1. 3. 6.
26. සුත්වා සුභාසිතං වාචං බුද්ධස්සාදිච්චබන්ධුනො
පච්චව්යධිං හි නිපුණං වාලග්ගං උසුනා යථා’ති.
ඉත්ථං සුදං ආයස්මා උභයො ථෙරො ගාථං අභාසිත්ථා’ති.
උභයත්ථෙරගාථා.
1. 3. 7.
27. දබ්බං කුසං පොටකිලං උසීරං මුඤ්ජබබ්බජං
උරසා පනුදිස්සාමි විවෙකමනුබ්රූහය’න්ති.
ඉත්ථං සුදං ආයස්මා ලොමසකඞ්ගියො ථෙරො ගාථං අභාසිත්ථා’ති.
ලොමසකඞ්ගියත්ථෙරගාථා.
1. 3. 8.
28. කච්චි නො වත්ථපසුතො කච්චි නො භූසනාරතො
කච්චි සීලමයං ගන්ධං කිං ත්වං වායසි නෙතරා පජා’ති.
ඉත්ථං සුදං ආයස්මා ජම්බුගාමිකපුත්තො ථෙරො ගාථං අභාසිත්ථා’ති.
ජම්බුගාමිකත්ථෙරගාථා.
1. 3. 9.
29. සමුන්නමයමත්තානං උසුකාරො’ව තෙජනං
චිත්තං උජුං කරිත්වාන අවිජ්ජං භින්ද හාරිතා’ති.
ඉත්ථං සුදං ආයස්මා හාරිතො ථෙරො ගාථං අභාසිත්ථා’ති.
හාරිතත්ථෙරගාථා.
1. 3. 10.
30. ආබාධෙ මෙ සමුප්පන්නෙ සති මෙ උපපජ්ජථ
ආබාධො මෙ සමුප්පන්නො කාලො මෙ නප්පමජ්ජිතුන්ති.
ඉත්ථං සුදං ආයස්මා උත්තියො ථෙරො ගාථං අභාසිත්ථා’ති.
උත්තියත්ථෙරගාථා.
තතියො වග්ගො.
තස්සුද්දානං:
නිග්රොධො චිත්තකො ථෙරො ගොසාලථෙරො සුගන්ධො
නන්දියො උභයො ථෙරො ථෙරො ලොමසකඞ්ගියො
ජම්බුගාමිකපුත්තො ච හාරිතො උත්තියො ඉසීති.
චතුත්ථො වග්ගො
1. 4. 1.
31. ඵුට්ඨො ඩංසෙහි මකසෙහි අරඤ්ඤස්මිං බ්රහාවනෙ
නාගො සඞ්ගාමසීසෙව සතො තත්රාධිවාසයෙ’ති.
ඉත්ථං සුදං ආයස්මා ගබ්භරතීරියො ථෙරො ගාථං අභාසිත්ථා’ති.
ගබ්භරතීරියත්ථෙරගාථා.
1. 4. 2.
32. අජරං ජිරමානෙන තප්පමානෙන නිබ්බුතිං
නිම්මිස්සං පරමං සන්තිං යොගක්ඛෙමං අනුත්තර’න්ති.
ඉත්ථං සුදං ආයස්මා සුප්පියො ථෙරො ගාථං අභාසිත්ථා’ති.
සුප්පියත්ථෙරගාථා.
1. 4. 3.
33. යථාපි එකපුත්තස්මිං පියස්මිං කුසලී සියා
එවං සබ්බෙසු පාණෙසු සබ්බත්ථ කුසලො සියා’ති.
ඉත්ථං සුදං ආයස්මා සොපාකො ථෙරො ගාථං අභාසිත්ථා’ති.
සොපාකත්ථෙරගාථා.
1. 4. 4.
34. අනාසන්නවරා එතා නිච්චමෙව විජානතා
ගාමා අරඤ්ඤමාගම්ම තතො ගෙහං උපාවිසිං
තතො උට්ඨාය පක්කමිං අනාමන්තිය පොසියො’ති.
ඉත්ථං සුදං ආයස්මා පොසියො ථෙරො ගාථං අභාසිත්ථා’ති.
පොසියත්ථෙරගාථා.
1. 4. 5.
35. සුඛං සුඛත්ථො ලභතෙ තදාචරං
කිත්තිං ච පප්පොති යසස්ස වඩ්ඪති
යො අරියමට්ඨඞ්ගිකමඤ්ජසං උජුං
භාවෙති මග්ගං අමතස්ස පත්තියා’ති.
ඉත්ථං සුදං ආයස්මා සාමඤ්ඤකානිත්ථෙරො ගාථං අභාසිත්ථා’ති.
සාමඤ්ඤකානිත්ථෙරගාථා.
1. 4. 6.
36. සාධු සුතං සාධු චරිතකං
සාධු සදා අනිකෙතවිහාරො
අත්ථපුච්ඡනං පදක්ඛිණකම්මං
එතං සාමඤ්ඤමකිඤ්චනස්සා’ති.
ඉත්ථං සුදං ආයස්මා කුමාරපුත්තො ථෙරො ගාථං අභාසිත්ථා’ති.
කුමාරපුත්තත්ථෙරගාථා.