70. 1. 1.
1220. නික්ඛන්තං වත මං සන්තං අගාරස්මානගාරියං
විතක්කා උපධාවන්ති පගබ්භා කණ්හතො ඉමෙ.
විතක්කා උපධාවන්ති පගබ්භා කණ්හතො ඉමෙ.
1221. උග්ගපුත්තා මහිස්සාසා සික්ඛිතා දළ්හධම්මිනො
සමන්තා පරිකිරෙය්යුං සහස්සං අපලායිනං.
සමන්තා පරිකිරෙය්යුං සහස්සං අපලායිනං.
1222. සචෙ’පි එත්තකා භිය්යො ආගමිස්සන්ති ඉත්ථියො
නෙව මං බ්යාධයිස්සන්ති ධම්මෙ සම්හි පතිට්ඨිතං.
නෙව මං බ්යාධයිස්සන්ති ධම්මෙ සම්හි පතිට්ඨිතං.
1223. සක්ඛීහි මෙ සුතං එතං බුද්ධස්සාදිච්චබන්ධුනො
නිබ්බානගමනං මග්ගං තත්ථ මෙ නිරතො මනො.
නිබ්බානගමනං මග්ගං තත්ථ මෙ නිරතො මනො.
1224. එවං චෙ මං විහරන්තං පාපිම උපගච්ඡසි
තථා මච්චු කරිස්සාමි න මෙ මග්ගම්පි දක්ඛසි.
තථා මච්චු කරිස්සාමි න මෙ මග්ගම්පි දක්ඛසි.
1225. අරතිං රතිං ච පහාය සබ්බසො ගෙහෙසිතං ච විතක්කං
වනථං න කරෙය්ය කුහිඤ්චි නිබ්බනථො අවනථො ස භික්ඛු.
වනථං න කරෙය්ය කුහිඤ්චි නිබ්බනථො අවනථො ස භික්ඛු.
1226. යමිධ පඨවිං ච වෙහාසං රූපගතං ජගතොගධං කිඤ්චි
පරිජීයති සබ්බමතිච්චං එවං සමෙච්ච චරන්ති මුතත්තා.
පරිජීයති සබ්බමතිච්චං එවං සමෙච්ච චරන්ති මුතත්තා.
1227. උපධීසු ජනා ගධිතාසෙ දිට්ඨෙ සුතෙ පටිඝෙ ච මුතෙ ච
එත්ථ විනොදය ඡන්දමනෙජො යො හෙත්ථ න ලිප්පති මුනි තමාහු.
එත්ථ විනොදය ඡන්දමනෙජො යො හෙත්ථ න ලිප්පති මුනි තමාහු.
1228. අට්ඨ සට්ඨිසිතා සවිතක්කා පුථුජ්ජනතායං අධම්මා නිවිට්ඨා
න ච වග්ගගතස්ස කුහිඤ්චි නො පන දුට්ඨුල්ලගාහී ස භික්ඛු.
න ච වග්ගගතස්ස කුහිඤ්චි නො පන දුට්ඨුල්ලගාහී ස භික්ඛු.
1229. දබ්බො චිරරත්තසමාහිතො අකුහකො නිපකො අපිහාලු,
සන්තං පදං අජ්ඣගමා මුනි පටිච්ච පරිනිබ්බුතො කඞ්ඛති කාලං.
සන්තං පදං අජ්ඣගමා මුනි පටිච්ච පරිනිබ්බුතො කඞ්ඛති කාලං.
1230. මානං පජහස්සු ගොතම මනපථං ච ජහස්සු අසෙසං
මානපථම්හි ස මුච්ඡිතො විප්පටිසාරී හුවා චිරරත්තං.
මානපථම්හි ස මුච්ඡිතො විප්පටිසාරී හුවා චිරරත්තං.
1231. මක්ඛෙන මක්ඛිතා පජා මානහතා නිරයං පපතන්ති
සොචන්ති ජනා චිරරත්තං මානහතා නිරයං උපපන්නා.
සොචන්ති ජනා චිරරත්තං මානහතා නිරයං උපපන්නා.
1232. න හි සොචති භික්ඛු කදාචි මග්ගජිනො සම්මා පටිපන්නො
කිත්තිං ච සුඛං චානුභොති ධම්මදසො’ති තමාහු තථත්තං.
කිත්තිං ච සුඛං චානුභොති ධම්මදසො’ති තමාහු තථත්තං.
1233. තස්මා අඛිලො පධානවා නීවරණානි පහාය විසුද්ධො
මානං ච පහාය අසෙසං විජ්ජායන්තකරො සමිතාවී.
මානං ච පහාය අසෙසං විජ්ජායන්තකරො සමිතාවී.
1234. කාමරාගෙන ඩය්හාමි චිත්තං මෙ පරිඩය්හති
සාධු නිබ්බාපනං බ්රූහි අනුකම්පාය ගොතම.
සාධු නිබ්බාපනං බ්රූහි අනුකම්පාය ගොතම.
1235. සඤ්ඤාය විපරියෙසා චිත්තං තෙ පරිඩය්හති
නිමිත්තං පරිවජ්ජෙහි සුභං රාගූපසංහිතං.
නිමිත්තං පරිවජ්ජෙහි සුභං රාගූපසංහිතං.
1236. සඞ්ඛාරෙ පරතො පස්ස දුක්ඛතො මා ච අත්තතො
නිබ්බාපෙහි මහාරාගං මා ඩයිහිත්ථො පුනප්පුනං.
නිබ්බාපෙහි මහාරාගං මා ඩයිහිත්ථො පුනප්පුනං.
1237. අසුභාය චිත්තං භාවෙහි එකග්ගං සුසමාහිතං
සති කායගතාත්යත්ථු නිබ්බිදාබහුලො භව.
සති කායගතාත්යත්ථු නිබ්බිදාබහුලො භව.
1238. අනිමිත්තඤ්ච භාවෙහි මානානුසයමුජ්ජහ
තතො මානාභිසමයා උපසන්තො චරිස්සසි.
තතො මානාභිසමයා උපසන්තො චරිස්සසි.
1239. තමෙව වාචං භාසෙය්ය යායත්තානං න තාපයෙ
පරෙ ච න විහිංසෙය්ය සා වෙ වාචා සුභාසිතා.
පරෙ ච න විහිංසෙය්ය සා වෙ වාචා සුභාසිතා.
1240. පියවාචමෙව භාසෙය්ය යා වාචා පටිනන්දිතා
යං අනාදාය පාපානි පරෙසං භාසතෙ පියං.
යං අනාදාය පාපානි පරෙසං භාසතෙ පියං.
1241. සච්චං වෙ අමතා වාචා එස ධම්මො සනන්තනො
සච්චෙ අත්ථෙ ච ධම්මෙ ච ආහු සත්තො පතිට්ඨිතා.
සච්චෙ අත්ථෙ ච ධම්මෙ ච ආහු සත්තො පතිට්ඨිතා.
1242. යං බුද්ධො භාසති වාචං ඛෙමං නිබ්බානපත්තියා
දුක්ඛස්සන්තකිරියාය සා වෙ වාචානමුත්තමා.
දුක්ඛස්සන්තකිරියාය සා වෙ වාචානමුත්තමා.