ඡට්ඨො වග්ගො.
1. 6. 1.
51. වස්සති දෙවො යථා සුගීතං
ඡන්නා මෙ කුටිකා සුඛා නිවාතා
චිත්තං සුසමාහිතං ච මය්හං
අථ චෙ පත්ථයසි පවස්ස දෙවා’ති.
ඉත්ථං සුදං ආයස්මා ගොධිකො ථෙරො ගාථං අභාසිත්ථා’ති.
ගොධිකත්ථෙරගාථා.
1. 6. 2.
52. වස්සති දෙවො යථා සුගීතං
ඡන්නා මෙ කුටිකා සුඛා නිවාතා
චිත්තං සුසමාහිතං ච කායෙ
අථ චෙ පත්ථයසි පවස්ස දෙවා’ති.
ඉත්ථං සුදං ආයස්මා සුබාහුත්ථෙරො ගාථං අභාසිත්ථා’ති.
සුබාහුත්ථෙරගාථා.
1. 6. 3.
53. වස්සති දෙවො යථා සුගීතං
ඡන්නා මෙ කුටිකා සුඛා නිවාතා
තස්සං විහරාමි අප්පමත්තො
අථ චෙ පත්ථයසි පවස්ස දෙවා’ති.
ඉත්ථං සුදං ආයස්මා වල්ලියො ථෙරො ගාථං අභාසිත්ථා’ති.
වල්ලියත්ථෙරගාථා.
1. 6. 4.
54. වස්සති දෙවො යථා සුගීතං
ඡන්නා මෙ කුටිකා සුඛා නිවාතා
තස්සං විහරාමි අදුතියො
අථ චෙ පත්ථයසි පවස්ස දෙවා’ති.
ඉත්ථං සුදං ආයස්මා උත්තියො ථෙරො ගාථං අභාසිත්ථා’ති.
උත්තියත්ථෙරගාථා.
1. 6. 5.
55. ආසන්දි කුටිකං කත්වා ඔගය්හ අඤ්ජනං වනං
තිස්සො විජ්ජා අනුප්පත්තා කතං බුද්ධස්ස සාසන’න්ති.
ඉත්ථං සුදං අඤ්ජනවනියො ථෙරො ගාථං අභාසිත්ථා’ති.
අඤ්ජනවනියත්ථෙරගාථා.
1. 6. 6.
56. කො කුටිකායං භික්ඛු කුටිකායං
වීතරාගො සුසමාහිත චිත්තො
එවං ජානාහි ආවුසො
අමොඝා තෙ කුටිකා කතා’ති.
ඉත්ථං සුදං ආයස්මා කුටිවිහාරිත්ථෙරො ගාථං අභාසිත්ථා’ති.
කුටිවිහාරිත්ථෙරගාථා.
1. 6. 7.
57. අයමාහු පුරාණියා කුටි අඤ්ඤං පත්ථයසෙ නවං කුටිං
ආසං කුටියා විරාජය දුක්ඛා භික්ඛු පුන නවා කුටී’ති.
ඉත්ථං සුදං ආයස්මා දුතියකුටිවිහාරිත්ථෙරො ගාථං අභාසිත්ථා’ති.
දුතියකුටිවිහාරිත්ථෙරගාථා.
1. 6. 8.
58. රමණීයො මෙ කුටිකා සද්ධාදෙය්යා මනොරමා
න මෙ අත්ථො කුමාරීහි යෙසං අත්ථො තහිං ගච්ඡථ නාරියො’ති.
ඉත්ථං සුදං ආයස්මා රමණීයකුටිකො ථෙරො ගාථං අභාසිත්ථා’ති.
රමණීයකුටිකත්ථෙරගාථා.
1. 6. 9.
59. සද්ධායාහං පබ්බජිතො අරඤ්ඤෙ මෙ කුටිකා කතා
අප්පමත්තො ච ආතාපී සම්පජානො පතිස්සතො’ති.
ඉත්ථං සුදං ආයස්මා කොසලවිහාරිත්ථෙරො ගාථං අභාසිත්ථා’ති.
කොසලවිහාරිත්ථෙරගාථා.
1. 6. 10.
60. තෙ මෙ ඉජ්ඣිංසු සඞ්කප්පා යදත්ථො පවිසිං කුටිං
විජ්ජාවිමුත්තිං පච්චෙස්සං මානානුසයමුජ්ජහි’න්ති.
ඉත්ථං සුදං ආයස්මා සීවලිත්ථෙරො ගාථං අභාසිත්ථා’ති.
සීවලිත්ථෙරගාථා.
ඡට්ඨො වග්ගො.
තස්සුද්දානං:
ගොධිකො ච සුබාහු ච වල්ලියො උත්තියො ඉසි
අඤ්ජනවනියො ථෙරො දුවෙ කුටිවිහාරිනො
රමණීයකුටිකො ච කොසලව්හයසීවලී’ති.