2. 5.
27. කිඤ්චාපි ඛොම්හි කිසිකා ගිලානා බාළ්හදුබ්බලා,
දණ්ඩමොලුබ්භ ගච්ඡාමි පබ්බතං අභිරූහිය.
28. සඞ්ඝාටිං නික්ඛිපිත්වාන පත්තකං ච නිකුජ්ජිය,
සෙලෙ ඛම්භෙසිමත්තානං තමොක්ඛන්ධං පදාලියාති.
ඉත්ථං සුදං චිත්තා ථෙරී ගාථායො අභාසිත්ථා’ති.
චිත්තාථෙරීගාථා.
2. 6.
29. කිඤ්චාපි ඛොම්හි දුක්ඛිතා දුබ්බලා ගතයොබ්බනා,
දණ්ඩමොලුබ්භ ගච්ඡාමි පබ්බතං අභිරූහිය.
30. නික්ඛිපිත්වාන සඞ්ඝාටිං පත්තකං ච නිකුජ්ජිය
නිසින්නා චම්හි සෙලම්හි අථ චිත්තං විමුච්චි මෙ,
තිස්සො විජ්ජා අනුප්පත්තා කතං බුද්ධස්ස සාසනන්ති.
ඉත්ථං සුදං මෙත්තිකා ථෙරී ගාථායො අභාසිත්ථා’ති.
මෙත්තිකාථෙරීගාථා.
2. 7.
31. චාතුද්දසිං පඤ්චදසිං යා ච පක්ඛස්ස අට්ඨමී
පාටිහාරියපක්ඛඤ්ච අට්ඨඞ්ගසුසමාගතං,
උපොසථං උපාගඤ්ඡිං දෙවකායාභිනන්දිනී.
32. සාජ්ජ එකෙන භත්තෙන මුණ්ඩා සඞ්ඝාටිපාරුතා
දෙවකායං න පත්ථෙහං විනෙය්ය හදයෙ දරන්ති.
ඉත්ථං සුදං මෙත්තා ථෙරී ගාථායො අභාසිත්ථා’ති.
මෙත්තාථෙරීගාථා.
2. 8.
33. උද්ධං පාදතලා අම්ම අධො වෙ කෙසමත්ථකා,
පච්චවෙක්ඛස්සු’මං කායං අසුචි පූතිගන්ධිකං.
34. එවං විහරමානාය සබ්බො රාගො සමූහතො,
පරිළාහො සමුච්ඡින්නො සීතිභූතාම්හි නිබ්බුතාති.
ඉත්ථං සුදං අභයමාතා ථෙරී ගාථායො අභාසිත්ථා’ති.
අභයමාතාථෙරීගාථා.
2. 9.
35. අභයෙ භිදුරො කායො යත්ථ සත්තා පුථුජ්ජනා,
නික්ඛිපිප්පාමිමං දෙහං සම්පජානා සතීමතී.
36. බහූහි දික්ඛධම්මෙහි අප්පමාදරතාය මෙ,
තණ්හක්ඛයො අනුප්පත්තො කතං බුද්ධස්ස සාසනන්ති.
ඉත්ථං සුදං අභයාථෙරී ගාථායො අභාසිත්ථා’ති.
අභයාථෙරීගාථා.
2. 10.
37. චතුක්ඛත්තුං පඤ්චක්ඛත්තුං විහාරා උපනික්ඛමිං,
අලද්ධා චෙතසො සන්තිං චිත්තෙ අවසවත්තිනී.
38. තස්සා මෙ අට්ඨමී රත්ති යතො තණ්හා සමූහතා,
බහූහි දුක්ඛධම්මෙහි අප්පමාදරතාය මෙ,
තණ්හක්ඛයො අනුප්පත්තො කතං බුද්ධස්ස සාසනන්ති.
ඉත්ථං සුදං සාමා ථෙරී ගාථායො අභාසිත්ථා’ති.
සාමාථෙරීගාථා.
දුකනිපාතො නිට්ඨිතො.