සූවිසි පට්ඨාන ප්‍රත්‍ය නය සංග්‍රහ සංක්ෂේප සන්නය - නාඋයනේ අරියධම්ම හිමි 2009.pdf
- කතෘ :
- නාඋයනේ අරියධම්ම හිමි
- ප්‍රකාශිත වර්ෂය :
- 2022
- මුද්‍රිත වර්ෂය :
- 2022
- පිටු ගණන :
- 246
- බාගත කිරීම් ගණන :
- 1,565
- වෙබ් අඩවියට එක් කළ දිනය :
- 2023-04-16
- ගොනුවේ ප්‍රමාණය :
- 21 MB
පොතේ පිටු කිහිපයක ඡායාරූප පහතින් බලන්න.
සූවිසි පට්ඨාන ප්‍රත්‍ය නය සංග්‍රහ නම් වූ සංක්ෂෙප පට්ඨාන සන්නය යනු අභිධර්ම පිටකයේ එන ගැඹුරුතම ධර්ම කොටස වන පට්ඨාන ප්‍රකරණයේ සූවිසි ප්‍රත්‍ය විභාගය සංක්ෂේපයෙන් පැහැදිලි කෙරෙන වටිනා අභිධර්ම ග්‍රන්ථයකි.
බුරුම රට ඡට්ඨසංගීතිකාරක අග්ගමහාපණ්ඩිත මසෝයෙයින් සෙයාඩෝ (භදන්ත සූරියාභිවංස) මාහිමියන් විසින් රචිත මූලික ග්‍රන්ථය ඇසුරින්, අතිපූජ්‍ය ත්‍රිපිටකවාගීශ්වරාචාර්ය නාඋයනේ අරියධම්ම මහා ස්ථවිරයන් වහන්සේ විසින් 1971 දී මෙම සිංහල සන්නය සම්පාදනය කර ඇත. අභිධර්මය හදාරන සහ විදර්ශනා වඩන යෝගාවචරයන්ට හේතුඵල දහම මනාව වටහා ගැනීමට මෙය මහෝපකාරී වේ.
මෙහි ප්‍රථම මුද්‍රණය 2009 දී පළ වූ අතර, මෙම දෙවන මුද්‍රණය 2022 වසරේදී නුගේගොඩ Lithira Printing Industries වෙතින් මුද්‍රණය කර ධර්මදානය පිණිස බෙදාහැර තිබේ.
පෙරවදන
සම්මා සම්බුදුරජාණන් වහන්සේ විසින් දේශනා කරන ලද සුවාසූ දහසක් වූ ධර්මස්කන්ධයම ධ්‍යානාභිඥා මාර්ගඵල ප්‍රතිලාභයත් සමග නිර්වාණාවබෝධය පිණිස හේතුවක් වන භාවනා මාර්ගයකි. ඒ වග මහා සතිපට්ඨාන සූත්‍රාර්ථකථාවෙහි මෙසේ දක්වා ඇත. “කම්මට්ඨාන විනිම්මුත්තා හි ධම්මදෙසනා නාම නත්ථී” යනුවෙනි. එහි තේරුම මෙසේය. භාවනා කර්මස්ථානයකින් තොර ධර්ම දේශනාවක් නම් නොමැත යනුයි.
ශ්‍රී ලංකාවේ ගතිම්බය විහාරවාසී තිස්සදත්ත නම් මහතෙරුන් වහන්සේ බුද්ධගයාවේ ශ්‍රී මහා බෝධි වන්දනාව පිණිස මහ සයුරේ නැවකින් වඩින ගමනේ දී නැවේදීම අර්හත්වයට පත් වී වදාළේ අනන්ත නය සමන්ත පට්ඨාන මහා ප්‍රකරණයෙහි නය ක්‍රමය මෙනෙහි කිරීමෙනි. ත්‍රිපිටක ධර්මයෙහි ගැඹුරුම කොටස අභිධර්ම පිටකයය. එයිනුත් අතිශයින් ගාම්භීරතම කොටස සූවිසි පට්ඨාන නය ක්‍රමයය. එම ගාම්භීරතම සූවිසි පට්ඨාන නය ක්‍රමය වුවද භාවිතා කිරීම නිවනට පත් කෙරෙන භාවනා මාර්ගයක් වග මෙයින් පැහැදිලි වෙයි.
ඈත අතීතයේ ශ්‍රී ලාංකික ගිහි පැවිදි බොහෝ දෙනා ත්‍රිපිටකය උගතුන් බැවින් මාර්ගඵල ලාභීන් බහුලව සිටියහ. තවමත් ථෙරවාද බුද්ධාගම බැබලෙන බුරුම රට භික්ෂූන් වහන්සේලා ත්‍රිපිටක බුද්ධ ධර්මය වාචොද්ගථ කරති. එහෙයින් අධිගම ලාභීන් ද වැඩ සිටිති. ඒකායනා විදර්ශනා භාවනා මාර්ගයක් වන අභිධර්ම පිටකය විශේෂයෙන්ම උගනිති. එරට රජයෙන් ද ඒ සඳහා සම්මාන දෙමින් දිරි ගන්වනු ලැබේ.
බුරුම රට ත්‍රිපිටකධාරී මහ තෙරනුවන් වහන්සේ නමක් වූ “මජුයෙන් සෙයාඩෝ” නාහිමියන් විසින් සම්පාදිත වූ සූවිසි පට්ඨාන සංක්ෂෙප නය ක්‍රමය නමැති බුරුම බසින් රචිත ග්‍රන්ථය බුරුම ජාතික භදන්ත අග්ගමහා පණ්ඩිත ඤාණින්ද සෙයාඩෝ මාහිමියන් වහන්සේ වෙතින් අප වෙත භාරදෙන ලද්දේ සිංහළ බසට පරිවර්තනය කිරීම පිණිසය. අතිපූජනීය අග්ගමහා පණ්ඩිත බලන්ගොඩ ආනන්ද මෛත්‍රිය මහා නායක මාහිමියන් වහන්සේ ද එය අනුමත කරන ලද්දේ එහි අගය දන්නා බැවිනි.
ඉකුත් වූ වර්ෂ 1971 දී සිංහළ බසට ලියන ලද එම ග්‍රන්ථයේ අගය තේරුම් ගත් පූජ්‍ය අගුල්ගමුවේ අරියනන්ද ස්වාමීන් වහන්සේ විසින් එය දහම් පොතක් වශයෙන් මුද්‍රණය කරවීමට සූදානම් වූ අතර එම කාර්යය, වර්ෂයක් පාසා අපගේ ජන්ම දින නිමිත්තෙන් දහම් පොතක් මුද්‍රණය කරවා පිරිනමන කල්යාණමිත්‍ර එච්. ජී. ආරියරත්න මහත්මා සහ එම චන්ද්‍රා ආරියරත්න මහත්මනී ද විසින් තවත් ධර්මකාමී පරිත්‍යාගශීලී අයත් සමග මෙසේ මුද්‍රණය කරවා ධර්මදානය වශයෙන් පිරිනැමෙනුයේ මෛත්‍රී පූර්ණ ආශිර්වාද ප්‍රාර්ථනාවෙනි.
මෙම ධර්මදානමය කුශලය අතිපූජ්‍ය භදන්ත අග්ගමහා පණ්ඩිත ඤාණින්ද සෙයාඩෝ මාහිමියන් වහන්සේට ද අතිපූජ්‍ය අග්ගමහා පණ්ඩිත බලන්ගොඩ ආනන්දමෛත්‍රිය මහානායක මාහිමියන් වහන්සේට ද උතුම් බුදුබව පිණිසම හේතු වේවා! ශ්‍රී කල්‍යාණී යෝගාශ්‍රම සංස්ථාවේ සම්මුත්පාදක ප්‍රධාන අනුශාසක අතිපූජනීය රාජකීය පණ්ඩිත කඩවැද්දුවේ ජිනවංශාභිධාන අස්මදාචාර්ය මාහිමියන් වහන්සේට ද අතිපූජනීය මාතර සිරි ඥානාරාමාභිධාන මහෝපාධ්‍යාය මාහිමියන් වහන්සේට ද අනිකුත් ආචාර්යවර මාහිමියන් වහන්සේලාට ද මතු උතුම් බුදුබව පිණිසම හේතු වේවා! එසේම, එච්. ජී. ආරියරත්න මහත්මාණන්ගේ සහ චන්ද්‍රා ආරියරත්න මහත්මනීත් ගේ ද මවුපිය සතරදෙනා ප්‍රධාන පරලෝ සැපත් සියලු ඥාතීන්ට ද ධර්මදානය සඳහා සහභාගී වූ සැමදෙනාගේ පරලෝසැපත් සියලු ඥාතීන්ට ද අමාමහ නිවන් සුව පිණිසම හේතු වේවා!
කල්යාණමිත්‍ර, එච්. ජී. ආරියරත්න මහත්මාණන්ට ද, එම චන්ද්‍රා ආරියරත්න මහත්මනීට ද, අමිලා ගමගේ රණසිංහ අංසක ගමගේ දරුවන් දෙදෙනාට ද, ඒවීන් තේනුක රණසිංහ අනුක් ඒනුක රණසිංහ මුණුබුරු දෙදෙනාටද, දෙපාර්ශවයේම සහෝදර සහෝදරීන් සහිත සැමට ද, සහභාගී වූ සැමට ද, පොත මුද්‍රණය කළ ලිතිර මුද්‍රණාලයාධිපති සත් ගුණවත් කමල් ඇඹුල්දෙණිය මැතිතුමා සහ එම මැතිණියට ද, ආයුරාරෝග්‍ය සම්පත් සහ ධර්මඥාන භාවනාඥානයත් මුදුන්පත් වී අග්‍ර අමා මහ නිවන් සුව පිණිස හේතු වේවා!
මෙය මුද්‍රණය කරවීමට විශේෂයෙන් අපේක්ෂා කළ පූජ්‍ය අගුල්ගමුවේ අරියනන්ද ස්වාමින් වහන්සේටත් නිරතුරුව මාගේ සුවදුක් විමසමින් සෙවනැල්ලක්මෙන් මා පසුපසින් සිට සියලු කටයුතු සොයාබලමින් උපස්ථාන කටයුතු කරන පූජ්‍ය නාගපොකුණේ අරියසීල ස්වාමීන් වහන්සේටත් නිරෝගි සුව දීර්ඝායුෂ වර්ධනය වී ශාන්ත නිවන් සුව පිණිස හේතු වේවා! “සූවිසි පට්ඨාන සංක්ෂෙප නය ක්‍රමය” නම් වූ මේ දහම් පොත අභිධර්මය හදාරන අයට අත්වැලක් වේවා. මෙය කියවන අයටත් ලොවී ලොවුතුරා සම්පත් අත් වේවා!
“සබ්බෙ සත්තා භවන්තු සුඛිතත්තා”
මෙයට, මෙත්සිතැති,
නාඋයනේ අරියධම්ම ස්ථවිර නාඋයන ආරණ්‍ය සේනාසනය පන්සියගම.
2553 අප්‍රේල් 16 2009
නාඋයනේ අරියධම්ම ස්ථවිර
නාඋයන ආරණ්‍ය සේනාසනය
පන්සියගම.
2553 අප්‍රේල් 16
2009
පසුවදන
මහාකාරුණික බුදුරජාණන් වහන්සේගේ අනන්ත ඥාණමණ්ඩලයේ ප්‍රතිමූර්තිය සමන්ත මහා පට්ඨානප්පකරණයයි. පටිහනනයකින් තොරව තථාගත ප්‍රඥාවට සංසරණ භූමිය වූයේද එම ධර්ම පර්යායයි. ධම්මසංගණී ආදී ප්‍රකරණ සතකින් සැදුම්ලත් අභිධර්ම දේශනාවේ ගම්භීරතම ධර්ම විවරණය වන පට්ඨානප්‍රකරණයෙන් විවරණය වන්නේ හේතුඵල දහමයි. ද්වාදසාංග පටිච්චසමුප්පාදය සූත්‍රපිටකයේ විවරණය වේ. අභිධර්මපිටකයේ විස්තර වන්නේ හේතු ප්‍රත්‍යාදී සූවිසි ප්‍රත්‍යයන්ගෙන් සැදුම්ලත් අනවශේෂ ප්‍රත්‍ය විභාගයයි. යමෙක් තථාගත ඥාණයේ සහ ප්‍රත්‍ය සමායෝජනයේ ගැඹුර ගැන සොයයි නම් එම සූවිසි ප්‍රත්‍ය විවරණය උගත යුත්තේමය. ඒ උදෙසා උපකාර වන මෙම ධර්ම ග්‍රන්ථය ගෞරවයෙන් පරිශීලනය කිරීමෙන් හා ගුරු ඇසුරේ හැදෑරීම මගින් සත්ත්ව පුද්ගල ප්‍රඥප්තිය ඉක්මවා ගොස් මාර්ගඵල ප්‍රතිවේදය දක්වාම පරමාර්ථ ඥාණය දියුණු කළ හැකිය. මෙම පිවිතුරු ධර්ම ග්‍රන්ථය නැවත මුද්‍රණය කර ධර්මදානය පිණිස බෙදා හැරීමෙන් සිදු කරනු ලබන ධර්මදානමය කුසල සම්භාරය පරමාර්ථ ධර්මාවබෝධය පිණිසම හේතු වේවා!
මේ වගට බලංගොඩ රාධ භික්ෂු
බලංගොඩ රාධ භික්ෂු
පුණ්‍යානුමෝදනාව
තුන් ලෝකාග්‍ර වූ භාග්‍යවත් වූ අරහත් වූ සම්යක් සම්බුද්ධ දසබලධාරී ශාක්‍ය මුනීන්ද්‍රයාණන් වහන්සේ සූවිසි අසංඛ්‍ය කල්ප ලක්ෂයක් පුරා අපරිමිත වීර්යයකින් යුතුව පාරමීධර්ම සම්පාදනයෙන් රැස් කරගත්තා වූ අනන්ත පුණ්‍යානුභාවයෙන් අවබෝධ කොටගෙන ලෝ සතුන් වෙත පතළ මහා කරුණාවෙන්ම දේශනා කොට සත්ත්වයන් බොහෝ දෙනෙකු නිවන්පුර පැමිණවුවාවූ මුල මැද අග යහපත් වූ නෛර්යාණික ශ්‍රී සද්ධර්මයේ පරම ගම්භීරතම ධර්ම කෝඨාශය විවරණය කොට සැකසුණු ග්‍රන්ථ රත්නයක පුනර් මුද්‍රණයක් මෙලෙසින් ඔබ අතට පත් කිරීමට අවකාශ සැලසීම අප සැමගේම මහා පුණ්‍ය විපාකයක ඉෂ්මතු වීමයැයි සලකන්නෙමු.
ග්‍රන්ථකාරකයන් වහන්සේ වන අපවත් වී වදාළ ඡට්ඨසංගීති සංඝමහානායක, ඡට්ඨසංගීතිභාරිනීත්ථාරකසංඝසභාපති ආදී පරමසම්භාවනීය ස්ථානාන්තර හෙබවූ අග්ගමහාපණ්ඩිත අභිධජ මහාරට්ඨගුරු භදන්ත සූරියාභිවංස මසෝයෙයිං සයාඩෝ මාහිමිපාණන් වහන්සේ හටද, සිංහල පරිවර්තනය සිදු කිරීමෙන් සම්මා සම්බුද්ධ ශාසනය වෙනුවෙන් අපරිමිත සේවයක් ඉටු කොට අපවත් වී වදාළ ශ්‍රී කල්‍යාණී යෝගාශ්‍රම සංස්ථාධිපති හා ප්‍රධාන අනුශාසක මහා කම්මට්ඨානාචාර්ය ත්‍රිපිටකවාගීශ්වරාචාර්ය ත්‍රිපිටකධරාචාර්ය නාඋයනේ සිරි අරියධම්මාභිධාන ශ්‍රී ලංකා රාමඤ්ඤ මහානිකායේ අනුනායක මාහිමියන් වහන්සේ හටද, ත්‍රිවිධශාසනයේ උද්දීප්තිය වෙනුවෙන් උත්තරීතර මෙහෙයක් ඉටු කරන ශ්‍රී කල්‍යාණී යෝගාශ්‍රම සංස්ථාව පිහිටුවා වදාළ අතිගරු පූජනීය කඩවෑද්දුව ශ්‍රී ජිනවංශාභිධාන මහෝපාධ්‍යාය මාහිමියන් වහන්සේ හටද, ඒ සඳහා උන්වහන්සේට බෙහෙවින් උපකාරී වූ පරම පූජනීය මාතර සිරි ඥානාරාම මහෝපාධ්‍යාය මාහිමිපාණන් වහන්සේ හටද, අපගේ ධර්මාචාර්යෝත්තම පරම පූජනීය මහානායක රේරුකානේ චන්දවිමල මහානායක මාහිමිපාණන් වහන්සේ හටද වැඳ නමස්කාරයෙන් පුණ්‍යානුමෝදනා කරන්නෙමු.
කිහිප විටක් සෝදුපත් බලමින් අවශ්‍ය සංශෝධන සිදු කරමින් බොහෝ සෙයින් උපකාරීව අනුශාසනා කළ පූජ්‍ය ත්‍රිපිටකාචාර්ය අභිධර්ම විශාරද ධර්මකීර්ති ශ්‍රී දිගන සුගතවංශ ස්වාමීන් වහන්සේ හටද, අගනා පෙරවදනක් සකසා දුන් විචිත්‍ර ධර්මකථික ත්‍රිපිටකාචාර්ය ත්‍රිපිටක විශාරද, අභිධර්ම කථිකාචාර්ය ශාස්ත්‍රපති රාජකීය පණ්ඩිත අරියධම්මවංසාභිධජ සද්ධම්මකිත්තිස්සිරි විනයාලංකාර පූජනීය බළන්ගොඩ රාධ ස්වාමීන් වහන්සේ හටද, ග්‍රන්ථකාරක මසෝයෙයිං සයාඩෝ මාහිමිපාණන් වහන්සේ පිළිබඳව මහාවංශ සංක්ෂිප්ත චරිතාපදාන සටහනක් සම්පාදනය කර දුන් කරුවලගස්වැව අන්තර්ජාතික ථේරවාද ධර්මායතනයේ ආචාර්ය පූජනීය සාසනධජ ධම්මාවරිය පැල්මඩුල්ලේ විජිතානන්දාභිවංශ ස්වාමීන් වහන්සේ හටද, නමස්කාර පූර්වකව පුණ්‍යානුමෝදනා කරමු.
නිවන් මග භාවනා මධ්‍යස්ථාන අනුශාසක, නිවන් මග දාගැබ නිර්මාතෘ, පූජනීය පැල්මඩුල්ලේ චේතියධම්ම ස්වාමීන් වහන්සේ මෙම ග්‍රන්ථරත්නයේ පිටපත් දෙකක් අධ්‍යයන කටයුතු සඳහා සොයා දෙන මෙන් අප වෙත කළ ඉල්ලීම ඉටු කර ලන්නට නොහැකි වුවද, ඒ ඉල්ලීම නොවන්නට ග්‍රන්ථයේ දුර්ලභ භාවය අවබෝධ කොටගෙන පුනර් මුද්‍රණයකට යොමු වීමක් නොවනු ඇත. මෙවන් දුර්ලභ කුසලකර්මයක් සඳහා අප යොමු කරවූ උන්වහන්සේ වෙත කෘතඥතා පූර්වකව පුණ්‍යානුමෝදනා කරන්නෙමු. ඒ සමගම නන් අයුරින් උපකාර කළ නෙළුවේ ශාන්තමාලා මෙහෙණින් වහන්සේ හට අපගේ ගෞරව පූර්වාංගම නමස්කාරය වේවා!
ඡායාරූප සපයා දීමෙන්, ග්‍රන්ථකාරක මසෝයෙයිං සයාඩෝ මාහිමිපාණන් වහන්සේ පිළිබඳව චරිතාපදාන සටහන සඳහා සම්බන්ධීකරණය සිදු කර දීමෙන් සහ පුණ්‍යානුමෝදනාව සඳහා ඇවැසි ඌන පූරණයන් සිදු කිරීමෙන් මහත්ම උපකාර වූ කථිකාචාර්ය රවින් කෝදාගොඩ මහතාටත් අපගේ කෘතවේදීත්වය පළ කරන්නෙමු. වසර ගණනාවකට පෙර නිකුත් වුනු මෙම මහඟු පුස්තක රත්නය බොහෝ වෙහෙස දරා උත්සාහවත්ව නැවත සකසා දුන් ලිතිර ආයතනයේ කාර්ය මණ්ඩලය වෙතද අපගේ හෘදයාංගම ස්තූතිය පිරිනමන්නෙමු.
සම්මා සම්බුද්ධ ශාසනය තවත් බොහෝ කල් පැවතීමට මින් ජනිත වන්නා වූ සියලුම කුශල චිත්තපරම්පරාවෝ හේතු වාසනා වෙත්වා! අප හැමට උතුම් වූ පරම ගම්භීර ධර්මය මනා කොට වැටහීම පිණිසද, උතුම් නිර්වාණාවබෝධය පිණිසද මෙම මහානීය පුණ්‍යකර්මය හේතු වාසනා වේවා!
මෙම ග්‍රන්ථරත්නය මුද්‍රණය සඳහා දායක වූ හිතවතුන් සැම දෙනාගේම සහයෝගය මහත්ම සවියක් වූ බව මෙත් සිතින් සිහිපත් කරන්නෙමු. එම දායක පින්වතුන්ට මෙන්ම ඔවුන්ගේ පවුල් වල ජීවත්ව සිටින සියලු දෙනාහටද, මිය පරලොව ගිය සියලුම ඥාති හිතවතුන්ටද මින් ජනිත වන සියලුම කුසල සම්භාරය නොඅඩුවම අනුමෝදන් වේවා!
අතිගරු පරම පූජනීය නාඋයනේ සිරි අරියධම්මාභිධාන මාහිමිපාණන් වහන්සේ විසින් නිතර සිදු කළ පැතුමකින් අපගේ පුණ්‍යානුමෝදනාව නිමා කරන්නෙමු.
“අද අපි මේ සැනසීමෙන් යන නිවන් මගට උපකාරී වන බුද්ධශාසනය නොනැසී නොපිරිහී අඳුරු නොවී මොනම අන්‍ය ආගම් බලවේගයකින්වත් යටපත් නොවී ගගනතලයේ සඳහිරු මඩල මෙන් දිදුලමින් බබළමින් අපරාජිතව විරාජිතව තුන්ලෝකයට සදහම් කිරණ විහිදුවමින් අවුරුදු පන්දහසකට වැඩි කලක් ශ්‍රී ලංකාදීප ධරණීතලයෙහි නිර්මලව පවතීවා කියා අප සෑම විටම ප්‍රාර්ථනා කළ යුතු වෙනවා”
චිරං තිට්ඨතු ලොකස්මිං සම්මාසම්බුද්ධසාසනං!
මෙයට ශාසනාලැයි තිලිණ සේනානායක
තිලිණ සේනානායක