2. 1. 3.
125. මක්කටො පඤ්චද්වාරායං කුටිකායං පසක්කිය,
ද්වාරෙන අනුපරියෙති ඝට්ටයෙන්තො මුහුං මුහුං.
ද්වාරෙන අනුපරියෙති ඝට්ටයෙන්තො මුහුං මුහුං.
126. තිට්ඨ මක්කට මා ධාවි නහි තෙ තං යථා පුරෙ,
නිග්ගහීතොසි පඤ්ඤාය නෙව දූරං ගමිස්සසී’ති.
නිග්ගහීතොසි පඤ්ඤාය නෙව දූරං ගමිස්සසී’ති.
ඉත්ථං සුදං ආයස්මා වල්ලියො ථෙරො ගාථායො අභාසිත්ථා’ති.
වල්ලියත්ථෙරගාථා.
2. 1. 4.
127. තිණ්ණං මෙ තාලපත්තානං ගඞ්ගාතීරෙ කුටී කතා,
ජවසිත්තොව මෙ පත්තො පංසුකූලං ච චීවරං.
ජවසිත්තොව මෙ පත්තො පංසුකූලං ච චීවරං.
128. ද්වින්නං අන්තරවස්සානං එකා වාචා මෙ භාසිතා,
තතියෙ අන්තරවස්සම්හි තමොක්ඛන්ධො පදාලිතො.
තතියෙ අන්තරවස්සම්හි තමොක්ඛන්ධො පදාලිතො.
ඉත්ථං සුදං ආයස්මා ගඞ්ගාතීරියො ථෙරො ගාථායො අභාසිත්ථා’ති.
ගඞ්ගාතීරියත්ථෙරගාථා.
2. 1. 5.
129. අපි චෙ හොති තෙවිජ්ජො මච්චුහායී අනාසවො,
අප්පඤ්ඤාතොති නං බාලා අවජානන්ති අජානතා.
අප්පඤ්ඤාතොති නං බාලා අවජානන්ති අජානතා.
130. යො ච ඛො අන්නපානස්ස ලාභී හොතීධ පුග්ගලො,
පාපධම්මොපි චෙ හොති සො නෙසං හොති සක්කතො’ති.
පාපධම්මොපි චෙ හොති සො නෙසං හොති සක්කතො’ති.
ඉත්ථං සුදං ආයස්මා අජිනො ථෙරො ගාථායො අභාසිත්ථා’ති.
අජිනත්ථෙරගාථා.
2. 1. 6.
131. යදාහං ධම්මමස්සොසිං භාසමානස්ස සත්ථුනො,
න කඞ්ඛමභිජානාමි සබ්බඤ්ඤූ අපරාජිතෙ.
න කඞ්ඛමභිජානාමි සබ්බඤ්ඤූ අපරාජිතෙ.
132. සත්ථවාහෙ මහාවීරෙ සාරථීනං වරුත්තමෙ,
මග්ගෙ පටිපදායං වා කඞ්ඛා මය්හං න විජ්ජතී’ති.
මග්ගෙ පටිපදායං වා කඞ්ඛා මය්හං න විජ්ජතී’ති.
ඉත්ථං සුදං ආයස්මා මෙලජිනො ථෙරො ගාථායො අභාසිත්ථා’ති.
මෙලජිනත්ථෙරගාථා.
2. 1. 7.
133. යථා අගාරං දුච්ඡන්නං වුට්ඨි සමතිවිජ්ඣති,
එවං අභාවිතං චිත්තං රාගො සමතිවිජ්ඣති.
එවං අභාවිතං චිත්තං රාගො සමතිවිජ්ඣති.
134. යථා අගාරං සුච්ඡන්නං වුට්ඨි න සමතිවිජ්ඣති,
එවං සුභාවිතං චිත්තං රාගො න සමතිවිජ්ඣති.
එවං සුභාවිතං චිත්තං රාගො න සමතිවිජ්ඣති.
ඉත්ථං සුදං ආයස්මා රාධො ථෙරො ගාථායො අභාසිත්ථා’ති.
රාධත්ථෙරගාථා.