2. 1. 7.
133. යථා අගාරං දුච්ඡන්නං වුට්ඨි සමතිවිජ්ඣති,
එවං අභාවිතං චිත්තං රාගො සමතිවිජ්ඣති.
එවං අභාවිතං චිත්තං රාගො සමතිවිජ්ඣති.
134. යථා අගාරං සුච්ඡන්නං වුට්ඨි න සමතිවිජ්ඣති,
එවං සුභාවිතං චිත්තං රාගො න සමතිවිජ්ඣති.
එවං සුභාවිතං චිත්තං රාගො න සමතිවිජ්ඣති.
ඉත්ථං සුදං ආයස්මා රාධො ථෙරො ගාථායො අභාසිත්ථා’ති.
රාධත්ථෙරගාථා.
2. 1. 8.
135. ඛීණා හි මය්හං ජාති වුසිතං ජිනසාසනං,
පහීනො ජාලසඞ්ඛාතො භවනෙත්ති සමූහතා.
පහීනො ජාලසඞ්ඛාතො භවනෙත්ති සමූහතා.
136. යස්සත්ථාය පබ්බජිතො අගාරස්මානගාරියං,
සො මෙ අත්ථො අනුප්පත්තො සබ්බසංයොජනක්ඛයො’ති.
සො මෙ අත්ථො අනුප්පත්තො සබ්බසංයොජනක්ඛයො’ති.
ඉත්ථං සුදං ආයස්මා සුරාධො ථෙරො ගාථායො අභාසිත්ථා’ති.
සුරාධත්ථෙරගාථා.
2. 1. 9.
137. සුඛං සුපන්ති මුනයො යෙ ඉත්ථිසු න බජ්ඣරෙ,
සදා වෙ රක්ඛිතබ්බාසු යාසු සච්චං සුදුල්ලභං.
සදා වෙ රක්ඛිතබ්බාසු යාසු සච්චං සුදුල්ලභං.
138. වධං චරිම්හ තෙ කාම අනණා දානි තෙ මයං,
ගච්ඡාම දානි නිබ්බානං යත්ථ ගන්ත්වා න සොචතී’ති.
ගච්ඡාම දානි නිබ්බානං යත්ථ ගන්ත්වා න සොචතී’ති.
ඉත්ථං සුදං ආයස්මා ගොතමො ථෙරො ගාථායො අභාසිත්ථා’ති.
ගොතමත්ථෙරගාථා.
2. 1. 10.
139. පුබ්බෙ හන්ති අත්තානං පච්ඡා හන්ති සො පරෙ,
සුහතං හන්ති අත්තානං වීතසෙනෙව පක්ඛිමා.
සුහතං හන්ති අත්තානං වීතසෙනෙව පක්ඛිමා.
140. න බ්රාහ්මණො බහිවණ්ණො අන්තො වණ්ණො හි බ්රාහ්මණො,
යසුමිං පාපානි කම්මානි ස වෙ කණ්හො සුජම්පතී’ති.
යසුමිං පාපානි කම්මානි ස වෙ කණ්හො සුජම්පතී’ති.
ඉත්ථං සුදං ආයස්මා වසභො ථෙරො ගාථායො අභාසිත්ථා’ති.
වසභත්ථෙරගාථා.
වග්ගො පඨමො.
තස්සුද්දානං:
උත්තරො චෙව පිණ්ඩොලො වල්ලිතො තීරියො ඉසි,
අජිනො ච මෙලජිනො රාධො සුරාධො ගොතමො,
වසභෙන ඉමෙ හොන්ති දස ථෙරා මහිද්ධිකා’ති.
අජිනො ච මෙලජිනො රාධො සුරාධො ගොතමො,
වසභෙන ඉමෙ හොන්ති දස ථෙරා මහිද්ධිකා’ති.