1096. කදා නු’හං පබ්බතකන්දරාසු
එකාකියො අද්දුතියො විහස්සං
අනිච්චතො සබ්බභවං විපස්සං
තං මෙ ඉදං තං නු කදා භවිස්සති.

1097. කදා නු’හං භින්නපටන්ධරො මුනි
කාසාවවත්ථො අමමො නිරාසො
රාගං ච දොසං ච තථෙව මොහං
හන්ත්වා සුඛී පවනගතො විහස්සං.

1098. කදා අනිච්චං වධරොගනීළං
කායං ඉමං මච්චුජරායුපද්දුතං
විපස්සමානො වීතභයො විහස්සං
එකො වනෙ තං නු කදා භවිස්සති.

1099. කදා නු’හං භයජනනිං දුඛාවහං
තණ්හාලතා බහුවිධානුවත්තනිං
පඤ්ඤාමයං තිඛිණමසිං ගහෙත්වා
ඡෙත්වා වසෙ තම්පි කදා භවිස්සති.

1100. කදා නු පඤ්ඤාමයමුග්ගතෙජං
සත්ථං ඉසීනං සහසාදියිත්වා
මාරං සසෙනං සහසා භඤ්ජිස්සං
සීහාසනෙ තං නු කදා භවිස්සති.

1101. කදා නු’හං සබ්භිසමාගමෙසු
දිට්ඨො භවෙ ධම්මගරූහි තාදිහි
යථාවදස්සීහි ජිතින්ද්රියෙහි
පධානියො තං නු කදා භවිස්සති.

1102. කදා නු මං තන්දිඛුදා පිපාසා
වාතාතපා කීටසිරිංසපා වා
නබාධයිස්සන්ති න තං ගිරිබ්බජෙ
අත්ථත්ථියං තං නු කදා භවිස්සති.

1103. කදා නු ඛො යං විදිතං මහෙසිනා
චත්තාරි සච්චානි සුදුද්දසානි
සමාහිතත්තො සතිමා අගච්ඡං,
පඤ්ඤාය තං තං නු කදා භවිස්සති.

1104. කදා නු රූපෙ අමිතෙ ච සද්දෙ
ගන්ධෙ රසෙ ඵුසිතබ්බෙ ච ධම්මෙ
ආදිත්තතොහං සමථෙහි යුත්තො
පඤ්ඤාය දක්ඛං තදිදං කදා මෙ.

1105. කදා නු’හං දුබ්බචනෙන වුත්තො
තතො නිමිත්තං විමනො න හෙස්සං
අථො පසත්ථො’පි තතො නිමිත්තං
තුට්ඨො න හෙස්සං තදිදං කදා මෙ.

1106. කදා නු කට්ඨෙ ච තිණෙ ලතා ච
ඛන්ධෙ ඉමෙහං අමිතෙ ච ධම්මෙ
අජ්ඣත්තිකානෙව ච බාහිරානි ච
සමං තුලෙය්යං තදිදං කදා මෙ.

1107. කදා නු මං පාවුසකාලමෙඝො
නවෙන තොයෙන සචීවරං වනෙ
ඉසිප්පයාතම්හි පථෙ වජන්තං
ඔවස්සතෙ තං නු කදා භවිස්සති.

1108. කදා මයූරස්ස සිඛණ්ඩිනො වනෙ
දිජස්ස සුත්වා ගිරිගබ්භරෙ රුතං
පච්චුට්ඨහිත්වා අමතස්ස පත්තියා
සංචින්තියෙ තං නු කදා භවිස්සති.

1109. කදා නු ගඞ්ගං යමුනං සරස්සතිං
පාතාලඛිත්තං වළවාමුඛං ච
අසජ්ජමානො පතරෙය්යමිද්ධියා
විභීසනං තං නු කදා භවිස්සති.

1110. කදා නු නාගො’ව අසඞ්ගචාරී
පදාලයෙ කාමගුණෙසු ඡන්දං
නිබ්බජ්ජයං සබ්බසුභං නිමිත්තං
ඣානෙ යුතො තං නු කදා භවිස්සති.

1111. කදා ඉණට්ටො’ව දළිද්දකො නිධිං
ආරාධයිත්වා ධනිකෙහි පීළිතො
තුට්ඨො භවිස්සං අධිගම්ම සාසනං
මහෙසිනො තං නු කදා භවිස්සති.

1112. බහූනි වස්සානි තයාම්හි යාචිතො
ආගාරවාසෙන අලං නු තෙ ඉදං
තං දානි මං පබ්බජිතං සමානං
කිංකාරණා චිත්ත තුවං න යුඤ්ජසි.

1113. නනු අහං චිත්ත තයාම්හි යාචිතො
ගිරිබ්බජෙ චිත්රඡදා විහඞ්ගමා
මහින්දඝොසත්ථන්තාභිගජ්ජිනො
තෙ තං රමිස්සන්ති වනම්හි ඣායිනං.

1114. කුලම්හි මිත්තෙ ච පියෙ ච ඤාතකෙ
ඛිඩ්ඩාරතිං කාමගුණං ච ලොකෙ
සබ්බං පහාය ඉමමජ්ඣපාගතො
අථො’පි ත්වං චිත්ත න මය්හ තුස්සසි.

1115. මමෙව එතං න හි ත්වං පරෙසං
සන්නාහකාලෙ පරිදෙවිතෙන කිං
සබ්බං ඉදං චලමිති පෙක්ඛමානො
අභිනික්ඛමිං අමතපදං ජිගීසං.