පාළිපාඨමඤ්ජරී ද්විතීය භාගය - කහඳාමෝදර පියරතන හිමි 1913.pdf
- කතෘ :
- කහඳමෝදර පියරතන හිමි
- ප්‍රකාශිත වර්ෂය :
- 1968
- මුද්‍රිත වර්ෂය :
- 1968
- පිටු ගණන :
- 110
- බාගත කිරීම් ගණන :
- 750
- වෙබ් අඩවියට එක් කළ දිනය :
- 2023-03-02
- ගොනුවේ ප්‍රමාණය :
- 81 MB
පොතේ පිටු කිහිපයක ඡායාරූප පහතින් බලන්න.
පාළිපාඨමඤ්ජරී (ද්විතීය භාගය) යනු පාළි භාෂාව හදාරන ආධුනික ශිෂ්‍යයන් උදෙසා කෝට්ටගොඩ සෞභාග්‍යොදය විද්‍යාලයේ ප්‍රධානාචාර්ය්‍ය ධුරය දැරූ කහඳාමෝදර පියරතන හිමියන් විසින් සම්පාදිත ප්‍රාථමික පාළි කියවීම් පාඩම් පොතකි.
පාළි අටුවා පාඨ කියවීමට ප්‍රථම ශිෂ්‍යයන්ට භාෂා ඥානය හා වචන මාලාව ක්‍රමානුකූලව හුරු කරවීම සඳහා සකස් කරන ලද මෙහි, විභක්ති හැඳින්වීම්, කෙටි ආදර්ශ පාඨ, අභ්‍යාස ප්‍රශ්න සහ එක් එක් පාඩම් අවසානයෙහි පදමාලාවන් ද අන්තර්ගත වේ. පොත අවසානයෙහි සිංහල අර්ථ සහිත පාලි වචන මාලාවක් ද ඇතුළත් කර ඇත.
1913 වසරේදී මුල්වරට සම්පාදිත මෙම කෘතියෙහි එකොළොස්වන මුද්‍රණය 1968 පෙබරවාරි මස කොළඹ ඇම්. ඩී. ගුණසේන සහ සමාගම විසින් ප්‍රකාශයට පත් කර තිබේ.
විශේෂ නිවේදනය
මේ පොත ලියූ කාලයේ පැවැතුණාට වඩා දැනට ලක් දිව පාළි භාෂාධ්‍යයනය පිළිබඳ මහත් දියුණුවක් තිබෙන බව පෙනේ. බොහෝ පාඨශාලාවලත් විද්‍යාලවලත් ශිෂ්‍යයෝ දැන් පාළි භාෂාව හදාරති. පාරිවේණික ශිෂ්‍යයන් ගැන කිවමනාද නැති.
පාළි ඉගැනීම පටන් ගැනීමේ දී භාවිත කළ යුතු ලිහිල් පාඩම් පොතක් නැතිකමේ පාඩුව පිරිමැසීම සඳහා ලියූ මේ පොත පාරිවේණික වූ ද පාඨශාලීය වූ ද පාළි ශිෂ්‍යයන් හට බොහෝ වැඩදායක වන බව දක්නට ලැබීම ප්‍රීතියකි. පිරිවෙන් පාසල් විද්‍යාල ආදියෙහි ආචාර්ය ශිෂ්‍ය උභය පක්ෂයේ ම සිත් දිනාගත් මේ පාළිපාඨමඤ්ජරී පොත් පෙළ කොතරම් ජනප්‍රිය වී ද යත හොත් එය ලංකාවේ පමණක් නො ව, බුරුම අකුරෙන් මුද්‍රිත ව බුරුම රටේද පාළි උගන්නවුන් අතර විශාල ලෙස ප්‍රචලිත ව පවත්නේ වෙයි.
මේ පොතේ ද්විතීය මුද්‍රාංකණයේ දී අමුතුවෙන් කරුණු එකතු කිරීමෙන් හා දුර්බෝධ ස්ථාන සුබෝධ කිරීමෙන් ද, ඉංග්‍රීසි අර්ථ සහිත පරිශිෂ්ටයක් යෙදීමෙන් ද සම්පූර්ණ සංස්කරණයක් කරන ලදී. පොත භාවිත කළ ගුරුවරුන්ගේ අත්දැකීම අනුව කරන ලද ඉල්ලීම පරිදි සතර වැනි වර මුද්‍රණයේ දී පාඩමක් පාසා අභ්‍යාස ප්‍රශ්න ද යෙදීමි.
වාක්‍ය පූරණය, සුදුසු පද තෝරා වාක්‍ය ලිවීම හා ව්‍යාකරණ පිළිබඳ අභ්‍යාස ද එහි ඇතුළත් බැවින් ශිෂ්‍යයන් හට එය බොහෝ ප්‍රයෝජනවත් විය හැකි යැයි විශ්වාස කරමි.
මේ එකොළොස් වැනි මුද්‍රණය ද ලක්දිව ශ්‍රේෂ්ඨ පන්තියේ සිංහල මුද්‍රණ ශිල්පීන් හා ග්‍රන්ථ ප්‍රචාරකයන් ද වන කොළඹ සීමාසහිත ඇම්. ඩී. ගුණසේන සහ සමාගමේ මහතුන්ගේ අනුග්‍රහයෙන් විද්‍යාර්ථීන් අතට පත් කරන්නට හැකි වීම ගැන ඒ මහතුන්ට අවංකව ස්තූති කරමි.
සම්පාදක. 1968 පෙබරවාරි
සංඥාපනය පාළිපාඨමඤ්ජරී
මෙය වනාහි අතිශය ආයාසයෙන් ලැබිය යුතු වූ, එහෙයින් ම දුලබ වූ, ග්‍රන්ථ කර්තෘත්වය පිළිබඳ හිමිකමක් අනායාසයෙන් හෝ තරමක ආයාසයෙන් හෝ ලබා ගැනීමට කළ ප්‍රයාසයක් නොවේ; හුදෙක්, පාළිභාෂාව හදාරන නවීන පන්තියෙහි ශිෂ්‍යයා ගේ කියැවීම් පාඩම පිළිබඳ පහසුවක් සැලසීම මෙහි මුඛ්‍යාර්ථය වන්නේය.
මාගධි සංඛ්‍යාත පාළිභාෂාව දෙස පාඨශාලා ශිෂ්‍යයා පවා නොදුරු අතීතයට වඩා පැනැස මෙන්ම මනැසත් යොමා මහත් ඕනෑකමකින් බලන මේ කාලයෙහි, නවීනවුත් සුබෝධවුත් ක්‍රමයන්ගෙන් ලක්දිව පාළි අධ්‍යාපනය තවත් ප්‍රාණවත් බවට පැමිණැවිය යුතු ව තිබේ.
ලක්දිව වැසි නවීන පාළි ශිෂ්‍යයාට කියවීම් පාඩම් පොතක් වශයෙන් පළමුකොට අතට දෙනු ලබන්නේ නැතහොත් දීමට තිබෙන්නේ ධම්මපදට්ඨකථා, ජාතකට්ඨකථාදි පොත්වලින් එකක් ය. “සඞ්ග්‍රහය (රචනාවිලාසය) අතින් සලකන විට මෙකී පොත් ලියා තිබෙන්නේ සෙසු අටුවාවන්ගේම තත්ත්වයෙන්මිස ‘ක්‍රමානුගත ප්‍රාථමික පාඩම් පොත්’ වශයෙන් නො වේ ය යි කීම කිසිසේත් එකී ග්‍රන්ථවලට කරන අගෞරවයක් නොවිය යුතු බව පැහැදිලිය. එහෙත් කිය යුත්තක් තිබේ. පාළි භාෂාව පිළිබඳ තරමක සාමාන්‍ය දැනීමක් අනුක්‍රමයෙන් ක්‍රමානුගතව ඇතිකරගත් පසු අටුවා පාළිය ඉගෙනීමට එකී පොත් අවශ්‍යයෙන්ම භාවිතා කළයුතු බවයි.
වයසින් හෝ උගත් කමින් නැතහොත් ඒ දෙකින් ම ළදරු වූ ශිෂ්‍යයා හට ප්‍රථමකොට මේ පොත් ඉතා බරපතළ බවත්, තද්‍රූප ව්‍යාඛ්‍යානශික්ෂාපදාදි නොයෙක් පරිවාර පොත් තිබියදිත් ප්‍රාථමික ශිෂ්‍යයා එයින් පෙළෙන සැටිත් බොහෝ පාළි ආචාර්ය්‍යවරයන් හට ප්‍රත්‍යක්ෂව තිබෙනු නොඅනුමානය. පැවිදි ශිෂ්‍යයාටත් වඩා මේ කරුණෙහි ලා මහත් ආයාසයට පැමිණෙන්නේ ගෘහස්ථ ශිෂ්‍යයා බව බොහෝවිට දක්නා ලැබේ.
එසේ හෙයින් පාළිභාෂාව හදාරණ නවීන ශිෂ්‍යයාගේ ප්‍රථමාවතරණයට යෝග්‍ය ලිහිල්වුත් සුබෝධවුත් ක්‍රාමිකවුත් පාළි (කියැවීම්) පාඩම් පොතක ආවශ්‍යකත්වය තෙමේ බෙහෙවින් මා උද්යුක්ත කරවූයේ ය. උද්යුක්ත කරවා මේ කෘත්‍යයෙහි නියුක්ත කරවීය.
පාළි ව්‍යාකරණ හා වාක්‍යරචනා (Composition) පිළිබඳ ලිහිල් පාඩම්වලින් යුත් පොත් පෙළක් නිපදවීම ද මෙ කල පාළි අධ්‍යාපන වර්ධනය උදෙසා කළයුතු උසස් සංග්‍රහයෙකි. උගතුන් කීප පලක් විසින් දැනට එබඳු පොත් කීපයක් ලියා තිබෙනු දැක්ම සතුටට කරුණකි.
මේ පාළිපාඨමඤ්ජරියෙහි පළමුකොට විභක්ති හැඳින්වීම් වශයෙන් පාඩම් නවයක් දක්වා, එතැන් පටන් ක්‍රමානු ගතවූ ඉතා ලිහිල් පාඩම් යොදන ලදී. පහසුවෙන් අවබෝධ කරවීම පරමාර්ථකොට සිංහල භාෂාවට ඉතාම ආසන්නවූ පාළි වචනයන්ගෙන් හා ලුහුඬුවාක්‍යයන්ගෙන්ම පාඩම් සම්පාදනය කිරීමට අපේක්ෂිත වීමි. ප්‍රථමාවතරණයෙහිදී ශිෂ්‍යයා ඛෙදයට නොපැමිණැවීමෙන් ඉගෙනීමෙහි ආශාව වර්ධනය වන බැවිනි.
සන්ධි ශාස්ත්‍රය මේ තාක් නූගත් අලුත් ශිෂ්‍යයාට සන්ධි වෙන්කර ගැනීම සඳහා මහත් ආයාස දරන්නට සිදුවන්නේය. ඇතැම් විට වරද්දා ද විසන්ධි කරන්නේ ය. අර්ථය දරා ගැනීමට පවා නො හැකිව වෙහෙසෙන ශිෂ්‍යයාට මෙබඳු ප්‍රාථමික පාඩම් පොතෙකදී සන්ධි පිළිබඳව ද තවත් ගැහැටක් ඇති කිරීම කිසිසේත් යුතු නොවන බව සැලකීම අයුතු නොවේ.
මෙහි ඒ ඒ පාඩම් අගට “පදමාලා” නමින් දක්වන වචන පංක්තිය පාඩම උගන්වා අවසානයේදී අතිරේක වචන කිහිපයක් වශයෙන් ඉගැන්විය යුතුය. කිසිසේත් ඒ වචන සමූහය ඊ ළඟ පාඩමේදී ශිෂ්‍යයාහට සම්මුඛ විය හැකිය. සාකච්ඡා ව්‍යාපාරයෙන් හෝ (Conversation) අන් ක්‍රමයකින් පාඩමෙන් පිටස්තර වූ වචනද පාඩම අවසානයෙහි හැකිතාක් ඉගැන්වීම විධිමත් නවීන අධ්‍යාපන ක්‍රමයේ ඵලදායක අංගයක් බව සැලකුව මනාය.
තවද ශිෂ්‍යයාහට අලුත්වූ ද දුර්බෝධ වියහැකිවූ ද පදයන්ගේ අර්ථ ඒ ඒ පාඩම් වලට මුලින් දක්වන ලදී. සම්පූර්ණ පොතෙහි වචනාර්ථ අකාරාදි ක්‍රමයෙන් ග්‍රන්ථාවසානයෙහි දකින්නට ඇත.
පාඩමට මුලින් දක්වන වචනයෙහි ත්වා - තූන - තුං මාන අන්ත ආදි ප්‍රත්‍යයාන්ත ශබ්ද වෙන් වශයෙන් ඒ ඒ පාඩම්වල බොහෝ සෙයින් ඇතුළත් වනසේ පිළියෙල කරන ලද බව හඟවත්. එයින් අදහස් කරන්නේ ඒ අන්තවත් අන්‍ය ශබ්ද ද හමුවූ විට එබඳුම අර්ථවත් ශබ්දයයි ශිෂ්‍යයාහට හසුවෙන් අවබෝධ කරවීමය.
උදාහරණයක්:- මෙහි 13 වෙනි පාඩමෙහි “මාන” ප්‍රත්‍යයාන්ත ශබ්ද බහුල වශයෙන් ඇත. පාඩම විස්තර කර දීමේ දී ගුරුවරයා විසින් පොතේ නො ආ ඒ ප්‍රත්‍යයාන්ත අන්‍ය ශබ්ද ද ආදායී වශයෙන් කියා දිය යුතුය. එසේ කළ ශබ්ද පරිඥාන විෂයයෙහි ස්වල්ප ව්‍යාපාරයකින් ශිෂ්‍යයාගේ බුද්ධිය පුළුල්වීමට එය හළදෙරක් වැනි වෙයි. සෙසු පාඨයන්හිද මේ ක්‍රමයෙන් ම ශිෂ්‍යයාහට හස්තාවලම්බනය. දිය යුතුය.
සාමාන්‍ය වශයෙන් මේ කුඩා පොතෙන් පාළි භාෂාවේ වචන 1,500 ක් පමණ ඉගෙන ගත හැකි වෙයි.
“සො කරොහි දීපමත්තනො ඛිප්පං වායාම, පණ්ඩිතො භව.”
ධම්මපද -
මීට,
කහඳමෝදර පියරතන ස්ථවිර.
2474/1913 1. 1. කෝට්ටගොඩ සෞභාග්‍යොදය විද්‍යාලය