පාඨශාලීය සද්ධර්ම කෝෂය.pdf
- ප්‍රකාශිත වර්ෂය :
- 2001
- මුද්‍රිත වර්ෂය :
- 2001
- පිටු ගණන :
- 277
- බාගත කිරීම් ගණන :
- 3,603
- වෙබ් අඩවියට එක් කළ දිනය :
- 2016-01-23
- ගොනුවේ ප්‍රමාණය :
- 38 MB
පොතේ පිටු කිහිපයක ඡායාරූප පහතින් බලන්න.
පාඨශාලීය සද්ධර්ම කෝෂය යනු අධ්‍යාපන ප්‍රකාශන දෙපාර්තමේන්තුව මඟින් පාසල් සිසුන් හා බුද්ධ ධර්මය හදාරන්නන් සඳහා සකස් කරන ලද ධර්ම ශබ්දකෝෂයකි. 1990 දශකයේ භාවිත වූ පාසල් බුද්ධ ධර්මය පෙළපොත් ඇසුරින් තෝරාගත් ගැඹුරු ධර්ම පද, පුද්ගල නාම, ස්ථාන නාම හා චාරිත්‍ර වාරිත්‍ර පිළිබඳ නිවැරදි විවරණ මෙහි අකාරාදි පිළිවෙළට ඇතුළත් කර ඇත.
මෙම කෘතිය සම්පාදනය සඳහා විද්වත් උපදේශක මණ්ඩලයක් හා ලේඛක සංස්කාරක මණ්ඩලයක් දායක වී ඇති අතර, අධ්‍යාපන ප්‍රකාශන කොමසාරිස් විජයනායක රාජපක්ෂ මහතාගේ පෙරවදනක් ද සහිත ව 2001 වර්ෂයේ දී පළමු වරට ප්‍රකාශයට පත් කර තිබේ.
පෙරවදන
බුද්ධ ධර්මය පෙළ පොත්වල යෙදෙන වචන පිළිබඳ ව නිවැරදි අර්ථ කථන ශිෂ්‍යයන්ට ඉගැන්වීම සඳහා පරිහරණය කළ හැකි ග්‍රන්ථයක් වශයෙන් මෙම පාඨශාලීය සද්ධර්ම කෝෂය සකස් කර ඇත.
ශිෂ්‍යයන්ට පමණක් නොව ගුරු භවතුන්ට ද බුදු දහම ගැන උනන්දුවක් දක්වන සෙසු පාඨකයන්ට ද බුදු දහමේ එන ධර්ම වචන පිළිබඳ පර්යේෂණ පවත්වන විද්‍යාර්ථීන්ට ද මෙය ප්‍රයෝජනවත් ග්‍රන්ථයක් වනු ඇත.
මෙම ග්‍රන්ථය සකස් කිරීමේ දී වෙහෙසවුණු උපදේශක මණ්ඩලයට හා ලේඛක සංස්කාරක මණ්ඩලයට ද, අධ්‍යාපන ප්‍රකාශන දෙපාර්තමේන්තුවේ නිලධාරී පිරිසට ද කෘතඥතාව පිරිනමමි.
විජයනායක රාජපක්ෂ
අධ්‍යාපන ප්‍රකාශන කොමසාරිස්/
නියෝජ්‍ය අධ්‍යාපන අධ්‍යක්ෂ ජනරාල්
2001 ජුනි මස 15 වන දින
බත්තරමුල්ල,
ඉසුරුපාය,
අධ්‍යාපන ප්‍රකාශන දෙපාර්තමේන්තුවේ දී ය.
හැඳින්වීම
බුද්ධ ධර්මය හදාරන සිසුන්ට බහුල වශයෙන් හමුවන වචන සමූහයක විවරණ මෙහි ඇතුළත් වෙයි. 1990 දශකයේ භාවිත වූ බුද්ධ ධර්මය පෙළ පොත් ඇසුරින් එම වචන තෝරාගෙන ඇත. නිවැරදි විවරණයක් අවශ්‍ය ධර්මපද වැඩි වශයෙනුත්, අවශ්‍යයෙන් ම විස්තරයක් දැන ගැනීම ප්‍රයෝජනවත් වෙතැයි සැලකෙන, විෂයට අදාළ පුද්ගල නාම, ස්ථාන නාම හා චාරිත්‍ර වාරිත්‍රාදිය ප්‍රකාශිත වචන සුළු ප්‍රමාණයකුත් මෙම වචන මාලාවට ඇතුළත් ව තිබේ. සිසුන්ට සැලසෙන ප්‍රයෝජනය ගැන සලකා සමහර වචන තරමක් දීර්ඝ ලෙස විවරණය කර ඇත.
මෙබඳු කෘතියක අවශ්‍යතාව මුලින් ම දුටුවේ බුද්ධ ධර්මය පාඨ ග්‍රන්ථ උපදේශක මණ්ඩලය යි. ඒ පිළිබඳ ව අධ්‍යාපන හා උසස් අධ්‍යාපන අමාත්‍යාංශයේ බෞද්ධ උපදේශක මණ්ඩලයේ අවධානය යොමු කරවන ලදුව එහි නිර්දේශය මත ලේඛන කාර්යය අප වෙත පැවරිණි.
මෙහි වචන පෙළ ගස්වා තිබෙන්නේ සිංහල අක්ෂර මාලාවේ අනුපිළිවෙළට ය. එ බැවින් තමන්ට අවශ්‍ය වචනය සොයා ගැනීමට අකාරාදි පිළිවෙළ අනුගමනය කළ යුතු ය. ඇතැම් වචන නමින් පමණක් සඳහන් කර අදාළ විස්තරය මේ ග්‍රන්ථයේ ම වෙනත් වචනයක් යටතේ බලා ගැනීමට සලස්වා ඇත. (උදා: දස පාරමිතා - පාරමිතා බ.) කිසියම් වචනයකට අදාළ ව වැඩිමනත් විස්තර වෙනත් වචන යටතේ කියවා ගැනීමට යොමු කළ තැන් ද තිබේ. (උදා: උච්ඡේදවාදය විවරණය අවසානයේ දුක්ඛ සමුදය අරිය සච්ච ද බ. යනුවෙන් සඳහන් වෙයි.)
මෙ බඳු ග්‍රන්ථයක අවශ්‍යයෙන් ම ඇතුළත් විය යුතු වචන මඟ හැරී ඇත්නම් ඒ බව පෙන්වා දීම පාඨක වගකීමකි. එ බඳු අඩුපාඩු සපුරාලීමට අධ්‍යාපන ප්‍රකාශන දෙපාර්තමේන්තුව මෙහි ඉදිරි සංස්කරණයක දී පියවර ගනු ඇතැයි අපි විශ්වාස කරමු. පාඨශාලීය සද්ධර්ම කෝෂය පාසල් සිසුන් ඇතුළු පාඨක සැමගේ ධර්ම ඥානය හා ශ්‍රද්ධාව දියුණු වීමට පිටුබලයක් වේවා යි දැහැමි සිතින් ප්‍රාර්ථනය කරමු.
ලේඛක / සංස්කාරක මණ්ඩලය