1. 4. 1.
31. ඵුට්ඨො ඩංසෙහි මකසෙහි අරඤ්ඤස්මිං බ්රහාවනෙ
නාගො සඞ්ගාමසීසෙව සතො තත්රාධිවාසයෙ’ති.
ඉත්ථං සුදං ආයස්මා ගබ්භරතීරියො ථෙරො ගාථං අභාසිත්ථා’ති.
ගබ්භරතීරියත්ථෙරගාථා.
1. 4. 2.
32. අජරං ජිරමානෙන තප්පමානෙන නිබ්බුතිං
නිම්මිස්සං පරමං සන්තිං යොගක්ඛෙමං අනුත්තර’න්ති.
ඉත්ථං සුදං ආයස්මා සුප්පියො ථෙරො ගාථං අභාසිත්ථා’ති.
සුප්පියත්ථෙරගාථා.
1. 4. 3.
33. යථාපි එකපුත්තස්මිං පියස්මිං කුසලී සියා
එවං සබ්බෙසු පාණෙසු සබ්බත්ථ කුසලො සියා’ති.
ඉත්ථං සුදං ආයස්මා සොපාකො ථෙරො ගාථං අභාසිත්ථා’ති.
සොපාකත්ථෙරගාථා.
1. 4. 4.
34. අනාසන්නවරා එතා නිච්චමෙව විජානතා
ගාමා අරඤ්ඤමාගම්ම තතො ගෙහං උපාවිසිං
තතො උට්ඨාය පක්කමිං අනාමන්තිය පොසියො’ති.
ඉත්ථං සුදං ආයස්මා පොසියො ථෙරො ගාථං අභාසිත්ථා’ති.
පොසියත්ථෙරගාථා.
1. 4. 5.
35. සුඛං සුඛත්ථො ලභතෙ තදාචරං
කිත්තිං ච පප්පොති යසස්ස වඩ්ඪති
යො අරියමට්ඨඞ්ගිකමඤ්ජසං උජුං
භාවෙති මග්ගං අමතස්ස පත්තියා’ති.
ඉත්ථං සුදං ආයස්මා සාමඤ්ඤකානිත්ථෙරො ගාථං අභාසිත්ථා’ති.
සාමඤ්ඤකානිත්ථෙරගාථා.
1. 4. 6.
36. සාධු සුතං සාධු චරිතකං
සාධු සදා අනිකෙතවිහාරො
අත්ථපුච්ඡනං පදක්ඛිණකම්මං
එතං සාමඤ්ඤමකිඤ්චනස්සා’ති.
ඉත්ථං සුදං ආයස්මා කුමාරපුත්තො ථෙරො ගාථං අභාසිත්ථා’ති.
කුමාරපුත්තත්ථෙරගාථා.
1. 4. 7.
37. නානාජනපදං යන්ති විචරන්තො අසඤ්ඤතා
සමාධිං ච විරොධෙන්ති කිංසු රට්ඨචරියා කරිස්සති
තස්මා විනෙය්ය සාරම්භං ඣායෙය්ය අපුරක්ඛතො’ති.
ඉත්ථං සුදං ආයස්මා කුමාපුත්තත්ථෙරස්ස සහායකා ථෙරො ගාථං අභාසිත්ථා’ති.
කුමාපුත්තසහායකත්ථෙරගාථා.
1. 4. 8.
38. යො ඉද්ධියා සරභුං අට්ඨපෙසි
සො ගවම්පති අසිතො අනෙජො
තං සබ්බසඞ්ගාතිගතං මහාමුනිං
දෙවා නමස්සන්ති භවස්ස පාරගු’න්ති.
ඉත්ථං සුදං ආයස්මා ගවම්පතිත්ථෙරො ගාථං අභාසිත්ථා’ති.
ගවම්පතිත්ථෙරගාථා.
1. 4. 9.
39. සත්තියා විය ඔමට්ඨො ඩය්හමානො’ව මත්ථකෙ
කාමරාගප්පහානාය සතො භික්ඛු පරිබ්බජෙ’ති.
ඉත්ථං සුදං ආයස්මා තිස්සො ථෙරො ගාථං අභාසිත්ථා’ති.
තිස්සත්ථෙරගාථා.
1. 4. 10.
40. සත්තියා විය ඔමට්ඨො ඩය්හමානො’ව මත්ථකෙ
භවරාගප්පහානාය සතො භික්ඛු පරිබ්බජෙ’ති.
ඉත්ථං සුදං ආයස්මා වඩ්ඪමානො ථෙරො ගාථං අභාසිත්ථා’ති.
වඩ්ඪමානත්ථෙරගාථා.
චතුත්ථො වග්ගො.
තස්සුද්දානං:
ගබ්භරතීරියො සුප්පියො සොපාකො චෙව පොසියො
සාමඤ්ඤකානි කුමාපුත්තො කුමාපුත්තසහායකො
ගවම්පති තිස්සත්ථෙරො වඩ්ඪමානො මහායසො’ති.