337. දහරා අහං සුද්ධවසනා යං පුරෙ ධම්මමස්සුණිං,
තස්සා මෙ අප්පමත්තාය සච්චාභිසමයො අහු.

338. තතොහං සබ්බකාමෙසු භුසං අරතිමජ්ඣගං,
සක්කායස්මිං භයං දිස්වා නෙක්ඛම්මඤ්ඤෙව පීහයෙ.

339. හිත්වානහං ඤාතිගණං දාසකම්මකරානි ච,
ගාමක්ඛෙත්තානි ඵීතානි රමණීයෙ පමොදිතෙ.

340. පහායාහං පබ්බජිතා සාපතෙය්යමනප්පකං,
එවං සද්ධාය නික්ඛම්ම සද්ධම්මෙ සුප්පවෙදිතෙ
න මෙතං අස්ස පතිරූපං ආකිඤ්චඤ්ඤං හි පත්ථයෙ.

341. යො ජාතරූපං රජතං ඡඩ්ඩෙත්වා පුනරාගමෙ
රජතං ජාතරූපං වා න බොධාය න සන්තියා
නෙතං සමණ සාරුප්පං න එතං අරියං ධනං.

342. ලොභනං මදනං චෙතං මොහනං රජවඩ්ඪනං,
සාසඞ්කං බහු ආයාසං නත්ථි චෙත්ථ ධුවං ඨිති.

343. එත්ථ රත්තා පමත්තා ච සංකිලිට්ඨමනා නරා,
අඤ්ඤමඤ්ඤෙන ව්යාරුද්ධා පුථුපුබ්බන්ති මෙධගං.

344. වධො බන්ධො පරික්ලෙසො ජානි සොකපරිද්දවො,
කාමෙසු අධිපන්නානං දිස්සතෙ ව්යසනං බහුං.

345. තං මං ඤාතී අමිත්තාව කිං වො කාමෙසු යුඤ්ජථ,
ජානාථ මං පබ්බජිතං කාමෙසු භයදස්සනිං.

346. න හිරඤ්ඤසුවණ්ණෙන පරික්ඛීයන්ති ආසවා
අමිත්තා වධකා කාමා සපත්තා සල්ලබන්ධනා.

347. තං මං ඤාතී අමිත්තාව කිං වො කාමෙසු යුඤ්ජථ,
ජානාථ මං පබ්බජිතං මුණ්ඩං සඞ්ඝාටිපාරුතං.

348. උත්තිට්ඨපිණ්ඩො උඤ්ඡො ච පංසුකූලං ච චීවරං,
එතං ඛො මම සාරුප්පං අනාගාරූපනිස්සයො.

349. වන්තා මහෙසීහි කාමා යෙ දිබ්බා යෙ ච මානුසා
ඛෙමට්ඨානෙ විමුත්තා තෙ පත්තා තෙ අචලං සුඛං.

350. සාහං කාමෙහි සඞ්ගච්ඡිං යෙසු තාණං න විජ්ජති,
අමිත්තා වධකා කාමා අග්ගික්ඛන්ධසමා දුඛා.

351. පරිපන්ථො එස භයො සවිඝාතො සකණ්ටකො,
ගෙධො සුවිසමො ලෙපො මහන්තො මොහනාමුඛො.

352. උපසග්ගො භීමරූපො කාමා සප්පසිරූපමා,
යෙ බාලා අභිනන්දන්ති අන්ධභූතා පුථුජ්ජනා.

353. කාමපඞ්කෙන සත්තාහි බහූ ලොකෙ අවිද්දසූ,
පරියන්තං නාභිජානන්ති ජාතියා මරණස්ස ච.

354. දුග්ගතිගමනං මග්ගං මනුස්සා කාමහෙතුකං,
බහුං වෙ පටිපජ්ජන්ති අත්තනො රොගමාවහං.

355. එවං අමිත්තජනනා තාපනා සංකිලෙසිකා,
ලොකාමිසා බන්ධනීයා කාමා මරණබන්ධනා.

356. උම්මාදනා උල්ලපනා කාමා චිත්තප්පමාථිනො
සත්තානං සංකිලෙසාය ඛිපං මාරෙන ඔඩ්ඩිතං.

357. අනන්තාදීනවා කාමා බහුදුක්ඛා මහාවිසා,
අප්පස්සාදා රණකරා සුක්කපක්ඛවිසොසනා.

358. සාහං එතාදිසං කත්වා ව්යසනං කාමහෙතුකං,
න තං පච්චාගමිස්සාමි නිබ්බානාභිරතා සදා.