1. 8. 10.
80. යං මයා පකතං කම්මං අප්පං වා යදි වා බහුං
සබ්බමෙතං පරික්ඛීණං නත්ථි දානි පුනබ්භවො’ති.
ඉත්ථං සුදං ආයස්මා උග්ගො ථෙරො ගාථං අභාසිත්ථා’ති.
උග්ගත්ථෙරගාථා.
අට්ඨමො වග්ගො.
තස්සුද්දානං:
වච්ඡපාලො ච යො ථෙරො ආතුමො මාණවො ඉසි
සුයාමො ච සුසාරදො ථෙරො යො ච පියඤ්ජහො
ආරොහපුත්තො මෙණ්ඩසිරො රක්ඛිතො උග්ගසව්හයො’ති.
නවමො වග්ගො.
1. 9. 1.
81. යං මයා පකතං පාපං පුබ්බෙ අඤ්ඤාසු ජාතිසු
ඉධෙව තං වෙදනීයං වත්ථු අඤ්ඤං න විජ්ජතී’ති.
ඉත්ථං සුදං ආයස්මා සමිතිගුත්තො ථෙරො ගාථං අභාසිත්ථා’ති.
සමිතිගුත්තත්ථෙරගාථා.
1. 9. 2.
82. යෙන යෙන සුභික්ඛානි සිවානි අභයානි ච
තෙන පුත්තක ගච්ඡස්සු මා සොකාපහතො භවා’ති.
ඉත්ථං සුදං ආයස්මා කස්සපො ථෙරො ගාථං අභාසිත්ථා’ති.
කස්සපත්ථෙරගාථා.
1. 9. 3.
83. සීහප්පමත්තා විහර රත්තින්දිවමතන්දිතො
භාවෙහි කුසලං ධම්මං ජහ සීඝං සමුස්සයන්ති.
ඉත්ථං සුදං ආයස්මා සීහො ථෙරො ගාථං අභාසිත්ථා’ති.
සීහත්ථෙරගාථා.
1. 9. 4.
84. සබ්බරත්තිං සුපිත්වාන දිවා සඞ්ගණිකෙ රතො,
කුදස්සු නාම දුම්මෙධො දුක්ඛස්සන්තං කරිස්සතී’ති.
ඉත්ථං සුදං ආයස්මා නීතො ථෙරො ගාථං අභාසිත්ථා’ති.
නීතත්ථෙරගාථා.
1. 9. 5.
85. චිත්තනිමිත්තස්ස කොවිදො පවිවෙකරසං විජානිය,
ඣායං නිපකො පතිස්සතො අධිගච්ඡෙය්ය සුඛං නිරාමිසන්ති.
ඉත්ථං සුදං ආයස්මා සුනාගො ථෙරො ගාථං අභාසිත්ථා’ති.
සුනාගත්ථෙරගාථා.
1. 9. 6.
86. ඉතො බහිද්ධා පුථු අඤ්ඤවාදිනං
මග්ගො න නිබ්බානගමො යථා අයං,
ඉතිස්සු සඞ්ඝං භගවානුසාසති
සත්ථා සයං පාණිතලෙව දස්සය’න්ති.
ඉත්ථං සුදං ආයස්මා නාගිතො ථෙරො ගාථං අභාසිත්ථා’ති.
නාගිතත්ථෙරගාථා.