2. 3. 2.
163. පනාදො නාම සො රාජා යස්ස යූපො සුවණ්ණයො,
තිරියං සොළසපබ්බෙධො උද්ධමාහු සහස්සධා.
164. සහස්සකණ්ඩො සතභෙණ්ඩු ධජාලූ හරිතාමයො,
අනච්චුං තත්ථ ගන්ධබ්බා ඡසභස්සානි සත්තධා’ති.
ඉත්ථං සුදං ආයස්මා භද්දජි ථෙරො ගාථායො අභාසිත්ථා’ති.
භද්දජිත්ථෙරගාථා.
2. 3. 3.
165. සතිමා පඤ්ඤවා භික්ඛු ආරද්ධබලවීරියො,
පඤ්චකප්පසතානාහං එකරත්තිං අනුස්සරිං.
166. චත්තාරො සතිපට්ඨානෙ සත්ත අට්ඨ ච භාවයං,
පඤ්චකප්පසතානාහං එකරත්තිං අනුස්සරින්ති.
ඉත්ථං සුදං ආයස්මා සොභිතො ථෙරො ගාථායො අභාසිත්ථා’ති.
සොභිතත්ථෙරගාථා.
2. 3. 4.
167. යං කිච්චං දළ්හවිරියෙන යං කිච්චං බොද්ධුමිච්ඡතා,
කරිස්සං නාවරුජ්ඣිස්සං පස්ස විරියං පරක්කමං.
168. ත්වං ච මෙ මග්ගමක්ඛාහි අඤ්ජසං අමතොගධං,
අහං මොනෙන මොනිස්සං ගඞ්ගාසොතො’ව සාගරන්ති.
ඉත්ථං සුදං ආයස්මා වල්ලියො ථෙරො ගාථායො අභාසිත්ථා’ති.
වල්ලියත්ථෙරගාථා.
2. 3. 5.
169. කෙසෙ මෙ ඔලිඛිස්ස’න්ති කප්පකො උපසඞ්කමි,
තතො අදාසමාදාය සරීරං පච්චවෙක්ඛිසං.
170. තුච්ඡො කායො අදිස්සිත්ථ අන්ධකාරො තමො ව්යගා,
සබ්බෙ චොළා සමුච්ඡින්නා නත්ථි දානි පුනබ්භවො’ති.
ඉත්ථං සුදං ආයස්මා වීතසොකො ථෙරො ගාථායො අභාසිත්ථා’ති.
වීතසොකත්ථෙරගාථා.
2. 3. 6.
171. පඤ්චනීවරණෙ හිත්වා යොගක්ඛෙමස්ස පත්තියා,
ධම්මාදාසං ගහෙත්වාන ඤාණදස්සනමත්තනො.
172. පච්චවෙක්ඛිං ඉමං කායං සබ්බං සන්තරබාහිරං,
අජ්ඣත්තඤ්ච බහිද්ධා ච තුච්ඡො කායො අදිස්සථා’ති.
ඉත්ථං සුදං ආයස්මා පුණ්ණමාසො ථෙරො ගාථායො අභාසිත්ථා’ති.
පුණ්ණමාසත්ථෙරගාථා.
2. 3. 7.
173. යථාපි භද්දො ආජඤ්ඤො ඛලිත්වා පතිතිට්ඨති,
භිය්යො ලද්ධාන සංවෙගං අදීනො වහතෙ ධුරං.
174. එවං දස්සනසම්පන්නං සම්මාසම්බුද්ධසාවකං,
ආජානීයං මං ධාරෙථ පුත්තං බුද්ධස්ස ඔරසන්ති.
ඉත්ථං සුදං ආයස්මා නන්දකො ථෙරො ගාථායො අභාසිත්ථා’ති.
නන්දකත්ථෙරගාථා.
2. 3. 8.
175. එහි නන්දක ගච්ඡාම උපජ්ඣායස්ස සන්තිකං,
සීහනාදං නදිස්සාම බුද්ධසෙට්ඨස්ස සම්මුඛා.
176. යාය නො අනුකම්පාය අම්හෙ පබ්බාජයී මුනි,
සො නො අත්ථො අනුප්පත්තො සබ්බසංයොජනක්ඛයො’ති.
ඉත්ථං සුදං ආයස්මා භරතො ථෙරො ගාථායො අභාසිත්ථා’ති.
භරතත්ථෙරගාථා.