1. එකකනිපාතො.
1. 1.
1. සුඛං සුපාහි ථෙරිකෙ කත්වා චොළෙන පාරුතා,
උපසන්තො හි තෙ රාගො සුක්ඛඩාකං ව කුම්භියන්ති.
උපසන්තො හි තෙ රාගො සුක්ඛඩාකං ව කුම්භියන්ති.
ඉත්ථං සුදං අඤ්ඤතරා ථෙරී අපඤ්ඤාතා භික්ඛුනී ගාථං අභාසිත්ථා’ති.
අඤ්ඤතරථෙරීගාථා.
1. 2.
2. මුත්තෙ මුච්චස්සු යොගෙහි චන්දො රාහුග්ගහා ඉව,
විප්පමුත්තෙන චිත්තෙන අනණා භුඤ්ජ පිණ්ඩකන්ති.
විප්පමුත්තෙන චිත්තෙන අනණා භුඤ්ජ පිණ්ඩකන්ති.
ඉත්ථං සුදං භගවා මුත්තං සික්ඛමානං ඉමාය ගාථාය අභිණ්හං ඔවදතී’ති.
මුත්තාථෙරීගාථා.
1. 3.
3. පුණ්ණො පූරස්සු ධම්මෙහි චන්දො පණ්ණරසොරිව,
පරිපුණ්ණාය පඤ්ඤාය තමොක්ඛන්ධං පදාලයාති.
පරිපුණ්ණාය පඤ්ඤාය තමොක්ඛන්ධං පදාලයාති.
ඉත්ථං සුදං පුණ්ණා ථෙරී ගාථං අභාසිත්ථා’ති.
පුණ්ණාථෙරීගාථා.
1. 4.
4. තිස්සෙ සික්ඛස්සු සික්ඛාය මා තං යොගා උපච්චගුං,
සබ්බයොගවිසංයුත්තා චර ලොකෙ අනාසවා’ති.
සබ්බයොගවිසංයුත්තා චර ලොකෙ අනාසවා’ති.
ඉත්ථං සුදං තිස්සා ථෙරී ගාථං අභාසිත්ථා’ති.
තිස්සාථෙරීගාථා.
1. 5.
5. තිස්සෙ යුඤ්ජස්සු ධම්මෙහි ඛණො තං මා උපච්චගා,
ඛණාතීතා හි සොචන්ති නිරයම්හි සමප්පිතා’ති.
ඛණාතීතා හි සොචන්ති නිරයම්හි සමප්පිතා’ති.
ඉත්ථං සුදං තිස්සා ථෙරී ගාථං අභාසිත්ථා’ති.
තිස්සාථෙරීගාථා.
1. 6.
6. ධීරෙ නිරොධං ඵුස්සෙහි සඤ්ඤා වූපසමං සුඛං,
ආරාධයාහි නිබ්බානං යොගක්ඛෙමං අනුත්තරං.
ආරාධයාහි නිබ්බානං යොගක්ඛෙමං අනුත්තරං.
ඉත්ථං සුදං ධීරා ථෙරී ගාථං අභාසිත්ථා’ති.
ධීරාථෙරීගාථා.
1. 7.
7. වීරා වීරෙහි ධම්මෙහි භික්ඛුනී භාවිතින්ද්රියා,
ධාරෙහි අන්තිමං දෙහං ඡෙත්වා මාරං සවාහිනින්ති.
ධාරෙහි අන්තිමං දෙහං ඡෙත්වා මාරං සවාහිනින්ති.
ඉත්ථං සුදං වීරා ථෙරී ගාථං අභාසිත්ථා’ති.
වීරාථෙරීගාථා.
1. 8.
8. සද්ධාය පබ්බජිත්වාන මිත්තෙ මිත්තරතා භව,
භාවෙහි කුසලෙ ධම්මෙ යොගක්ඛෙමස්ස පත්තියාති.
භාවෙහි කුසලෙ ධම්මෙ යොගක්ඛෙමස්ස පත්තියාති.
ඉත්ථං සුදං මිත්තාථෙරී ගාථං අභාසිත්ථා’ති.
මිත්තාථෙරීගාථා.