පඤ්චමො වග්ගො
1. 5. 1.
41. විවරමනුපතන්ති විජ්ජුතා වෙභාරස්ස ච පණ්ඩවස්ස ච
නගවිවරගතො ච ඣායති පුත්තො අප්පටිමස්ස තාදිනො’ති.
ඉත්ථං සුදං ආයස්මා සිරිවඩ්ඪො ථෙරො ගාථං අභාසිත්ථා’ති.
සිරිවඩ්ඪත්ථෙරගාථා.
1. 5. 2.
42. චාලෙ උපචාලෙ සීසූපචාලෙ
පතිස්සතා නු ඛො විහරථ
ආගතො වො වාලං විය වෙධී’ති.
ඉත්ථං සුදං ආයස්මා ඛදිරවනියො රෙවතො ථෙරො ගාථං අභාසිත්ථා’ති.
ඛදිරවනියරෙවතත්ථෙරගාථා.
1. 5. 3.
43. සුමුත්තිකො සුමුත්තිකො සාහු සුමුත්තිකොම්හි තීහි ඛුජ්ජකෙහි
අසිතාසු මයා නඞ්ගලාසු මයා කුද්දාලාසු මයා
යදිපි ඉධමෙව ඉධමෙව අථවා පි අලමෙව අලමෙව
ඣාය සුමඞ්ගල ඣාය සුමඞ්ගල අප්පමත්තො විහර සුමඞ්ගලා’ති.
ඉත්ථං සුදං ආයස්මා සුමඞ්ගලො ථෙරො ගාථං අභාසිත්ථා’ති.
සුමඞ්ගලත්ථෙරගාථා.
1. 5. 4.
44. මතං වා අම්ම රොදන්ති යො වා ජීවං න දිස්සති
ජීවන්තං මං අම්ම පස්සන්තී කස්මා මං අම්ම රොදසී’ති.
ඉත්ථං සුදං ආයස්මා සානුත්ථෙරො ගාථං අභාසිත්ථා’ති.
සානුත්ථෙරගාථා.
1. 5. 5.
45. යථාපි භද්දො ආජඤ්ඤො ඛලිත්වා පතිතිට්ඨති
එවං දස්සනසම්පන්නං සම්මාසම්බුද්ධසාවකන්ති.
ඉත්ථං සුදං ආයස්මා රමණීයවිහාරිත්ථෙරො ගාථං අභාසිත්ථා’ති.
රමණීයවිහාරිත්ථෙරගාථා.
1. 5. 6.
46. සද්ධායාහං පබ්බජිතො අගාරස්මානගාරියං
සති පඤ්ඤා ච මෙ වුද්ධා චිත්තං ච සුසමාහිතං
කාමං කරස්සු රූපානි නෙව මං බාධයිස්සසී’ති.
ඉත්ථං සුදං ආයස්මා සමිද්ධිත්ථෙරො ගාථං අභාසිත්ථා’ති.
සමිද්ධිත්ථෙරගාථා.
1. 5. 7.
47. නමො තෙ බුද්ධවීරත්ථු විප්පමුත්තොසි සබ්බධි
තුය්හාපදානෙ විහරං විහරාමි අනාසවො’ති.
ඉත්ථං සුදං ආයස්මා උජ්ජයො ථෙරො ගාථං අභාසිත්ථා’ති.
උජ්ජයත්ථෙරගාථා.
1. 5. 8.
48. යතො අහං පබ්බජිතො අගාරස්මානගාරියං
නාභිජානාමි සඞ්කප්පං අනරියං දොසසංහිත’න්ති.
ඉත්ථං සුදං ආයස්මා සඤ්ජයො ථෙරො ගාථං අභාසිත්ථා’ති.
සඤ්ජයත්ථෙරගාථා.
1. 5. 9.
49. විහවිහාභිනදිතෙ සිප්පිකාභිරුතෙහි ච
න මෙ තං ඵන්දති චිත්තං එකත්තනිරතං හි මෙ’ති.
ඉත්ථං සුදං ආයස්මා රාමණෙය්යකො ථෙරො ගාථං අභාසිත්ථා’ති.
රාමණෙය්යකත්ථෙරගාථා.
1. 5. 10.
50. ධරණී ච සිඤ්චති වාති මාලුතො විජ්ජුතා චරති නභෙ
උපසමන්ති විතක්කා චිත්තං සුසමාහිතං මමා’ති.
ඉත්ථං සුදං විමලො ථෙරො ගාථං අභාසිත්ථා’ති.
විමලත්ථෙරගාථා.
පඤ්චමො වග්ගො.
තස්සුද්දානං:
සිරිවඩ්ඪො රෙවතො ථෙරො සුමඞ්ගලො සානුසව්හයො
රමණීයවිහාරී ච සමිද්ධිඋජ්ජයසඤ්ජයා
රාමණෙය්යො ච සො ථෙරො විමලො ච රණඤ්ජහො’ති.