1. 3. 2.
22. නීලා සුගීවා සිඛිනො මොරා කාරංවියං අභිනදන්ති.
තෙ සීතවාතකද්දිතකලිතා සුත්තං ඣායං නිබොධෙන්තී’ති.
ඉත්ථං සුදං ආයස්මා චිත්තකො ථෙරො ගාථං අභාසිත්ථා’ති.
චිත්තකත්ථෙරගාථා.
1. 3. 3.
23. අහං ඛො වෙළුගුම්බස්මිං භුත්වාන මධුපායසං
පදක්ඛිණං සම්මසන්තො ඛන්ධානං උදයබ්බයං
සානුං පටිගමිස්සාමි විවෙකමනුබ්රූහයන්ති.
ඉත්ථං සුදං ආයස්මා ගොසාලො ථෙරො ගාථං අභාසිත්ථා’ති.
ගොසාලත්ථෙරගාථා.
1. 3. 4.
24. අනුවස්සිකො පබ්බජිතො පස්ස ධම්මසුධම්මතං
තිස්සො විජ්ජා අනුප්පත්තා කතං බුද්ධස්ස සාසන’න්ති.
ඉත්ථං සුදං ආයස්මා සුගන්ධො ථෙරො ගාථං අභාසිත්ථා’ති.
සුගන්ධත්ථෙරගාථා.
1. 3. 5.
25. ඔභාසජාතං ඵලගං චිත්තං යස්ස අභිණ්හසො
තාදිසං භික්ඛුමාසජ්ජ කණ්හ දුක්ඛං නිගච්ඡසී’ති.
ඉත්ථං සුදං ආයස්මා නන්දියො ථෙරො ගාථං අභාසිත්ථා’ති.
නන්දියත්ථෙරගාථා.
1. 3. 6.
26. සුත්වා සුභාසිතං වාචං බුද්ධස්සාදිච්චබන්ධුනො
පච්චව්යධිං හි නිපුණං වාලග්ගං උසුනා යථා’ති.
ඉත්ථං සුදං ආයස්මා උභයො ථෙරො ගාථං අභාසිත්ථා’ති.
උභයත්ථෙරගාථා.
1. 3. 7.
27. දබ්බං කුසං පොටකිලං උසීරං මුඤ්ජබබ්බජං
උරසා පනුදිස්සාමි විවෙකමනුබ්රූහය’න්ති.
ඉත්ථං සුදං ආයස්මා ලොමසකඞ්ගියො ථෙරො ගාථං අභාසිත්ථා’ති.
ලොමසකඞ්ගියත්ථෙරගාථා.
1. 3. 8.
28. කච්චි නො වත්ථපසුතො කච්චි නො භූසනාරතො
කච්චි සීලමයං ගන්ධං කිං ත්වං වායසි නෙතරා පජා’ති.
ඉත්ථං සුදං ආයස්මා ජම්බුගාමිකපුත්තො ථෙරො ගාථං අභාසිත්ථා’ති.
ජම්බුගාමිකත්ථෙරගාථා.
1. 3. 9.
29. සමුන්නමයමත්තානං උසුකාරො’ව තෙජනං
චිත්තං උජුං කරිත්වාන අවිජ්ජං භින්ද හාරිතා’ති.
ඉත්ථං සුදං ආයස්මා හාරිතො ථෙරො ගාථං අභාසිත්ථා’ති.
හාරිතත්ථෙරගාථා.
1. 3. 10.
30. ආබාධෙ මෙ සමුප්පන්නෙ සති මෙ උපපජ්ජථ
ආබාධො මෙ සමුප්පන්නො කාලො මෙ නප්පමජ්ජිතුන්ති.
ඉත්ථං සුදං ආයස්මා උත්තියො ථෙරො ගාථං අභාසිත්ථා’ති.
උත්තියත්ථෙරගාථා.
තතියො වග්ගො.
තස්සුද්දානං:
නිග්රොධො චිත්තකො ථෙරො ගොසාලථෙරො සුගන්ධො
නන්දියො උභයො ථෙරො ථෙරො ලොමසකඞ්ගියො
ජම්බුගාමිකපුත්තො ච හාරිතො උත්තියො ඉසීති.