1. 11. 10.
110. නගා නගග්ගෙසු සුසංවිරූළ්හා
උදග්ගමෙඝෙන නවෙන සිත්තා
විවෙකකාමස්ස අරඤ්ඤසඤ්ඤිනො
ජනෙති භිය්යො උසභස්ස කල්යත’න්ති.
ඉත්ථං සුදං ආයස්මා උසභො ථෙරො ගාථං අභාසිත්ථා’ති.
උසභත්ථෙරගාථා.
එකාදසමො වග්ගො.
තස්සුද්දානං:
බෙලට්ඨානිකසෙතුච්ඡා බන්ධුරො ඛිතකො ඉසී,
මලිතවම්භො සුහෙමන්තො ධම්මසවො ධම්මසවපිතා,
සඞ්ඝරක්ඛිතත්ථෙරො ච උසභො ච මහාමුනී’ති.
වග්ගො ද්වාදසමො.
1. 12. 1.
111. දුප්පබ්බජ්ජං වෙ දුරධිවාසා ගෙහා
ධම්මො ගම්භීරො දුරධිගමා භොගා,
කිච්ඡා වුත්ති නො ඉතරීතරෙනෙව
යුත්තං චින්තෙතුං සතතමනිච්චත’න්ති.
ඉත්ථං සුදං ආයස්මා ජෙන්තො ථෙරො ගාථං අභාසිත්ථා’ති.
ජෙන්තත්ථෙරගාථා.
1. 12. 2.
112. තෙවිජ්ජොහං මහාඣායී චෙතොසමථකොවිදො
සදත්ථො මෙ අනුප්පත්තො කතං බුද්ධස්ස සාසන’න්ති.
ඉත්ථං සුදං ආයස්මා ජෙන්තො ථෙරො ගාථං අභාසිත්ථා’ති.
වච්ඡගොත්තත්ථෙරගාථා.
1. 12. 3.
113. අච්ඡොදිකා පුථුසිලා ගොනඞ්ගුලමිගායුතා,
අම්බුසෙවාලසඤ්ඡන්නා තෙ සෙලා රමයන්ති ම’න්ති.
ඉත්ථං සුදං ආයස්මා වනවච්ඡො ථෙරො ගාථං අභාසිත්ථා’ති.
වනවච්ඡත්ථෙරගාථා.
1. 12. 4.
114. කායදුට්ඨුල්ලගරුනො හීයමානම්හි ජීවිතෙ,
සරීරසුඛගිද්ධස්ස කුතො සමණ සාධුතා’ති.
ඉත්ථං සුදං ආයස්මා අධිමුත්තො ථෙරො ගාථං අභාසිත්ථා’ති.
අධිමුත්තත්ථෙරගාථා.
1. 12. 5.
115. එසාවහිය්යසෙ පබ්බතෙන බහුකුටජසල්ලකිකෙන,
නෙසාදකෙන ගිරිනා යසස්සිනා පරිච්ඡදෙනා’ති.
ඉත්ථං සුදං ආයස්මා මහානාමො ථෙරො ගාථං අභාසිත්ථා’ති.
මහානාමත්ථෙරගාථා.
1. 12. 6.
116. ඡ ඵස්සායතනෙ හිත්වා ගුත්තද්වාරො සුසංවුතො,
අඝමූලං වමිත්වාන පත්තො මෙ ආසවක්ඛයො’ති.
ඉත්ථං සුදං ආයස්මා පාරාසරියත්ථෙරො ගාථං අභාසිත්ථා’ති.
පාරාසරියත්ථෙරගාථා.