1. 2. 10.
20. මරණෙ මෙ භයං නත්ථි නිකන්ති නත්ථි ජීවිතෙ
සන්දෙහං නික්ඛිපිස්සාමි සම්පජානො පතිස්සතො’ති.
සන්දෙහං නික්ඛිපිස්සාමි සම්පජානො පතිස්සතො’ති.
ඉත්ථං සුදං ආයස්මා අජිතො ථෙරො ගාථං අභාසිත්ථා’ති.
අජිතත්ථෙරගාථා.
දුතියො වග්ගො.
තස්සුද්දානං:
චූළවච්ඡො මහාවච්ඡො වනවච්ඡො ච සීවකො
කුණ්ඩධානො ච බෙලට්ඨි දාසකො ච තතොපරි
සිගාලපිතිකො ථෙරො කුණ්ඩලො ච අජිතො දසා’ති.
කුණ්ඩධානො ච බෙලට්ඨි දාසකො ච තතොපරි
සිගාලපිතිකො ථෙරො කුණ්ඩලො ච අජිතො දසා’ති.
තතියො වග්ගො
1. 3. 1.
21. නාහං භයස්ස භායාමි සත්ථා නො අමතස්ස කොවිදො
යත්ථ භයං නාවතිට්ඨති තෙන මග්ගෙන වජන්ති භික්ඛවො’ති.
යත්ථ භයං නාවතිට්ඨති තෙන මග්ගෙන වජන්ති භික්ඛවො’ති.
ඉත්ථං සුදං ආයස්මා නිග්රොධො ථෙරො ගාථං අභාසිත්ථා’ති.
නිග්රොධත්ථෙරගාථා.
1. 3. 2.
22. නීලා සුගීවා සිඛිනො මොරා කාරංවියං අභිනදන්ති.
තෙ සීතවාතකද්දිතකලිතා සුත්තං ඣායං නිබොධෙන්තී’ති.
තෙ සීතවාතකද්දිතකලිතා සුත්තං ඣායං නිබොධෙන්තී’ති.
ඉත්ථං සුදං ආයස්මා චිත්තකො ථෙරො ගාථං අභාසිත්ථා’ති.
චිත්තකත්ථෙරගාථා.
1. 3. 3.
23. අහං ඛො වෙළුගුම්බස්මිං භුත්වාන මධුපායසං
පදක්ඛිණං සම්මසන්තො ඛන්ධානං උදයබ්බයං
සානුං පටිගමිස්සාමි විවෙකමනුබ්රූහයන්ති.
පදක්ඛිණං සම්මසන්තො ඛන්ධානං උදයබ්බයං
සානුං පටිගමිස්සාමි විවෙකමනුබ්රූහයන්ති.
ඉත්ථං සුදං ආයස්මා ගොසාලො ථෙරො ගාථං අභාසිත්ථා’ති.
ගොසාලත්ථෙරගාථා.
1. 3. 4.
24. අනුවස්සිකො පබ්බජිතො පස්ස ධම්මසුධම්මතං
තිස්සො විජ්ජා අනුප්පත්තා කතං බුද්ධස්ස සාසන’න්ති.
තිස්සො විජ්ජා අනුප්පත්තා කතං බුද්ධස්ස සාසන’න්ති.
ඉත්ථං සුදං ආයස්මා සුගන්ධො ථෙරො ගාථං අභාසිත්ථා’ති.
සුගන්ධත්ථෙරගාථා.
1. 3. 5.
25. ඔභාසජාතං ඵලගං චිත්තං යස්ස අභිණ්හසො
තාදිසං භික්ඛුමාසජ්ජ කණ්හ දුක්ඛං නිගච්ඡසී’ති.
තාදිසං භික්ඛුමාසජ්ජ කණ්හ දුක්ඛං නිගච්ඡසී’ති.
ඉත්ථං සුදං ආයස්මා නන්දියො ථෙරො ගාථං අභාසිත්ථා’ති.
නන්දියත්ථෙරගාථා.