236. උදකමාහරිං සීතෙ සදා උදකමොතරිං,
අය්යානං දණ්ඩභයභීතා වාචාදොසභයට්ටිතා.

237. කස්ස බ්රාහ්මණ ත්වං භීතො සදා උදකමොතරි,
වෙධමානෙහි ගත්තෙහි සීතං වෙදයසෙ භුසං.

238. ජානන්තී වත මං හොති පුණ්ණිකෙ පරිපුච්ඡසි,
කරොන්තං කුසලං කම්මං රුන්ධන්තං කත පාපකං.

239. යො ච වුද්ධො දහරො වා පාපකම්මං පකුබ්බතී,
දකාභිසෙචනා සොපි පාපකම්මා පමුච්චති.

240. කොනු තෙ ඉදමක්ඛාසි අජානන්තස්ස අජානකො,
දකාභිසෙචනා නාම පාපකම්මා පමුච්චති.

241. සග්ගං නූන ගමිස්සන්ති සබ්බෙ මණ්ඩුකකච්ඡපා,
නක්කා ච සුංසුමාරා ච යෙ චඤ්ඤෙ උදකෙ චරා.

242. ඔරබ්භිකා සූකරිකා මච්ඡකා මිගබන්ධකා,
චොරා ච වජ්ඣඝාතා ච යෙචඤ්ඤෙපාපකම්මිනො,
දකාභිසෙචනා තෙපි පාපකම්මා පමුච්චරෙ.

243. සචෙ ඉමා නදියො තෙ පාපං පුබ්බෙ කතං වහුං,
පුඤ්ඤානිමානි වහෙය්යුං තෙන ත්වං පරිබාහිරො.

244. යස්ස බ්රාහ්මණ ත්වං භීතො සදා උදකමොතරි,
තමෙව බ්රහ්මෙ මාකාසි මා තෙ සීතං ඡවිං හනී.

245. කුම්මග්ගං පටිපන්නං මං අරියමග්ගං සමානයි,
උදකාභිසෙචනා භොති ඉමං සාටං දදාමි තෙ.

246. තුය්හෙව සාටකො හොතු නාහං ඉච්ඡාමි සාටකං,
සචෙ භායසි දුක්ඛස්ස සචෙ තෙ දුක්ඛමප්පියං.

247. මාකාසි පාපකං කම්මං ආවී වා යදි වා රහො,
සචෙ ච පාපකං කම්මං කරිස්සසි කරොසි වා.

248. න තෙ දුක්ඛා පමුත්ත්යත්ථි උපෙච්චාපි පලායතො,
සචෙ භාසසි දුක්ඛස්ස සචෙ තෙ දුක්ඛමප්පියං.

249. උපෙහි සරණං බුද්ධං ධම්මං සඞ්ඝඤ්ච තාදිනං,
සමාදියාහි සීලානි තං තෙ අත්ථාය හෙහිති.

250. උපෙමි සරණං බුද්ධං ධම්මං සඞ්ඝඤ්ච තාදිනං,
සමාදියාමි සීලානි තම්මෙ අත්ථාය හෙහිති.

251. බ්රහ්මබන්ධු පුරෙ ආසිං අජ්ජම්හි සච්ච බ්රාහ්මණො,
තෙවිජ්ජො වෙදසම්පන්නො සොත්ථියො චම්හි නහාතකොති.