473. එකපුත්තො අහං ආසිං පියො මාතු පියො පිතු,
බහූහි වතචරියාහි ලද්ධො ආයාචනාහි ච.

474. තෙ ච මං අනුකම්පාය අත්ථකාමා හිතෙසිනො,
උභො පිතා ච මාතා ච බුද්ධස්ස උපනාමයුං,

475. කිච්ඡා ලද්ධො අයං පුත්තො සුඛුමාලො සුඛෙධිතො,
ඉමං දදාම තෙ නාථ ජිනස්ස පරිචාරකං.

476. සත්ථා ච මං පටිග්ගය්හ ආනන්දං එතදබ්රවි,
පබ්බාජෙහි ඉමං ඛිප්පං හෙස්සත්යාජානියො අයං.

477. පබ්බාජෙත්වාන මං සත්ථා විහාරං පාවිසී ජිනො,
අනොග්ගතස්මිං සුරියස්මිං තතො චිත්තං විමුච්චි මෙ.

478. තතො සත්ථා නිරංකත්වා පටිසල්ලානවුට්ඨිතො,
එහි භද්දා’ති මං ආහ සා මෙ ආසූපසම්පදා.

479. ජාතියා සත්තවස්සෙන ලද්ධා මෙ උපසම්පදා,
තිස්සො විජ්ජා අනුප්පත්තා අහො ධම්මසුධම්මතා’ති.

480. දිස්වා පාසාදඡායායං චඞ්කමන්තං නරුත්තමං,
තත්ථ නං උපසඞ්කම්ම වන්දිසං පුරිසුත්තමං.

481. එකංසං චීවරං කත්වා සංහරිත්වාන පාණයො,
අනුචඞ්කමිස්සං විරජං සබ්බසත්තානමුත්තමං.

482. තතො පඤ්හෙ අපුච්ඡි මං පඤ්හානං කොවිදො විදූ,
අච්ඡම්භී ච අභීතො ච ව්යාකාසිං සත්ථුනො අහං.

483. විස්සජ්ජිතෙසු පඤ්හෙසු අනුමොදි තථාගතො,
භික්ඛුසඞ්ඝං විලොකෙත්වා ඉමමත්ථං අභාසථ.

484. ලාභා අඞ්ගානමගධානං යෙසායං පරිභුඤ්ජති,
චීවරං පිණ්ඩපාතං ච පච්චයං සයනාසනං,
පච්චුට්ඨානං ච සාමීචිං තෙසං ලාභාති චාබ්රවි.

485. අජ්ජතග්ගෙ මං සොපාක දස්සනායුපසඞ්කම,
එසා චෙව තෙ සොපාක භවතු උපසම්පදා.

486. ජාතියා සත්තවස්සොහං ලද්ධාන උපසම්පදං,
ධාරෙමි අන්තිමං දෙහං අහො ධම්මසුධම්මතා’ති.

487. සරෙ හත්ථෙහි භඤ්ජිත්වා කත්වාන කුටිමච්ඡිසං,
තෙන මෙ සරභඞ්ගොති නාමං සම්මුතියා අහු.

488. න මය්හං කප්පතෙ අජ්ජ සරෙ හත්ථෙහි භඤ්ජිතුං,
සික්ඛාපදා නො පඤ්ඤත්තා ගොතමෙන යසස්සිනා.

489. සකලං සමත්තං රොගං සරභඞ්ගො නාද්දසං පුබ්බෙ,
සො’යං රොගො දිට්ඨො වචනකරෙනාතිදෙවස්ස.

490. යෙනෙව මග්ගෙන ගතො විපස්සී
යෙනෙව මග්ගෙන සිඛී ච වෙස්සභූ,
කකුසන්ධකොණාගමනා ච කස්සපො
තෙනඤ්ජසෙන අගමාසි ගොතමො.