි ආධුනිකයන්ට සිංහලෙන් පාලි ඉගැන්වීම සඳහා සම්පාදිත පොතකි. මෙහි ගෙන තිබෙන පිළිවෙල නම් වාක්‍යරචනා මාර්ගයෙන් භාෂාව ඉගැන්වීමේ අභිනව ක්‍රමයයි. පාඩම් ක්‍රමයෙන් ගැඹුරුවනසේ ද අභ්‍යාසයෙන් ඉගනියයුතුසේ ද සම්පාදිතය. දීර්ඝකාලයක සිට තිබුණු ඕනෑකමක් මේ පොතෙන් පිරිමැසේ. මෙය පාලිපරිචය සඳහා පාඨශාලාවල ප්‍රථමයෙන් ඉගැන්විය යුතු පොතක් යයි අපි සම්මත කරමු.” මේ වනාහි මේ පොත පිළිගැනීමේදී අධ්‍යාපන මණ්ඩලය සම්බන්ධ ග්‍රන්ථ විවේචන සභාව ප්‍රකාශකළ වචනයි. මේ පොත හැඳින්වීමට මීට වඩා විස්තර කථාවක් ඕනෑයයි නොසිතේ.
පාලිභාෂාව ඉගැනීමට මහත් ආශාවක් මෙකල බොහෝ දෙනෙකුන් තුළ ඇතිව තිබේ. එය සිංහලභාෂාවේ මාතෘභාෂාවක් වීමත්, සද්ධර්මය ඒ භාෂාවෙන් ලියවී තිබීමත්, ආණ්ඩුවේ පාඨපරීක්‍ෂණවලට පාලිභාෂාව ඇතුළත් කිරීමත් මේ උනන්දුවට හේතුවූහයි සිතමි. එහෙත් පහසුවෙන් පාලි ඉගැනීමට උපකාරවූ අභිනව ක්‍රමයට ගැළපූ පොත් නැතිවීම එය ඉගෙනගනු කැමති ආධුනිකයන්ට මහත් බාධාවක් විය. ඒ බාධාව මහඟරවනු සඳහා ආනන්ද විද්‍යාලයාධිපති ශාස්ත්‍රාචාර්‍ය්‍ය කුලරත්න මැතිතුමන් ආදී උසස් මහතුන්ගේ මෙහෙයීම ලෙස අප විසින් මේ පාලිභාෂාවතරණය සම්පාදිත ය.
මුලින්ම ඉගැනීමට පටන් ගන්නා ශිෂ්‍යයන් සඳහා මේ පළමුවෙන් පොත අදහස්කරන ලද බැවින් මෙය හැකිතරම් ලිහිල් භාෂාවෙන් යුක්ත කරනලදි. මෙහි ලිංග තුනට අයත් බහුල ප්‍රචාරයට පැමිණෙන ශබ්දයන් වරනඟන ආකාරය ද කාලත්‍රයට අයත් ක්‍රියාපද ස්වල්පයක් ද පූර්වක්‍රියා, ක්‍රියාවිශේෂණ, විශේෂ්‍යපද, නිපාතපද ආදිය ද සංක්ෂෙපයෙන් දක්වන ලදහ. සිංහල වාක්‍යයන් සිංහලට නැඟීමේදී ද ශිෂ්‍යයන්ට උපකාරවීම සඳහා පොතේ ඇතුළත් සියලු වචනයන් අකාරාදි පිළිවෙලින් ගළපා පාලි - සිංහල, සිංහල - පාලි වචනමාලා දෙකක් ද මෙහි අන්තයෙහි යොදන ලදි.
සන්ධි - සමාස - තද්ධිත - කිත්තකයන් - පිළිබඳ විස්තර ද ආඛ්‍යාතය පිළිබඳ වැඩි විස්තර ද දෙවෙනි පොතේ ඇතුළත් වෙති. තුන්වෙනි පොතෙන් ඉතා උසස් පරීක්‍ෂණයකට පෙනී සිටින්නකුට වුවත් සෑහෙන තරම් ගැඹුරු දැනීමක් ලබාගත හැක. වාක්‍යරචනාව වැඩිදුර ඉගෙනගනු කැමැත්තන් උදෙසා “පාලි ගද්‍ය පද්‍ය රචනා” නම් පොතක් ද අප විසින් ප්‍රචාරයට පමුණුවා තිබේ. මෙසේ දැන් පාලි ඉගෙනගනු කැමැත්තෙකුට නිර්භයව ඒ ඉගෙනීමට බැසිය හැකිවනසේ අප විසින් කටයුතු සම්පාදනය කොට තිබේ.
පාලි ඉගැනීමට ආශා ඇතත් ගුරුවරුන් කරා පැමිණීමට අවකාශ නැතිව සිටින්නන් විසින් හෝ ගුරුවරුන් සොයාගත නොහැකි භවතුන් විසින් මේ පොත් හා ”පාලිපාඨාවලී” නම් පාඩම් පොත ද පාලිභාෂාවතරණ යතුර ද ගැනීමෙන් ස්වෝත්සාහයෙන් ම පාලි ඉගැනීම ද කළ හැක. පිරිවෙන්වල ශිෂ්‍යයන් අවුරුදු දෙකක්දී ලබන තරම් ඉගෙනීමක් මේ පළමුවෙනි පොතෙන් හමසකදී ලබාගත හැක.
පළමුවෙනි පොත පළමුවර මුද්‍රණයට පමුණුවන ලද්දේ 1923 දී ය. පළමුකොට ආනන්ද මහාవిద్యාලයේ පාලි ඉගෙන ගන්නා ශිෂ්‍යයන් විසින් මෙම පරිශීලනය කරන ලදි. අවුරුදු කීපයක් අප විසින්ම ආනන්ද නාලන්ද විද්‍යාලයන්හි ශිෂ්‍යයන්ට මේ පොතෙන් පාලි ඉගැන්වීම කළ බැවින් පොතේ සකස්කළ යුතු තැන් දැනගත හැකිවිය. එසේ ප්‍රතිසංස්කරණයට පැමිණවූ මෙය නැවත 1927 දී ප්‍රචාරයට පමුණුවන ලදි. තෘතීය මුද්‍රණයේදීත් ස්වල්ප සංස්කරණයක් කරන ලදි. සිවුවෙනි වාරයේදී පොත සම්පූර්ණ සංස්කරණයකට පමුණුවන ලදි. අභ්‍යාස සියල්ලම වාගේ අමුතුවෙන් ලියා වැඩිපුර කරුණු ද ඇතුළත් කරන ලදි.
ශිෂ්‍යයන් සඳහා අප විසින් සම්පාදිත වූ පාලි - සිංහල ශබ්දකෝෂය දැන් ලබා ගත හැක.
මීට, අම්බලන්ගොඩ අග්ගාරාමාධිපති පොල්වත්තේ බුද්ධදත්ත ස්ථවිර
අම්බලන්ගොඩ අග්ගාරාමාධිපති
පොල්වත්තේ බුද්ධදත්ත ස්ථවිර